| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. ததியஅனாக³தப⁴யஸுத்தங்
9. Tatiyaanāgatabhayasuttaṃ
79. ‘‘பஞ்சிமானி , பி⁴க்க²வே, அனாக³தப⁴யானி ஏதரஹி அஸமுப்பன்னானி ஆயதிங் ஸமுப்பஜ்ஜிஸ்ஸந்தி. தானி வோ 1 படிபு³ஜ்ஜி²தப்³பா³னி ; படிபு³ஜ்ஜி²த்வா ச தேஸங் பஹானாய வாயமிதப்³ப³ங்.
79. ‘‘Pañcimāni , bhikkhave, anāgatabhayāni etarahi asamuppannāni āyatiṃ samuppajjissanti. Tāni vo 2 paṭibujjhitabbāni ; paṭibujjhitvā ca tesaṃ pahānāya vāyamitabbaṃ.
‘‘கதமானி பஞ்ச? ப⁴விஸ்ஸந்தி, பி⁴க்க²வே, பி⁴க்கூ² அனாக³தமத்³தா⁴னங் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞே உபஸம்பாதெ³ஸ்ஸந்தி. தேபி 3 ந ஸக்கி²ஸ்ஸந்தி வினேதுங் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞே உபஸம்பாதெ³ஸ்ஸந்தி. தேபி 4 ந ஸக்கி²ஸ்ஸந்தி வினேதுங் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ங், பி⁴க்க²வே, பட²மங் அனாக³தப⁴யங் ஏதரஹி அஸமுப்பன்னங் ஆயதிங் ஸமுப்பஜ்ஜிஸ்ஸதி. தங் வோ படிபு³ஜ்ஜி²தப்³ப³ங்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ங்.
‘‘Katamāni pañca? Bhavissanti, bhikkhave, bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti. Tepi 5 na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti. Tepi 6 na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, paṭhamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘புன சபரங், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னங் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞேஸங் நிஸ்ஸயங் த³ஸ்ஸந்தி. தேபி ந ஸக்கி²ஸ்ஸந்தி வினேதுங் அதி⁴ஸீலே அதி⁴சித்தே அதி⁴பஞ்ஞாய . தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞேஸங் நிஸ்ஸயங் த³ஸ்ஸந்தி. தேபி ந ஸக்கி²ஸ்ஸந்தி வினேதுங் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ங், பி⁴க்க²வே, து³தியங் அனாக³தப⁴யங் ஏதரஹி அஸமுப்பன்னங் ஆயதிங் ஸமுப்பஜ்ஜிஸ்ஸதி. தங் வோ படிபு³ஜ்ஜி²தப்³ப³ங்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ங்.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññesaṃ nissayaṃ dassanti. Tepi na sakkhissanti vinetuṃ adhisīle adhicitte adhipaññāya . Tepi bhavissanti abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññesaṃ nissayaṃ dassanti. Tepi na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, dutiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘புன சபரங், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னங் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அபி⁴த⁴ம்மகத²ங் வேத³ல்லகத²ங் கதெ²ந்தா கண்ஹத⁴ம்மங் ஓக்கமமானா ந பு³ஜ்ஜி²ஸ்ஸந்தி. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ங், பி⁴க்க²வே, ததியங் அனாக³தப⁴யங் ஏதரஹி அஸமுப்பன்னங் ஆயதிங் ஸமுப்பஜ்ஜிஸ்ஸதி. தங் வோ படிபு³ஜ்ஜி²தப்³ப³ங்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ங்.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā abhidhammakathaṃ vedallakathaṃ kathentā kaṇhadhammaṃ okkamamānā na bujjhissanti. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, tatiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘புன சபரங், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னங் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதாப்படிஸங்யுத்தா, தேஸு ப⁴ஞ்ஞமானேஸு ந ஸுஸ்ஸூஸிஸ்ஸந்தி, ந ஸோதங் ஓத³ஹிஸ்ஸந்தி, ந அஞ்ஞா சித்தங் உபட்ட²பெஸ்ஸந்தி, ந ச தே த⁴ம்மே உக்³க³ஹேதப்³ப³ங் பரியாபுணிதப்³ப³ங் மஞ்ஞிஸ்ஸந்தி. யே பன தே ஸுத்தந்தா கவிதா 7 காவெய்யா சித்தக்க²ரா சித்தப்³யஞ்ஜனா பா³ஹிரகா ஸாவகபா⁴ஸிதா, தேஸு ப⁴ஞ்ஞமானேஸு ஸுஸ்ஸூஸிஸ்ஸந்தி, ஸோதங் ஓத³ஹிஸ்ஸந்தி, அஞ்ஞா சித்தங் உபட்ட²பெஸ்ஸந்தி, தே ச த⁴ம்மே உக்³க³ஹேதப்³ப³ங் பரியாபுணிதப்³ப³ங் மஞ்ஞிஸ்ஸந்தி. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ங், பி⁴க்க²வே, சதுத்த²ங் அனாக³தப⁴யங் ஏதரஹி அஸமுப்பன்னங் ஆயதிங் ஸமுப்பஜ்ஜிஸ்ஸதி. தங் வோ படிபு³ஜ்ஜி²தப்³ப³ங்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ங்.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā ye te suttantā tathāgatabhāsitā gambhīrā gambhīratthā lokuttarā suññatāppaṭisaṃyuttā, tesu bhaññamānesu na sussūsissanti, na sotaṃ odahissanti, na aññā cittaṃ upaṭṭhapessanti, na ca te dhamme uggahetabbaṃ pariyāpuṇitabbaṃ maññissanti. Ye pana te suttantā kavitā 8 kāveyyā cittakkharā cittabyañjanā bāhirakā sāvakabhāsitā, tesu bhaññamānesu sussūsissanti, sotaṃ odahissanti, aññā cittaṃ upaṭṭhapessanti, te ca dhamme uggahetabbaṃ pariyāpuṇitabbaṃ maññissanti. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, catutthaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘புன சபரங், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னங் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா . தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா தே²ரா பி⁴க்கூ² பா³ஹுலிகா 9 ப⁴விஸ்ஸந்தி ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா, ந வீரியங் ஆரபி⁴ஸ்ஸந்தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. தேஸங் பச்சி²மா ஜனதா தி³ட்டா²னுக³திங் ஆபஜ்ஜிஸ்ஸதி. ஸாபி ப⁴விஸ்ஸதி பா³ஹுலிகா ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா, ந வீரியங் ஆரபி⁴ஸ்ஸதி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ங், பி⁴க்க²வே, பஞ்சமங் அனாக³தப⁴யங் ஏதரஹி அஸமுப்பன்னங் ஆயதிங் ஸமுப்பஜ்ஜிஸ்ஸதி. தங் வோ படிபு³ஜ்ஜி²தப்³ப³ங்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ங் . ‘‘இமானி கோ², பி⁴க்க²வே, பஞ்ச அனாக³தப⁴யானி ஏதரஹி அஸமுப்பன்னானி ஆயதிங் ஸமுப்பஜ்ஜிஸ்ஸந்தி. தானி வோ படிபு³ஜ்ஜி²தப்³பா³னி; படிபு³ஜ்ஜி²த்வா ச தேஸங் பஹானாய வாயமிதப்³ப³’’ந்தி. நவமங்.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā . Te abhāvitakāyā samānā abhāvitasīlā abhāvitacittā abhāvitapaññā therā bhikkhū bāhulikā 10 bhavissanti sāthalikā okkamane pubbaṅgamā paviveke nikkhittadhurā, na vīriyaṃ ārabhissanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjissati. Sāpi bhavissati bāhulikā sāthalikā okkamane pubbaṅgamā paviveke nikkhittadhurā, na vīriyaṃ ārabhissati appattassa pattiyā anadhigatassa adhigamāya asacchikatassa sacchikiriyāya. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, pañcamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ . ‘‘Imāni kho, bhikkhave, pañca anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabba’’nti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. ததியஅனாக³தப⁴யஸுத்தவண்ணனா • 9. Tatiyaanāgatabhayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. ததியஅனாக³தப⁴யஸுத்தவண்ணனா • 9. Tatiyaanāgatabhayasuttavaṇṇanā
