| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
3. தபனீயஸுத்தவண்ணனா
3. Tapanīyasuttavaṇṇanā
30. ததியே தபனீயாதி இத⁴ சேவ ஸம்பராயே ச தபந்தி விபா³தெ⁴ந்தி விஹேடெ²ந்தீதி தபனீயா. தபனங் வா து³க்க²ங் தி³ட்டே² சேவ த⁴ம்மே அபி⁴ஸம்பராயே ச தஸ்ஸ உப்பாத³னேன சேவ அனுப³லப்பதா³னேன ச ஹிதாதி தபனீயா. அத² வா தபந்தி தேனாதி தபனங், பச்சா²னுதாபோ, விப்படிஸாரோதி அத்தோ², தஸ்ஸ ஹேதுபா⁴வதோ ஹிதாதி தபனீயா. அகதகல்யாணோதி அகதங் கல்யாணங் ப⁴த்³த³கங் புஞ்ஞங் ஏதேனாதி அகதகல்யாணோ. ஸேஸபத³த்³வயங் தஸ்ஸேவ வேவசனங். புஞ்ஞஞ்ஹி பவத்திஹிததாய ஆயதிங்ஸுக²தாய ச ப⁴த்³த³கட்டே²ன கல்யாணந்தி ச குச்சி²தஸலனாதி³அத்தே²ன குஸலந்தி ச து³க்க²பீ⁴ரூனங் ஸங்ஸாரபீ⁴ரூனஞ்ச ரக்க²னட்டே²ன பீ⁴ருத்தாணந்தி ச வுச்சதி. கதபாபோதி கதங் உபசிதங் பாபங் ஏதேனாதி கதபாபோ. ஸேஸபத³த்³வயங் தஸ்ஸேவ வேவசனங். அகுஸலகம்மஞ்ஹி லாமகட்டே²ன பாபந்தி ச அத்தனோ பவத்திக்க²ணே விபாகக்க²ணே ச கோ⁴ரஸபா⁴வதாய லுத்³த³ந்தி ச கிலேஸேஹி தூ³ஸிதபா⁴வேன கிப்³பி³ஸந்தி ச வுச்சதி. இதி ப⁴க³வா ‘‘த்³வே த⁴ம்மா தபனீயா’’தி த⁴ம்மாதி⁴ட்டா²னேன உத்³தி³ஸித்வா அகதங் குஸலங் த⁴ம்மங் கதஞ்ச அகுஸலங் த⁴ம்மங் புக்³க³லாதி⁴ட்டா²னேன நித்³தி³ஸி. இதா³னி தேஸங் தபனீயபா⁴வங் த³ஸ்ஸெந்தோ ‘‘ஸோ அகதங் மே கல்யாணந்திபி தப்பதி, கதங் மே பாபந்திபி தப்பதீ’’தி ஆஹ. சித்தஸந்தாஸேன தப்பதி அனுதப்பதி அனுஸோசதீதி அத்தோ².
30. Tatiye tapanīyāti idha ceva samparāye ca tapanti vibādhenti viheṭhentīti tapanīyā. Tapanaṃ vā dukkhaṃ diṭṭhe ceva dhamme abhisamparāye ca tassa uppādanena ceva anubalappadānena ca hitāti tapanīyā. Atha vā tapanti tenāti tapanaṃ, pacchānutāpo, vippaṭisāroti attho, tassa hetubhāvato hitāti tapanīyā. Akatakalyāṇoti akataṃ kalyāṇaṃ bhaddakaṃ puññaṃ etenāti akatakalyāṇo. Sesapadadvayaṃ tasseva vevacanaṃ. Puññañhi pavattihitatāya āyatiṃsukhatāya ca bhaddakaṭṭhena kalyāṇanti ca kucchitasalanādiatthena kusalanti ca dukkhabhīrūnaṃ saṃsārabhīrūnañca rakkhanaṭṭhena bhīruttāṇanti ca vuccati. Katapāpoti kataṃ upacitaṃ pāpaṃ etenāti katapāpo. Sesapadadvayaṃ tasseva vevacanaṃ. Akusalakammañhi lāmakaṭṭhena pāpanti ca attano pavattikkhaṇe vipākakkhaṇe ca ghorasabhāvatāya luddanti ca kilesehi dūsitabhāvena kibbisanti ca vuccati. Iti bhagavā ‘‘dve dhammā tapanīyā’’ti dhammādhiṭṭhānena uddisitvā akataṃ kusalaṃ dhammaṃ katañca akusalaṃ dhammaṃ puggalādhiṭṭhānena niddisi. Idāni tesaṃ tapanīyabhāvaṃ dassento ‘‘so akataṃ me kalyāṇantipi tappati, kataṃ me pāpantipi tappatī’’ti āha. Cittasantāsena tappati anutappati anusocatīti attho.
கா³தா²ஸு து³ட்டு² சரிதங், கிலேஸபூதிகத்தா வா து³ட்ட²ங் சரிதந்தி து³ச்சரிதங். காயேன து³ச்சரிதங், காயதோ வா பவத்தங் து³ச்சரிதங் காயது³ச்சரிதங். ஏவங் வசீமனோது³ச்சரிதானிபி த³ட்ட²ப்³பா³னி. இமானி ச காயது³ச்சரிதாதீ³னி கம்மபத²ப்பத்தானி அதி⁴ப்பேதானீதி யங் ந கம்மபத²ப்பத்தங் அகுஸலஜாதங், தங் ஸந்தா⁴யாஹ ‘‘யஞ்சஞ்ஞங் தோ³ஸஸஞ்ஹித’’ந்தி. தஸ்ஸத்தோ² – யம்பி ச அஞ்ஞங் கம்மபத²பா⁴வங் அப்பத்தத்தா நிப்பரியாயேன காயகம்மாதி³ஸங்க²ங் ந லப⁴தி, ராகா³தி³கிலேஸஸங்ஸட்ட²த்தா தோ³ஸஸஹிதங் அகுஸலங் தம்பி கத்வாதி அத்தோ². நிரயந்தி நிரதிஅத்தே²ன நிரஸ்ஸாத³ட்டே²ன வா நிரயந்தி லத்³த⁴னாமங் ஸப்³ப³ம்பி து³க்³க³திங், அயஸங்கா²தஸுக²ப்படிக்கே²பேன வா ஸப்³ப³த்த² ஸுக³திது³க்³க³தீஸு நிரயது³க்க²ங். ஸோ தாதி³ஸோ புக்³க³லோ உபக³ச்ச²தீதி ஏவமெத்த² அத்தோ² த³ட்ட²ப்³போ³.
Gāthāsu duṭṭhu caritaṃ, kilesapūtikattā vā duṭṭhaṃ caritanti duccaritaṃ. Kāyena duccaritaṃ, kāyato vā pavattaṃ duccaritaṃ kāyaduccaritaṃ. Evaṃ vacīmanoduccaritānipi daṭṭhabbāni. Imāni ca kāyaduccaritādīni kammapathappattāni adhippetānīti yaṃ na kammapathappattaṃ akusalajātaṃ, taṃ sandhāyāha ‘‘yañcaññaṃ dosasañhita’’nti. Tassattho – yampi ca aññaṃ kammapathabhāvaṃ appattattā nippariyāyena kāyakammādisaṅkhaṃ na labhati, rāgādikilesasaṃsaṭṭhattā dosasahitaṃ akusalaṃ tampi katvāti attho. Nirayanti niratiatthena nirassādaṭṭhena vā nirayanti laddhanāmaṃ sabbampi duggatiṃ, ayasaṅkhātasukhappaṭikkhepena vā sabbattha sugatiduggatīsu nirayadukkhaṃ. So tādiso puggalo upagacchatīti evamettha attho daṭṭhabbo.
எத்த² ச காயது³ச்சரிதஸ்ஸ தபனீயபா⁴வே நந்தோ³ யக்கோ² நந்தோ³ மாணவகோ நந்தோ³ கோ³கா⁴தகோ த்³வே பா⁴திகாதி ஏதேஸங் வத்தூ²னி கதே²தப்³பா³னி. தே கிர கா³விங் வதி⁴த்வா மங்ஸங் த்³வே கொட்டா²ஸே அகங்ஸு. ததோ கனிட்டோ² ஜெட்ட²ங் ஆஹ – ‘‘மய்ஹங் தா³ரகா ப³ஹூ, இமானி மே அந்தானி தே³ஹீ’’தி. அத² நங் ஜெட்டோ² – ‘‘ஸப்³ப³ங் மங்ஸங் த்³வேதா⁴ விப⁴த்தங், புன கிமக்³க³ஹேஸீ’’தி பஹரித்வா ஜீவிதக்க²யங் பாபேஸி. நிவத்தித்வா ச நங் ஓலோகெந்தோ மதங் தி³ஸ்வா ‘‘பா⁴ரியங் வத மயா கதங், ஸ்வாஹங் அகாரணேனேவ நங் மாரேஸி’’ந்தி சித்தங் உப்பாதே³ஸி. அத²ஸ்ஸ ப³லவவிப்படிஸாரோ உப்பஜ்ஜி. ஸோ டி²தட்டா²னேபி நிஸின்னட்டா²னேபி ததே³வ கம்மங் ஆவஜ்ஜேதி, சித்தஸ்ஸாத³ங் ந லப⁴தி, அஸிதபீதகா²யிதம்பிஸ்ஸ ஸரீரே ஓஜங் ந ப²ரதி, அட்டி²சம்மமத்தமேவ அஹோஸி. அத² நங் ஏகோ தே²ரோ புச்சி² ‘‘உபாஸக, த்வங் அதிவிய கிஸோ அட்டி²சம்மமத்தோ ஜாதோ, கீதி³ஸோ தே ரோகோ³, உதா³ஹு அத்தி² கிஞ்சி தபனீயங் கம்மங் கத’’ந்தி? ஸோ ‘‘ஆம, ப⁴ந்தே’’தி ஸப்³ப³ங் ஆரோசேஸி. அத²ஸ்ஸ ஸோ ‘‘பா⁴ரியங் தே, உபாஸக, கம்மங் கதங், அனபராத⁴ட்டா²னே அபரத்³த⁴’’ந்தி ஆஹ. ஸோ தேனேவ கம்முனா காலங் கத்வா நிரயே நிப்³ப³த்தி. வசீது³ச்சரிதஸ்ஸ பன ஸுப்பபு³த்³த⁴ஸக்ககோகாலிகசிஞ்சமாணவிகாதீ³னங் வத்தூ²னி கதே²தப்³பா³னி, மனோது³ச்சரிதஸ்ஸ உக்கலஜயப⁴ஞ்ஞாதீ³னங்.
Ettha ca kāyaduccaritassa tapanīyabhāve nando yakkho nando māṇavako nando goghātako dve bhātikāti etesaṃ vatthūni kathetabbāni. Te kira gāviṃ vadhitvā maṃsaṃ dve koṭṭhāse akaṃsu. Tato kaniṭṭho jeṭṭhaṃ āha – ‘‘mayhaṃ dārakā bahū, imāni me antāni dehī’’ti. Atha naṃ jeṭṭho – ‘‘sabbaṃ maṃsaṃ dvedhā vibhattaṃ, puna kimaggahesī’’ti paharitvā jīvitakkhayaṃ pāpesi. Nivattitvā ca naṃ olokento mataṃ disvā ‘‘bhāriyaṃ vata mayā kataṃ, svāhaṃ akāraṇeneva naṃ māresi’’nti cittaṃ uppādesi. Athassa balavavippaṭisāro uppajji. So ṭhitaṭṭhānepi nisinnaṭṭhānepi tadeva kammaṃ āvajjeti, cittassādaṃ na labhati, asitapītakhāyitampissa sarīre ojaṃ na pharati, aṭṭhicammamattameva ahosi. Atha naṃ eko thero pucchi ‘‘upāsaka, tvaṃ ativiya kiso aṭṭhicammamatto jāto, kīdiso te rogo, udāhu atthi kiñci tapanīyaṃ kammaṃ kata’’nti? So ‘‘āma, bhante’’ti sabbaṃ ārocesi. Athassa so ‘‘bhāriyaṃ te, upāsaka, kammaṃ kataṃ, anaparādhaṭṭhāne aparaddha’’nti āha. So teneva kammunā kālaṃ katvā niraye nibbatti. Vacīduccaritassa pana suppabuddhasakkakokālikaciñcamāṇavikādīnaṃ vatthūni kathetabbāni, manoduccaritassa ukkalajayabhaññādīnaṃ.
ததியஸுத்தவண்ணனா நிட்டி²தா.
Tatiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 3. தபனீயஸுத்தங் • 3. Tapanīyasuttaṃ
