| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. உத³யஸுத்தவண்ணனா
2. Udayasuttavaṇṇanā
198. ஏதங் வுத்தந்தி ‘‘ஓத³னேன பூரேஸீ’’தி ஏதங் வசனங் வுத்தங். ‘‘க³ஹேதுங் ஸமத்தோ² நாம நாஹோஸீதி ப⁴க³வதோ அதி⁴ட்டா²னப³லேனா’’தி வத³ந்தி. தங் ப்³ராஹ்மணங் வினேதுகாமதாய கிர ப⁴க³வா ததா² அகாஸி.
198.Etaṃ vuttanti ‘‘odanena pūresī’’ti etaṃ vacanaṃ vuttaṃ. ‘‘Gahetuṃ samattho nāma nāhosīti bhagavato adhiṭṭhānabalenā’’ti vadanti. Taṃ brāhmaṇaṃ vinetukāmatāya kira bhagavā tathā akāsi.
உபாரம்ப⁴ப⁴யேனாதி பரூபவாத³ப⁴யேன. அவத்வாவ நிவத்தோ ‘‘அப்³பா⁴க³தோபி பாஸண்டோ³ வாசாமத்தேனபி ந பூஜேதப்³போ³’’தி ப்³ராஹ்மணத⁴ம்மே வுத்தத்தா. பக்கந்தோதி ப்³ராஹ்மணஸ்ஸ த⁴ம்மங் அவத்வா பக்கந்தோ ப்³ராஹ்மணஸ்ஸ ந தாவ ஞாணங் பரிபக்கந்தி. ஏதங் வசனங்…பே॰… மக³மாஸி ‘‘புனப்புனஞ்சேவ வபந்தி பீ³ஜ’’ந்திஆதி³னா த⁴ம்மங் கதே²துங் அவஸ்ஸங் ஆகங்க²ந்தோ. பகாரதோ கஸ்ஸதீதி பகட்ட²கோ, ரஸதண்ஹாய பகட்டோ²தி அத்தோ². தேனாஹ ‘‘ரஸகி³த்³தோ⁴’’தி.
Upārambhabhayenāti parūpavādabhayena. Avatvāva nivatto ‘‘abbhāgatopi pāsaṇḍo vācāmattenapi na pūjetabbo’’ti brāhmaṇadhamme vuttattā. Pakkantoti brāhmaṇassa dhammaṃ avatvā pakkanto brāhmaṇassa na tāva ñāṇaṃ paripakkanti. Etaṃ vacanaṃ…pe… magamāsi ‘‘punappunañceva vapanti bīja’’ntiādinā dhammaṃ kathetuṃ avassaṃ ākaṅkhanto. Pakārato kassatīti pakaṭṭhako, rasataṇhāya pakaṭṭhoti attho. Tenāha ‘‘rasagiddho’’ti.
‘‘புனப்புனஞ்சேவ வபந்தி பீ³ஜ’’ந்தி இமங் தே³ஸனங் ஆரபீ⁴தி ஸம்ப³ந்தோ⁴. பீ³ஜந்தி ச இதி-ஸத்³தோ³ நித³ஸ்ஸனத்தோ² வா. தேன அவயவேன ஸமுதா³யங் நித³ஸ்ஸேதி. ஓஸக்கஸீதி ஸங்கோசஸி. வுத்தந்தி வபனங் கதங். தஸ்மா வுத்தங் ‘‘அலமெத்தாவதா’’தி. ‘‘வஸ்ஸித்வா’’தி வுட்டி²ங் பவத்தெத்வா.
‘‘Punappunañceva vapanti bīja’’nti imaṃ desanaṃ ārabhīti sambandho. Bījanti ca iti-saddo nidassanattho vā. Tena avayavena samudāyaṃ nidasseti. Osakkasīti saṅkocasi. Vuttanti vapanaṃ kataṃ. Tasmā vuttaṃ ‘‘alamettāvatā’’ti. ‘‘Vassitvā’’ti vuṭṭhiṃ pavattetvā.
தே³ஸனா…பே॰… த³ஸ்ஸேதி ப்³ராஹ்மணேன வுத்தங் அயுத்தவசனங் பரிவட்டெந்தோபி தி³வஸே தி³வஸே பி⁴க்கா²சரியா நாம பி⁴க்கூ²னங் காயக³தா வுத்தீதி. கீ²ரங் ஹத்தே²ன நயந்தீதி வா கீ²ரனிகா. கிலமதீதி தங்தங்கிச்சகரணவஸேன கி²ஜ்ஜதி. ப²ந்த³தீதி அனத்த²ஸமாயோக³வஸேன விப்ப²ந்த³தி. அபுனப்³ப⁴வாயாதி ஆயதிங் அனுப்பத்தியா. மக்³கோ³ நாமாதி உபாயோ நாம நிப்³பா³னங், தஸ்மிங் லத்³தே⁴ புனப்³ப⁴வாபா⁴வதோ. ‘‘புனப்புன’’ந்தி வசனங் உபாதா³ய பீ³ஜவபனாத³யோ புனப்புனத⁴ம்மா நாம ஜாதாதி ஆஹ ‘‘ஸோளஸ புனப்புனத⁴ம்மே தே³ஸெந்தேனா’’தி.
Desanā…pe… dasseti brāhmaṇena vuttaṃ ayuttavacanaṃ parivaṭṭentopi divase divase bhikkhācariyā nāma bhikkhūnaṃ kāyagatā vuttīti. Khīraṃ hatthena nayantīti vā khīranikā. Kilamatīti taṃtaṃkiccakaraṇavasena khijjati. Phandatīti anatthasamāyogavasena vipphandati. Apunabbhavāyāti āyatiṃ anuppattiyā. Maggo nāmāti upāyo nāma nibbānaṃ, tasmiṃ laddhe punabbhavābhāvato. ‘‘Punappuna’’nti vacanaṃ upādāya bījavapanādayo punappunadhammā nāma jātāti āha ‘‘soḷasa punappunadhamme desentenā’’ti.
உத³யஸுத்தவண்ணனா நிட்டி²தா.
Udayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. உத³யஸுத்தங் • 2. Udayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. உத³யஸுத்தவண்ணனா • 2. Udayasuttavaṇṇanā
