| Library / Tipiṭaka / તિપિટક • Tipiṭaka / પઞ્ચપકરણ-અનુટીકા • Pañcapakaraṇa-anuṭīkā |
૧૩. તેરસમનયો અસઙ્ગહિતેનસમ્પયુત્તવિપ્પયુત્તપદવણ્ણના
13. Terasamanayo asaṅgahitenasampayuttavippayuttapadavaṇṇanā
૪૪૮. યેહીતિ રૂપક્ખન્ધધમ્માયતનાદીહિ. તીહિપિ ખન્ધાયતનાદિસઙ્ગહેહિ. પુન યેહીતિ અરૂપભવાદીહિ. ઓળારિકાયતનાનેવ હોન્તિ આયતનધાતુસઙ્ગહેહિપિ અસઙ્ગહિતત્તા. તેતિ ચતુવોકારભવાદયો. વુત્તાવસેસાતિ રૂપક્ખન્ધધમ્માયતનાદીહિ અવસિટ્ઠા. સતિપિ અસઙ્ગાહકત્તે તેહિ અસઙ્ગહિતાનં સમ્પયોગો ન સમ્ભવતીતિ વેદનાક્ખન્ધાદયો ઇધ તેરસમનયે વિસ્સજ્જનં ન રુહન્તિ નારોહન્તિ. તેનાહ અટ્ઠકથાયં ‘‘વેદનાક્ખન્ધેન હિ ખન્ધાદિવસેન રૂપારૂપધમ્મા અસઙ્ગહિતા હોન્તિ, તેસઞ્ચ સમ્પયોગો નામ નત્થી’’તિ (ધાતુ॰ ૪૪૮) અસઙ્ગાહકા એવ ન હોન્તિ અવિકલપઞ્ચક્ખન્ધાદિસમુદાયભાવતો.
448. Yehīti rūpakkhandhadhammāyatanādīhi. Tīhipi khandhāyatanādisaṅgahehi. Puna yehīti arūpabhavādīhi. Oḷārikāyatanāneva honti āyatanadhātusaṅgahehipi asaṅgahitattā. Teti catuvokārabhavādayo. Vuttāvasesāti rūpakkhandhadhammāyatanādīhi avasiṭṭhā. Satipi asaṅgāhakatte tehi asaṅgahitānaṃ sampayogo na sambhavatīti vedanākkhandhādayo idha terasamanaye vissajjanaṃ na ruhanti nārohanti. Tenāha aṭṭhakathāyaṃ ‘‘vedanākkhandhena hi khandhādivasena rūpārūpadhammā asaṅgahitā honti, tesañca sampayogo nāma natthī’’ti (dhātu. 448) asaṅgāhakā eva na honti avikalapañcakkhandhādisamudāyabhāvato.
તેતિ ‘‘દુક્ખસચ્ચાદી’’તિ આદિ-સદ્દેન વુત્તધમ્મા. અસબ્બ…પે॰… સિયું અવિતક્કાવિચારાદિધમ્મા વિય. ન તેસં વિપ્પયોગો નત્થિ તબ્બિનિમુત્તસ્સ ચિત્તુપ્પાદસ્સ સમ્ભવતો. વેદનાક્ખન્ધેન અસઙ્ગહિતાનં અનારમ્મણમિસ્સકત્તા ન ‘‘વિપ્પયોગસ્સ અત્થિતાયા’’તિ વુત્તં. તથા ચાહ ‘‘રૂપારૂપધમ્મા અસઙ્ગહિતા’’તિ. ઉભયાભાવતોતિ સમ્પયોગવિપ્પયોગાભાવતો. અનારમ્મણસહિતસબ્બવિઞ્ઞાણતંધાતુસમ્પયુત્તતદુભયધમ્મા અચેતસિકચેતસિકલોકિયપદાદીનં વસેન વેદિતબ્બા.
Teti ‘‘dukkhasaccādī’’ti ādi-saddena vuttadhammā. Asabba…pe… siyuṃ avitakkāvicārādidhammā viya. Na tesaṃ vippayogo natthi tabbinimuttassa cittuppādassa sambhavato. Vedanākkhandhena asaṅgahitānaṃ anārammaṇamissakattā na ‘‘vippayogassa atthitāyā’’ti vuttaṃ. Tathā cāha ‘‘rūpārūpadhammā asaṅgahitā’’ti. Ubhayābhāvatoti sampayogavippayogābhāvato. Anārammaṇasahitasabbaviññāṇataṃdhātusampayuttatadubhayadhammā acetasikacetasikalokiyapadādīnaṃ vasena veditabbā.
તેરસમનયઅસઙ્ગહિતેનસમ્પયુત્તવિપ્પયુત્તપદવણ્ણના નિટ્ઠિતા.
Terasamanayaasaṅgahitenasampayuttavippayuttapadavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / ધાતુકથાપાળિ • Dhātukathāpāḷi / ૧૩. અસઙ્ગહિતેનસમ્પયુત્તવિપ્પયુત્તપદનિદ્દેસો • 13. Asaṅgahitenasampayuttavippayuttapadaniddeso
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧૩. તેરસમનયો અસઙ્ગહિતેનસમ્પયુત્તવિપ્પયુત્તપદવણ્ણના • 13. Terasamanayo asaṅgahitenasampayuttavippayuttapadavaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૧૩. તેરસમનયો અસઙ્ગહિતેનસમ્પયુત્તવિપ્પયુત્તપદવણ્ણના • 13. Terasamanayo asaṅgahitenasampayuttavippayuttapadavaṇṇanā
