| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૯. તિમિરવગ્ગો
9. Timiravaggo
૧. તિમિરપુપ્ફિયત્થેરઅપદાનવણ્ણના
1. Timirapupphiyattheraapadānavaṇṇanā
ચન્દભાગાનદીતીરેતિઆદિકં આયસ્મતો તિમિરપુપ્ફિયત્થેરસ્સ અપદાનં. કા ઉપ્પત્તિ? અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે એકસ્મિં કુલગેહે નિબ્બત્તો વુદ્ધિપ્પત્તો ઘરાવાસં સણ્ઠપેત્વા વસન્તો કામેસુ આદીનવં દિસ્વા ઘરાવાસં પહાય તાપસપબ્બજ્જં પબ્બજિત્વા ચન્દભાગાય નદિયા સમીપે વસતિ, વિવેકકામતાય હિમવન્તં ગન્ત્વા નિસિન્નં સિદ્ધત્થં ભગવન્તં દિસ્વા વન્દિત્વા તસ્સ ગુણં પસીદિત્વા તિમિરપુપ્ફં ગહેત્વા પૂજેસિ. સો તેન પુઞ્ઞેન દેવેસુ ચ મનુસ્સેસુ ચ સમ્પત્તિમનુભવન્તો સંસરિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિતો નચિરસ્સેવ અરહા અહોસિ.
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
૧. સો અપરભાગે પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ચન્દભાગાનદીતીરેતિઆદિમાહ. તસ્સત્થો હેટ્ઠા વુત્તોવ. અનુભોતં વજામહન્તિ ગઙ્ગાય આસન્ને વસનભાવેન સબ્બત્થ રમ્મભાવેન ગઙ્ગાતો હેટ્ઠા સોતાનુસારેન અહં વજામિ ગચ્છામિ તત્થ તત્થ વસામીતિ અત્થો. નિસિન્નં સમણં દિસ્વાતિ સમિતપાપત્તા સોસિતપાપત્તા સમણસઙ્ખાતં સમ્માસમ્બુદ્ધં દિસ્વાતિ અત્થો.
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
૨. એવં ચિન્તેસહં તદાતિ અયં ભગવા સયં તિણ્ણો સબ્બસત્તે તારયિસ્સતિ સંસારતો ઉત્તારેતિ સયં કાયદ્વારાદીહિ દમિતો અયં ભગવા પરે દમેતિ.
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
૩. સયં અસ્સત્થો અસ્સાસમ્પત્તો, કિલેસપરિળાહતો મુત્તો સબ્બસત્તે અસ્સાસેતિ, સન્તભાવં આપાપેતિ. સયં સન્તો સન્તકાયચિત્તો પરેસં સન્તકાયચિત્તં પાપેતિ. સયં મુત્તો સંસારતો મુચ્ચિતો પરે સંસારતો મોચયિસ્સતિ. સો અયં ભગવા સયં નિબ્બુતો કિલેસગ્ગીહિ નિબ્બુતો પરેસમ્પિ કિલેસગ્ગીહિ નિબ્બાપેસ્સતીતિ અહં તદા એવં ચિન્તેસિન્તિ અત્થો.
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
૪. ગહેત્વા તિમિરપુપ્ફન્તિ સકલં વનન્તં નીલકાળરંસીહિ અન્ધકારં વિય કુરુમાનં ખાયતીતિ તિમિરં પુપ્ફં તં ગહેત્વા કણ્ણિકાવણ્ટં ગહેત્વા મત્થકે સીસસ્સ ઉપરિ આકાસે ઓકિરિં પૂજેસિન્તિ અત્થો. સેસં ઉત્તાનત્થમેવાતિ.
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
તિમિરપુપ્ફિયત્થેરઅપદાનવણ્ણના સમત્તા.
Timirapupphiyattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૧. તિમિરપુપ્ફિયત્થેરઅપદાનં • 1. Timirapupphiyattheraapadānaṃ
