| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. பரிப்³பா³ஜகவக்³கோ³
3. Paribbājakavaggo
1. தேவிஜ்ஜவச்ச²ஸுத்தவண்ணனா
1. Tevijjavacchasuttavaṇṇanā
185. ஏவங் மே ஸுதந்தி தேவிஜ்ஜவச்ச²ஸுத்தங். தத்த² ஏகபுண்ட³ரீகேதி புண்ட³ரீகோ வுச்சதி ஸேதம்ப³ருக்கோ², ஸோ தஸ்மிங் ஆராமே ஏகோ புண்ட³ரீகோ அத்தீ²தி ஏகபுண்ட³ரீகோ. ஏதத³ஹோஸீதி தத்த² பவிஸிதுகாமதாய அஹோஸி. சிரஸ்ஸங் கோ², ப⁴ந்தேதி பகதியா ஆக³தபுப்³ப³தங் உபாதா³ய. த⁴ம்மஸ்ஸ சானுத⁴ம்மந்தி இத⁴ ஸப்³ப³ஞ்ஞுதஞ்ஞாணங் த⁴ம்மோ நாம, மஹாஜனஸ்ஸ ப்³யாகரணங் அனுத⁴ம்மோ நாம. ஸேஸங் ஜீவகஸுத்தே (ம॰ நி॰ 2.51 ஆத³யோ) வுத்தனயமேவ. ந மே தேதி அனநுஞ்ஞாய ட²த்வா அனுஞ்ஞம்பி படிக்கி²பதி. ‘‘ஸப்³ப³ஞ்ஞூ ஸப்³ப³த³ஸ்ஸாவீ அபரிஸேஸங் ஞாணத³ஸ்ஸனங் படிஜானாதீ’’தி ஹி இத³ங் அனுஜானிதப்³ப³ங் ஸியா, – ‘‘சரதோ ச மே…பே॰… பச்சுபட்டி²த’’ந்தி இத³ங் பன நானுஜானிதப்³ப³ங். ஸப்³ப³ஞ்ஞுதஞ்ஞாணேன ஹி ஆவஜ்ஜித்வா பஜானாதி. தஸ்மா அனநுஞ்ஞாய ட²த்வா அனுஞ்ஞம்பி படிக்கி²பந்தோ ஏவமாஹ.
185.Evaṃme sutanti tevijjavacchasuttaṃ. Tattha ekapuṇḍarīketi puṇḍarīko vuccati setambarukkho, so tasmiṃ ārāme eko puṇḍarīko atthīti ekapuṇḍarīko. Etadahosīti tattha pavisitukāmatāya ahosi. Cirassaṃ kho, bhanteti pakatiyā āgatapubbataṃ upādāya. Dhammassa cānudhammanti idha sabbaññutaññāṇaṃ dhammo nāma, mahājanassa byākaraṇaṃ anudhammo nāma. Sesaṃ jīvakasutte (ma. ni. 2.51 ādayo) vuttanayameva. Na me teti ananuññāya ṭhatvā anuññampi paṭikkhipati. ‘‘Sabbaññū sabbadassāvī aparisesaṃ ñāṇadassanaṃ paṭijānātī’’ti hi idaṃ anujānitabbaṃ siyā, – ‘‘carato ca me…pe… paccupaṭṭhita’’nti idaṃ pana nānujānitabbaṃ. Sabbaññutaññāṇena hi āvajjitvā pajānāti. Tasmā ananuññāya ṭhatvā anuññampi paṭikkhipanto evamāha.
186. ஆஸவானங் க²யாதி எத்த² ஸகிங் கீ²ணானங் ஆஸவானங் புன கே²பேதப்³பா³பா⁴வா யாவதே³வாதி ந வுத்தங். புப்³பே³னிவாஸஞாணேன செத்த² ப⁴க³வா அதீதஜானநகு³ணங் த³ஸ்ஸேதி, தி³ப்³ப³சக்கு²ஞாணேன பச்சுப்பன்னஜானநகு³ணங், ஆஸவக்க²யஞாணேன லோகுத்தரகு³ணந்தி. இதி இமாஹி தீஹி விஜ்ஜாஹி ஸகலபு³த்³த⁴கு³ணே ஸங்கி²பித்வா கதே²ஸி.
186.Āsavānaṃ khayāti ettha sakiṃ khīṇānaṃ āsavānaṃ puna khepetabbābhāvā yāvadevāti na vuttaṃ. Pubbenivāsañāṇena cettha bhagavā atītajānanaguṇaṃ dasseti, dibbacakkhuñāṇena paccuppannajānanaguṇaṃ, āsavakkhayañāṇena lokuttaraguṇanti. Iti imāhi tīhi vijjāhi sakalabuddhaguṇe saṃkhipitvā kathesi.
கி³ஹிஸங்யோஜனந்தி கி³ஹிப³ந்த⁴னங் கி³ஹிபரிக்கா²ரேஸு நிகந்திங். நத்தி² கோ² வச்சா²தி கி³ஹிஸங்யோஜனங் அப்பஹாய து³க்க²ஸ்ஸந்தகரோ நாம நத்தி². யேபி ஹி ஸந்ததிமஹாமத்தோ உக்³க³ஸேனோ ஸெட்டி²புத்தோ வீதஸோகதா³ரகோதி கி³ஹிலிங்கே³ டி²தாவ அரஹத்தங் பத்தா, தேபி மக்³கே³ன ஸப்³ப³ஸங்கா²ரேஸு நிகந்திங் ஸுக்கா²பெத்வா பத்தா. தங் பத்வா பன ந தேன லிங்கே³ன அட்ட²ங்ஸு, கி³ஹிலிங்க³ங் நாமேதங் ஹீனங், உத்தமகு³ணங் தா⁴ரேதுங் ந ஸக்கோதி. தஸ்மா தத்த² டி²தோ அரஹத்தங் பத்வா தங்தி³வஸமேவ பப்³ப³ஜதி வா பரினிப்³பா³தி வா. பூ⁴மதே³வதா பன திட்ட²ந்தி. கஸ்மா? நிலீயனோகாஸஸ்ஸ அத்தி²தாய. ஸேஸகாமப⁴வே மனுஸ்ஸேஸு ஸோதாபன்னாத³யோ தயோ திட்ட²ந்தி, காமாவசரதே³வேஸு ஸோதாபன்னா ஸகதா³கா³மினோ ச, அனாகா³மிகீ²ணாஸவா பனெத்த² ந திட்ட²ந்தி. கஸ்மா? தஞ்ஹி டா²னங் லளிதஜனஸ்ஸ ஆவாஸோ, நத்தி² தத்த² தேஸங் பவிவேகாரஹங் படிச்ச²ன்னட்டா²னஞ்ச. இதி தத்த² கீ²ணாஸவோ பரினிப்³பா³தி, அனாகா³மீ சவித்வா ஸுத்³தா⁴வாஸே நிப்³ப³த்ததி. காமாவசரதே³வதோ உபரி பன சத்தாரோபி அரியா திட்ட²ந்தி.
Gihisaṃyojananti gihibandhanaṃ gihiparikkhāresu nikantiṃ. Natthi kho vacchāti gihisaṃyojanaṃ appahāya dukkhassantakaro nāma natthi. Yepi hi santatimahāmatto uggaseno seṭṭhiputto vītasokadārakoti gihiliṅge ṭhitāva arahattaṃ pattā, tepi maggena sabbasaṅkhāresu nikantiṃ sukkhāpetvā pattā. Taṃ patvā pana na tena liṅgena aṭṭhaṃsu, gihiliṅgaṃ nāmetaṃ hīnaṃ, uttamaguṇaṃ dhāretuṃ na sakkoti. Tasmā tattha ṭhito arahattaṃ patvā taṃdivasameva pabbajati vā parinibbāti vā. Bhūmadevatā pana tiṭṭhanti. Kasmā? Nilīyanokāsassa atthitāya. Sesakāmabhave manussesu sotāpannādayo tayo tiṭṭhanti, kāmāvacaradevesu sotāpannā sakadāgāmino ca, anāgāmikhīṇāsavā panettha na tiṭṭhanti. Kasmā? Tañhi ṭhānaṃ laḷitajanassa āvāso, natthi tattha tesaṃ pavivekārahaṃ paṭicchannaṭṭhānañca. Iti tattha khīṇāsavo parinibbāti, anāgāmī cavitvā suddhāvāse nibbattati. Kāmāvacaradevato upari pana cattāropi ariyā tiṭṭhanti.
ஸோபாஸி கம்மவாதீ³தி ஸோபி கம்மவாதீ³ அஹோஸி, கிரியம்பி ந படிபா³ஹித்த². தஞ்ஹி ஏகனவுதிகப்பமத்த²கே அத்தானங்யேவ க³ஹெத்வா கதே²தி. ததா³ கிர மஹாஸத்தோ பாஸண்ட³பரிக்³க³ண்ஹனத்த²ங் பப்³ப³ஜிதோ தஸ்ஸபி பாஸண்ட³ஸ்ஸ நிப்ப²லபா⁴வங் ஜானித்வா வீரியங் ந ஹாபேஸி, கிரியவாதீ³ ஹுத்வா ஸக்³கே³ நிப்³ப³த்ததி. தஸ்மா ஏவமாஹ. ஸேஸங் ஸப்³ப³த்த² உத்தானமேவாதி.
Sopāsi kammavādīti sopi kammavādī ahosi, kiriyampi na paṭibāhittha. Tañhi ekanavutikappamatthake attānaṃyeva gahetvā katheti. Tadā kira mahāsatto pāsaṇḍapariggaṇhanatthaṃ pabbajito tassapi pāsaṇḍassa nipphalabhāvaṃ jānitvā vīriyaṃ na hāpesi, kiriyavādī hutvā sagge nibbattati. Tasmā evamāha. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
தேவிஜ்ஜவச்ச²ஸுத்தவண்ணனா நிட்டி²தா.
Tevijjavacchasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. தேவிஜ்ஜவச்ச²ஸுத்தங் • 1. Tevijjavacchasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. தேவிஜ்ஜவச்ச²ஸுத்தவண்ணனா • 1. Tevijjavacchasuttavaṇṇanā
