| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. மாரஸங்யுத்தங்
4. Mārasaṃyuttaṃ
1. பட²மவக்³கோ³
1. Paṭhamavaggo
1. தபோகம்மஸுத்தவண்ணனா
1. Tapokammasuttavaṇṇanā
137. உருவேலாய ஸமீபே கா³மோ உருவேலகா³மோ, தங் உருவேலகா³மங் அபி⁴முக²பா⁴வேன ஸம்மதே³வ ஸப்³ப³த⁴ம்மே பு³ஜ்ஜ²தீதி அபி⁴ஸம்போ³தி⁴, ஸப்³ப³ஞ்ஞுதஞ்ஞாணங், தேன ஸமன்னாக³தத்தா ச ப⁴க³வா அபி⁴ஸம்பு³த்³தோ⁴தி வுச்சதி. தஸ்ஸ பஞ்சசத்தாலீஸாய வஸ்ஸேஸு ஆதி³தோ பன்னரஸ வஸ்ஸானி பட²மபோ³தி⁴, இத⁴ பன ஸத்தாஹப்³ப⁴ந்தரமேவ அதி⁴ப்பேதந்தி ஆஹ ‘‘அபி⁴ஸம்பு³த்³தோ⁴ ஹுத்வா அந்தோஸத்தாஹஸ்மிங் யேவா’’தி. அஸுக²பா⁴வேன அஞ்ஞேஹி காதுங் அஸக்குணெய்யத்தா து³க்கரங் கரோதீதி து³க்கரகாரோ, ஸோ ஏவ இத்தி²லிங்க³வஸேன து³க்கரகாரிகா. தாய முத்தோ வதம்ஹீதி சிந்தேஸி. யதி³ ஏவங் கஸ்மா தங் லோகனாதோ² ச²ப்³ப³ஸ்ஸானி ஸமனுயுஞ்ஜதி? கம்மபீளிதவஸேன. வுத்தஞ்ஹேதங் அபதா³னே (அப॰ தே²ர 1.39.92-94) –
137. Uruvelāya samīpe gāmo uruvelagāmo, taṃ uruvelagāmaṃ abhimukhabhāvena sammadeva sabbadhamme bujjhatīti abhisambodhi, sabbaññutaññāṇaṃ, tena samannāgatattā ca bhagavā abhisambuddhoti vuccati. Tassa pañcacattālīsāya vassesu ādito pannarasa vassāni paṭhamabodhi, idha pana sattāhabbhantarameva adhippetanti āha ‘‘abhisambuddho hutvā antosattāhasmiṃ yevā’’ti. Asukhabhāvena aññehi kātuṃ asakkuṇeyyattā dukkaraṃ karotīti dukkarakāro, so eva itthiliṅgavasena dukkarakārikā. Tāya mutto vatamhīti cintesi. Yadi evaṃ kasmā taṃ lokanātho chabbassāni samanuyuñjati? Kammapīḷitavasena. Vuttañhetaṃ apadāne (apa. thera 1.39.92-94) –
‘‘அவசாஹங் ஜோதிபாலோ, ஸுக³தங் கஸ்ஸபங் ததா³;
‘‘Avacāhaṃ jotipālo, sugataṃ kassapaṃ tadā;
குதோ நு போ³தி⁴ முண்ட³ஸ்ஸ, போ³தி⁴ பரமது³ல்லபா⁴.
Kuto nu bodhi muṇḍassa, bodhi paramadullabhā.
‘‘தேன கம்மவிபாகேன, அசரிங் து³க்கரங் ப³ஹுங்;
‘‘Tena kammavipākena, acariṃ dukkaraṃ bahuṃ;
ச²ப்³ப³ஸ்ஸானுருவேலாயங், ததோ போ³தி⁴மபாபுணிங்.
Chabbassānuruvelāyaṃ, tato bodhimapāpuṇiṃ.
‘‘நாஹங் ஏதேன மக்³கே³ன, பாபுணிங் போ³தி⁴முத்தமங்;
‘‘Nāhaṃ etena maggena, pāpuṇiṃ bodhimuttamaṃ;
கும்மக்³கே³ன க³வேஸிஸ்ஸங், புப்³ப³கம்மேன வாரிதோ’’தி.
Kummaggena gavesissaṃ, pubbakammena vārito’’ti.
மாரேதீதி விபா³தே⁴தி. விபத்திஆதி³ஸங்யோஜனஞ்ஹி ஸாதூ⁴னங் பரமத்த²தோ மரணங் ஸச்சபடிவேத⁴மாரணத்தா, பாபதரத்தா பாபதமோதி பாபிமா. ஸா சஸ்ஸ பாபதமதா பாபவுத்திதாயாதி ஆஹ ‘‘பாபே நியுத்தோ’’தி. அதி⁴பதீதி காமாதி⁴பதி. அப்பஹீனகாமராகே³ அத்தனோ வஸே வத்தேதீதி வஸவத்தீ. தேஸங்யேவ குஸலகம்மானங் அந்தங் கரோதீதி அந்தகோ. வட்டது³க்க²தோ அபரிமுத்தபச்சயத்தா நமுசி. மத்தானங் பமத்தானங் ப³ந்தூ⁴தி பமத்தப³ந்து⁴.
Māretīti vibādheti. Vipattiādisaṃyojanañhi sādhūnaṃ paramatthato maraṇaṃ saccapaṭivedhamāraṇattā, pāpatarattā pāpatamoti pāpimā. Sā cassa pāpatamatā pāpavuttitāyāti āha ‘‘pāpeniyutto’’ti. Adhipatīti kāmādhipati. Appahīnakāmarāge attano vase vattetīti vasavattī. Tesaṃyeva kusalakammānaṃ antaṃ karotīti antako. Vaṭṭadukkhato aparimuttapaccayattā namuci. Mattānaṃ pamattānaṃ bandhūti pamattabandhu.
தபோகம்மாதி அத்தகிலமதா²னுயோக³தோ. அபரத்³தோ⁴தி விரஜ்ஜ²ஸி. ‘‘அபராதோ⁴’’திபி அத்தி², ஸோயேவ அத்தோ². காயகிலமத²ங் அனுயுஞ்ஜந்தோ யேபு⁴ய்யேன அமரத்தா²ய அனுயுஞ்ஜதி, ஸோ ச கம்மவாதீ³ஹி அனுயுஞ்ஜியமானோ தே³வத்தா²ய ஸியாதி ஆஹ ‘‘அமரபா⁴வத்தா²யா’’தி. ஸப்³ப³ங் தபந்தி ஸப்³ப³ங் அத்தபரிதாபனங். அத்தா²வஹங் ந ப⁴வதி போ³தி⁴யா அனுபாயத்தா. கிஞ்சஸ்ஸாதி கிஞ்சி ஸியாதி அத்தோ². பி²யாரித்தங்வ த⁴ம்மனீதி த⁴ம்மங் வுச்சதி வண்ணு, ஸோ இத⁴ ‘‘த⁴ம்ம’’ந்தி வுத்தோ, த⁴ம்மனி வண்ணுபதே³ஸேதி அத்தோ². தேனாஹ ‘‘அரஞ்ஞே’’தி. உபோ⁴ஸு பஸ்ஸேஸு பி²யாஹி ஆகட்³டெ⁴ய்ய சேவ அரித்தேஹி உப்பீளெய்ய ச.
Tapokammāti attakilamathānuyogato. Aparaddhoti virajjhasi. ‘‘Aparādho’’tipi atthi, soyeva attho. Kāyakilamathaṃ anuyuñjanto yebhuyyena amaratthāya anuyuñjati, so ca kammavādīhi anuyuñjiyamāno devatthāya siyāti āha ‘‘amarabhāvatthāyā’’ti. Sabbaṃ tapanti sabbaṃ attaparitāpanaṃ. Atthāvahaṃ na bhavati bodhiyā anupāyattā. Kiñcassāti kiñci siyāti attho. Phiyārittaṃva dhammanīti dhammaṃ vuccati vaṇṇu, so idha ‘‘dhamma’’nti vutto, dhammani vaṇṇupadeseti attho. Tenāha ‘‘araññe’’ti. Ubhosu passesu phiyāhi ākaḍḍheyya ceva arittehi uppīḷeyya ca.
ஸம்மாவாசாகம்மந்தாஜீவா க³ஹிதா மக்³க³ஸீலஸ்ஸ அதி⁴ப்பேதத்தா. ஸமாதி⁴னோ ஹி க³ஹணேன ஸம்மாவாயாமஸதிஸமாத⁴யோ க³ஹிதா உபகாரபா⁴வதோ. பஞ்ஞாயாதி எத்தா²பி ஏஸேவ நயோ. பு³ஜ்ஜ²தி ஏதேனாதி போ³தோ⁴. மக்³கோ³தி ஆஹ ‘‘போ³தா⁴யாதி மக்³க³த்தா²யா’’தி. கத²ங் பன மக்³க³ங் மக்³க³த்தா²ய பா⁴வேதீதி ஆஹ ‘‘யதா² ஹீ’’திஆதி³. தேன யதா² யாகு³பசனாரம்போ⁴ யாவதே³வ யாகு³அத்தோ², ஏவங் மக்³க³பா⁴வனாரம்போ⁴ மக்³கா³தி⁴க³மத்தா²யாதி த³ஸ்ஸேதி. ஆரம்போ⁴தி ச அரியமக்³க³பா⁴வனாய ப³ந்தா⁴பனங் த³ட்ட²ப்³ப³ங். கேசி பன ‘‘மக்³க³ந்தி அரியமக்³க³ங், போ³தா⁴யாதி அரஹத்தஸம்போ³தா⁴ய, ஏவஞ்ச கத்வா ‘பத்தொஸ்மி பரமஸுத்³தி⁴’ந்தி இத³ம்பி வசனங் ஸமத்தி²த’’ந்தி வத³ந்தி, அபரே பன ‘‘ஸப்³ப³ஞ்ஞுதஞ்ஞாணஸம்போ³தா⁴யாதி. ஸோ ஹி ஸப்³ப³ஸ்மாபி போ³தி⁴தோ உத்தரிதரோ’’தி. நிஹதோ நிப்³பி³ஸேவனபா⁴வங் பாபிதோ. தேனாஹ ‘‘பராஜிதோ’’தி.
Sammāvācākammantājīvā gahitā maggasīlassa adhippetattā. Samādhino hi gahaṇena sammāvāyāmasatisamādhayo gahitā upakārabhāvato. Paññāyāti etthāpi eseva nayo. Bujjhati etenāti bodho. Maggoti āha ‘‘bodhāyāti maggatthāyā’’ti. Kathaṃ pana maggaṃ maggatthāya bhāvetīti āha ‘‘yathā hī’’tiādi. Tena yathā yāgupacanārambho yāvadeva yāguattho, evaṃ maggabhāvanārambho maggādhigamatthāyāti dasseti. Ārambhoti ca ariyamaggabhāvanāya bandhāpanaṃ daṭṭhabbaṃ. Keci pana ‘‘magganti ariyamaggaṃ, bodhāyāti arahattasambodhāya, evañca katvā ‘pattosmi paramasuddhi’nti idampi vacanaṃ samatthita’’nti vadanti, apare pana ‘‘sabbaññutaññāṇasambodhāyāti. So hi sabbasmāpi bodhito uttaritaro’’ti. Nihato nibbisevanabhāvaṃ pāpito. Tenāha ‘‘parājito’’ti.
தபோகம்மஸுத்தவண்ணனா நிட்டி²தா.
Tapokammasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. தபோகம்மஸுத்தங் • 1. Tapokammasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. தபோகம்மஸுத்தவண்ணனா • 1. Tapokammasuttavaṇṇanā
