| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
3. பரிப்³பா³ஜகவக்³கோ³
3. Paribbājakavaggo
1. தேவிஜ்ஜவச்ச²ஸுத்தங்
1. Tevijjavacchasuttaṃ
185. ஏவங் மே ஸுதங் – ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். தேன கோ² பன ஸமயேன வச்ச²கொ³த்தோ பரிப்³பா³ஜகோ ஏகபுண்ட³ரீகே பரிப்³பா³ஜகாராமே படிவஸதி. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய வேஸாலிங் பிண்டா³ய பாவிஸி. அத² கோ² ப⁴க³வதோ ஏதத³ஹோஸி – ‘‘அதிப்பகோ³ கோ² தாவ வேஸாலியங் பிண்டா³ய சரிதுங்; யங்னூனாஹங் யேன ஏகபுண்ட³ரீகோ பரிப்³பா³ஜகாராமோ யேன வச்ச²கொ³த்தோ பரிப்³பா³ஜகோ தேனுபஸங்கமெய்ய’’ந்தி. அத² கோ² ப⁴க³வா யேன ஏகபுண்ட³ரீகோ பரிப்³பா³ஜகாராமோ யேன வச்ச²கொ³த்தோ பரிப்³பா³ஜகோ தேனுபஸங்கமி. அத்³த³ஸா கோ² வச்ச²கொ³த்தோ பரிப்³பா³ஜகோ ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான ப⁴க³வந்தங் ஏதத³வோச – ‘‘ஏது கோ², ப⁴ந்தே, ப⁴க³வா. ஸ்வாக³தங் 1, ப⁴ந்தே, ப⁴க³வதோ. சிரஸ்ஸங் கோ², ப⁴ந்தே, ப⁴க³வா இமங் பரியாயமகாஸி யதி³த³ங் இதா⁴க³மனாய. நிஸீத³து, ப⁴ந்தே, ப⁴க³வா இத³மாஸனங் பஞ்ஞத்த’’ந்தி. நிஸீதி³ ப⁴க³வா பஞ்ஞத்தே ஆஸனே. வச்ச²கொ³த்தோபி கோ² பரிப்³பா³ஜகோ அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங் நிஸின்னோ கோ² வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘ஸுதங் மேதங், ப⁴ந்தே – ‘ஸமணோ கோ³தமோ ஸப்³ப³ஞ்ஞூ ஸப்³ப³த³ஸ்ஸாவீ, அபரிஸே+ஸங் ஞாணத³ஸ்ஸனங் படிஜானாதி, சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங் பச்சுபட்டி²த’ந்தி. யே தே, ப⁴ந்தே, ஏவமாஹங்ஸு – ‘ஸமணோ கோ³தமோ ஸப்³ப³ஞ்ஞூ ஸப்³ப³த³ஸ்ஸாவீ, அபரிஸேஸங் ஞாணத³ஸ்ஸனங் படிஜானாதி, சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங் பச்சுபட்டி²த’ந்தி, கச்சி தே, ப⁴ந்தே, ப⁴க³வதோ வுத்தவாதி³னோ, ந ச ப⁴க³வந்தங் அபூ⁴தேன அப்³பா⁴சிக்க²ந்தி, த⁴ம்மஸ்ஸ சானுத⁴ம்மங் ப்³யாகரொந்தி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்ச²தீ’’தி? ‘‘யே தே, வச்ச², ஏவமாஹங்ஸு – ‘ஸமணோ கோ³தமோ ஸப்³ப³ஞ்ஞூ ஸப்³ப³த³ஸ்ஸாவீ, அபரிஸேஸங் ஞாணத³ஸ்ஸனங் படிஜானாதி, சரதோ ச மே திட்ட²தோ ச ஸுத்தஸ்ஸ ச ஜாக³ரஸ்ஸ ச ஸததங் ஸமிதங் ஞாணத³ஸ்ஸனங் பச்சுபட்டி²த’ந்தி, ந மே தே வுத்தவாதி³னோ, அப்³பா⁴சிக்க²ந்தி ச பன மங் அஸதா அபூ⁴தேனா’’தி.
185. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Tena kho pana samayena vacchagotto paribbājako ekapuṇḍarīke paribbājakārāme paṭivasati. Atha kho bhagavā pubbaṇhasamayaṃ nivāsetvā pattacīvaramādāya vesāliṃ piṇḍāya pāvisi. Atha kho bhagavato etadahosi – ‘‘atippago kho tāva vesāliyaṃ piṇḍāya carituṃ; yaṃnūnāhaṃ yena ekapuṇḍarīko paribbājakārāmo yena vacchagotto paribbājako tenupasaṅkameyya’’nti. Atha kho bhagavā yena ekapuṇḍarīko paribbājakārāmo yena vacchagotto paribbājako tenupasaṅkami. Addasā kho vacchagotto paribbājako bhagavantaṃ dūratova āgacchantaṃ. Disvāna bhagavantaṃ etadavoca – ‘‘etu kho, bhante, bhagavā. Svāgataṃ 2, bhante, bhagavato. Cirassaṃ kho, bhante, bhagavā imaṃ pariyāyamakāsi yadidaṃ idhāgamanāya. Nisīdatu, bhante, bhagavā idamāsanaṃ paññatta’’nti. Nisīdi bhagavā paññatte āsane. Vacchagottopi kho paribbājako aññataraṃ nīcaṃ āsanaṃ gahetvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘sutaṃ metaṃ, bhante – ‘samaṇo gotamo sabbaññū sabbadassāvī, aparise+saṃ ñāṇadassanaṃ paṭijānāti, carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhita’nti. Ye te, bhante, evamāhaṃsu – ‘samaṇo gotamo sabbaññū sabbadassāvī, aparisesaṃ ñāṇadassanaṃ paṭijānāti, carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhita’nti, kacci te, bhante, bhagavato vuttavādino, na ca bhagavantaṃ abhūtena abbhācikkhanti, dhammassa cānudhammaṃ byākaronti, na ca koci sahadhammiko vādānuvādo gārayhaṃ ṭhānaṃ āgacchatī’’ti? ‘‘Ye te, vaccha, evamāhaṃsu – ‘samaṇo gotamo sabbaññū sabbadassāvī, aparisesaṃ ñāṇadassanaṃ paṭijānāti, carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhita’nti, na me te vuttavādino, abbhācikkhanti ca pana maṃ asatā abhūtenā’’ti.
186. ‘‘கத²ங் ப்³யாகரமானா பன மயங், ப⁴ந்தே, வுத்தவாதி³னோ சேவ ப⁴க³வதோ அஸ்ஸாம, ந ச ப⁴க³வந்தங் அபூ⁴தேன அப்³பா⁴சிக்கெ²ய்யாம, த⁴ம்மஸ்ஸ சானுத⁴ம்மங் ப்³யாகரெய்யாம, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்செ²ய்யா’’தி?
186. ‘‘Kathaṃ byākaramānā pana mayaṃ, bhante, vuttavādino ceva bhagavato assāma, na ca bhagavantaṃ abhūtena abbhācikkheyyāma, dhammassa cānudhammaṃ byākareyyāma, na ca koci sahadhammiko vādānuvādo gārayhaṃ ṭhānaṃ āgaccheyyā’’ti?
‘‘‘தேவிஜ்ஜோ ஸமணோ கோ³தமோ’தி கோ², வச்ச², ப்³யாகரமானோ வுத்தவாதீ³ சேவ மே அஸ்ஸ, ந ச மங் அபூ⁴தேன அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்செ²ய்ய. அஹஞ்ஹி, வச்ச², யாவதே³வ ஆகங்கா²மி அனேகவிஹிதங் புப்³பே³னிவாஸங் அனுஸ்ஸராமி, ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸராமி. அஹஞ்ஹி, வச்ச², யாவதே³வ ஆகங்கா²மி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே…பே॰… யதா²கம்மூபகே³ ஸத்தே பஜானாமி. அஹஞ்ஹி, வச்ச², ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி.
‘‘‘Tevijjo samaṇo gotamo’ti kho, vaccha, byākaramāno vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānuvādo gārayhaṃ ṭhānaṃ āgaccheyya. Ahañhi, vaccha, yāvadeva ākaṅkhāmi anekavihitaṃ pubbenivāsaṃ anussarāmi, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarāmi. Ahañhi, vaccha, yāvadeva ākaṅkhāmi dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate…pe… yathākammūpage satte pajānāmi. Ahañhi, vaccha, āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharāmi.
‘‘‘தேவிஜ்ஜோ ஸமணோ கோ³தமோ’தி கோ², வச்ச², ப்³யாகரமானோ வுத்தவாதீ³ சேவ மே அஸ்ஸ, ந ச மங் அபூ⁴தேன அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்செ²ய்யா’’தி.
‘‘‘Tevijjo samaṇo gotamo’ti kho, vaccha, byākaramāno vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānuvādo gārayhaṃ ṭhānaṃ āgaccheyyā’’ti.
ஏவங் வுத்தே, வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘அத்தி² நு கோ², போ⁴ கோ³தம, கோசி கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ து³க்க²ஸ்ஸந்தகரோ’’தி? ‘‘நத்தி² கோ², வச்ச², கோசி கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ து³க்க²ஸ்ஸந்தகரோ’’தி.
Evaṃ vutte, vacchagotto paribbājako bhagavantaṃ etadavoca – ‘‘atthi nu kho, bho gotama, koci gihī gihisaṃyojanaṃ appahāya kāyassa bhedā dukkhassantakaro’’ti? ‘‘Natthi kho, vaccha, koci gihī gihisaṃyojanaṃ appahāya kāyassa bhedā dukkhassantakaro’’ti.
‘‘அத்தி² பன, போ⁴ கோ³தம, கோசி கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ ஸக்³கூ³பகோ³’’தி? ‘‘ந கோ², வச்ச², ஏகங்யேவ ஸதங் ந த்³வே ஸதானி ந தீணி ஸதானி ந சத்தாரி ஸதானி ந பஞ்ச ஸதானி, அத² கோ² பி⁴ய்யோவ யே கி³ஹீ கி³ஹிஸங்யோஜனங் அப்பஹாய காயஸ்ஸ பே⁴தா³ ஸக்³கூ³பகா³’’தி 3.
‘‘Atthi pana, bho gotama, koci gihī gihisaṃyojanaṃ appahāya kāyassa bhedā saggūpago’’ti? ‘‘Na kho, vaccha, ekaṃyeva sataṃ na dve satāni na tīṇi satāni na cattāri satāni na pañca satāni, atha kho bhiyyova ye gihī gihisaṃyojanaṃ appahāya kāyassa bhedā saggūpagā’’ti 4.
‘‘அத்தி² நு கோ², போ⁴ கோ³தம, கோசி ஆஜீவகோ 5 காயஸ்ஸ பே⁴தா³ து³க்க²ஸ்ஸந்தகரோ’’தி? ‘‘நத்தி² கோ², வச்ச², கோசி ஆஜீவகோ காயஸ்ஸ பே⁴தா³ து³க்க²ஸ்ஸந்தகரோ’’தி.
‘‘Atthi nu kho, bho gotama, koci ājīvako 6 kāyassa bhedā dukkhassantakaro’’ti? ‘‘Natthi kho, vaccha, koci ājīvako kāyassa bhedā dukkhassantakaro’’ti.
‘‘அத்தி² பன, போ⁴ கோ³தம, கோசி ஆஜீவகோ காயஸ்ஸ பே⁴தா³ ஸக்³கூ³பகோ³’’தி? ‘‘இதோ கோ² ஸோ, வச்ச², ஏகனவுதோ கப்போ 7 யமஹங் அனுஸ்ஸராமி, நாபி⁴ஜானாமி கஞ்சி ஆஜீவகங் ஸக்³கூ³பக³ங் அஞ்ஞத்ர ஏகேன; ஸோபாஸி கம்மவாதீ³ கிரியவாதீ³’’தி. ‘‘ஏவங் ஸந்தே, போ⁴ கோ³தம, ஸுஞ்ஞங் அது³ங் தித்தா²யதனங் அந்தமஸோ ஸக்³கூ³பகே³னபீ’’தி? ‘‘ஏவங், வச்ச², ஸுஞ்ஞங் அது³ங் தித்தா²யதனங் அந்தமஸோ ஸக்³கூ³பகே³னபீ’’தி.
‘‘Atthi pana, bho gotama, koci ājīvako kāyassa bhedā saggūpago’’ti? ‘‘Ito kho so, vaccha, ekanavuto kappo 8 yamahaṃ anussarāmi, nābhijānāmi kañci ājīvakaṃ saggūpagaṃ aññatra ekena; sopāsi kammavādī kiriyavādī’’ti. ‘‘Evaṃ sante, bho gotama, suññaṃ aduṃ titthāyatanaṃ antamaso saggūpagenapī’’ti? ‘‘Evaṃ, vaccha, suññaṃ aduṃ titthāyatanaṃ antamaso saggūpagenapī’’ti.
இத³மவோச ப⁴க³வா. அத்தமனோ வச்ச²கொ³த்தோ பரிப்³பா³ஜகோ ப⁴க³வதோ பா⁴ஸிதங் அபி⁴னந்தீ³தி.
Idamavoca bhagavā. Attamano vacchagotto paribbājako bhagavato bhāsitaṃ abhinandīti.
தேவிஜ்ஜவச்ச²ஸுத்தங் நிட்டி²தங் பட²மங்.
Tevijjavacchasuttaṃ niṭṭhitaṃ paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 1. தேவிஜ்ஜவச்ச²ஸுத்தவண்ணனா • 1. Tevijjavacchasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. தேவிஜ்ஜவச்ச²ஸுத்தவண்ணனா • 1. Tevijjavacchasuttavaṇṇanā
