| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
6. தண்ஹாஸங்க²யஸுத்தவண்ணனா
6. Taṇhāsaṅkhayasuttavaṇṇanā
66. ச²ட்டே² அஞ்ஞாஸிகொண்ட³ஞ்ஞோதி எத்த² கொண்ட³ஞ்ஞோதி தஸ்ஸாயஸ்மதோ கொ³த்ததோ ஆக³தனாமங். ஸாவகேஸு பன ஸப்³ப³பட²மங் அரியஸச்சானி படிவிஜ்ஜீ²தி ப⁴க³வதா ‘‘அஞ்ஞாஸி வத, போ⁴, கொண்ட³ஞ்ஞோ’’தி (மஹாவ॰ 17; ஸங்॰ நி॰ 5.1081) வுத்தஉதா³னவஸேன தே²ரோ ஸாஸனே ‘‘அஞ்ஞாஸிகொண்ட³ஞ்ஞோ’’த்வேவ பஞ்ஞாயித்த². தண்ஹாஸங்க²யவிமுத்திந்தி தண்ஹா ஸங்கீ²யதி பஹீயதி எத்தா²தி தண்ஹாஸங்க²யோ, நிப்³பா³னங். தஸ்மிங் தண்ஹாஸங்க²யே விமுத்தி. தண்ஹா வா ஸங்கீ²யதி பஹீயதி ஏதேனாதி தண்ஹாஸங்க²யோ, அரியமக்³கோ³. தஸ்ஸ ப²லபூ⁴தா, பரியோஸானபூ⁴தா வா விமுத்தீதி தண்ஹாஸங்க²யவிமுத்தி , நிப்பரியாயேன அரஹத்தப²லஸமாபத்தி. தங் பச்சவெக்க²மானோ நிஸின்னோ ஹோதி. அயஞ்ஹி ஆயஸ்மா ப³ஹுலங் ப²லஸமாபத்திங் ஸமாபஜ்ஜதி, தஸ்மா இதா⁴பி ஏவமகாஸி.
66. Chaṭṭhe aññāsikoṇḍaññoti ettha koṇḍaññoti tassāyasmato gottato āgatanāmaṃ. Sāvakesu pana sabbapaṭhamaṃ ariyasaccāni paṭivijjhīti bhagavatā ‘‘aññāsi vata, bho, koṇḍañño’’ti (mahāva. 17; saṃ. ni. 5.1081) vuttaudānavasena thero sāsane ‘‘aññāsikoṇḍañño’’tveva paññāyittha. Taṇhāsaṅkhayavimuttinti taṇhā saṅkhīyati pahīyati etthāti taṇhāsaṅkhayo, nibbānaṃ. Tasmiṃ taṇhāsaṅkhaye vimutti. Taṇhā vā saṅkhīyati pahīyati etenāti taṇhāsaṅkhayo, ariyamaggo. Tassa phalabhūtā, pariyosānabhūtā vā vimuttīti taṇhāsaṅkhayavimutti , nippariyāyena arahattaphalasamāpatti. Taṃ paccavekkhamāno nisinno hoti. Ayañhi āyasmā bahulaṃ phalasamāpattiṃ samāpajjati, tasmā idhāpi evamakāsi.
ஏதமத்த²ங் விதி³த்வாதி ஏதங் அஞ்ஞாஸிகொண்ட³ஞ்ஞத்தே²ரஸ்ஸ அக்³க³ப²லபச்சவெக்க²ணங் விதி³த்வா தத³த்த²தீ³பனங் இமங் உதா³னங் உதா³னேஸி.
Etamatthaṃviditvāti etaṃ aññāsikoṇḍaññattherassa aggaphalapaccavekkhaṇaṃ viditvā tadatthadīpanaṃ imaṃ udānaṃ udānesi.
தத்த² யஸ்ஸ மூலங் ச²மா நத்தீ²தி யஸ்ஸ அரியபுக்³க³லஸ்ஸ அத்தபா⁴வருக்க²மூலபூ⁴தா அவிஜ்ஜா, தஸ்ஸாவ பதிட்டா² ஹேதுபூ⁴தா ஆஸவனீவரணஅயோனிஸோமனஸிகாரஸங்கா²தா ச²மா பத²வீ ச நத்தி² அக்³க³மக்³கே³ன ஸமுக்³கா⁴திதத்தா. பண்ணா நத்தி² குதோ லதாதி நத்தி² லதா குதோ பண்ணாதி பத³ஸம்ப³ந்தோ⁴. மானாதிமானாதி³பபே⁴தா³ ஸாகா²பஸாகா²தி³ஸங்கா²தா லதாபி நத்தி², குதோ ஏவ மத³ப்பமாத³மாயாஸாடெ²ய்யாதி³பண்ணானீதி அத்தோ². அத² வா பண்ணா நத்தி² குதோ லதாதி ருக்க²ங்குரஸ்ஸ வட்³ட⁴மானஸ்ஸ பட²மங் பண்ணானி நிப்³ப³த்தந்தி. பச்சா² ஸாகா²பஸாகா²ஸங்கா²தா லதாதி கத்வா வுத்தங். தத்த² யஸ்ஸ அரியமக்³க³பா⁴வனாய அஸதி உப்பஜ்ஜனாரஹஸ்ஸ அத்தபா⁴வருக்க²ஸ்ஸ அரியமக்³க³ஸ்ஸ பா⁴விதத்தா யங் அவிஜ்ஜாஸங்கா²தங் மூலங், தஸ்ஸ பதிட்டா²னபூ⁴தங் ஆஸவாதி³ ச நத்தி². மூலக்³க³ஹணேனேவ செத்த² மூலகாரணத்தா பீ³ஜட்டா²னியங் கம்மங் தத³பா⁴வோபி க³ஹிதோயேவாதி வேதி³தப்³போ³. அஸதி ச கம்மபீ³ஜே தங்னிமித்தோ விஞ்ஞாணங்குரோ, விஞ்ஞாணங்குரனிமித்தா ச நாமரூபஸளாயதனபத்தஸாகா²த³யோ ந நிப்³ப³த்திஸ்ஸந்தியேவ. தேன வுத்தங் – ‘‘யஸ்ஸ மூலங் ச²மா நத்தி², பண்ணா நத்தி² குதோ லதா’’தி.
Tattha yassa mūlaṃ chamā natthīti yassa ariyapuggalassa attabhāvarukkhamūlabhūtā avijjā, tassāva patiṭṭhā hetubhūtā āsavanīvaraṇaayonisomanasikārasaṅkhātā chamā pathavī ca natthi aggamaggena samugghātitattā. Paṇṇā natthi kuto latāti natthi latā kuto paṇṇāti padasambandho. Mānātimānādipabhedā sākhāpasākhādisaṅkhātā latāpi natthi, kuto eva madappamādamāyāsāṭheyyādipaṇṇānīti attho. Atha vā paṇṇā natthi kuto latāti rukkhaṅkurassa vaḍḍhamānassa paṭhamaṃ paṇṇāni nibbattanti. Pacchā sākhāpasākhāsaṅkhātā latāti katvā vuttaṃ. Tattha yassa ariyamaggabhāvanāya asati uppajjanārahassa attabhāvarukkhassa ariyamaggassa bhāvitattā yaṃ avijjāsaṅkhātaṃ mūlaṃ, tassa patiṭṭhānabhūtaṃ āsavādi ca natthi. Mūlaggahaṇeneva cettha mūlakāraṇattā bījaṭṭhāniyaṃ kammaṃ tadabhāvopi gahitoyevāti veditabbo. Asati ca kammabīje taṃnimitto viññāṇaṅkuro, viññāṇaṅkuranimittā ca nāmarūpasaḷāyatanapattasākhādayo na nibbattissantiyeva. Tena vuttaṃ – ‘‘yassa mūlaṃ chamā natthi, paṇṇā natthi kuto latā’’ti.
தங் தீ⁴ரங் ப³ந்த⁴னா முத்தந்தி தங் சதுப்³பி³த⁴ஸம்மப்பதா⁴னவீரியயோகே³ன விஜிதமாரத்தா தீ⁴ரங், ததோ ஏவ ஸப்³ப³கிலேஸாபி⁴ஸங்கா²ரப³ந்த⁴னதோ முத்தங். கோ தங் நிந்தி³துமரஹதீதி எத்த² ந்தி நிபாதமத்தங். ஏவங் ஸப்³ப³கிலேஸவிப்பமுத்தங் ஸீலாதி³அனுத்தரகு³ணஸமன்னாக³தங் கோ நாம விஞ்ஞுஜாதிகோ நிந்தி³துங் க³ரஹிதுங் அரஹதி நிந்தா³னிமித்தஸ்ஸேவ அபா⁴வதோ. தே³வாபி நங் பஸங்ஸந்தீதி அஞ்ஞத³த்து² தே³வா ஸக்காத³யோ கு³ணவிஸேஸவிதூ³, அபிஸத்³தே³ன மனுஸ்ஸாபி க²த்தியபண்டி³தாத³யோ பஸங்ஸந்தி. கிஞ்ச பி⁴ய்யோ ப்³ரஹ்முனாபி பஸங்ஸிதோ மஹாப்³ரஹ்முனாபி அஞ்ஞேஹிபி ப்³ரஹ்மனாக³யக்க²க³ந்த⁴ப்³பா³தீ³ஹிபி பஸங்ஸிதோ தோ²மிதோயேவாதி.
Taṃ dhīraṃ bandhanā muttanti taṃ catubbidhasammappadhānavīriyayogena vijitamārattā dhīraṃ, tato eva sabbakilesābhisaṅkhārabandhanato muttaṃ. Ko taṃ ninditumarahatīti ettha nti nipātamattaṃ. Evaṃ sabbakilesavippamuttaṃ sīlādianuttaraguṇasamannāgataṃ ko nāma viññujātiko nindituṃ garahituṃ arahati nindānimittasseva abhāvato. Devāpi naṃ pasaṃsantīti aññadatthu devā sakkādayo guṇavisesavidū, apisaddena manussāpi khattiyapaṇḍitādayo pasaṃsanti. Kiñca bhiyyo brahmunāpi pasaṃsito mahābrahmunāpi aññehipi brahmanāgayakkhagandhabbādīhipi pasaṃsito thomitoyevāti.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 6. தண்ஹாஸங்க²யஸுத்தங் • 6. Taṇhāsaṅkhayasuttaṃ
