| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. தாயனஸுத்தவண்ணனா
8. Tāyanasuttavaṇṇanā
89. அதீதஜாதியங் ஸயங்காரவஸேன தாய தி³ட்டி²யா உப்பாதி³தத்தா புப்³பே³ தித்த²கரோ. தேனாஹ ‘‘தி³ட்டி² உப்பாதெ³த்வா’’தி. அபரே ஆஹு ‘‘அயங் மே ஸத்தா²தி க³ஹணவஸேன தித்த²கரோ அஸ்ஸ அத்தீ²தி புப்³பே³ தித்த²கரோ, அதீதத்தபா⁴வே தித்த²கரஸாவகோ’’தி. தே ‘‘தி³ட்டி²ங் உப்பாதெ³த்வாதி தஸ்ஸ ஸத்து²னோ தி³ட்டி²ங் ஆதா³ய க³ஹெத்வாதி அத்தோ²’’தி வத³ந்தி. தித்த²ங் நாம த்³வாஸட்டி² தி³ட்டி²யோ தப்³பி³னிமுத்தஸ்ஸ மிச்சா²வாத³ஸ்ஸ அபா⁴வதோ. தித்தே² நியுத்தாதி தித்தி²கா, தே ஏவ தித்தி²யாதி வுத்தா க-காரஸ்ஸ ய-காரங் கத்வா. தஸ்ஸாதி யதா²வுத்தஸ்ஸ கல்யாணகம்மஸ்ஸ. நிஸ்ஸந்தே³னாதி ப²லபா⁴வேன. வீரியப்படிஸங்யுத்தாதி வீரியதீ³பனாதி அத்தோ².
89. Atītajātiyaṃ sayaṃkāravasena tāya diṭṭhiyā uppāditattā pubbe titthakaro. Tenāha ‘‘diṭṭhi uppādetvā’’ti. Apare āhu ‘‘ayaṃ me satthāti gahaṇavasena titthakaro assa atthīti pubbe titthakaro, atītattabhāve titthakarasāvako’’ti. Te ‘‘diṭṭhiṃ uppādetvāti tassa satthuno diṭṭhiṃ ādāya gahetvāti attho’’ti vadanti. Titthaṃ nāma dvāsaṭṭhi diṭṭhiyo tabbinimuttassa micchāvādassa abhāvato. Titthe niyuttāti titthikā, te eva titthiyāti vuttā ka-kārassa ya-kāraṃ katvā. Tassāti yathāvuttassa kalyāṇakammassa. Nissandenāti phalabhāvena. Vīriyappaṭisaṃyuttāti vīriyadīpanāti attho.
அனியமிதஆணத்தீதி அனியமவிதா⁴னங் அனியமவஸேன விதி⁴வசனங். தண்ஹாஸோதந்தி தண்ஹாப்பப³ந்த⁴னங். நீஹராதி ஸமேஹி பஜஹ. ஏகத்தந்தி ஏகக்³க³ங். தேனாஹ ‘‘ஜா²ன’’ந்தி. உபபஜ்ஜதீதி ந உப்பஜ்ஜதி ந பாபுணாதீதி ஆஹ ‘‘ந படிலப⁴தீ’’தி. ந ஓஸக்கெய்யாதி ந ஸங்கோசங் ஆபஜ்ஜெய்ய. க⁴ராவாஸதோ பரிப்³ப³ஜனங் பரிதோ அபக³மோதி பரிப்³ப³ஜோ. பப்³ப³ஜிதவதஸமாதா³னஸ்ஸ அத³ள்ஹதாய ச தத்த² ச அஸக்கச்சகிரியாய ஸிதி²லக³ஹிதா. அதிரேகந்தி பப்³ப³ஜ்ஜாய புரிமகாலதோபி அதி⁴கங். உபரீதி உபரூபரி. து³க்கடங் அகதமேவ ஸெய்யோதி து³ச்சரிதங் நாம ஸப்³பே³ன ஸப்³ப³ங் அகதமேவ ஹிதாவஹங்.
Aniyamitaāṇattīti aniyamavidhānaṃ aniyamavasena vidhivacanaṃ. Taṇhāsotanti taṇhāppabandhanaṃ. Nīharāti samehi pajaha. Ekattanti ekaggaṃ. Tenāha ‘‘jhāna’’nti. Upapajjatīti na uppajjati na pāpuṇātīti āha ‘‘na paṭilabhatī’’ti. Na osakkeyyāti na saṅkocaṃ āpajjeyya. Gharāvāsato paribbajanaṃ parito apagamoti paribbajo. Pabbajitavatasamādānassa adaḷhatāya ca tattha ca asakkaccakiriyāya sithilagahitā. Atirekanti pabbajjāya purimakālatopi adhikaṃ. Uparīti uparūpari. Dukkaṭaṃ akatameva seyyoti duccaritaṃ nāma sabbena sabbaṃ akatameva hitāvahaṃ.
யங் கிஞ்சீதி யங் கிஞ்சி கம்மங். ஸிதி²லங் கதந்தி அஸக்கச்சகாரிதாய ஸிதி²லங் கத்வா பவத்திதங். ஏவரூபமேவாதி ஏவரூபங் பராமட்ட²ஸாமஞ்ஞஸதி³ஸமேவ பச்சா²னுதாபசரியாதி³படிபா⁴க³தோ. ஸங்கிலிட்ட²மேவ தண்ஹாஸங்கிலேஸஉபக்கிலிட்ட²த்தா. ஆஸங்கிதபரிஸங்கிதந்திஆதி³தோ ஸமந்ததோபி பரேஹி ஸங்கிதங். ப்³ரஹ்மசரியஸ்ஸ ஆதி³ ஆதி³ப்³ரஹ்மசரியங், தத்த² நியுத்தாதி ஆதி³ப்³ரஹ்மசரியிகா, மக்³க³ப்³ரஹ்மசரியஸ்ஸ புப்³ப³பா⁴க³படிபதா³தி அத்தோ². தேனாஹ ‘‘மக்³க³ப்³ரஹ்மசரியஸ்ஸ ஆதி³பூ⁴தா’’தி. புப்³ப³பதா⁴னபூ⁴தாதி பட²மாரம்ப⁴பூ⁴தா.
Yaṃ kiñcīti yaṃ kiñci kammaṃ. Sithilaṃ katanti asakkaccakāritāya sithilaṃ katvā pavattitaṃ. Evarūpamevāti evarūpaṃ parāmaṭṭhasāmaññasadisameva pacchānutāpacariyādipaṭibhāgato. Saṃkiliṭṭhameva taṇhāsaṃkilesaupakkiliṭṭhattā. Āsaṅkitaparisaṅkitantiādito samantatopi parehi saṅkitaṃ. Brahmacariyassa ādi ādibrahmacariyaṃ, tattha niyuttāti ādibrahmacariyikā, maggabrahmacariyassa pubbabhāgapaṭipadāti attho. Tenāha ‘‘maggabrahmacariyassa ādibhūtā’’ti. Pubbapadhānabhūtāti paṭhamārambhabhūtā.
தாயனஸுத்தவண்ணனா நிட்டி²தா.
Tāyanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. தாயனஸுத்தங் • 8. Tāyanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. தாயனஸுத்தவண்ணனா • 8. Tāyanasuttavaṇṇanā
