| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. ததியஅத⁴ம்மஸுத்தங்
7. Tatiyaadhammasuttaṃ
173. ‘‘அத⁴ம்மோ ச, பி⁴க்க²வே, வேதி³தப்³போ³ த⁴ம்மோ ச; அனத்தோ² ச வேதி³தப்³போ³ அத்தோ² ச . அத⁴ம்மஞ்ச விதி³த்வா த⁴ம்மஞ்ச, அனத்த²ஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³ங்.
173. ‘‘Adhammo ca, bhikkhave, veditabbo dhammo ca; anattho ca veditabbo attho ca . Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabbaṃ.
‘‘கதமோ ச, பி⁴க்க²வே, அத⁴ம்மோ, கதமோ ச த⁴ம்மோ; கதமோ ச அனத்தோ², கதமோ ச அத்தோ²? பாணாதிபாதோ, பி⁴க்க²வே, அத⁴ம்மோ; பாணாதிபாதா வேரமணீ த⁴ம்மோ; யே ச பாணாதிபாதபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயங் அனத்தோ²; பாணாதிபாதா வேரமணிபச்சயா ச அனேகே குஸலா த⁴ம்மா பா⁴வனாபாரிபூரிங் க³ச்ச²ந்தி, அயங் அத்தோ².
‘‘Katamo ca, bhikkhave, adhammo, katamo ca dhammo; katamo ca anattho, katamo ca attho? Pāṇātipāto, bhikkhave, adhammo; pāṇātipātā veramaṇī dhammo; ye ca pāṇātipātapaccayā aneke pāpakā akusalā dhammā sambhavanti, ayaṃ anattho; pāṇātipātā veramaṇipaccayā ca aneke kusalā dhammā bhāvanāpāripūriṃ gacchanti, ayaṃ attho.
‘‘அதி³ன்னாதா³னங், பி⁴க்க²வே, அத⁴ம்மோ; அதி³ன்னாதா³னா வேரமணீ த⁴ம்மோ… காமேஸுமிச்சா²சாரோ, பி⁴க்க²வே , அத⁴ம்மோ; காமேஸுமிச்சா²சாரா வேரமணீ த⁴ம்மோ… முஸாவாதோ³, பி⁴க்க²வே, அத⁴ம்மோ; முஸாவாதா³ வேரமணீ த⁴ம்மோ… பிஸுணா வாசா, பி⁴க்க²வே, அத⁴ம்மோ; பிஸுணாய வாசாய வேரமணீ த⁴ம்மோ… ப²ருஸா வாசா, பி⁴க்க²வே, அத⁴ம்மோ; ப²ருஸாய வாசாய வேரமணீ த⁴ம்மோ… ஸம்ப²ப்பலாபோ, பி⁴க்க²வே , அத⁴ம்மோ; ஸம்ப²ப்பலாபா வேரமணீ த⁴ம்மோ… அபி⁴ஜ்ஜா², பி⁴க்க²வே, அத⁴ம்மோ; அனபி⁴ஜ்ஜா² த⁴ம்மோ… ப்³யாபாதோ³, பி⁴க்க²வே, அத⁴ம்மோ; அப்³யாபாதோ³ த⁴ம்மோ….
‘‘Adinnādānaṃ, bhikkhave, adhammo; adinnādānā veramaṇī dhammo… kāmesumicchācāro, bhikkhave , adhammo; kāmesumicchācārā veramaṇī dhammo… musāvādo, bhikkhave, adhammo; musāvādā veramaṇī dhammo… pisuṇā vācā, bhikkhave, adhammo; pisuṇāya vācāya veramaṇī dhammo… pharusā vācā, bhikkhave, adhammo; pharusāya vācāya veramaṇī dhammo… samphappalāpo, bhikkhave , adhammo; samphappalāpā veramaṇī dhammo… abhijjhā, bhikkhave, adhammo; anabhijjhā dhammo… byāpādo, bhikkhave, adhammo; abyāpādo dhammo….
‘‘மிச்சா²தி³ட்டி², பி⁴க்க²வே, அத⁴ம்மோ; ஸம்மாதி³ட்டி² த⁴ம்மோ; யே ச மிச்சா²தி³ட்டி²பச்சயா அனேகே பாபகா அகுஸலா த⁴ம்மா ஸம்ப⁴வந்தி, அயங் அனத்தோ²; ஸம்மாதி³ட்டி²பச்சயா ச அனேகே குஸலா த⁴ம்மா பா⁴வனாபாரிபூரிங் க³ச்ச²ந்தி, அயங் அத்தோ².
‘‘Micchādiṭṭhi, bhikkhave, adhammo; sammādiṭṭhi dhammo; ye ca micchādiṭṭhipaccayā aneke pāpakā akusalā dhammā sambhavanti, ayaṃ anattho; sammādiṭṭhipaccayā ca aneke kusalā dhammā bhāvanāpāripūriṃ gacchanti, ayaṃ attho.
‘‘‘அத⁴ம்மோ ச, பி⁴க்க²வே, வேதி³தப்³போ³ த⁴ம்மோ ச; அனத்தோ² ச வேதி³தப்³போ³ அத்தோ² ச. அத⁴ம்மஞ்ச விதி³த்வா த⁴ம்மஞ்ச, அனத்த²ஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³’ந்தி, இதி யங் தங் வுத்தங், இத³மேதங் படிச்ச வுத்த’’ந்தி. ஸத்தமங்.
‘‘‘Adhammo ca, bhikkhave, veditabbo dhammo ca; anattho ca veditabbo attho ca. Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabba’nti, iti yaṃ taṃ vuttaṃ, idametaṃ paṭicca vutta’’nti. Sattamaṃ.
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-44. ப்³ராஹ்மணபச்சோரோஹணீஸுத்தாதி³வண்ணனா • 1-44. Brāhmaṇapaccorohaṇīsuttādivaṇṇanā
