| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૧. તતિયપબ્બતસુત્તં
11. Tatiyapabbatasuttaṃ
૮૪. સાવત્થિયં વિહરતિ…પે॰… ‘‘સેય્યથાપિ , ભિક્ખવે, પુરિસો સિનેરુસ્સ પબ્બતરાજસ્સ સત્ત મુગ્ગમત્તિયો પાસાણસક્ખરા ઉપનિક્ખિપેય્ય. તં કિં મઞ્ઞથ, ભિક્ખવે, કતમં નુ ખો બહુતરં, યા વા સત્ત મુગ્ગમત્તિયો પાસાણસક્ખરા ઉપનિક્ખિત્તા યો વા સિનેરુ 1 પબ્બતરાજા’’તિ?
84. Sāvatthiyaṃ viharati…pe… ‘‘seyyathāpi , bhikkhave, puriso sinerussa pabbatarājassa satta muggamattiyo pāsāṇasakkharā upanikkhipeyya. Taṃ kiṃ maññatha, bhikkhave, katamaṃ nu kho bahutaraṃ, yā vā satta muggamattiyo pāsāṇasakkharā upanikkhittā yo vā sineru 2 pabbatarājā’’ti?
‘‘એતદેવ, ભન્તે, બહુતરં યદિદં સિનેરુ પબ્બતરાજા; અપ્પમત્તિકા સત્ત મુગ્ગમત્તિયો પાસાણસક્ખરા ઉપનિક્ખિત્તા. નેવ સતિમં કલં ઉપેન્તિ ન સહસ્સિમં કલં ઉપેન્તિ ન સતસહસ્સિમં કલં ઉપેન્તિ સિનેરું પબ્બતરાજાનં ઉપનિધાય સત્ત મુગ્ગમત્તિયો પાસાણસક્ખરા ઉપનિક્ખિત્તા’’તિ. ‘‘એવમેવ ખો, ભિક્ખવે, અરિયસાવકસ્સ દિટ્ઠિસમ્પન્નસ્સ પુગ્ગલસ્સ અધિગમં ઉપનિધાય અઞ્ઞતિત્થિયસમણબ્રાહ્મણપરિબ્બાજકાનં અધિગમો નેવ સતિમં કલં ઉપેતિ ન સહસ્સિમં કલં ઉપેતિ ન સતસહસ્સિમં કલં ઉપેતિ. એવં મહાધિગમો, ભિક્ખવે, દિટ્ઠિસમ્પન્નો પુગ્ગલો, એવં મહાભિઞ્ઞો’’તિ. એકાદસમં.
‘‘Etadeva, bhante, bahutaraṃ yadidaṃ sineru pabbatarājā; appamattikā satta muggamattiyo pāsāṇasakkharā upanikkhittā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti sineruṃ pabbatarājānaṃ upanidhāya satta muggamattiyo pāsāṇasakkharā upanikkhittā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa adhigamaṃ upanidhāya aññatitthiyasamaṇabrāhmaṇaparibbājakānaṃ adhigamo neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti. Evaṃ mahādhigamo, bhikkhave, diṭṭhisampanno puggalo, evaṃ mahābhiñño’’ti. Ekādasamaṃ.
અભિસમયસંયુત્તં સમત્તં.
Abhisamayasaṃyuttaṃ samattaṃ.
તસ્સુદ્દાનં –
Tassuddānaṃ –
નખસિખા પોક્ખરણી, સમ્ભેજ્જઉદકે ચ દ્વે;
Nakhasikhā pokkharaṇī, sambhejjaudake ca dve;
દ્વે પથવી દ્વે સમુદ્દા, તયો ચ પબ્બતૂપમાતિ.
Dve pathavī dve samuddā, tayo ca pabbatūpamāti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૫. પથવીસુત્તાદિવણ્ણના • 5. Pathavīsuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૪. પથવીસુત્તાદિવણ્ણના • 4. Pathavīsuttādivaṇṇanā
