| Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
ઉદ્દેસભત્તકથાવણ્ણના
Uddesabhattakathāvaṇṇanā
ભોજનસાલાયાતિ ભત્તુદ્દેસટ્ઠાનં સન્ધાય વુત્તં. એકવળઞ્જન્તિ એકદ્વારેન વળઞ્જિતબ્બં. નાનાનિવેસનેસૂતિ નાનાકુલસ્સ નાનૂપચારેસુ નિવેસનેસુ.
Bhojanasālāyāti bhattuddesaṭṭhānaṃ sandhāya vuttaṃ. Ekavaḷañjanti ekadvārena vaḷañjitabbaṃ. Nānānivesanesūti nānākulassa nānūpacāresu nivesanesu.
નિસિન્નસ્સપિ નિદ્દાયન્તસ્સપીતિ અનાદરે સામિવચનં, વુડ્ઢતરે નિદ્દાયન્તે નવકસ્સ ગાહિતં સુગ્ગહિતન્તિ અત્થો.
Nisinnassapi niddāyantassapīti anādare sāmivacanaṃ, vuḍḍhatare niddāyante navakassa gāhitaṃ suggahitanti attho.
વિસ્સટ્ઠદૂતોતિ યથારુચિ વત્તું લભનતો નિરાસઙ્કદૂતો. પુચ્છાસભાગેનાતિ પુચ્છાવચનપટિભાગેન. ‘‘એકા કૂટટ્ઠિતિકા નામા’’તિ વુત્તમેવત્થં વિભાવેતું ‘‘રઞ્ઞો વા હી’’તિઆદિ વુત્તં.
Vissaṭṭhadūtoti yathāruci vattuṃ labhanato nirāsaṅkadūto. Pucchāsabhāgenāti pucchāvacanapaṭibhāgena. ‘‘Ekā kūṭaṭṭhitikā nāmā’’ti vuttamevatthaṃ vibhāvetuṃ ‘‘rañño vā hī’’tiādi vuttaṃ.
સબ્બં પત્તસ્સામિકસ્સ હોતીતિ ચીવરાદિકમ્પિ સબ્બં પત્તસ્સામિકસ્સેવ હોતિ, મયા ભત્તમેવ સન્ધાય વુત્તં, ન ચીવરાદિન્તિ વત્વા ગહેતું ન વટ્ટતીતિ અત્થો.
Sabbaṃ pattassāmikassa hotīti cīvarādikampi sabbaṃ pattassāmikasseva hoti, mayā bhattameva sandhāya vuttaṃ, na cīvarādinti vatvā gahetuṃ na vaṭṭatīti attho.
અકતભાગોનામાતિ આગન્તુકભાગો નામ, અદિન્નપુબ્બભાગોતિ અત્થો.
Akatabhāgonāmāti āgantukabhāgo nāma, adinnapubbabhāgoti attho.
કિં આહરીયતીતિ અવત્વાતિ ‘‘કતરભત્તં વા તયા આહરીયતી’’તિ દાયકં અપુચ્છિત્વા. પકતિટ્ઠિતિકાયાતિ ઉદ્દેસભત્તટ્ઠિતિકાય.
Kiṃ āharīyatīti avatvāti ‘‘katarabhattaṃ vā tayā āharīyatī’’ti dāyakaṃ apucchitvā. Pakatiṭṭhitikāyāti uddesabhattaṭṭhitikāya.
ઉદ્દેસભત્તકથાવણ્ણના નિટ્ઠિતા.
Uddesabhattakathāvaṇṇanā niṭṭhitā.
