| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. தண்ஹுப்பாத³ஸுத்தவண்ணனா
6. Taṇhuppādasuttavaṇṇanā
105. ச²ட்டே² தண்ஹுப்பாதா³தி எத்த² உப்பஜ்ஜதி ஏதேஸூதி உப்பாதா³. கா உப்பஜ்ஜதி? தண்ஹா. தண்ஹாய உப்பாதா³ தண்ஹுப்பாதா³, தண்ஹாவத்தூ²னி தண்ஹாகாரணானீதி அத்தோ². யத்தா²தி யேஸு நிமித்தபூ⁴தேஸு . உப்பஜ்ஜமானாதி உப்பஜ்ஜனஸீலா. சீவரஹேதூதி ‘‘கத்த² மனாபங் சீவரங் லபி⁴ஸ்ஸாமீ’’தி சீவரகாரணா உப்பஜ்ஜதி. ஸேஸபதே³ஸுபி ஏஸேவ நயோ. இதிப⁴வாப⁴வஹேதூதி எத்த² பன இதீதி நித³ஸ்ஸனத்தே² நிபாதோ. யதா² சீவராதி³ஹேது, ஏவங் ப⁴வாப⁴வஹேதுபீதி அத்தோ². ப⁴வாப⁴வாதி செத்த² பணீதப்பணீதானி ஸப்பினவனீதாதீ³னி அதி⁴ப்பேதானி ப⁴வதி ஆரொக்³யங் ஏதேனாதி கத்வா. ‘‘ஸம்பத்திப⁴வேஸு பணீதப்பணீததரோ ப⁴வாப⁴வோ’’திபி வத³ந்தி. ப⁴வோதி வா ஸம்பத்தி, அப⁴வோதி விபத்தி. ப⁴வோதி வுட்³டி⁴, அப⁴வோதி ஹானி. தங் நிமித்தஞ்ச தண்ஹா உப்பஜ்ஜதீதி வுத்தங் ‘‘ப⁴வாப⁴வஹேது வா’’தி.
105. Chaṭṭhe taṇhuppādāti ettha uppajjati etesūti uppādā. Kā uppajjati? Taṇhā. Taṇhāya uppādā taṇhuppādā, taṇhāvatthūni taṇhākāraṇānīti attho. Yatthāti yesu nimittabhūtesu . Uppajjamānāti uppajjanasīlā. Cīvarahetūti ‘‘kattha manāpaṃ cīvaraṃ labhissāmī’’ti cīvarakāraṇā uppajjati. Sesapadesupi eseva nayo. Itibhavābhavahetūti ettha pana itīti nidassanatthe nipāto. Yathā cīvarādihetu, evaṃ bhavābhavahetupīti attho. Bhavābhavāti cettha paṇītappaṇītāni sappinavanītādīni adhippetāni bhavati ārogyaṃ etenāti katvā. ‘‘Sampattibhavesu paṇītappaṇītataro bhavābhavo’’tipi vadanti. Bhavoti vā sampatti, abhavoti vipatti. Bhavoti vuḍḍhi, abhavoti hāni. Taṃ nimittañca taṇhā uppajjatīti vuttaṃ ‘‘bhavābhavahetu vā’’ti.
கா³தா² ஹெட்டா² வுத்தத்தா² ஏவ. அபிச தண்ஹாது³தியோதி தண்ஹாஸஹாயோ. அயஞ்ஹி ஸத்தோ அனமதக்³கே³ ஸங்ஸாரவட்டே ஸங்ஸரந்தோ ந ஏககோவ ஸங்ஸரதி, தண்ஹங் பன து³தியிகங் ஸஹாயிகங் லபி⁴த்வாவ ஸங்ஸரதி. ததா² ஹி தங் பபாதபாதங் அசிந்தெத்வா மது⁴க³ண்ஹனகலுத்³த³கங் விய அனேகாதீ³னவாகுலேஸுபி ப⁴வேஸு ஆனிஸங்ஸமேவ த³ஸ்ஸெந்தீ அனத்த²ஜாலே ஸா பரிப்³ப⁴மாபேதி. ஏதமாதீ³னவங் ஞத்வாதி ஏதங் அதீதானாக³தபச்சுப்பன்னேஸு க²ந்தே⁴ஸு இத்த²பா⁴வஞ்ஞதா²பா⁴வஸஞ்ஞிதங் ஆதீ³னவங் ஜானித்வா. தண்ஹங் து³க்க²ஸ்ஸ ஸம்ப⁴வந்தி ‘‘தண்ஹா சாயங் வட்டது³க்க²ஸ்ஸ ஸம்ப⁴வோ பப⁴வோ காரண’’ந்தி ஜானித்வா. எத்தாவதா ச ஏகஸ்ஸ பி⁴க்கு²னோ விபஸ்ஸனங் வட்³டெ⁴த்வா அரஹத்துப்பத்தி த³ஸ்ஸிதா. இதா³னி தங் கீ²ணாஸவங் தோ²மெந்தோ ‘‘வீததண்ஹோ’’திஆதி³மாஹ. யங் பனெத்த² அவுத்தங், தங் ஹெட்டா² வுத்தனயமேவ.
Gāthā heṭṭhā vuttatthā eva. Apica taṇhādutiyoti taṇhāsahāyo. Ayañhi satto anamatagge saṃsāravaṭṭe saṃsaranto na ekakova saṃsarati, taṇhaṃ pana dutiyikaṃ sahāyikaṃ labhitvāva saṃsarati. Tathā hi taṃ papātapātaṃ acintetvā madhugaṇhanakaluddakaṃ viya anekādīnavākulesupi bhavesu ānisaṃsameva dassentī anatthajāle sā paribbhamāpeti. Etamādīnavaṃ ñatvāti etaṃ atītānāgatapaccuppannesu khandhesu itthabhāvaññathābhāvasaññitaṃ ādīnavaṃ jānitvā. Taṇhaṃ dukkhassa sambhavanti ‘‘taṇhā cāyaṃ vaṭṭadukkhassa sambhavo pabhavo kāraṇa’’nti jānitvā. Ettāvatā ca ekassa bhikkhuno vipassanaṃ vaḍḍhetvā arahattuppatti dassitā. Idāni taṃ khīṇāsavaṃ thomento ‘‘vītataṇho’’tiādimāha. Yaṃ panettha avuttaṃ, taṃ heṭṭhā vuttanayameva.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. தண்ஹுப்பாத³ஸுத்தங் • 6. Taṇhuppādasuttaṃ
