| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. திஸ்ஸப்³ரஹ்மாஸுத்தங்
3. Tissabrahmāsuttaṃ
56. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² த்³வே தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் கி³ஜ்ஜ²கூடங் ஓபா⁴ஸெத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² ஏகா தே³வதா ப⁴க³வந்தங் ஏதத³வோச – ‘‘ஏதா, ப⁴ந்தே, பி⁴க்கு²னியோ விமுத்தா’’தி. அபரா தே³வதா ப⁴க³வந்தங் ஏதத³வோச – ‘‘ஏதா, ப⁴ந்தே, பி⁴க்கு²னியோ அனுபாதி³ஸேஸா ஸுவிமுத்தா’’தி. இத³மவோசுங் தா தே³வதா. ஸமனுஞ்ஞோ ஸத்தா² அஹோஸி. அத² கோ² தா தே³வதா ‘‘ஸமனுஞ்ஞோ ஸத்தா²’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யிங்ஸு.
56. Evaṃ me sutaṃ – ekaṃ samayaṃ bhagavā rājagahe viharati gijjhakūṭe pabbate. Atha kho dve devatā abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavantaṃ etadavoca – ‘‘etā, bhante, bhikkhuniyo vimuttā’’ti. Aparā devatā bhagavantaṃ etadavoca – ‘‘etā, bhante, bhikkhuniyo anupādisesā suvimuttā’’ti. Idamavocuṃ tā devatā. Samanuñño satthā ahosi. Atha kho tā devatā ‘‘samanuñño satthā’’ti bhagavantaṃ abhivādetvā padakkhiṇaṃ katvā tatthevantaradhāyiṃsu.
அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘இமங், பி⁴க்க²வே, ரத்திங் த்³வே தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் கி³ஜ்ஜ²கூடங் ஓபா⁴ஸெத்வா யேனாஹங் தேனுபஸங்கமிங்ஸு; உபஸங்கமித்வா மங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ², பி⁴க்க²வே, ஏகா தே³வதா மங் ஏதத³வோச – ‘ஏதா, ப⁴ந்தே, பி⁴க்கு²னியோ விமுத்தா’தி. அபரா தே³வதா மங் ஏதத³வோச – ‘ஏதா, ப⁴ந்தே, பி⁴க்கு²னியோ அனுபாதி³ஸேஸா ஸுவிமுத்தா’தி. இத³மவோசுங், பி⁴க்க²வே, தா தே³வதா. இத³ங் வத்வா மங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யிங்ஸூ’’தி.
Atha kho bhagavā tassā rattiyā accayena bhikkhū āmantesi – ‘‘imaṃ, bhikkhave, rattiṃ dve devatā abhikkantāya rattiyā abhikkantavaṇṇā kevalakappaṃ gijjhakūṭaṃ obhāsetvā yenāhaṃ tenupasaṅkamiṃsu; upasaṅkamitvā maṃ abhivādetvā ekamantaṃ aṭṭhaṃsu. Ekamantaṃ ṭhitā kho, bhikkhave, ekā devatā maṃ etadavoca – ‘etā, bhante, bhikkhuniyo vimuttā’ti. Aparā devatā maṃ etadavoca – ‘etā, bhante, bhikkhuniyo anupādisesā suvimuttā’ti. Idamavocuṃ, bhikkhave, tā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyiṃsū’’ti.
தேன கோ² பன ஸமயேன ஆயஸ்மா மஹாமொக்³க³ல்லானோ ப⁴க³வதோ அவிதூ³ரே நிஸின்னோ ஹோதி. அத² கோ² ஆயஸ்மதோ மஹாமொக்³க³ல்லானஸ்ஸ ஏதத³ஹோஸி – ‘‘கதமேஸானங் கோ² தே³வானங் ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி? தேன கோ² பன ஸமயேன திஸ்ஸோ நாம பி⁴க்கு² அது⁴னாகாலங்கதோ அஞ்ஞதரங் ப்³ரஹ்மலோகங் உபபன்னோ ஹோதி. தத்ராபி நங் ஏவங் ஜானந்தி – ‘‘திஸ்ஸோ ப்³ரஹ்மா மஹித்³தி⁴கோ மஹானுபா⁴வோ’’தி.
Tena kho pana samayena āyasmā mahāmoggallāno bhagavato avidūre nisinno hoti. Atha kho āyasmato mahāmoggallānassa etadahosi – ‘‘katamesānaṃ kho devānaṃ evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti? Tena kho pana samayena tisso nāma bhikkhu adhunākālaṅkato aññataraṃ brahmalokaṃ upapanno hoti. Tatrāpi naṃ evaṃ jānanti – ‘‘tisso brahmā mahiddhiko mahānubhāvo’’ti.
அத² கோ² ஆயஸ்மா மஹாமொக்³க³ல்லானோ – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவங் – கி³ஜ்ஜ²கூடே பப்³ப³தே அந்தரஹிதோ தஸ்மிங் ப்³ரஹ்மலோகே பாதுரஹோஸி. அத்³த³ஸா கோ² திஸ்ஸோ ப்³ரஹ்மா ஆயஸ்மந்தங் மஹாமொக்³க³ல்லானங் தூ³ரதோவ ஆக³ச்ச²ந்தங். தி³ஸ்வா ஆயஸ்மந்தங் மஹாமொக்³க³ல்லானங் ஏதத³வோச – ‘‘ஏஹி கோ², மாரிஸ மொக்³க³ல்லான; ஸ்வாக³தங், மாரிஸ மொக்³க³ல்லான! சிரஸ்ஸங் கோ², மாரிஸ மொக்³க³ல்லான, இமங் பரியாயமகாஸி , யதி³த³ங் இதா⁴க³மனாய. நிஸீத³, மாரிஸ மொக்³க³ல்லான, இத³மாஸனங் பஞ்ஞத்த’’ந்தி. நிஸீதி³ கோ² ஆயஸ்மா மஹாமொக்³க³ல்லானோ பஞ்ஞத்தே ஆஸனே. திஸ்ஸோபி கோ² ப்³ரஹ்மா ஆயஸ்மந்தங் மஹாமொக்³க³ல்லானங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² திஸ்ஸங் ப்³ரஹ்மானங் ஆயஸ்மா மஹாமொக்³க³ல்லானோ ஏதத³வோச – ‘‘கதமேஸானங் கோ², திஸ்ஸ , தே³வானங் ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி? ‘‘ப்³ரஹ்மகாயிகானங் கோ², மாரிஸ மொக்³க³ல்லான, தே³வானங் ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
Atha kho āyasmā mahāmoggallāno – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ – gijjhakūṭe pabbate antarahito tasmiṃ brahmaloke pāturahosi. Addasā kho tisso brahmā āyasmantaṃ mahāmoggallānaṃ dūratova āgacchantaṃ. Disvā āyasmantaṃ mahāmoggallānaṃ etadavoca – ‘‘ehi kho, mārisa moggallāna; svāgataṃ, mārisa moggallāna! Cirassaṃ kho, mārisa moggallāna, imaṃ pariyāyamakāsi , yadidaṃ idhāgamanāya. Nisīda, mārisa moggallāna, idamāsanaṃ paññatta’’nti. Nisīdi kho āyasmā mahāmoggallāno paññatte āsane. Tissopi kho brahmā āyasmantaṃ mahāmoggallānaṃ abhivādetvā ekamantaṃ nisīdi. Ekamantaṃ nisinnaṃ kho tissaṃ brahmānaṃ āyasmā mahāmoggallāno etadavoca – ‘‘katamesānaṃ kho, tissa , devānaṃ evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti? ‘‘Brahmakāyikānaṃ kho, mārisa moggallāna, devānaṃ evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
‘‘ஸப்³பே³ஸஞ்ஞேவ கோ², திஸ்ஸ, ப்³ரஹ்மகாயிகானங் தே³வானங் ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி? ‘‘ந கோ², மாரிஸ மொக்³க³ல்லான, ஸப்³பே³ஸங் ப்³ரஹ்மகாயிகானங் தே³வானங் ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
‘‘Sabbesaññeva kho, tissa, brahmakāyikānaṃ devānaṃ evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti? ‘‘Na kho, mārisa moggallāna, sabbesaṃ brahmakāyikānaṃ devānaṃ evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
‘‘யே கோ² தே, மாரிஸ மொக்³க³ல்லான, ப்³ரஹ்மகாயிகா தே³வா ப்³ரஹ்மேன ஆயுனா ஸந்துட்டா² ப்³ரஹ்மேன வண்ணேன ப்³ரஹ்மேன ஸுகே²ன ப்³ரஹ்மேன யஸேன ப்³ரஹ்மேன ஆதி⁴பதெய்யேன ஸந்துட்டா², தே உத்தரி நிஸ்ஸரணங் யதா²பூ⁴தங் நப்பஜானந்தி. தேஸங் ந ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’தி. யே ச கோ² தே, மாரிஸ மொக்³க³ல்லான, ப்³ரஹ்மகாயிகா தே³வா ப்³ரஹ்மேன ஆயுனா அஸந்துட்டா², ப்³ரஹ்மேன வண்ணேன ப்³ரஹ்மேன ஸுகே²ன ப்³ரஹ்மேன யஸேன ப்³ரஹ்மேன ஆதி⁴பதெய்யேன அஸந்துட்டா², தே ச உத்தரி நிஸ்ஸரணங் யதா²பூ⁴தங் பஜானந்தி. தேஸங் ஏவங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
‘‘Ye kho te, mārisa moggallāna, brahmakāyikā devā brahmena āyunā santuṭṭhā brahmena vaṇṇena brahmena sukhena brahmena yasena brahmena ādhipateyyena santuṭṭhā, te uttari nissaraṇaṃ yathābhūtaṃ nappajānanti. Tesaṃ na evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’ti. Ye ca kho te, mārisa moggallāna, brahmakāyikā devā brahmena āyunā asantuṭṭhā, brahmena vaṇṇena brahmena sukhena brahmena yasena brahmena ādhipateyyena asantuṭṭhā, te ca uttari nissaraṇaṃ yathābhūtaṃ pajānanti. Tesaṃ evaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
‘‘இத⁴, மாரிஸ மொக்³க³ல்லான, பி⁴க்கு² உப⁴தோபா⁴க³விமுத்தோ ஹோதி. தமேனங் தே தே³வா ஏவங் ஜானந்தி – ‘அயங் கோ² ஆயஸ்மா உப⁴தோபா⁴க³விமுத்தோ. யாவஸ்ஸ காயோ ட²ஸ்ஸதி தாவ நங் த³க்க²ந்தி தே³வமனுஸ்ஸா. காயஸ்ஸ பே⁴தா³ ந நங் த³க்க²ந்தி தே³வமனுஸ்ஸா’தி. ஏவம்பி கோ², மாரிஸ மொக்³க³ல்லான , தேஸங் தே³வானங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
‘‘Idha, mārisa moggallāna, bhikkhu ubhatobhāgavimutto hoti. Tamenaṃ te devā evaṃ jānanti – ‘ayaṃ kho āyasmā ubhatobhāgavimutto. Yāvassa kāyo ṭhassati tāva naṃ dakkhanti devamanussā. Kāyassa bhedā na naṃ dakkhanti devamanussā’ti. Evampi kho, mārisa moggallāna , tesaṃ devānaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
‘‘இத⁴ பன, மாரிஸ மொக்³க³ல்லான, பி⁴க்கு² பஞ்ஞாவிமுத்தோ ஹோதி. தமேனங் தே தே³வா ஏவங் ஜானந்தி – ‘அயங் கோ² ஆயஸ்மா பஞ்ஞாவிமுத்தோ. யாவஸ்ஸ காயோ ட²ஸ்ஸதி தாவ நங் த³க்க²ந்தி தே³வமனுஸ்ஸா. காயஸ்ஸ பே⁴தா³ ந நங் த³க்க²ந்தி தே³வமனுஸ்ஸா’தி. ஏவம்பி கோ², மாரிஸ மொக்³க³ல்லான, தேஸங் தே³வானங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
‘‘Idha pana, mārisa moggallāna, bhikkhu paññāvimutto hoti. Tamenaṃ te devā evaṃ jānanti – ‘ayaṃ kho āyasmā paññāvimutto. Yāvassa kāyo ṭhassati tāva naṃ dakkhanti devamanussā. Kāyassa bhedā na naṃ dakkhanti devamanussā’ti. Evampi kho, mārisa moggallāna, tesaṃ devānaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
‘‘இத⁴ பன, மாரிஸ மொக்³க³ல்லான, பி⁴க்கு² காயஸக்கீ² ஹோதி. தமேனங் தே³வா ஏவங் ஜானந்தி – ‘அயங் கோ² ஆயஸ்மா காயஸக்கீ². அப்பேவ நாம அயமாயஸ்மா அனுலோமிகானி ஸேனாஸனானி படிஸேவமானோ கல்யாணமித்தே ப⁴ஜமானோ இந்த்³ரியானி ஸமன்னானயமானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யா’தி. ஏவம்பி கோ², மாரிஸ மொக்³க³ல்லான, தேஸங் தே³வானங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
‘‘Idha pana, mārisa moggallāna, bhikkhu kāyasakkhī hoti. Tamenaṃ devā evaṃ jānanti – ‘ayaṃ kho āyasmā kāyasakkhī. Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyā’ti. Evampi kho, mārisa moggallāna, tesaṃ devānaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
‘‘இத⁴ பன, மாரிஸ மொக்³க³ல்லான, பி⁴க்கு² தி³ட்டி²ப்பத்தோ ஹோதி…பே॰… ஸத்³தா⁴விமுத்தோ ஹோதி…பே॰… த⁴ம்மானுஸாரீ ஹோதி. தமேனங் தே தே³வா ஏவங் ஜானந்தி – ‘அயங் கோ² ஆயஸ்மா த⁴ம்மானுஸாரீ . அப்பேவ நாம அயமாயஸ்மா அனுலோமிகானி ஸேனாஸனானி படிஸேவமானோ கல்யாணமித்தே ப⁴ஜமானோ இந்த்³ரியானி ஸமன்னானயமானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யா’தி. ஏவம்பி கோ², மாரிஸ மொக்³க³ல்லான, தேஸங் தே³வானங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி.
‘‘Idha pana, mārisa moggallāna, bhikkhu diṭṭhippatto hoti…pe… saddhāvimutto hoti…pe… dhammānusārī hoti. Tamenaṃ te devā evaṃ jānanti – ‘ayaṃ kho āyasmā dhammānusārī . Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyā’ti. Evampi kho, mārisa moggallāna, tesaṃ devānaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti.
அத² கோ² ஆயஸ்மா மஹாமொக்³க³ல்லானோ திஸ்ஸஸ்ஸ ப்³ரஹ்முனோ பா⁴ஸிதங் அபி⁴னந்தி³த்வா அனுமோதி³த்வா – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவங் – ப்³ரஹ்மலோகே அந்தரஹிதோ கி³ஜ்ஜ²கூடே பப்³ப³தே பாதுரஹோஸி. அத² கோ² ஆயஸ்மா மஹாமொக்³க³ல்லானோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா மஹாமொக்³க³ல்லானோ யாவதகோ அஹோஸி திஸ்ஸேன ப்³ரஹ்முனா ஸத்³தி⁴ங் கதா²ஸல்லாபோ தங் ஸப்³ப³ங் ப⁴க³வதோ ஆரோசேஸி.
Atha kho āyasmā mahāmoggallāno tissassa brahmuno bhāsitaṃ abhinanditvā anumoditvā – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ – brahmaloke antarahito gijjhakūṭe pabbate pāturahosi. Atha kho āyasmā mahāmoggallāno yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā mahāmoggallāno yāvatako ahosi tissena brahmunā saddhiṃ kathāsallāpo taṃ sabbaṃ bhagavato ārocesi.
‘‘ந ஹி பன தே, மொக்³க³ல்லான, திஸ்ஸோ ப்³ரஹ்மா ஸத்தமங் அனிமித்தவிஹாரிங் புக்³க³லங் தே³ஸேதி’’. ‘‘ஏதஸ்ஸ, ப⁴க³வா, காலோ; ஏதஸ்ஸ, ஸுக³த, காலோ! யங் ப⁴க³வா ஸத்தமங் அனிமித்தவிஹாரிங் புக்³க³லங் தே³ஸெய்ய. ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேன ஹி, மொக்³க³ல்லான, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா மஹாமொக்³க³ல்லானோ ப⁴க³வதோ பச்சஸ்ஸோஸி. ப⁴க³வா ஏதத³வோச –
‘‘Na hi pana te, moggallāna, tisso brahmā sattamaṃ animittavihāriṃ puggalaṃ deseti’’. ‘‘Etassa, bhagavā, kālo; etassa, sugata, kālo! Yaṃ bhagavā sattamaṃ animittavihāriṃ puggalaṃ deseyya. Bhagavato sutvā bhikkhū dhāressantī’’ti. ‘‘Tena hi, moggallāna, suṇāhi, sādhukaṃ manasi karohi; bhāsissāmī’’ti. ‘‘Evaṃ, bhante’’ti kho āyasmā mahāmoggallāno bhagavato paccassosi. Bhagavā etadavoca –
‘‘இத⁴, மொக்³க³ல்லான, பி⁴க்கு² ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹரதி. தமேனங் தே தே³வா ஏவங் ஜானந்தி – ‘அயங் கோ² ஆயஸ்மா ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹரதி. அப்பேவ நாம அயமாயஸ்மா அனுலோமிகானி ஸேனாஸனானி படிஸேவமானோ கல்யாணமித்தே ப⁴ஜமானோ இந்த்³ரியானி ஸமன்னானயமானோ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யா’தி. ஏவங் கோ², மொக்³க³ல்லான, தேஸங் தே³வானங் ஞாணங் ஹோதி – ‘ஸஉபாதி³ஸேஸே வா ஸஉபாதி³ஸேஸோதி, அனுபாதி³ஸேஸே வா அனுபாதி³ஸேஸோ’’’தி. ததியங்.
‘‘Idha, moggallāna, bhikkhu sabbanimittānaṃ amanasikārā animittaṃ cetosamādhiṃ upasampajja viharati. Tamenaṃ te devā evaṃ jānanti – ‘ayaṃ kho āyasmā sabbanimittānaṃ amanasikārā animittaṃ cetosamādhiṃ upasampajja viharati. Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyā’ti. Evaṃ kho, moggallāna, tesaṃ devānaṃ ñāṇaṃ hoti – ‘saupādisese vā saupādisesoti, anupādisese vā anupādiseso’’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. திஸ்ஸப்³ரஹ்மாஸுத்தவண்ணனா • 3. Tissabrahmāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. திஸ்ஸப்³ரஹ்மாஸுத்தவண்ணனா • 3. Tissabrahmāsuttavaṇṇanā
