| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. உத்³தே³ஸவிப⁴ங்க³ஸுத்தவண்ணனா
8. Uddesavibhaṅgasuttavaṇṇanā
313. ஏவங் மே ஸுதந்தி உத்³தே³ஸவிப⁴ங்க³ஸுத்தங். தத்த² உத்³தே³ஸவிப⁴ங்க³ந்தி உத்³தே³ஸஞ்ச விப⁴ங்க³ஞ்ச, மாதிகஞ்ச விப⁴ஜனஞ்சாதி அத்தோ². உபபரிக்கெ²ய்யாதி துலெய்ய தீரெய்ய பரிக்³க³ண்ஹெய்ய பரிச்சி²ந்தெ³ய்ய. ப³ஹித்³தா⁴தி ப³ஹித்³தா⁴ஆரம்மணேஸு. அவிக்கி²த்தங் அவிஸடந்தி நிகந்திவஸேன ஆரம்மணே திட்ட²மானங் விக்கி²த்தங் விஸடங் நாம ஹோதி, தங் படிஸேதெ⁴ந்தோ ஏவமாஹ. அஜ்ஜ²த்தங் அஸண்டி²தந்தி கோ³சரஜ்ஜ²த்தே நிகந்திவஸேன அஸண்டி²தங். அனுபாதா³ய ந பரிதஸ்ஸெய்யாதி அனுபாதி³யித்வா அக்³க³ஹெத்வா தங் விஞ்ஞாணங் ந பரிதஸ்ஸெய்ய. யதா² விஞ்ஞாணங் ப³ஹித்³தா⁴ அவிக்கி²த்தங் அவிஸடங், அஜ்ஜ²த்தங் அஸண்டி²தங் அனுபாதா³ய ந பரிதஸ்ஸெய்ய, ஏவங் பி⁴க்கு² உபபரிக்கெ²ய்யாதி வுத்தங் ஹோதி. ஜாதிஜராமரணது³க்க²ஸமுத³யஸம்ப⁴வோதி ஜாதிஜராமரணஸ்ஸ சேவ அவஸேஸஸ்ஸ ச து³க்க²ஸ்ஸ நிப்³ப³த்தி ந ஹோதீதி அத்தோ².
313.Evaṃme sutanti uddesavibhaṅgasuttaṃ. Tattha uddesavibhaṅganti uddesañca vibhaṅgañca, mātikañca vibhajanañcāti attho. Upaparikkheyyāti tuleyya tīreyya pariggaṇheyya paricchindeyya. Bahiddhāti bahiddhāārammaṇesu. Avikkhittaṃ avisaṭanti nikantivasena ārammaṇe tiṭṭhamānaṃ vikkhittaṃ visaṭaṃ nāma hoti, taṃ paṭisedhento evamāha. Ajjhattaṃ asaṇṭhitanti gocarajjhatte nikantivasena asaṇṭhitaṃ. Anupādāya na paritasseyyāti anupādiyitvā aggahetvā taṃ viññāṇaṃ na paritasseyya. Yathā viññāṇaṃ bahiddhā avikkhittaṃ avisaṭaṃ, ajjhattaṃ asaṇṭhitaṃ anupādāya na paritasseyya, evaṃ bhikkhu upaparikkheyyāti vuttaṃ hoti. Jātijarāmaraṇadukkhasamudayasambhavoti jātijarāmaraṇassa ceva avasesassa ca dukkhassa nibbatti na hotīti attho.
316. ரூபனிமித்தானுஸாரீதி ரூபனிமித்தங் அனுஸ்ஸரதி அனுதா⁴வதீதி ரூபனிமித்தானுஸாரீ.
316.Rūpanimittānusārīti rūpanimittaṃ anussarati anudhāvatīti rūpanimittānusārī.
318. ஏவங் கோ², ஆவுஸோ, அஜ்ஜ²த்தங் அஸண்டி²தந்தி நிகந்திவஸேன அஸண்டி²தங். நிகந்திவஸேன ஹி அதிட்ட²மானங் ஹானபா⁴கி³யங் ந ஹோதி, விஸேஸபா⁴கி³யமேவ ஹோதி.
318.Evaṃ kho, āvuso, ajjhattaṃ asaṇṭhitanti nikantivasena asaṇṭhitaṃ. Nikantivasena hi atiṭṭhamānaṃ hānabhāgiyaṃ na hoti, visesabhāgiyameva hoti.
320. அனுபாதா³ பரிதஸ்ஸனாதி ஸத்தா²ரா க²ந்தி⁴யவக்³கே³ ‘‘உபாதா³பரிதஸ்ஸனஞ்ச வோ, பி⁴க்க²வே, தே³ஸெஸ்ஸாமி அனுபாதா³அபரிதஸ்ஸனஞ்சா’’தி (ஸங்॰ நி॰ 3.7) ஏவங் க³ஹெத்வா பரிதஸ்ஸனா, அக்³க³ஹெத்வாவ அபரிதஸ்ஸனா ச கதி²தா, தங் மஹாதே²ரோ உபாதா³பரிதஸ்ஸனமேவ அனுபாதா³பரிதஸ்ஸனந்தி கத்வா த³ஸ்ஸெந்தோ ஏவமாஹ. கத²ங் பனேஸா அனுபாதா³பரிதஸ்ஸனா ஹோதீதி. உபாதா³தப்³ப³ஸ்ஸ அபா⁴வதோ. யதி³ ஹி கோசி ஸங்கா²ரோ நிச்சோ வா து⁴வோ வா அத்தா வா அத்தனியோ வாதி க³ஹேதப்³ப³யுத்தகோ அப⁴விஸ்ஸ, அயங் பரிதஸ்ஸனா உபாதா³பரிதஸ்ஸனாவ அஸ்ஸ. யஸ்மா பன ஏவங் உபாதா³தப்³போ³ ஸங்கா²ரோ நாம நத்தி², தஸ்மா ரூபங் அத்தாதிஆதி³னா நயேன ரூபாத³யோ உபாதி³ன்னாபி அனுபாதி³ன்னாவ ஹொந்தி. ஏவமேஸா தி³ட்டி²வஸேன உபாதா³பரிதஸ்ஸனாபி ஸமானா அத்த²தோ அனுபாதா³பரிதஸ்ஸனாயேவ நாம ஹோதீதி வேதி³தப்³பா³.
320.Anupādā paritassanāti satthārā khandhiyavagge ‘‘upādāparitassanañca vo, bhikkhave, desessāmi anupādāaparitassanañcā’’ti (saṃ. ni. 3.7) evaṃ gahetvā paritassanā, aggahetvāva aparitassanā ca kathitā, taṃ mahāthero upādāparitassanameva anupādāparitassananti katvā dassento evamāha. Kathaṃ panesā anupādāparitassanā hotīti. Upādātabbassa abhāvato. Yadi hi koci saṅkhāro nicco vā dhuvo vā attā vā attaniyo vāti gahetabbayuttako abhavissa, ayaṃ paritassanā upādāparitassanāva assa. Yasmā pana evaṃ upādātabbo saṅkhāro nāma natthi, tasmā rūpaṃ attātiādinā nayena rūpādayo upādinnāpi anupādinnāva honti. Evamesā diṭṭhivasena upādāparitassanāpi samānā atthato anupādāparitassanāyeva nāma hotīti veditabbā.
அஞ்ஞதா² ஹோதீதி பரிவத்ததி பகதிஜஹனேன நஸ்ஸதி, ரூபவிபரிணாமானுபரிவத்தீதி ‘‘மம ரூபங் விபரிணத’’ந்தி வா, ‘‘யங் அஹு, தங் வத மே நத்தீ²’’தி வா ஆதி³னா (ம॰ நி॰ 1.242) நயேன கம்மவிஞ்ஞாணங் ரூபஸ்ஸ பே⁴தா³னுபரிவத்தி ஹோதி. விபரிணாமானுபரிவத்தஜாதி விபரிணாமஸ்ஸ அனுபரிவத்தனதோ விபரிணாமாரம்மணசித்ததோ ஜாதா. பரிதஸ்ஸனா த⁴ம்மஸமுப்பாதா³தி தண்ஹாபரிதஸ்ஸனா ச அகுஸலத⁴ம்மஸமுப்பாதா³ ச. சித்தங் பரியாதா³ய திட்ட²ந்தீதி குஸலசித்தங் பரியாதி³யித்வா க³ஹெத்வா கே²பெத்வா திட்ட²ந்தி. உத்தாஸவாதி ப⁴யதாஸேனபி ஸஉத்தாஸோ தண்ஹாதாஸேனபி ஸஉத்தாஸோ. விகா⁴தவாதி ஸவிகா⁴தோ ஸது³க்கோ². அபெக்க²வாதி ஸாலயோ ஸஸினேஹோ. ஏவங் கோ², ஆவுஸோ, அனுபாதா³ பரிதஸ்ஸனா ஹோதீதி ஏவங் மணிகரண்ட³கஸஞ்ஞாய துச்ச²கரண்ட³கங் க³ஹெத்வா தஸ்மிங் நட்டே² பச்சா² விகா⁴தங் ஆபஜ்ஜந்தஸ்ஸ விய பச்சா² அக்³க³ஹெத்வா பரிதஸ்ஸனா ஹோதி.
Aññathā hotīti parivattati pakatijahanena nassati, rūpavipariṇāmānuparivattīti ‘‘mama rūpaṃ vipariṇata’’nti vā, ‘‘yaṃ ahu, taṃ vata me natthī’’ti vā ādinā (ma. ni. 1.242) nayena kammaviññāṇaṃ rūpassa bhedānuparivatti hoti. Vipariṇāmānuparivattajāti vipariṇāmassa anuparivattanato vipariṇāmārammaṇacittato jātā. Paritassanā dhammasamuppādāti taṇhāparitassanā ca akusaladhammasamuppādā ca. Cittaṃ pariyādāya tiṭṭhantīti kusalacittaṃ pariyādiyitvā gahetvā khepetvā tiṭṭhanti. Uttāsavāti bhayatāsenapi sauttāso taṇhātāsenapi sauttāso. Vighātavāti savighāto sadukkho. Apekkhavāti sālayo sasineho. Evaṃ kho, āvuso, anupādā paritassanā hotīti evaṃ maṇikaraṇḍakasaññāya tucchakaraṇḍakaṃ gahetvā tasmiṃ naṭṭhe pacchā vighātaṃ āpajjantassa viya pacchā aggahetvā paritassanā hoti.
321. ந ச ரூபவிபரிணாமானுபரிவத்தீதி கீ²ணாஸவஸ்ஸ கம்மவிஞ்ஞாணமேவ நத்தி², தஸ்மா ரூபபே⁴தா³னுபரிவத்தி ந ஹோதி. ஸேஸங் ஸப்³ப³த்த² உத்தானமேவாதி.
321.Naca rūpavipariṇāmānuparivattīti khīṇāsavassa kammaviññāṇameva natthi, tasmā rūpabhedānuparivatti na hoti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
உத்³தே³ஸவிப⁴ங்க³ஸுத்தவண்ணனா நிட்டி²தா.
Uddesavibhaṅgasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. உத்³தே³ஸவிப⁴ங்க³ஸுத்தங் • 8. Uddesavibhaṅgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. உத்³தே³ஸவிப⁴ங்க³ஸுத்தவண்ணனா • 8. Uddesavibhaṅgasuttavaṇṇanā
