| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૨. તાલપુટસુત્તવણ્ણના
2. Tālapuṭasuttavaṇṇanā
૩૫૪. દુતિયે તાલપુટોતિ એવંનામકો. તસ્સ કિર બન્ધના પમુત્તતાલપક્કવણ્ણો વિય મુખવણ્ણો વિપ્પસન્નો અહોસિ, તેનસ્સ તાલપુટોતિ નામં અકંસુ. સ્વાયં અભિનીહારસમ્પન્નો પચ્છિમભવિકપુગ્ગલો. યસ્મા પન પટિસન્ધિ નામ અનિયતા આકાસે ખિત્તદણ્ડસદિસા, તસ્મા એસ નટકુલે નિબ્બત્તિ. વુડ્ઢિપ્પત્તો પન નટસિપ્પે અગ્ગો હુત્વા સકલજમ્બુદીપે પાકટો જાતો. તસ્સ પઞ્ચ સકટસતાનિ પઞ્ચ માતુગામસતાનિ પરિવારો, ભરિયાયપિસ્સ તાવતકાવાતિ માતુગામસહસ્સેન ચેવ સકટસહસ્સેન ચ સદ્ધિં યં યં નગરં વા નિગમં વા પવિસતિ, તત્થસ્સ પુરેતરમેવ સતસહસ્સં દેન્તિ. સમજ્જવેસં ગણ્હિત્વા પન માતુગામસહસ્સેન સદ્ધિં કીળં કરોન્તસ્સ યં હત્થૂપગપાદૂપગાદિઆભરણજાતં ખિપન્તિ, તસ્સ પરિયન્તો નત્થિ. સો તંદિવસં માતુગામસહસ્સપરિવારિતો રાજગહે કીળં કત્વા પરિપક્કઞાણત્તા સપરિવારોવ યેન ભગવા તેનુપસઙ્કમિ.
354. Dutiye tālapuṭoti evaṃnāmako. Tassa kira bandhanā pamuttatālapakkavaṇṇo viya mukhavaṇṇo vippasanno ahosi, tenassa tālapuṭoti nāmaṃ akaṃsu. Svāyaṃ abhinīhārasampanno pacchimabhavikapuggalo. Yasmā pana paṭisandhi nāma aniyatā ākāse khittadaṇḍasadisā, tasmā esa naṭakule nibbatti. Vuḍḍhippatto pana naṭasippe aggo hutvā sakalajambudīpe pākaṭo jāto. Tassa pañca sakaṭasatāni pañca mātugāmasatāni parivāro, bhariyāyapissa tāvatakāvāti mātugāmasahassena ceva sakaṭasahassena ca saddhiṃ yaṃ yaṃ nagaraṃ vā nigamaṃ vā pavisati, tatthassa puretarameva satasahassaṃ denti. Samajjavesaṃ gaṇhitvā pana mātugāmasahassena saddhiṃ kīḷaṃ karontassa yaṃ hatthūpagapādūpagādiābharaṇajātaṃ khipanti, tassa pariyanto natthi. So taṃdivasaṃ mātugāmasahassaparivārito rājagahe kīḷaṃ katvā paripakkañāṇattā saparivārova yena bhagavā tenupasaṅkami.
સચ્ચાલિકેનાતિ સચ્ચેન ચ અલિકેન ચ. તિટ્ઠતેતન્તિ તિટ્ઠતુ એતં. રજનીયાતિ રાગપ્પચ્ચયા મુખતો પઞ્ચવણ્ણસુત્તનીહરણવાતવુટ્ઠિદસ્સનાદયો અઞ્ઞે ચ કામસ્સાદસંયુત્તાકારદસ્સનકા અભિનયા. ભિય્યોસોમત્તાયાતિ અધિકપ્પમાણત્તાય. દોસનીયાતિ દોસપ્પચ્ચયા હત્થપાદચ્છેદાદિદસ્સનાકારા. મોહનીયાતિ મોહપ્પચ્ચયા ઉદકં ગહેત્વા તેલકરણં, તેલં ગહેત્વા ઉદકકરણન્તિ એવમાદયો માયાપભેદા.
Saccālikenāti saccena ca alikena ca. Tiṭṭhatetanti tiṭṭhatu etaṃ. Rajanīyāti rāgappaccayā mukhato pañcavaṇṇasuttanīharaṇavātavuṭṭhidassanādayo aññe ca kāmassādasaṃyuttākāradassanakā abhinayā. Bhiyyosomattāyāti adhikappamāṇattāya. Dosanīyāti dosappaccayā hatthapādacchedādidassanākārā. Mohanīyāti mohappaccayā udakaṃ gahetvā telakaraṇaṃ, telaṃ gahetvā udakakaraṇanti evamādayo māyāpabhedā.
પહાસો નામ નિરયોતિ વિસું પહાસનામકો નિરયો નામ નત્થિ, અવીચિસ્સેવ પન એકસ્મિં કોટ્ઠાસે નચ્ચન્તા વિય ગાયન્તા વિય ચ નટવેસં ગહેત્વાવ પચ્ચન્તિ, તં સન્ધાયેતં વુત્તં. નાહં, ભન્તે, એતં રોદામીતિ અહં, ભન્તે, એતં ભગવતો બ્યાકરણં ન રોદામીતિ એવં સકમ્મકવસેનેત્થ અત્થો વેદિતબ્બો, ન અસ્સુવિમોચનમત્તેન. ‘‘મતં વા અમ્મરોદન્તી’’તિઆદયો ચેત્થ અઞ્ઞેપિ વોહારા વેદિતબ્બા.
Pahāsonāma nirayoti visuṃ pahāsanāmako nirayo nāma natthi, avīcisseva pana ekasmiṃ koṭṭhāse naccantā viya gāyantā viya ca naṭavesaṃ gahetvāva paccanti, taṃ sandhāyetaṃ vuttaṃ. Nāhaṃ, bhante, etaṃ rodāmīti ahaṃ, bhante, etaṃ bhagavato byākaraṇaṃ na rodāmīti evaṃ sakammakavasenettha attho veditabbo, na assuvimocanamattena. ‘‘Mataṃ vā ammarodantī’’tiādayo cettha aññepi vohārā veditabbā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૨. તાલપુટસુત્તં • 2. Tālapuṭasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૨. તાલપુટસુત્તવણ્ણના • 2. Tālapuṭasuttavaṇṇanā
