| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. உதா³யீஸுத்தங்
9. Udāyīsuttaṃ
159. ஏவங் மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன ஸமயேன ஆயஸ்மா உதா³யீ மஹதியா கி³ஹிபரிஸாய பரிவுதோ த⁴ம்மங் தே³ஸெந்தோ நிஸின்னோ ஹோதி. அத்³த³ஸா கோ² ஆயஸ்மா ஆனந்தோ³ ஆயஸ்மந்தங் உதா³யிங் மஹதியா கி³ஹிபரிஸாய பரிவுதங் த⁴ம்மங் தே³ஸெந்தங் நிஸின்னங். தி³ஸ்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘ஆயஸ்மா, ப⁴ந்தே, உதா³யீ மஹதியா கி³ஹிபரிஸாய பரிவுதோ த⁴ம்மங் தே³ஸேதீ’’தி 1.
159. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena āyasmā udāyī mahatiyā gihiparisāya parivuto dhammaṃ desento nisinno hoti. Addasā kho āyasmā ānando āyasmantaṃ udāyiṃ mahatiyā gihiparisāya parivutaṃ dhammaṃ desentaṃ nisinnaṃ. Disvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘āyasmā, bhante, udāyī mahatiyā gihiparisāya parivuto dhammaṃ desetī’’ti 2.
‘‘ந கோ², ஆனந்த³ , ஸுகரங் பரேஸங் த⁴ம்மங் தே³ஸேதுங். பரேஸங், ஆனந்த³, த⁴ம்மங் தே³ஸெந்தேன பஞ்ச த⁴ம்மே அஜ்ஜ²த்தங் உபட்டா²பெத்வா பரேஸங் த⁴ம்மோ தே³ஸேதப்³போ³. கதமே பஞ்ச? ‘அனுபுப்³பி³ங் கத²ங் 3 கதெ²ஸ்ஸாமீ’தி பரேஸங் த⁴ம்மோ தே³ஸேதப்³போ³; ‘பரியாயத³ஸ்ஸாவீ கத²ங் கதெ²ஸ்ஸாமீ’தி பரேஸங் த⁴ம்மோ தே³ஸேதப்³போ³; ‘அனுத்³த³யதங் படிச்ச கத²ங் கதெ²ஸ்ஸாமீ’தி பரேஸங் த⁴ம்மோ தே³ஸேதப்³போ³; ‘ந ஆமிஸந்தரோ கத²ங் கதெ²ஸ்ஸாமீ’தி பரேஸங் த⁴ம்மோ தே³ஸேதப்³போ³; ‘அத்தானஞ்ச பரஞ்ச அனுபஹச்ச கத²ங் கதெ²ஸ்ஸாமீ’தி பரேஸங் த⁴ம்மோ தே³ஸேதப்³போ³. ந கோ², ஆனந்த³, ஸுகரங் பரேஸங் த⁴ம்மங் தே³ஸேதுங். பரேஸங், ஆனந்த³, த⁴ம்மங் தே³ஸெந்தேன இமே பஞ்ச த⁴ம்மே அஜ்ஜ²த்தங் உபட்டா²பெத்வா பரேஸங் த⁴ம்மோ தே³ஸேதப்³போ³’’தி. நவமங்.
‘‘Na kho, ānanda , sukaraṃ paresaṃ dhammaṃ desetuṃ. Paresaṃ, ānanda, dhammaṃ desentena pañca dhamme ajjhattaṃ upaṭṭhāpetvā paresaṃ dhammo desetabbo. Katame pañca? ‘Anupubbiṃ kathaṃ 4 kathessāmī’ti paresaṃ dhammo desetabbo; ‘pariyāyadassāvī kathaṃ kathessāmī’ti paresaṃ dhammo desetabbo; ‘anuddayataṃ paṭicca kathaṃ kathessāmī’ti paresaṃ dhammo desetabbo; ‘na āmisantaro kathaṃ kathessāmī’ti paresaṃ dhammo desetabbo; ‘attānañca parañca anupahacca kathaṃ kathessāmī’ti paresaṃ dhammo desetabbo. Na kho, ānanda, sukaraṃ paresaṃ dhammaṃ desetuṃ. Paresaṃ, ānanda, dhammaṃ desentena ime pañca dhamme ajjhattaṃ upaṭṭhāpetvā paresaṃ dhammo desetabbo’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. உதா³யீஸுத்தவண்ணனா • 9. Udāyīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / (16) 1. ஸத்³த⁴ம்மவக்³கோ³ • (16) 1. Saddhammavaggo
