| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. திகிச்ச²கஸுத்தங்
8. Tikicchakasuttaṃ
108. ‘‘திகிச்ச²கா , பி⁴க்க²வே, விரேசனங் தெ³ந்தி பித்தஸமுட்டா²னானம்பி ஆபா³தா⁴னங் படிகா⁴தாய, ஸெம்ஹஸமுட்டா²னானம்பி ஆபா³தா⁴னங் படிகா⁴தாய, வாதஸமுட்டா²னானம்பி ஆபா³தா⁴னங் படிகா⁴தாய. அத்தே²தங், பி⁴க்க²வே, விரேசனங்; ‘நேதங் நத்தீ²’தி வதா³மி. தஞ்ச கோ² ஏதங், பி⁴க்க²வே, விரேசனங் ஸம்பஜ்ஜதிபி விபஜ்ஜதிபி.
108. ‘‘Tikicchakā , bhikkhave, virecanaṃ denti pittasamuṭṭhānānampi ābādhānaṃ paṭighātāya, semhasamuṭṭhānānampi ābādhānaṃ paṭighātāya, vātasamuṭṭhānānampi ābādhānaṃ paṭighātāya. Atthetaṃ, bhikkhave, virecanaṃ; ‘netaṃ natthī’ti vadāmi. Tañca kho etaṃ, bhikkhave, virecanaṃ sampajjatipi vipajjatipi.
‘‘அஹஞ்ச கோ², பி⁴க்க²வே, அரியங் விரேசனங் தே³ஸெஸ்ஸாமி, யங் விரேசனங் ஸம்பஜ்ஜதியேவ நோ விபஜ்ஜதி, யங் விரேசனங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி, ஜராத⁴ம்மா ஸத்தா ஜராய பரிமுச்சந்தி, மரணத⁴ம்மா ஸத்தா மரணேன பரிமுச்சந்தி, ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘Ahañca kho, bhikkhave, ariyaṃ virecanaṃ desessāmi, yaṃ virecanaṃ sampajjatiyeva no vipajjati, yaṃ virecanaṃ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti, sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘கதமஞ்ச தங், பி⁴க்க²வே, அரியங் விரேசனங், யங் விரேசனங் ஸம்பஜ்ஜதியேவ நோ விபஜ்ஜதி, யங் விரேசனங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி, ஜராத⁴ம்மா ஸத்தா ஜராய பரிமுச்சந்தி, மரணத⁴ம்மா ஸத்தா மரணேன பரிமுச்சந்தி , ஸோகபரிதே³வது³க்க²தோ³மனஸ்ஸுபாயாஸத⁴ம்மா ஸத்தா ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தி?
‘‘Katamañca taṃ, bhikkhave, ariyaṃ virecanaṃ, yaṃ virecanaṃ sampajjatiyeva no vipajjati, yaṃ virecanaṃ āgamma jātidhammā sattā jātiyā parimuccanti, jarādhammā sattā jarāya parimuccanti, maraṇadhammā sattā maraṇena parimuccanti , sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti?
‘‘ஸம்மாதி³ட்டி²கஸ்ஸ, பி⁴க்க²வே, மிச்சா²தி³ட்டி² விரித்தா ஹோதி; யே ச மிச்சா²தி³ட்டி²பச்சயா அனேகே பாபகா அகுஸலா த⁴ம்மா ஸம்ப⁴வந்தி தே சஸ்ஸ விரித்தா ஹொந்தி; ஸம்மாதி³ட்டி²பச்சயா ச அனேகே குஸலா த⁴ம்மா பா⁴வனாபாரிபூரிங் க³ச்ச²ந்தி.
‘‘Sammādiṭṭhikassa, bhikkhave, micchādiṭṭhi virittā hoti; ye ca micchādiṭṭhipaccayā aneke pāpakā akusalā dhammā sambhavanti te cassa virittā honti; sammādiṭṭhipaccayā ca aneke kusalā dhammā bhāvanāpāripūriṃ gacchanti.
‘‘ஸம்மாஸங்கப்பஸ்ஸ , பி⁴க்க²வே, மிச்சா²ஸங்கப்போ விரித்தோ ஹோதி…பே॰… ஸம்மாவாசஸ்ஸ, பி⁴க்க²வே, மிச்சா²வாசா விரித்தா ஹோதி… ஸம்மாகம்மந்தஸ்ஸ, பி⁴க்க²வே, மிச்சா²கம்மந்தோ விரித்தோ ஹோதி… ஸம்மாஆஜீவஸ்ஸ, பி⁴க்க²வே, மிச்சா²ஆஜீவோ விரித்தோ ஹோதி… ஸம்மாவாயாமஸ்ஸ, பி⁴க்க²வே, மிச்சா²வாயாமோ விரித்தோ ஹோதி… ஸம்மாஸதிஸ்ஸ, பி⁴க்க²வே, மிச்சா²ஸதி விரித்தா ஹோதி… ஸம்மாஸமாதி⁴ஸ்ஸ , பி⁴க்க²வே, மிச்சா²ஸமாதி⁴ விரித்தோ ஹோதி… ஸம்மாஞாணிஸ்ஸ, பி⁴க்க²வே, மிச்சா²ஞாணங் விரித்தங் ஹோதி…பே॰….
‘‘Sammāsaṅkappassa , bhikkhave, micchāsaṅkappo viritto hoti…pe… sammāvācassa, bhikkhave, micchāvācā virittā hoti… sammākammantassa, bhikkhave, micchākammanto viritto hoti… sammāājīvassa, bhikkhave, micchāājīvo viritto hoti… sammāvāyāmassa, bhikkhave, micchāvāyāmo viritto hoti… sammāsatissa, bhikkhave, micchāsati virittā hoti… sammāsamādhissa , bhikkhave, micchāsamādhi viritto hoti… sammāñāṇissa, bhikkhave, micchāñāṇaṃ virittaṃ hoti…pe….
‘‘ஸம்மாவிமுத்திஸ்ஸ, பி⁴க்க²வே, மிச்சா²விமுத்தி விரித்தா ஹோதி; யே ச மிச்சா²விமுத்திபச்சயா அனேகே பாபகா அகுஸலா த⁴ம்மா ஸம்ப⁴வந்தி தே சஸ்ஸ விரித்தா ஹொந்தி; ஸம்மாவிமுத்திபச்சயா ச அனேகே குஸலா த⁴ம்மா பா⁴வனாபாரிபூரிங் க³ச்ச²ந்தி. இத³ங் கோ² தங், பி⁴க்க²வே, அரியங் விரேசனங் யங் விரேசனங் ஸம்பஜ்ஜதியேவ நோ விபஜ்ஜதி, யங் விரேசனங் ஆக³ம்ம ஜாதித⁴ம்மா ஸத்தா ஜாதியா பரிமுச்சந்தி…பே॰… ஸோகபரிதே³வது³க்க²தோ³மனஸ்ஸுபாயாஸேஹி பரிமுச்சந்தீ’’தி. அட்ட²மங்.
‘‘Sammāvimuttissa, bhikkhave, micchāvimutti virittā hoti; ye ca micchāvimuttipaccayā aneke pāpakā akusalā dhammā sambhavanti te cassa virittā honti; sammāvimuttipaccayā ca aneke kusalā dhammā bhāvanāpāripūriṃ gacchanti. Idaṃ kho taṃ, bhikkhave, ariyaṃ virecanaṃ yaṃ virecanaṃ sampajjatiyeva no vipajjati, yaṃ virecanaṃ āgamma jātidhammā sattā jātiyā parimuccanti…pe… sokaparidevadukkhadomanassupāyāsehi parimuccantī’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8-10. திகிச்ச²கஸுத்தாதி³வண்ணனா • 8-10. Tikicchakasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-12. ஸமணஸஞ்ஞாஸுத்தாதி³வண்ணனா • 1-12. Samaṇasaññāsuttādivaṇṇanā
