| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૦. તતિયસમણબ્રાહ્મણસુત્તં
10. Tatiyasamaṇabrāhmaṇasuttaṃ
૧૨૩. સાવત્થિયં વિહરતિ…પે॰… ‘‘યે હિ કેચિ, ભિક્ખવે, સમણા વા બ્રાહ્મણા વા પથવીધાતું નપ્પજાનન્તિ, પથવીધાતુસમુદયં નપ્પજાનન્તિ, પથવીધાતુનિરોધં નપ્પજાનન્તિ, પથવીધાતુનિરોધગામિનિં પટિપદં નપ્પજાનન્તિ…પે॰… આપોધાતું નપ્પજાનન્તિ… તેજોધાતું નપ્પજાનન્તિ… વાયોધાતું નપ્પજાનન્તિ, વાયોધાતુસમુદયં નપ્પજાનન્તિ, વાયોધાતુનિરોધં નપ્પજાનન્તિ, વાયોધાતુનિરોધગામિનિં પટિપદં નપ્પજાનન્તિ, ન મે તે, ભિક્ખવે, સમણા વા બ્રાહ્મણા વા સમણેસુ વા સમણસમ્મતા બ્રાહ્મણેસુ વા બ્રાહ્મણસમ્મતા; ન ચ પન તે આયસ્મન્તો સામઞ્ઞત્થં વા બ્રહ્મઞ્ઞત્થં વા દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરન્તિ’’.
123. Sāvatthiyaṃ viharati…pe… ‘‘ye hi keci, bhikkhave, samaṇā vā brāhmaṇā vā pathavīdhātuṃ nappajānanti, pathavīdhātusamudayaṃ nappajānanti, pathavīdhātunirodhaṃ nappajānanti, pathavīdhātunirodhagāminiṃ paṭipadaṃ nappajānanti…pe… āpodhātuṃ nappajānanti… tejodhātuṃ nappajānanti… vāyodhātuṃ nappajānanti, vāyodhātusamudayaṃ nappajānanti, vāyodhātunirodhaṃ nappajānanti, vāyodhātunirodhagāminiṃ paṭipadaṃ nappajānanti, na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā; na ca pana te āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti’’.
‘‘યે ચ ખો કેચિ, ભિક્ખવે, સમણા વા બ્રાહ્મણા વા પથવીધાતું પજાનન્તિ, પથવીધાતુસમુદયં પજાનન્તિ, પથવીધાતુનિરોધં પજાનન્તિ, પથવીધાતુનિરોધગામિનિં પટિપદં પજાનન્તિ… યે ચ ખો કેચિ, ભિક્ખવે, સમણા વા બ્રાહ્મણા વા…પે॰… આપોધાતું પજાનન્તિ… તેજોધાતું પજાનન્તિ… વાયોધાતું પજાનન્તિ, વાયોધાતુસમુદયં પજાનન્તિ, વાયોધાતુનિરોધં પજાનન્તિ, વાયોધાતુનિરોધગામિનિં પટિપદં પજાનન્તિ, તે ચ ખો મે, ભિક્ખવે, સમણા વા બ્રાહ્મણા વા સમણેસુ ચેવ સમણસમ્મતા બ્રાહ્મણેસુ ચ બ્રાહ્મણસમ્મતા; તે ચ પનાયસ્મન્તો સામઞ્ઞત્થઞ્ચ બ્રહ્મઞ્ઞત્થઞ્ચ દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરન્તી’’તિ. દસમં.
‘‘Ye ca kho keci, bhikkhave, samaṇā vā brāhmaṇā vā pathavīdhātuṃ pajānanti, pathavīdhātusamudayaṃ pajānanti, pathavīdhātunirodhaṃ pajānanti, pathavīdhātunirodhagāminiṃ paṭipadaṃ pajānanti… ye ca kho keci, bhikkhave, samaṇā vā brāhmaṇā vā…pe… āpodhātuṃ pajānanti… tejodhātuṃ pajānanti… vāyodhātuṃ pajānanti, vāyodhātusamudayaṃ pajānanti, vāyodhātunirodhaṃ pajānanti, vāyodhātunirodhagāminiṃ paṭipadaṃ pajānanti, te ca kho me, bhikkhave, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā; te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Dasamaṃ.
ચતુત્થો વગ્ગો.
Catuttho vaggo.
તસ્સુદ્દાનં –
Tassuddānaṃ –
ચતસ્સો પુબ્બે અચરિં, નોચેદઞ્ચ દુક્ખેન ચ;
Catasso pubbe acariṃ, nocedañca dukkhena ca;
અભિનન્દઞ્ચ ઉપ્પાદો, તયો સમણબ્રાહ્મણાતિ.
Abhinandañca uppādo, tayo samaṇabrāhmaṇāti.
ધાતુસંયુત્તં સમત્તં.
Dhātusaṃyuttaṃ samattaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૬-૧૦. અભિનન્દસુત્તાદિવણ્ણના • 6-10. Abhinandasuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૬-૧૦. અભિનન્દસુત્તાદિવણ્ણના • 6-10. Abhinandasuttādivaṇṇanā
