| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. தே²ரஸுத்தங்
8. Therasuttaṃ
88. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ தே²ரோ பி⁴க்கு² ப³ஹுஜனஅஹிதாய படிபன்னோ ஹோதி ப³ஹுஜனஅஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானங்.
88. ‘‘Pañcahi, bhikkhave, dhammehi samannāgato thero bhikkhu bahujanaahitāya paṭipanno hoti bahujanaasukhāya bahuno janassa anatthāya ahitāya dukkhāya devamanussānaṃ.
‘‘கதமேஹி பஞ்சஹி? தே²ரோ ஹோதி ரத்தஞ்ஞூ சிரபப்³ப³ஜிதோ; ஞாதோ ஹோதி யஸஸ்ஸீ ஸக³ஹட்ட²பப்³ப³ஜிதானங் 1 ப³ஹுஜனபரிவாரோ; லாபீ⁴ ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானங்; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா அப்படிவித்³தா⁴; மிச்சா²தி³ட்டி²கோ ஹோதி விபரீதத³ஸ்ஸனோ, ஸோ ப³ஹுஜனங் ஸத்³த⁴ம்மா வுட்டா²பெத்வா அஸத்³த⁴ம்மே பதிட்டா²பேதி. தே²ரோ பி⁴க்கு² ரத்தஞ்ஞூ சிரபப்³ப³ஜிதோ இதிபிஸ்ஸ தி³ட்டா²னுக³திங் ஆபஜ்ஜந்தி , ஞாதோ தே²ரோ பி⁴க்கு² யஸஸ்ஸீ ஸக³ஹட்ட²பப்³ப³ஜிதானங் ப³ஹுஜனபரிவாரோ இதிபிஸ்ஸ தி³ட்டா²னுக³திங் ஆபஜ்ஜந்தி, லாபீ⁴ தே²ரோ பி⁴க்கு² சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானங் இதிபிஸ்ஸ தி³ட்டா²னுக³திங் ஆபஜ்ஜந்தி, ப³ஹுஸ்ஸுதோ தே²ரோ பி⁴க்கு² ஸுதத⁴ரோ ஸுதஸன்னிசயோ இதிபிஸ்ஸ தி³ட்டா²னுக³திங் ஆபஜ்ஜந்தி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ தே²ரோ பி⁴க்கு² ப³ஹுஜனஅஹிதாய படிபன்னோ ஹோதி ப³ஹுஜனஅஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானங்.
‘‘Katamehi pañcahi? Thero hoti rattaññū cirapabbajito; ñāto hoti yasassī sagahaṭṭhapabbajitānaṃ 2 bahujanaparivāro; lābhī hoti cīvarapiṇḍapātasenāsanagilānappaccayabhesajjaparikkhārānaṃ; bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā appaṭividdhā; micchādiṭṭhiko hoti viparītadassano, so bahujanaṃ saddhammā vuṭṭhāpetvā asaddhamme patiṭṭhāpeti. Thero bhikkhu rattaññū cirapabbajito itipissa diṭṭhānugatiṃ āpajjanti , ñāto thero bhikkhu yasassī sagahaṭṭhapabbajitānaṃ bahujanaparivāro itipissa diṭṭhānugatiṃ āpajjanti, lābhī thero bhikkhu cīvarapiṇḍapātasenāsanagilānappaccayabhesajjaparikkhārānaṃ itipissa diṭṭhānugatiṃ āpajjanti, bahussuto thero bhikkhu sutadharo sutasannicayo itipissa diṭṭhānugatiṃ āpajjanti. Imehi kho, bhikkhave, pañcahi dhammehi samannāgato thero bhikkhu bahujanaahitāya paṭipanno hoti bahujanaasukhāya bahuno janassa anatthāya ahitāya dukkhāya devamanussānaṃ.
‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ தே²ரோ பி⁴க்கு² ப³ஹுஜனஹிதாய படிபன்னோ ஹோதி ப³ஹுஜனஸுகா²ய ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானங்.
‘‘Pañcahi, bhikkhave, dhammehi samannāgato thero bhikkhu bahujanahitāya paṭipanno hoti bahujanasukhāya bahuno janassa atthāya hitāya sukhāya devamanussānaṃ.
‘‘கதமேஹி பஞ்சஹி? தே²ரோ ஹோதி ரத்தஞ்ஞூ சிரபப்³ப³ஜிதோ; ஞாதோ ஹோதி யஸஸ்ஸீ ஸக³ஹட்ட²பப்³ப³ஜிதானங் ப³ஹுஜனபரிவாரோ; லாபீ⁴ ஹோதி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானங் ; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴; ஸம்மாதி³ட்டி²கோ ஹோதி அவிபரீதத³ஸ்ஸனோ, ஸோ ப³ஹுஜனங் அஸத்³த⁴ம்மா வுட்டா²பெத்வா ஸத்³த⁴ம்மே பதிட்டா²பேதி. தே²ரோ பி⁴க்கு² ரத்தஞ்ஞூ சிரபப்³ப³ஜிதோ இதிபிஸ்ஸ தி³ட்டா²னுக³திங் ஆபஜ்ஜந்தி, ஞாதோ தே²ரோ பி⁴க்கு² யஸஸ்ஸீ ஸக³ஹட்ட²பப்³ப³ஜிதானங் ப³ஹுஜனபரிவாரோ இதிபிஸ்ஸ தி³ட்டா²னுக³திங் ஆபஜ்ஜந்தி, லாபீ⁴ தே²ரோ பி⁴க்கு² சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரானங் இதிபிஸ்ஸ தி³ட்டா²னுக³திங் ஆபஜ்ஜந்தி, ப³ஹுஸ்ஸுதோ தே²ரோ பி⁴க்கு² ஸுதத⁴ரோ ஸுதஸன்னிசயோ இதிபிஸ்ஸ தி³ட்டா²னுக³திங் ஆபஜ்ஜந்தி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ தே²ரோ பி⁴க்கு² ப³ஹுஜனஹிதாய படிபன்னோ ஹோதி ப³ஹுஜனஸுகா²ய ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸான’’ந்தி. அட்ட²மங்.
‘‘Katamehi pañcahi? Thero hoti rattaññū cirapabbajito; ñāto hoti yasassī sagahaṭṭhapabbajitānaṃ bahujanaparivāro; lābhī hoti cīvarapiṇḍapātasenāsanagilānappaccayabhesajjaparikkhārānaṃ ; bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā; sammādiṭṭhiko hoti aviparītadassano, so bahujanaṃ asaddhammā vuṭṭhāpetvā saddhamme patiṭṭhāpeti. Thero bhikkhu rattaññū cirapabbajito itipissa diṭṭhānugatiṃ āpajjanti, ñāto thero bhikkhu yasassī sagahaṭṭhapabbajitānaṃ bahujanaparivāro itipissa diṭṭhānugatiṃ āpajjanti, lābhī thero bhikkhu cīvarapiṇḍapātasenāsanagilānappaccayabhesajjaparikkhārānaṃ itipissa diṭṭhānugatiṃ āpajjanti, bahussuto thero bhikkhu sutadharo sutasannicayo itipissa diṭṭhānugatiṃ āpajjanti. Imehi kho, bhikkhave, pañcahi dhammehi samannāgato thero bhikkhu bahujanahitāya paṭipanno hoti bahujanasukhāya bahuno janassa atthāya hitāya sukhāya devamanussāna’’nti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. தே²ரஸுத்தவண்ணனா • 8. Therasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. தே²ரஸுத்தவண்ணனா • 8. Therasuttavaṇṇanā
