| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૮. તતિયઓવાદસુત્તં
8. Tatiyaovādasuttaṃ
૧૫૧. રાજગહે કલન્દકનિવાપે 1. અથ ખો આયસ્મા મહાકસ્સપો યેન ભગવા તેનુપસઙ્કમિ ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં મહાકસ્સપં ભગવા એતદવોચ – ‘‘ઓવદ, કસ્સપ, ભિક્ખૂ; કરોહિ, કસ્સપ, ભિક્ખૂનં ધમ્મિં કથં. અહં વા, કસ્સપ, ભિક્ખૂનં ઓવદેય્યં ત્વં વા; અહં વા ભિક્ખૂનં ધમ્મિં કથં કરેય્યં ત્વં વા’’તિ.
151. Rājagahe kalandakanivāpe 2. Atha kho āyasmā mahākassapo yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘ovada, kassapa, bhikkhū; karohi, kassapa, bhikkhūnaṃ dhammiṃ kathaṃ. Ahaṃ vā, kassapa, bhikkhūnaṃ ovadeyyaṃ tvaṃ vā; ahaṃ vā bhikkhūnaṃ dhammiṃ kathaṃ kareyyaṃ tvaṃ vā’’ti.
‘‘દુબ્બચા ખો, ભન્તે, એતરહિ ભિક્ખૂ, દોવચસ્સકરણેહિ ધમ્મેહિ સમન્નાગતા, અક્ખમા, અપ્પદક્ખિણગ્ગાહિનો અનુસાસની’’ન્તિ. ‘‘તથા હિ પન, કસ્સપ, પુબ્બે થેરા ભિક્ખૂ આરઞ્ઞિકા ચેવ અહેસું આરઞ્ઞિકત્તસ્સ ચ વણ્ણવાદિનો, પિણ્ડપાતિકા ચેવ અહેસું પિણ્ડપાતિકત્તસ્સ ચ વણ્ણવાદિનો , પંસુકૂલિકા ચેવ અહેસું પંસુકૂલિકત્તસ્સ ચ વણ્ણવાદિનો, તેચીવરિકા ચેવ અહેસું તેચીવરિકત્તસ્સ ચ વણ્ણવાદિનો, અપ્પિચ્છા ચેવ અહેસું અપ્પિચ્છતાય ચ વણ્ણવાદિનો, સન્તુટ્ઠા ચેવ અહેસું સન્તુટ્ઠિયા ચ વણ્ણવાદિનો, પવિવિત્તા ચેવ અહેસું પવિવેકસ્સ ચ વણ્ણવાદિનો, અસંસટ્ઠા ચેવ અહેસું અસંસગ્ગસ્સ ચ વણ્ણવાદિનો, આરદ્ધવીરિયા ચેવ અહેસું વીરિયારમ્ભસ્સ ચ વણ્ણવાદિનો.
‘‘Dubbacā kho, bhante, etarahi bhikkhū, dovacassakaraṇehi dhammehi samannāgatā, akkhamā, appadakkhiṇaggāhino anusāsanī’’nti. ‘‘Tathā hi pana, kassapa, pubbe therā bhikkhū āraññikā ceva ahesuṃ āraññikattassa ca vaṇṇavādino, piṇḍapātikā ceva ahesuṃ piṇḍapātikattassa ca vaṇṇavādino , paṃsukūlikā ceva ahesuṃ paṃsukūlikattassa ca vaṇṇavādino, tecīvarikā ceva ahesuṃ tecīvarikattassa ca vaṇṇavādino, appicchā ceva ahesuṃ appicchatāya ca vaṇṇavādino, santuṭṭhā ceva ahesuṃ santuṭṭhiyā ca vaṇṇavādino, pavivittā ceva ahesuṃ pavivekassa ca vaṇṇavādino, asaṃsaṭṭhā ceva ahesuṃ asaṃsaggassa ca vaṇṇavādino, āraddhavīriyā ceva ahesuṃ vīriyārambhassa ca vaṇṇavādino.
‘‘તત્ર યો હોતિ ભિક્ખુ આરઞ્ઞિકો ચેવ આરઞ્ઞિકત્તસ્સ ચ વણ્ણવાદી, પિણ્ડપાતિકો ચેવ પિણ્ડપાતિકત્તસ્સ ચ વણ્ણવાદી, પંસુકૂલિકો ચેવ પંસુકૂલિકત્તસ્સ ચ વણ્ણવાદી, તેચીવરિકો ચેવ તેચીવરિકત્તસ્સ ચ વણ્ણવાદી, અપ્પિચ્છો ચેવ અપ્પિચ્છતાય ચ વણ્ણવાદી, સન્તુટ્ઠો ચેવ સન્તુટ્ઠિયા ચ વણ્ણવાદી, પવિવિત્તો ચેવ પવિવેકસ્સ ચ વણ્ણવાદી, અસંસટ્ઠો ચેવ અસંસગ્ગસ્સ ચ વણ્ણવાદી, આરદ્ધવીરિયો ચેવ વીરિયારમ્ભસ્સ ચ વણ્ણવાદી, તં થેરા ભિક્ખૂ આસનેન નિમન્તેન્તિ – ‘એહિ, ભિક્ખુ, કો નામાયં ભિક્ખુ, ભદ્દકો વતાયં ભિક્ખુ, સિક્ખાકામો વતાયં ભિક્ખુ; એહિ, ભિક્ખુ, ઇદં આસનં નિસીદાહી’’’તિ.
‘‘Tatra yo hoti bhikkhu āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘તત્ર, કસ્સપ, નવાનં ભિક્ખૂનં એવં હોતિ – ‘યો કિર સો હોતિ ભિક્ખુ આરઞ્ઞિકો ચેવ આરઞ્ઞિકત્તસ્સ ચ વણ્ણવાદી, પિણ્ડપાતિકો ચેવ…પે॰… પંસુકૂલિકો ચેવ… તેચીવરિકો ચેવ… અપ્પિચ્છો ચેવ… સન્તુટ્ઠો ચેવ… પવિવિત્તો ચેવ… અસંસટ્ઠો ચેવ… આરદ્ધવીરિયો ચેવ વીરિયારમ્ભસ્સ ચ વણ્ણવાદી, તં થેરા ભિક્ખૂ આસનેન નિમન્તેન્તિ – એહિ, ભિક્ખુ, કો નામાયં ભિક્ખુ, ભદ્દકો વતાયં ભિક્ખુ, સિક્ખાકામો વતાયં ભિક્ખુ; એહિ, ભિક્ખુ, ઇદં આસનં નિસીદાહી’તિ. તે તથત્તાય પટિપજ્જન્તિ; તેસં તં હોતિ દીઘરત્તં હિતાય સુખાય.
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti; tesaṃ taṃ hoti dīgharattaṃ hitāya sukhāya.
‘‘એતરહિ પન, કસ્સપ, થેરા ભિક્ખૂ ન ચેવ આરઞ્ઞિકા ન ચ આરઞ્ઞિકત્તસ્સ વણ્ણવાદિનો, ન ચેવ પિણ્ડપાતિકા ન ચ પિણ્ડપાતિકત્તસ્સ વણ્ણવાદિનો, ન ચેવ પંસુકૂલિકા ન ચ પંસુકૂલિકત્તસ્સ વણ્ણવાદિનો, ન ચેવ તેચીવરિકા ન ચ તેચીવરિકત્તસ્સ વણ્ણવાદિનો, ન ચેવ અપ્પિચ્છા ન ચ અપ્પિચ્છતાય વણ્ણવાદિનો, ન ચેવ સન્તુટ્ઠા ન ચ સન્તુટ્ઠિયા વણ્ણવાદિનો, ન ચેવ પવિવિત્તા ન ચ પવિવેકસ્સ વણ્ણવાદિનો, ન ચેવ અસંસટ્ઠા ન ચ અસંસગ્ગસ્સ વણ્ણવાદિનો , ન ચેવ આરદ્ધવીરિયા ન ચ વીરિયારમ્ભસ્સ વણ્ણવાદિનો.
‘‘Etarahi pana, kassapa, therā bhikkhū na ceva āraññikā na ca āraññikattassa vaṇṇavādino, na ceva piṇḍapātikā na ca piṇḍapātikattassa vaṇṇavādino, na ceva paṃsukūlikā na ca paṃsukūlikattassa vaṇṇavādino, na ceva tecīvarikā na ca tecīvarikattassa vaṇṇavādino, na ceva appicchā na ca appicchatāya vaṇṇavādino, na ceva santuṭṭhā na ca santuṭṭhiyā vaṇṇavādino, na ceva pavivittā na ca pavivekassa vaṇṇavādino, na ceva asaṃsaṭṭhā na ca asaṃsaggassa vaṇṇavādino , na ceva āraddhavīriyā na ca vīriyārambhassa vaṇṇavādino.
‘‘તત્ર યો હોતિ ભિક્ખુ ઞાતો યસસ્સી લાભી ચીવર-પિણ્ડપાત-સેનાસનગિલાનપ્પચ્ચયભેસજ્જપરિક્ખારાનં તં થેરા ભિક્ખૂ આસનેન નિમન્તેન્તિ – ‘એહિ, ભિક્ખુ, કો નામાયં ભિક્ખુ, ભદ્દકો વતાયં ભિક્ખુ, સબ્રહ્મચારિકામો વતાયં ભિક્ખુ; એહિ, ભિક્ખુ, ઇદં આસનં નિસીદાહી’’’તિ.
‘‘Tatra yo hoti bhikkhu ñāto yasassī lābhī cīvara-piṇḍapāta-senāsanagilānappaccayabhesajjaparikkhārānaṃ taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘તત્ર, કસ્સપ, નવાનં ભિક્ખૂનં એવં હોતિ – ‘યો કિર સો હોતિ ભિક્ખુ ઞાતો યસસ્સી લાભી ચીવર-પિણ્ડપાત-સેનાસન-ગિલાનપ્પચ્ચયભેસજ્જપરિક્ખારાનં તં થેરા ભિક્ખૂ આસનેન નિમન્તેન્તિ – એહિ, ભિક્ખુ, કો નામાયં ભિક્ખુ, ભદ્દકો વતાયં ભિક્ખુ, સબ્રહ્મચારિકામો વતાયં ભિક્ખુ; એહિ, ભિક્ખુ, ઇદં આસનં નિસીદાહી’તિ. તે તથત્તાય પટિપજ્જન્તિ. તેસં તં હોતિ દીઘરત્તં અહિતાય દુક્ખાય. યઞ્હિ તં, કસ્સપ, સમ્મા વદમાનો વદેય્ય – ‘ઉપદ્દુતા બ્રહ્મચારી બ્રહ્મચારૂપદ્દવેન અભિપત્થના 3 બ્રહ્મચારી બ્રહ્મચારિઅભિપત્થનેના’તિ 4, એતરહિ તં, કસ્સપ, સમ્મા વદમાનો વદેય્ય – ‘ઉપદ્દુતા બ્રહ્મચારી બ્રહ્મચારૂપદ્દવેન અભિપત્થના બ્રહ્મચારી બ્રહ્મચારિઅભિપત્થનેના’’’તિ. અટ્ઠમં.
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu ñāto yasassī lābhī cīvara-piṇḍapāta-senāsana-gilānappaccayabhesajjaparikkhārānaṃ taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti. Tesaṃ taṃ hoti dīgharattaṃ ahitāya dukkhāya. Yañhi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā 5 brahmacārī brahmacāriabhipatthanenā’ti 6, etarahi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā brahmacārī brahmacāriabhipatthanenā’’’ti. Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. તતિયઓવાદસુત્તવણ્ણના • 8. Tatiyaovādasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૮. તતિયઓવાદસુત્તવણ્ણના • 8. Tatiyaovādasuttavaṇṇanā
