| Library / Tipiṭaka / તિપિટક • Tipiṭaka / પઞ્ચપકરણ-અટ્ઠકથા • Pañcapakaraṇa-aṭṭhakathā |
૫. તિકતિકપટ્ઠાનવણ્ણના
5. Tikatikapaṭṭhānavaṇṇanā
તિકતિકપટ્ઠાનેપિ કુસલં સુખાય વેદનાય સમ્પયુત્તં ધમ્મં પટિચ્ચ કુસલો સુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયાતિ પઞ્હુદ્ધારવસેનેવ સઙ્ખેપતો દેસના કતા. એત્થ ચ કુસલત્તિકં વેદનાત્તિકાદીહિ, વેદનાત્તિકાદયો ચ કુસલત્તિકેનાતિ એવં તિકેસુયેવ તિકા પક્ખિત્તા. યેન યેન ચ પદેન સદ્ધિં યં યં પદં યોજનં ન ગચ્છતિ, તં તં હાપેત્વા લબ્ભમાનવસેનેવ સબ્બપચ્ચયેસુ વારા ચ ગણનનયા ચ દસ્સિતા, તસ્મા તે સાધુકં પાળિં ઉપપરિક્ખિત્વા વેદિતબ્બા. યથા ચ કુસલત્તિકં વેદનાત્તિકાદીહિ, વેદનાત્તિકાદયો ચ તેન સદ્ધિં યોજેત્વા વેદિતબ્બા; તથા એકેકં તિકં સેસેહિ. સેસા ચ તેહિ સદ્ધિં યોજેત્વા વેદિતબ્બાતિ.
Tikatikapaṭṭhānepi kusalaṃ sukhāya vedanāya sampayuttaṃ dhammaṃ paṭicca kusalo sukhāya vedanāya sampayutto dhammo uppajjati hetupaccayāti pañhuddhāravaseneva saṅkhepato desanā katā. Ettha ca kusalattikaṃ vedanāttikādīhi, vedanāttikādayo ca kusalattikenāti evaṃ tikesuyeva tikā pakkhittā. Yena yena ca padena saddhiṃ yaṃ yaṃ padaṃ yojanaṃ na gacchati, taṃ taṃ hāpetvā labbhamānavaseneva sabbapaccayesu vārā ca gaṇananayā ca dassitā, tasmā te sādhukaṃ pāḷiṃ upaparikkhitvā veditabbā. Yathā ca kusalattikaṃ vedanāttikādīhi, vedanāttikādayo ca tena saddhiṃ yojetvā veditabbā; tathā ekekaṃ tikaṃ sesehi. Sesā ca tehi saddhiṃ yojetvā veditabbāti.
તિકતિકપટ્ઠાનવણ્ણના.
Tikatikapaṭṭhānavaṇṇanā.
