Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૨૬. થોમકવગ્ગો
26. Thomakavaggo
૧-૧૦. થોમકત્થેરઅપદાનાદિવણ્ણના
1-10. Thomakattheraapadānādivaṇṇanā
છબ્બીસતિમે વગ્ગે પઠમાપદાનં ઉત્તાનમેવ.
Chabbīsatime vagge paṭhamāpadānaṃ uttānameva.
૫-૬. દુતિયાપદાને વિજહિત્વા દેવવણ્ણન્તિ દેવતા સરીરં વિજહિત્વા છડ્ડેત્વા, મનુસ્સસરીરં નિમ્મિનિત્વાતિ અત્થો. અધિકારં કત્તુકામોતિ અધિકકિરિયં પુઞ્ઞસમ્ભારં કત્તુકામો દેવરો નામ અહં દેવરાજા ભરિયાય સહ બુદ્ધસેટ્ઠસ્સ સાસને સાદરતાય ઇધ ઇમસ્મિં મનુસ્સલોકે આગમિં આગતોતિ અત્થો. તસ્સ ભિક્ખા મયા દિન્નાતિ પદુમુત્તરસ્સ ભગવતો યો નામેન દેવલો નામ સાવકો અહોસિ, તસ્સ સાવકસ્સ મયા વિપ્પસન્નેન ચેતસા ભિક્ખા દિન્ના પિણ્ડપાતો દિન્નોતિ અત્થો.
5-6. Dutiyāpadāne vijahitvā devavaṇṇanti devatā sarīraṃ vijahitvā chaḍḍetvā, manussasarīraṃ nimminitvāti attho. Adhikāraṃ kattukāmoti adhikakiriyaṃ puññasambhāraṃ kattukāmo devaro nāma ahaṃ devarājā bhariyāya saha buddhaseṭṭhassa sāsane sādaratāya idha imasmiṃ manussaloke āgamiṃ āgatoti attho. Tassa bhikkhā mayā dinnāti padumuttarassa bhagavato yo nāmena devalo nāma sāvako ahosi, tassa sāvakassa mayā vippasannena cetasā bhikkhā dinnā piṇḍapāto dinnoti attho.
૯-૧૦. તતિયાપદાને આનન્દો નામ સમ્બુદ્ધોતિ આનન્દં તુટ્ઠિં જનનતો આનન્દો નામ પચ્ચેકબુદ્ધોતિ અત્થો. અમનુસ્સમ્હિ કાનનેતિ અમનુસ્સપરિગ્ગહે કાનને મહાઅરઞ્ઞે પરિનિબ્બાયિ અનુપાદિસેસનિબ્બાનધાતુયા અન્તરધાયિ, અદસ્સનં અગમાસીતિ અત્થો. સરીરં તત્થ ઝાપેસિન્તિ અહં દેવલોકા ઇધાગન્ત્વા તસ્સ ભગવતો સરીરં તત્થ અરઞ્ઞે ઝાપેસિં દહનં અકાસિન્તિ અત્થો.
9-10. Tatiyāpadāne ānando nāma sambuddhoti ānandaṃ tuṭṭhiṃ jananato ānando nāma paccekabuddhoti attho. Amanussamhi kānaneti amanussapariggahe kānane mahāaraññe parinibbāyi anupādisesanibbānadhātuyā antaradhāyi, adassanaṃ agamāsīti attho. Sarīraṃ tattha jhāpesinti ahaṃ devalokā idhāgantvā tassa bhagavato sarīraṃ tattha araññe jhāpesiṃ dahanaṃ akāsinti attho.
ચતુત્થપઞ્ચમાપદાનાનિ ઉત્તાનાનેવ.
Catutthapañcamāpadānāni uttānāneva.
૨૦. છટ્ઠાપદાને અહોસિં ચન્દનો નામાતિ નામેન પણ્ણત્તિવસેન ચન્દનો નામ. સમ્બુદ્ધસ્સત્રજોતિ પચ્ચેકસમ્બુદ્ધભૂતતો પુબ્બે તસ્સ અત્રજો પુત્તો અહં. એકોપાહનો મયા દિન્નોતિ એકં ઉપાહનયુગં મયા દિન્નં. બોધિં સમ્પજ્જ મે તુવન્તિ તેન ઉપાહનયુગેન મે મય્હં સાવકબોધિં તુવં સમ્પજ્જ નિપ્ફાદેહીતિ અત્થો.
20. Chaṭṭhāpadāne ahosiṃ candano nāmāti nāmena paṇṇattivasena candano nāma. Sambuddhassatrajoti paccekasambuddhabhūtato pubbe tassa atrajo putto ahaṃ. Ekopāhano mayā dinnoti ekaṃ upāhanayugaṃ mayā dinnaṃ. Bodhiṃ sampajja me tuvanti tena upāhanayugena me mayhaṃ sāvakabodhiṃ tuvaṃ sampajja nipphādehīti attho.
૨૩-૨૪. સત્તમાપદાને મઞ્જરિકં કરિત્વાનાતિ મઞ્જેટ્ઠિપુપ્ફં હરિતચઙ્કોટકં ગહેત્વા રથિયં વીથિયા પટિપજ્જિં અહં તથા પટિપન્નોવ ભિક્ખુસઙ્ઘપુરક્ખતં ભિક્ખુસઙ્ઘેન પરિવુતં સમણાનગ્ગં સમણાનં ભિક્ખૂનં અગ્ગં સેટ્ઠં સમ્માસમ્બુદ્ધં અદ્દસન્તિ સમ્બન્ધો. બુદ્ધસ્સ અભિરોપયિન્તિ દિસ્વા ચ પન તં પુપ્ફં ઉભોહિ હત્થેહિ પગ્ગય્હ ઉક્ખિપિત્વા બુદ્ધસ્સ ફુસ્સસ્સ ભગવતો અભિરોપયિં પૂજેસિન્તિ અત્થો.
23-24. Sattamāpadāne mañjarikaṃ karitvānāti mañjeṭṭhipupphaṃ haritacaṅkoṭakaṃ gahetvā rathiyaṃ vīthiyā paṭipajjiṃ ahaṃ tathā paṭipannova bhikkhusaṅghapurakkhataṃ bhikkhusaṅghena parivutaṃ samaṇānaggaṃ samaṇānaṃ bhikkhūnaṃ aggaṃ seṭṭhaṃ sammāsambuddhaṃ addasanti sambandho. Buddhassa abhiropayinti disvā ca pana taṃ pupphaṃ ubhohi hatthehi paggayha ukkhipitvā buddhassa phussassa bhagavato abhiropayiṃ pūjesinti attho.
૨૮-૨૯. અટ્ઠમાપદાને અલોણપણ્ણભક્ખોમ્હીતિ ખીરપણ્ણાદીનિ ઉઞ્છાચરિયાય આહરિત્વા લોણવિરહિતાનિ પણ્ણાનિ પચિત્વા ભક્ખામિ, અલોણપણ્ણભક્ખો અમ્હિ ભવામીતિ અત્થો. નિયમેસુ ચ સંવુતોતિ નિયમસઞ્ઞિતેસુ પાણાતિપાતાવેરમણિઆદીસુ નિચ્ચપઞ્ચસીલેસુ સંવુતો પિહિતોતિ અત્થો. પાતરાસે અનુપ્પત્તેતિ પુરેભત્તકાલે અનુપ્પત્તે. સિદ્ધત્થો ઉપગચ્છિ મન્તિ મમ સમીપં સિદ્ધત્થો ભગવા ઉપગઞ્છિ સમ્પાપુણિ. તાહં બુદ્ધસ્સ પાદાસિન્તિ અહં તં અલોણપણ્ણં તસ્સ બુદ્ધસ્સ અદાસિન્તિ અત્થો.
28-29. Aṭṭhamāpadāne aloṇapaṇṇabhakkhomhīti khīrapaṇṇādīni uñchācariyāya āharitvā loṇavirahitāni paṇṇāni pacitvā bhakkhāmi, aloṇapaṇṇabhakkho amhi bhavāmīti attho. Niyamesu ca saṃvutoti niyamasaññitesu pāṇātipātāveramaṇiādīsu niccapañcasīlesu saṃvuto pihitoti attho. Pātarāse anuppatteti purebhattakāle anuppatte. Siddhattho upagacchi manti mama samīpaṃ siddhattho bhagavā upagañchi sampāpuṇi. Tāhaṃ buddhassa pādāsinti ahaṃ taṃ aloṇapaṇṇaṃ tassa buddhassa adāsinti attho.
નવમાપદાનં ઉત્તાનમેવ.
Navamāpadānaṃ uttānameva.
૩૭-૩૮. દસમાપદાને સિખિનં સિખિનં યથાતિ સરીરતો નિક્ખન્તછબ્બણ્ણરંસીહિ ઓભાસયન્તં જલન્તં સિખીનં સિખીભગવન્તં સિખીનં યથા જલમાનઅગ્ગિક્ખન્ધં વિય. અગ્ગજં પુપ્ફમાદાયાતિ અગ્ગજનામકં પુપ્ફં ગહેત્વા બુદ્ધસ્સ સિખિસ્સ ભગવતો અભિરોપયિં પૂજેસિન્તિ અત્થો.
37-38. Dasamāpadāne sikhinaṃ sikhinaṃ yathāti sarīrato nikkhantachabbaṇṇaraṃsīhi obhāsayantaṃ jalantaṃ sikhīnaṃ sikhībhagavantaṃ sikhīnaṃ yathā jalamānaaggikkhandhaṃ viya. Aggajaṃ pupphamādāyāti aggajanāmakaṃ pupphaṃ gahetvā buddhassa sikhissa bhagavato abhiropayiṃ pūjesinti attho.
છબ્બીસતિમવગ્ગવણ્ણના સમત્તા.
Chabbīsatimavaggavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi
૨. એકાસનદાયકત્થેરઅપદાનં • 2. Ekāsanadāyakattheraapadānaṃ
૩. ચિતકપૂજકત્થેરઅપદાનં • 3. Citakapūjakattheraapadānaṃ
૬. ઉપાહનદાયકત્થેરઅપદાનં • 6. Upāhanadāyakattheraapadānaṃ
૭. મઞ્જરિપૂજકત્થેરઅપદાનં • 7. Mañjaripūjakattheraapadānaṃ
૮. પણ્ણદાયકત્થેરઅપદાનં • 8. Paṇṇadāyakattheraapadānaṃ
૧૦. અગ્ગપુપ્ફિયત્થેરઅપદાનં • 10. Aggapupphiyattheraapadānaṃ