| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. திம்ப³ருகஸுத்தவண்ணனா
8. Timbarukasuttavaṇṇanā
18. யஸ்மா திம்ப³ருகோ ‘‘வேத³னா அத்தா. அத்தாவ வேத³யதீ’’தி ஏவங்லத்³தி⁴கோ, தஸ்மா தாய லத்³தி⁴யா ‘‘ஸயங்கதங் ஸுக²து³க்க²’’ந்தி வத³தி, தங் படிஸங்ஹரிதுங் ப⁴க³வா ‘‘ஸா வேத³னா’’திஆதி³ங் அவோச. தேனாஹ ‘‘ஸா வேத³னாதிஆதி³ ஸயங்கதங் ஸுக²து³க்க²ந்தி லத்³தி⁴யா நிஸேத⁴னத்த²ங் வுத்த’’ந்தி. எத்தா²பீதி இமஸ்மிம்பி ஸுத்தே. தத்ராதி யங் வுத்தங் ‘‘ஸா வேத³னா…பே॰… ஸுக²து³க்க²’’ந்தி, தஸ்மிங் பாடே². ஆதி³ம்ஹியேவாதி எத்த² பு⁴ம்மவசனேன ‘‘ஆதி³தோ’’தி தோ-ஸத்³தோ³ ந நிஸ்ஸக்கவசனே. ஏவ-காரேன கோ²-ஸத்³தோ³ அவதா⁴ரணேதி த³ஸ்ஸேதி. யங் பனெத்த² வத்தப்³ப³ங், தங் அனந்தரஸுத்தே வுத்தமேவ. தத்த² பன ‘‘வேத³னாதோ அஞ்ஞோ அத்தா, வேத³னாய காரகோ’’தி லத்³தி⁴கஸ்ஸ தி³ட்டி²க³திகஸ்ஸ வாதோ³ படிக்கி²த்தோ, இத⁴ ‘‘வேத³னா அத்தா’’தி ஏவங்லத்³தி⁴கஸ்ஸாதி அயமேவ விஸேஸோ. தேனாஹ ‘‘ஏவஞ்ஹி ஸதி வேத³னாய ஏவ வேத³னா கதா ஹோதீ’’திஆதி³. இமிஸ்ஸாதி யாய வேத³னாய ஸுக²து³க்க²ங் கதங், இமிஸ்ஸா. புப்³பே³பீதி ஸஸ்ஸதாகாரதோ புப்³பே³பி. புரிமஞ்ஹி அத்த²ந்தி அனந்தரஸுத்தே வுத்தங் அத்த²ங். அட்ட²கதா²யந்தி போராணட்ட²கதா²யங். தந்தி புரிமஸுத்தே வுத்தமத்த²ங். அஸ்ஸாதி இமஸ்ஸ ஸுத்தஸ்ஸ. யஸ்மா திம்ப³ருகோ ‘‘வேத³னாவ அத்தா’’தி க³ண்ஹாதி, தஸ்மா வுத்தங் ‘‘அஹங் ஸா வேத³னா…பே॰… ந வதா³மீ’’தி.
18. Yasmā timbaruko ‘‘vedanā attā. Attāva vedayatī’’ti evaṃladdhiko, tasmā tāya laddhiyā ‘‘sayaṃkataṃ sukhadukkha’’nti vadati, taṃ paṭisaṃharituṃ bhagavā ‘‘sā vedanā’’tiādiṃ avoca. Tenāha ‘‘sā vedanātiādi sayaṃkataṃ sukhadukkhanti laddhiyā nisedhanatthaṃ vutta’’nti. Etthāpīti imasmimpi sutte. Tatrāti yaṃ vuttaṃ ‘‘sā vedanā…pe… sukhadukkha’’nti, tasmiṃ pāṭhe. Ādimhiyevāti ettha bhummavacanena ‘‘ādito’’ti to-saddo na nissakkavacane. Eva-kārena kho-saddo avadhāraṇeti dasseti. Yaṃ panettha vattabbaṃ, taṃ anantarasutte vuttameva. Tattha pana ‘‘vedanāto añño attā, vedanāya kārako’’ti laddhikassa diṭṭhigatikassa vādo paṭikkhitto, idha ‘‘vedanā attā’’ti evaṃladdhikassāti ayameva viseso. Tenāha ‘‘evañhi sati vedanāya eva vedanā katā hotī’’tiādi. Imissāti yāya vedanāya sukhadukkhaṃ kataṃ, imissā. Pubbepīti sassatākārato pubbepi. Purimañhi atthanti anantarasutte vuttaṃ atthaṃ. Aṭṭhakathāyanti porāṇaṭṭhakathāyaṃ. Tanti purimasutte vuttamatthaṃ. Assāti imassa suttassa. Yasmā timbaruko ‘‘vedanāva attā’’ti gaṇhāti, tasmā vuttaṃ ‘‘ahaṃ sā vedanā…pe… na vadāmī’’ti.
அஞ்ஞா வேத³னாதிஆதீ³ஸுபி யங் வத்தப்³ப³ங், தங் அனந்தரஸுத்தே வுத்தனயமேவ. காரகவேத³னாதி கத்துபூ⁴தவேத³னா. வேத³னாஸுக²து³க்க²ந்தி வேத³னாபூ⁴தஸுக²து³க்க²ங் கதி²தங், ந வட்டஸுக²து³க்க²ங். ‘‘விபாகஸுக²து³க்க²மேவ வட்டதீ’’தி வுத்தங் ‘‘ஸயங்கதங் ஸுக²ங் து³க்க²’’ந்திஆதி³வசனதோ.
Aññā vedanātiādīsupi yaṃ vattabbaṃ, taṃ anantarasutte vuttanayameva. Kārakavedanāti kattubhūtavedanā. Vedanāsukhadukkhanti vedanābhūtasukhadukkhaṃ kathitaṃ, na vaṭṭasukhadukkhaṃ. ‘‘Vipākasukhadukkhameva vaṭṭatī’’ti vuttaṃ ‘‘sayaṃkataṃ sukhaṃ dukkha’’ntiādivacanato.
திம்ப³ருகஸுத்தவண்ணனா நிட்டி²தா.
Timbarukasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. திம்ப³ருகஸுத்தங் • 8. Timbarukasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. திம்ப³ருகஸுத்தவண்ணனா • 8. Timbarukasuttavaṇṇanā
