| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(7) 2. மஹாவக்³கோ³
(7) 2. Mahāvaggo
1. தித்தா²யதனாதி³ஸுத்தங்
1. Titthāyatanādisuttaṃ
62. ‘‘தீணிமானி , பி⁴க்க²வே, தித்தா²யதனானி யானி பண்டி³தேஹி ஸமனுயுஞ்ஜியமானானி 1 ஸமனுகா³ஹியமானானி ஸமனுபா⁴ஸியமானானி பரம்பி க³ந்த்வா அகிரியாய ஸண்ட²ஹந்தி. கதமானி தீணி? ஸந்தி, பி⁴க்க²வே, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் புப்³பே³கதஹேதூ’தி. ஸந்தி, பி⁴க்க²வே, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் இஸ்ஸரனிம்மானஹேதூ’தி. ஸந்தி, பி⁴க்க²வே, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் அஹேதுஅப்பச்சயா’’’தி.
62. ‘‘Tīṇimāni , bhikkhave, titthāyatanāni yāni paṇḍitehi samanuyuñjiyamānāni 2 samanugāhiyamānāni samanubhāsiyamānāni parampi gantvā akiriyāya saṇṭhahanti. Katamāni tīṇi? Santi, bhikkhave, eke samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti. Santi, bhikkhave, eke samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ issaranimmānahetū’ti. Santi, bhikkhave, eke samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ ahetuappaccayā’’’ti.
‘‘தத்ர, பி⁴க்க²வே, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் புப்³பே³கதஹேதூ’தி, த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ ஏவங்வாதி³னோ ஏவங்தி³ட்டி²னோ – யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் புப்³பே³கதஹேதூ’தி ? தே ச மே 3 ஏவங் புட்டா² ‘ஆமா’தி 4 படிஜானந்தி. த்யாஹங் ஏவங் வதா³மி – ‘தேனஹாயஸ்மந்தோ பாணாதிபாதினோ ப⁴விஸ்ஸந்தி புப்³பே³கதஹேது, அதி³ன்னாதா³யினோ ப⁴விஸ்ஸந்தி புப்³பே³கதஹேது, அப்³ரஹ்மசாரினோ ப⁴விஸ்ஸந்தி புப்³பே³கதஹேது, முஸாவாதி³னோ ப⁴விஸ்ஸந்தி புப்³பே³கதஹேது, பிஸுணவாசா ப⁴விஸ்ஸந்தி புப்³பே³கதஹேது, ப²ருஸவாசா ப⁴விஸ்ஸந்தி புப்³பே³கதஹேது, ஸம்ப²ப்பலாபினோ ப⁴விஸ்ஸந்தி புப்³பே³கதஹேது, அபி⁴ஜ்ஜா²லுனோ ப⁴விஸ்ஸந்தி புப்³பே³கதஹேது, ப்³யாபன்னசித்தா ப⁴விஸ்ஸந்தி புப்³பே³கதஹேது, மிச்சா²தி³ட்டி²கா ப⁴விஸ்ஸந்தி புப்³பே³கதஹேது’’’.
‘‘Tatra, bhikkhave, ye te samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti, tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto evaṃvādino evaṃdiṭṭhino – yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ pubbekatahetū’ti ? Te ca me 5 evaṃ puṭṭhā ‘āmā’ti 6 paṭijānanti. Tyāhaṃ evaṃ vadāmi – ‘tenahāyasmanto pāṇātipātino bhavissanti pubbekatahetu, adinnādāyino bhavissanti pubbekatahetu, abrahmacārino bhavissanti pubbekatahetu, musāvādino bhavissanti pubbekatahetu, pisuṇavācā bhavissanti pubbekatahetu, pharusavācā bhavissanti pubbekatahetu, samphappalāpino bhavissanti pubbekatahetu, abhijjhāluno bhavissanti pubbekatahetu, byāpannacittā bhavissanti pubbekatahetu, micchādiṭṭhikā bhavissanti pubbekatahetu’’’.
‘‘புப்³பே³கதங் கோ² பன, பி⁴க்க²வே, ஸாரதோ பச்சாக³ச்ச²தங் ந ஹோதி ச²ந்தோ³ வா வாயாமோ வா இத³ங் வா கரணீயங் இத³ங் வா அகரணீயந்தி. இதி கரணீயாகரணீயே கோ² பன ஸச்சதோ தே²ததோ அனுபலப்³பி⁴யமானே முட்ட²ஸ்ஸதீனங் அனாரக்கா²னங் விஹரதங் ந ஹோதி பச்சத்தங் ஸஹத⁴ம்மிகோ ஸமணவாதோ³ . அயங் கோ² மே, பி⁴க்க²வே, தேஸு ஸமணப்³ராஹ்மணேஸு ஏவங்வாதீ³ஸு ஏவங்தி³ட்டீ²ஸு பட²மோ ஸஹத⁴ம்மிகோ நிக்³க³ஹோ ஹோதி.
‘‘Pubbekataṃ kho pana, bhikkhave, sārato paccāgacchataṃ na hoti chando vā vāyāmo vā idaṃ vā karaṇīyaṃ idaṃ vā akaraṇīyanti. Iti karaṇīyākaraṇīye kho pana saccato thetato anupalabbhiyamāne muṭṭhassatīnaṃ anārakkhānaṃ viharataṃ na hoti paccattaṃ sahadhammiko samaṇavādo . Ayaṃ kho me, bhikkhave, tesu samaṇabrāhmaṇesu evaṃvādīsu evaṃdiṭṭhīsu paṭhamo sahadhammiko niggaho hoti.
‘‘தத்ர, பி⁴க்க²வே, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் இஸ்ஸரனிம்மானஹேதூ’தி, த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ ஏவங்வாதி³னோ ஏவதி³ட்டி²னோ – யங் கிஞ்சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் இஸ்ஸரனிம்மானஹேதூ’தி? தே ச மே ஏவங் புட்டா² ‘ஆமா’தி படிஜானந்தி. த்யாஹங் ஏவங் வதா³மி – ‘தேனஹாயஸ்மந்தோ பாணாதிபாதினோ ப⁴விஸ்ஸந்தி இஸ்ஸரனிம்மானஹேது, அதி³ன்னாதா³யினோ ப⁴விஸ்ஸந்தி இஸ்ஸரனிம்மானஹேது, அப்³ரஹ்மசாரினோ ப⁴விஸ்ஸந்தி இஸ்ஸரனிம்மானஹேது, முஸாவாதி³னோ ப⁴விஸ்ஸந்தி இஸ்ஸரனிம்மானஹேது, பிஸுணவாசா ப⁴விஸ்ஸந்தி இஸ்ஸரனிம்மானஹேது, ப²ருஸவாசா ப⁴விஸ்ஸந்தி இஸ்ஸரனிம்மானஹேது, ஸம்ப²ப்பலாபினோ ப⁴விஸ்ஸந்தி இஸ்ஸரனிம்மானஹேது, அபி⁴ஜ்ஜா²லுனோ ப⁴விஸ்ஸந்தி இஸ்ஸரனிம்மானஹேது, ப்³யாபன்னசித்தா ப⁴விஸ்ஸந்தி இஸ்ஸரனிம்மானஹேது, மிச்சா²தி³ட்டி²கா ப⁴விஸ்ஸந்தி இஸ்ஸரனிம்மானஹேது’’’.
‘‘Tatra, bhikkhave, ye te samaṇabrāhmaṇā evaṃvādino evaṃdiṭṭhino – ‘yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ issaranimmānahetū’ti, tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto evaṃvādino evadiṭṭhino – yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ issaranimmānahetū’ti? Te ca me evaṃ puṭṭhā ‘āmā’ti paṭijānanti. Tyāhaṃ evaṃ vadāmi – ‘tenahāyasmanto pāṇātipātino bhavissanti issaranimmānahetu, adinnādāyino bhavissanti issaranimmānahetu, abrahmacārino bhavissanti issaranimmānahetu, musāvādino bhavissanti issaranimmānahetu, pisuṇavācā bhavissanti issaranimmānahetu, pharusavācā bhavissanti issaranimmānahetu, samphappalāpino bhavissanti issaranimmānahetu, abhijjhāluno bhavissanti issaranimmānahetu, byāpannacittā bhavissanti issaranimmānahetu, micchādiṭṭhikā bhavissanti issaranimmānahetu’’’.
‘‘இஸ்ஸரனிம்மானங் கோ² பன, பி⁴க்க²வே, ஸாரதோ பச்சாக³ச்ச²தங் ந ஹோதி ச²ந்தோ³ வா வாயாமோ வா இத³ங் வா கரணீயங் இத³ங் வா அகரணீயந்தி. இதி கரணீயாகரணீயே கோ² பன ஸச்சதோ தே²ததோ அனுபலப்³பி⁴யமானே முட்ட²ஸ்ஸதீனங் அனாரக்கா²னங் விஹரதங் ந ஹோதி பச்சத்தங் ஸஹத⁴ம்மிகோ ஸமணவாதோ³. அயங் கோ² மே, பி⁴க்க²வே, தேஸு ஸமணப்³ராஹ்மணேஸு ஏவங்வாதீ³ஸு ஏவங்தி³ட்டீ²ஸு து³தியோ ஸஹத⁴ம்மிகோ நிக்³க³ஹோ ஹோதி.
‘‘Issaranimmānaṃ kho pana, bhikkhave, sārato paccāgacchataṃ na hoti chando vā vāyāmo vā idaṃ vā karaṇīyaṃ idaṃ vā akaraṇīyanti. Iti karaṇīyākaraṇīye kho pana saccato thetato anupalabbhiyamāne muṭṭhassatīnaṃ anārakkhānaṃ viharataṃ na hoti paccattaṃ sahadhammiko samaṇavādo. Ayaṃ kho me, bhikkhave, tesu samaṇabrāhmaṇesu evaṃvādīsu evaṃdiṭṭhīsu dutiyo sahadhammiko niggaho hoti.
‘‘தத்ர , பி⁴க்க²வே, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘யங் கிங் சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் அஹேதுஅப்பச்சயா’தி, த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ ஏவங்வாதி³னோ ஏவங்தி³ட்டி²னோ – யங் கிங் சாயங் புரிஸபுக்³க³லோ படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா ஸப்³ப³ங் தங் அஹேதுஅப்பச்சயா’தி? தே ச மே ஏவங் புட்டா² ‘ஆமா’தி படிஜானந்தி . த்யாஹங் ஏவங் வதா³மி – ‘தேனஹாயஸ்மந்தோ பாணாதிபாதினோ ப⁴விஸ்ஸந்தி அஹேதுஅப்பச்சயா…பே॰… மிச்சா²தி³ட்டி²கா ப⁴விஸ்ஸந்தி அஹேதுஅப்பச்சயா’’’.
‘‘Tatra , bhikkhave, ye te samaṇabrāhmaṇā evaṃvādino evaṃdiṭṭhino – ‘yaṃ kiṃ cāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ ahetuappaccayā’ti, tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto evaṃvādino evaṃdiṭṭhino – yaṃ kiṃ cāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā sabbaṃ taṃ ahetuappaccayā’ti? Te ca me evaṃ puṭṭhā ‘āmā’ti paṭijānanti . Tyāhaṃ evaṃ vadāmi – ‘tenahāyasmanto pāṇātipātino bhavissanti ahetuappaccayā…pe… micchādiṭṭhikā bhavissanti ahetuappaccayā’’’.
‘‘அஹேதுஅப்பச்சயங் 7 கோ² பன, பி⁴க்க²வே, ஸாரதோ பச்சாக³ச்ச²தங் ந ஹோதி ச²ந்தோ³ வா வாயாமோ வா இத³ங் வா கரணீயங் இத³ங் வா அகரணீயந்தி. இதி கரணீயாகரணீயே கோ² பன ஸச்சதோ தே²ததோ அனுபலப்³பி⁴யமானே முட்ட²ஸ்ஸதீனங் அனாரக்கா²னங் விஹரதங் ந ஹோதி பச்சத்தங் ஸஹத⁴ம்மிகோ ஸமணவாதோ³. அயங் கோ² மே, பி⁴க்க²வே, தேஸு ஸமணப்³ராஹ்மணேஸு ஏவங்வாதீ³ஸு ஏவங்தி³ட்டீ²ஸு ததியோ ஸஹத⁴ம்மிகோ நிக்³க³ஹோ ஹோதி.
‘‘Ahetuappaccayaṃ 8 kho pana, bhikkhave, sārato paccāgacchataṃ na hoti chando vā vāyāmo vā idaṃ vā karaṇīyaṃ idaṃ vā akaraṇīyanti. Iti karaṇīyākaraṇīye kho pana saccato thetato anupalabbhiyamāne muṭṭhassatīnaṃ anārakkhānaṃ viharataṃ na hoti paccattaṃ sahadhammiko samaṇavādo. Ayaṃ kho me, bhikkhave, tesu samaṇabrāhmaṇesu evaṃvādīsu evaṃdiṭṭhīsu tatiyo sahadhammiko niggaho hoti.
‘‘இமானி கோ², பி⁴க்க²வே, தீணி தித்தா²யதனானி யானி பண்டி³தேஹி ஸமனுயுஞ்ஜியமானானி ஸமனுகா³ஹியமானானி ஸமனுபா⁴ஸியமானானி பரம்பி க³ந்த்வா அகிரியாய ஸண்ட²ஹந்தி.
‘‘Imāni kho, bhikkhave, tīṇi titthāyatanāni yāni paṇḍitehi samanuyuñjiyamānāni samanugāhiyamānāni samanubhāsiyamānāni parampi gantvā akiriyāya saṇṭhahanti.
‘‘அயங் கோ² பன, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹி. கதமோ ச, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹி? இமா ச² தா⁴துயோதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹி. இமானி ச² ப²ஸ்ஸாயதனானீதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹி. இமே அட்டா²ரஸ மனோபவிசாராதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹி. இமானி சத்தாரி அரியஸச்சானீதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹி.
‘‘Ayaṃ kho pana, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhi. Katamo ca, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhi? Imā cha dhātuyoti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhi. Imāni cha phassāyatanānīti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhi. Ime aṭṭhārasa manopavicārāti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhi. Imāni cattāri ariyasaccānīti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhi.
‘‘இமா ச² தா⁴துயோதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி கோ² பனேதங் வுத்தங். கிஞ்சேதங் படிச்ச வுத்தங்? ச²யிமா, பி⁴க்க²வே , தா⁴துயோ – பத²வீதா⁴து, ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து. இமா ச² தா⁴துயோதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி யங் தங் வுத்தங், இத³மேதங் படிச்ச வுத்தங்.
‘‘Imā cha dhātuyoti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti kho panetaṃ vuttaṃ. Kiñcetaṃ paṭicca vuttaṃ? Chayimā, bhikkhave , dhātuyo – pathavīdhātu, āpodhātu, tejodhātu, vāyodhātu, ākāsadhātu, viññāṇadhātu. Imā cha dhātuyoti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti yaṃ taṃ vuttaṃ, idametaṃ paṭicca vuttaṃ.
‘‘இமானி ச² ப²ஸ்ஸாயதனானீதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி கோ² பனேதங் வுத்தங். கிஞ்சேதங் படிச்ச வுத்தங்? ச²யிமானி, பி⁴க்க²வே, ப²ஸ்ஸாயதனானி – சக்கு² ப²ஸ்ஸாயதனங், ஸோதங் ப²ஸ்ஸாயதனங், கா⁴னங் ப²ஸ்ஸாயதனங், ஜிவ்ஹா ப²ஸ்ஸாயதனங், காயோ ப²ஸ்ஸாயதனங், மனோ ப²ஸ்ஸாயதனங். இமானி ச² ப²ஸ்ஸாயதனானீதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி யங் தங் வுத்தங், இத³மேதங் படிச்ச வுத்தங்.
‘‘Imāni cha phassāyatanānīti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti kho panetaṃ vuttaṃ. Kiñcetaṃ paṭicca vuttaṃ? Chayimāni, bhikkhave, phassāyatanāni – cakkhu phassāyatanaṃ, sotaṃ phassāyatanaṃ, ghānaṃ phassāyatanaṃ, jivhā phassāyatanaṃ, kāyo phassāyatanaṃ, mano phassāyatanaṃ. Imāni cha phassāyatanānīti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti yaṃ taṃ vuttaṃ, idametaṃ paṭicca vuttaṃ.
‘‘இமே அட்டா²ரஸ மனோபவிசாராதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி கோ² பனேதங் வுத்தங். கிஞ்சேதங் படிச்ச வுத்தங்? சக்கு²னா ரூபங் தி³ஸ்வா ஸோமனஸ்ஸட்டா²னியங் ரூபங் உபவிசரதி தோ³மனஸ்ஸட்டா²னியங் ரூபங் உபவிசரதி உபெக்கா²ட்டா²னியங் ரூபங் உபவிசரதி, ஸோதேன ஸத்³த³ங் ஸுத்வா… கா⁴னேன க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய ஸோமனஸ்ஸட்டா²னியங் த⁴ம்மங் உபவிசரதி தோ³மனஸ்ஸட்டா²னியங் த⁴ம்மங் உபவிசரதி உபெக்கா²ட்டா²னியங் த⁴ம்மங் உபவிசரதி. இமே அட்டா²ரஸ மனோபவிசாராதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி யங் தங் வுத்தங், இத³மேதங் படிச்ச வுத்தங்.
‘‘Ime aṭṭhārasa manopavicārāti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti kho panetaṃ vuttaṃ. Kiñcetaṃ paṭicca vuttaṃ? Cakkhunā rūpaṃ disvā somanassaṭṭhāniyaṃ rūpaṃ upavicarati domanassaṭṭhāniyaṃ rūpaṃ upavicarati upekkhāṭṭhāniyaṃ rūpaṃ upavicarati, sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya somanassaṭṭhāniyaṃ dhammaṃ upavicarati domanassaṭṭhāniyaṃ dhammaṃ upavicarati upekkhāṭṭhāniyaṃ dhammaṃ upavicarati. Ime aṭṭhārasa manopavicārāti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti yaṃ taṃ vuttaṃ, idametaṃ paṭicca vuttaṃ.
‘‘இமானி சத்தாரி அரியஸச்சானீதி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி கோ² பனேதங் வுத்தங். கிஞ்சேதங் படிச்ச வுத்தங்? ச²ன்னங், பி⁴க்க²வே, தா⁴தூனங் உபாதா³ய க³ப்³ப⁴ஸ்ஸாவக்கந்தி ஹோதி; ஓக்கந்தியா ஸதி நாமரூபங், நாமரூபபச்சயா ஸளாயதனங், ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா. வேதி³யமானஸ்ஸ கோ² பனாஹங், பி⁴க்க²வே, இத³ங் து³க்க²ந்தி பஞ்ஞபேமி, அயங் து³க்க²ஸமுத³யோதி பஞ்ஞபேமி, அயங் து³க்க²னிரோதோ⁴தி பஞ்ஞபேமி, அயங் து³க்க²னிரோத⁴கா³மினீ படிபதா³தி பஞ்ஞபேமி.
‘‘Imāni cattāri ariyasaccānīti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti kho panetaṃ vuttaṃ. Kiñcetaṃ paṭicca vuttaṃ? Channaṃ, bhikkhave, dhātūnaṃ upādāya gabbhassāvakkanti hoti; okkantiyā sati nāmarūpaṃ, nāmarūpapaccayā saḷāyatanaṃ, saḷāyatanapaccayā phasso, phassapaccayā vedanā. Vediyamānassa kho panāhaṃ, bhikkhave, idaṃ dukkhanti paññapemi, ayaṃ dukkhasamudayoti paññapemi, ayaṃ dukkhanirodhoti paññapemi, ayaṃ dukkhanirodhagāminī paṭipadāti paññapemi.
‘‘கதமஞ்ச, பி⁴க்க²வே, து³க்க²ங் அரியஸச்சங்? ஜாதிபி து³க்கா², ஜராபி து³க்கா² , ( ) 9 மரணம்பி து³க்க²ங் , ஸோகபரிதே³வது³க்க²தோ³மனஸ்ஸுபாயாஸாபி து³க்கா², (அப்பியேஹி ஸம்பயோகோ³ து³க்கோ², பியேஹி விப்பயோகோ³ து³க்கோ²,) 10 யம்பிச்ச²ங் ந லப⁴தி தம்பி து³க்க²ங். ஸங்கி²த்தேன பஞ்சுபாதா³னக்க²ந்தா⁴ து³க்கா². இத³ங் வுச்சதி, பி⁴க்க²வே, து³க்க²ங் அரியஸச்சங்.
‘‘Katamañca, bhikkhave, dukkhaṃ ariyasaccaṃ? Jātipi dukkhā, jarāpi dukkhā , ( ) 11 maraṇampi dukkhaṃ , sokaparidevadukkhadomanassupāyāsāpi dukkhā, (appiyehi sampayogo dukkho, piyehi vippayogo dukkho,) 12 yampicchaṃ na labhati tampi dukkhaṃ. Saṃkhittena pañcupādānakkhandhā dukkhā. Idaṃ vuccati, bhikkhave, dukkhaṃ ariyasaccaṃ.
‘‘கதமஞ்ச, பி⁴க்க²வே, து³க்க²ஸமுத³யங் 13 அரியஸச்சங்? அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங், விஞ்ஞாணபச்சயா நாமரூபங், நாமரூபபச்சயா ஸளாயதனங், ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங், உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. இத³ங் வுச்சதி, பி⁴க்க²வே, து³க்க²ஸமுத³யங் அரியஸச்சங்.
‘‘Katamañca, bhikkhave, dukkhasamudayaṃ 14 ariyasaccaṃ? Avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti. Idaṃ vuccati, bhikkhave, dukkhasamudayaṃ ariyasaccaṃ.
‘‘கதமஞ்ச, பி⁴க்க²வே, து³க்க²னிரோத⁴ங் 15 அரியஸச்சங்? அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴, விஞ்ஞாணனிரோதா⁴ நாமரூபனிரோதோ⁴, நாமரூபனிரோதா⁴ ஸளாயதனநிரோதோ⁴, ஸளாயதனநிரோதா⁴ ப²ஸ்ஸனிரோதோ⁴, ப²ஸ்ஸனிரோதா⁴ வேத³னானிரோதோ⁴, வேத³னானிரோதா⁴ தண்ஹானிரோதோ⁴, தண்ஹானிரோதா⁴ உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி. இத³ங் வுச்சதி, பி⁴க்க²வே, து³க்க²னிரோத⁴ங் அரியஸச்சங்.
‘‘Katamañca, bhikkhave, dukkhanirodhaṃ 16 ariyasaccaṃ? Avijjāya tveva asesavirāganirodhā saṅkhāranirodho, saṅkhāranirodhā viññāṇanirodho, viññāṇanirodhā nāmarūpanirodho, nāmarūpanirodhā saḷāyatananirodho, saḷāyatananirodhā phassanirodho, phassanirodhā vedanānirodho, vedanānirodhā taṇhānirodho, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti. Idaṃ vuccati, bhikkhave, dukkhanirodhaṃ ariyasaccaṃ.
‘‘கதமஞ்ச, பி⁴க்க²வே, து³க்க²னிரோத⁴கா³மினீ படிபதா³ அரியஸச்சங்? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴. இத³ங் வுச்சதி, பி⁴க்க²வே, து³க்க²னிரோத⁴கா³மினீ படிபதா³ அரியஸச்சங். ‘இமானி சத்தாரி அரியஸச்சானீ’தி, பி⁴க்க²வே, மயா த⁴ம்மோ தே³ஸிதோ அனிக்³க³ஹிதோ அஸங்கிலிட்டோ² அனுபவஜ்ஜோ அப்படிகுட்டோ² ஸமணேஹி ப்³ராஹ்மணேஹி விஞ்ஞூஹீதி. இதி யங் தங் வுத்தங் இத³மேதங் படிச்ச வுத்த’’ந்தி. பட²மங்.
‘‘Katamañca, bhikkhave, dukkhanirodhagāminī paṭipadā ariyasaccaṃ? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi. Idaṃ vuccati, bhikkhave, dukkhanirodhagāminī paṭipadā ariyasaccaṃ. ‘Imāni cattāri ariyasaccānī’ti, bhikkhave, mayā dhammo desito aniggahito asaṃkiliṭṭho anupavajjo appaṭikuṭṭho samaṇehi brāhmaṇehi viññūhīti. Iti yaṃ taṃ vuttaṃ idametaṃ paṭicca vutta’’nti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. தித்தா²யதனஸுத்தவண்ணனா • 1. Titthāyatanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. தித்தா²யதனஸுத்தவண்ணனா • 1. Titthāyatanasuttavaṇṇanā
