| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
2. உத்³த⁴தஸுத்தவண்ணனா
2. Uddhatasuttavaṇṇanā
32. து³தியே குஸினாராயந்தி குஸினாராயங் நாம மல்லராஜூனங் நக³ரே. உபவத்தனே மல்லானங் ஸாலவனேதி யதா² ஹி அனுராத⁴புரஸ்ஸ தூ²பாராமோ, ஏவங் குஸினாராய உய்யானங் த³க்கி²ணபச்சி²மதி³ஸாய ஹோதி. யதா² தூ²பாராமதோ த³க்கி²ணத்³வாரேன நக³ரபவிஸனமக்³கோ³ பாசீனமுகோ² க³ந்த்வா உத்தரேன நிவத்ததி, ஏவங் உய்யானதோ ஸாலபந்தி பாசீனமுகா² க³ந்த்வா உத்தரேன நிவத்தா, தஸ்மா ‘‘உபவத்தன’’ந்தி வுச்சதி. தஸ்மிங் உபவத்தனே மல்லராஜூனங் ஸாலவனே. அரஞ்ஞகுடிகாயந்தி ஸாலபந்தியா அவிதூ³ரே ருக்க²க³ச்ச²ஸஞ்ச²ன்னட்டா²னே கதா குடிகா, தங் ஸந்தா⁴ய வுத்தங் ‘‘அரஞ்ஞகுடிகாயங் விஹரதீ’’தி. தே பன பி⁴க்கூ² படிஸங்கா²னவிரஹிதா ஒஸ்ஸட்ட²வீரியா பமத்தவிஹாரினோ, தேன வுத்தங் ‘‘உத்³த⁴தா’’திஆதி³.
32. Dutiye kusinārāyanti kusinārāyaṃ nāma mallarājūnaṃ nagare. Upavattane mallānaṃ sālavaneti yathā hi anurādhapurassa thūpārāmo, evaṃ kusinārāya uyyānaṃ dakkhiṇapacchimadisāya hoti. Yathā thūpārāmato dakkhiṇadvārena nagarapavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā, tasmā ‘‘upavattana’’nti vuccati. Tasmiṃ upavattane mallarājūnaṃ sālavane. Araññakuṭikāyanti sālapantiyā avidūre rukkhagacchasañchannaṭṭhāne katā kuṭikā, taṃ sandhāya vuttaṃ ‘‘araññakuṭikāyaṃ viharatī’’ti. Te pana bhikkhū paṭisaṅkhānavirahitā ossaṭṭhavīriyā pamattavihārino, tena vuttaṃ ‘‘uddhatā’’tiādi.
தத்த² உத்³த⁴ச்சப³ஹுலத்தா அவூபஸந்தசித்ததாய உத்³த⁴தா. துச்ச²பா⁴வேன மானோ நளோ வியாதி நளோ, மானஸங்கா²தோ உக்³க³தோ நளோ ஏதேஸந்தி உன்னளா, உக்³க³ததுச்ச²மானாதி அத்தோ². பத்தசீவரமண்ட³னாதி³சாபல்லேன ஸமன்னாக³தத்தா ப³ஹுகதாய வா சபலா. ப²ருஸவாசதாய முகே²ன க²ராதி முக²ரா. திரச்சா²னகதா²ப³ஹுலதாய விகிண்ணா ப்³யாகுலா வாசா ஏதேஸந்தி விகிண்ணவாசா. முட்டா² நட்டா² ஸதி ஏதேஸந்தி முட்ட²ஸ்ஸதினோ, ஸதிவிரஹிதா பமாத³விஹாரினோதி அத்தோ². ஸப்³பே³ன ஸப்³ப³ங் ஸம்பஜஞ்ஞாபா⁴வதோ அஸம்பஜானா. க³த்³தூ³ஹனமத்தம்பி காலங் சித்தஸமாதா⁴னஸ்ஸ அபா⁴வதோ ந ஸமாஹிதாதி அஸமாஹிதா. லோலஸபா⁴வத்தா ப⁴ந்தமிக³ஸப்படிபா⁴க³தாய விப்³ப⁴ந்தசித்தா. மனச்ச²ட்டா²னங் இந்த்³ரியானங் அஸங்வரணதோ அஸஞ்ஞதிந்த்³ரியதாய பாகதிந்த்³ரியா.
Tattha uddhaccabahulattā avūpasantacittatāya uddhatā. Tucchabhāvena māno naḷo viyāti naḷo, mānasaṅkhāto uggato naḷo etesanti unnaḷā, uggatatucchamānāti attho. Pattacīvaramaṇḍanādicāpallena samannāgatattā bahukatāya vā capalā. Pharusavācatāya mukhena kharāti mukharā. Tiracchānakathābahulatāya vikiṇṇā byākulā vācā etesanti vikiṇṇavācā. Muṭṭhā naṭṭhā sati etesanti muṭṭhassatino, sativirahitā pamādavihārinoti attho. Sabbena sabbaṃ sampajaññābhāvato asampajānā. Gaddūhanamattampi kālaṃ cittasamādhānassa abhāvato na samāhitāti asamāhitā. Lolasabhāvattā bhantamigasappaṭibhāgatāya vibbhantacittā. Manacchaṭṭhānaṃ indriyānaṃ asaṃvaraṇato asaññatindriyatāya pākatindriyā.
ஏதமத்த²ங் விதி³த்வாதி ஏதங் தேஸங் பி⁴க்கூ²னங் உத்³த⁴ச்சாதி³வஸேன பமாத³விஹாரங் ஜானித்வா. இமங் உதா³னந்தி இமங் பமாத³விஹாரே அப்பமாத³விஹாரே ச யதா²க்கமங் ஆதீ³னவானிஸங்ஸவிபா⁴வனங் உதா³னங் உதா³னேஸி.
Etamatthaṃviditvāti etaṃ tesaṃ bhikkhūnaṃ uddhaccādivasena pamādavihāraṃ jānitvā. Imaṃ udānanti imaṃ pamādavihāre appamādavihāre ca yathākkamaṃ ādīnavānisaṃsavibhāvanaṃ udānaṃ udānesi.
தத்த² அரக்கி²தேனாதி ஸதிஆரக்கா²பா⁴வேன அகு³த்தேன. காயேனாதி ச²விஞ்ஞாணகாயேன சக்கு²விஞ்ஞாணேன ஹி ரூபங் தி³ஸ்வா தத்த² நிமித்தானுப்³யஞ்ஜனக்³க³ஹணவஸேன அபி⁴ஜ்ஜா²தி³பவத்திதோ விஞ்ஞாணத்³வாரஸ்ஸ ஸதியா அரக்கி²தபா⁴வதோ. ஸோதவிஞ்ஞாணாதீ³ஸுபி ஏஸேவ நயோ. ஏவங் ச²விஞ்ஞாணகாயஸ்ஸ அரக்கி²தபா⁴வங் ஸந்தா⁴யாஹ ‘‘அரக்கி²தேன காயேனா’’தி. கேசி பன ‘‘காயேனா’’தி அத்த²ங் வத³ந்தி, தேஸம்பி வுத்தனயேனேவ அத்த²யோஜனாய ஸதி யுஜ்ஜெய்ய. அபரே பன ‘‘அரக்கி²தேன சித்தேனா’’தி பட²ந்தி, தேஸம்பி வுத்தனயோ ஏவ அத்தோ². மிச்சா²தி³ட்டி²ஹதேனாதி ஸஸ்ஸதாதி³மிச்சா²பி⁴னிவேஸதூ³ஸிதேன. தி²னமித்³தா⁴பி⁴பூ⁴தேனாதி சித்தஸ்ஸ அகல்யதாலக்க²ணேன தி²னேன காயஸ்ஸ அகல்யதாலக்க²ணேன மித்³தே⁴ன ச அஜ்ஜொ²த்த²டேன, தேன காயேன சித்தேனாதி வா ஸம்ப³ந்தோ⁴. வஸங் மாரஸ்ஸ க³ச்ச²தீதி கிலேஸமாராதி³கஸ்ஸ ஸப்³ப³ஸ்ஸபி மாரஸ்ஸ வஸங் யதா²காமகரணீயதங் உபக³ச்ச²தி, தேஸங் விஸயங் நாதிக்கமதீதி அத்தோ².
Tattha arakkhitenāti satiārakkhābhāvena aguttena. Kāyenāti chaviññāṇakāyena cakkhuviññāṇena hi rūpaṃ disvā tattha nimittānubyañjanaggahaṇavasena abhijjhādipavattito viññāṇadvārassa satiyā arakkhitabhāvato. Sotaviññāṇādīsupi eseva nayo. Evaṃ chaviññāṇakāyassa arakkhitabhāvaṃ sandhāyāha ‘‘arakkhitena kāyenā’’ti. Keci pana ‘‘kāyenā’’ti atthaṃ vadanti, tesampi vuttanayeneva atthayojanāya sati yujjeyya. Apare pana ‘‘arakkhitena cittenā’’ti paṭhanti, tesampi vuttanayo eva attho. Micchādiṭṭhihatenāti sassatādimicchābhinivesadūsitena. Thinamiddhābhibhūtenāti cittassa akalyatālakkhaṇena thinena kāyassa akalyatālakkhaṇena middhena ca ajjhotthaṭena, tena kāyena cittenāti vā sambandho. Vasaṃ mārassa gacchatīti kilesamārādikassa sabbassapi mārassa vasaṃ yathākāmakaraṇīyataṃ upagacchati, tesaṃ visayaṃ nātikkamatīti attho.
இமாய ஹி கா³தா²ய ப⁴க³வா யே ஸதிஆரக்கா²பா⁴வேன ஸப்³ப³ஸோ அரக்கி²தசித்தா, யோனிஸோமனஸிகாரஸ்ஸ ஹேதுபூ⁴தாய பஞ்ஞாய அபா⁴வதோ அயோனிஸோ உம்முஜ்ஜனேன நிச்சந்திஆதி³னா விபரியேஸகா³ஹினோ, ததோ ஏவ குஸலகிரியாய வீரியாரம்பா⁴பா⁴வதோ கோஸஜ்ஜாபி⁴பூ⁴தா ஸங்ஸாரவட்டதோ ஸீஸங் ந உக்கி²பிஸ்ஸந்தீதி தேஸங் பி⁴க்கூ²னங் பமாத³விஹாரக³ரஹாமுகே²ன வட்டங் த³ஸ்ஸெத்வா இதா³னி விவட்டங் த³ஸ்ஸேதுங், ‘‘தஸ்மா ரக்கி²தசித்தஸ்ஸா’’தி து³தியகா³த²மாஹ.
Imāya hi gāthāya bhagavā ye satiārakkhābhāvena sabbaso arakkhitacittā, yonisomanasikārassa hetubhūtāya paññāya abhāvato ayoniso ummujjanena niccantiādinā vipariyesagāhino, tato eva kusalakiriyāya vīriyārambhābhāvato kosajjābhibhūtā saṃsāravaṭṭato sīsaṃ na ukkhipissantīti tesaṃ bhikkhūnaṃ pamādavihāragarahāmukhena vaṭṭaṃ dassetvā idāni vivaṭṭaṃ dassetuṃ, ‘‘tasmā rakkhitacittassā’’ti dutiyagāthamāha.
தத்த² தஸ்மா ரக்கி²தசித்தஸ்ஸாதி யஸ்மா அரக்கி²தசித்தோ மாரஸ்ஸ யதா²காமகரணீயோ ஹுத்வா ஸங்ஸாரேயேவ ஹோதி, தஸ்மா ஸதிஸங்வரேன மனச்ச²ட்டா²னங் இந்த்³ரியானங் ரக்க²ணேன பித³ஹனேன ரக்கி²தசித்தோ அஸ்ஸ. சித்தே ஹி ரக்கி²தே சக்கா²தி³இந்த்³ரியானி ரக்கி²தானேவ ஹொந்தீதி. ஸம்மாஸங்கப்பகோ³சரோதி யஸ்மா மிச்சா²ஸங்கப்பகோ³சரோ ததா² ததா² அயோனிஸோ விதக்கெத்வா நானாவிதா⁴னி மிச்சா²த³ஸ்ஸனானி க³ண்ஹந்தோ மிச்சா²தி³ட்டி²ஹதேன சித்தேன மாரஸ்ஸ யதா²காமகரணீயோ ஹோதி, தஸ்மா யோனிஸோமனஸிகாரேன கம்மங் கரொந்தோ நெக்க²ம்மஸங்கப்பாதி³ஸம்மாஸங்கப்பகோ³சரோ அஸ்ஸ, ஜா²னாதி³ஸம்பயுத்தங் ஸம்மாஸங்கப்பமேவ அத்தனோ சித்தஸ்ஸ பவத்திட்டா²னங் கரெய்ய. ஸம்மாதி³ட்டி²புரெக்கா²ரோதி ஸம்மாஸங்கப்பகோ³சரதாய விதூ⁴தமிச்சா²த³ஸ்ஸனோ புரேதரங்யேவ கம்மஸ்ஸகதாலக்க²ணங், ததோ யதா²பூ⁴தஞாணலக்க²ணஞ்ச ஸம்மாதி³ட்டி²ங் புரதோ கத்வா புப்³பே³ வுத்தனயேனேவ ஸீலஸமாதீ⁴ஸு யுத்தோ பயுத்தோ விபஸ்ஸனங் ஆரபி⁴த்வா ஸங்கா²ரே ஸம்மஸந்தோ ஞத்வான உத³யப்³ப³யங் பஞ்சஸு உபாதா³னக்க²ந்தே⁴ஸு ஸமபஞ்ஞாஸாய ஆகாரேஹி உப்பாத³னிரோத⁴ங் வவத்த²பெத்வா உத³யப்³ப³யஞாணமதி⁴க³ந்த்வா ததோ பரங் ப⁴ங்கா³னுபஸ்ஸனாதி³வஸேன விபஸ்ஸனங் உஸ்ஸுக்காபெத்வா அனுக்கமேன அரியமக்³க³ங் க³ண்ஹந்தோ அக்³க³மக்³கே³ன, தி²னமித்³தா⁴பி⁴பூ⁴ பி⁴க்கு² ஸப்³பா³ து³க்³க³தியோ ஜஹேதி, ஏவங் ஸோ ஹெட்டி²மமக்³க³வஜ்ஜா²னங் கிலேஸானங் பட²மமேவ பஹீனத்தா தி³ட்டி²விப்பயுத்தலோப⁴ஸஹக³தசித்துப்பாதே³ஸு உப்பஜ்ஜனகதி²னமித்³தா⁴னங் அதி⁴க³தேன அரஹத்தமக்³கே³ன ஸமுச்சி²ந்த³னதோ ததே³கட்டா²னங் மானாதீ³னம்பி பஹீனத்தா ஸப்³ப³ஸோ பி⁴ன்னகிலேஸோ கீ²ணாஸவோ பி⁴க்கு² திவித⁴து³க்க²தாயோகே³ன து³க்³க³திஸங்கா²தா ஸப்³பா³பி க³தியோ உச்சி²ன்னப⁴வமூலத்தா ஜஹே, பஜஹெய்ய. தாஸங் பரபா⁴கே³ நிப்³பா³னே பதிட்டெ²ய்யாதி அத்தோ².
Tattha tasmā rakkhitacittassāti yasmā arakkhitacitto mārassa yathākāmakaraṇīyo hutvā saṃsāreyeva hoti, tasmā satisaṃvarena manacchaṭṭhānaṃ indriyānaṃ rakkhaṇena pidahanena rakkhitacitto assa. Citte hi rakkhite cakkhādiindriyāni rakkhitāneva hontīti. Sammāsaṅkappagocaroti yasmā micchāsaṅkappagocaro tathā tathā ayoniso vitakketvā nānāvidhāni micchādassanāni gaṇhanto micchādiṭṭhihatena cittena mārassa yathākāmakaraṇīyo hoti, tasmā yonisomanasikārena kammaṃ karonto nekkhammasaṅkappādisammāsaṅkappagocaro assa, jhānādisampayuttaṃ sammāsaṅkappameva attano cittassa pavattiṭṭhānaṃ kareyya. Sammādiṭṭhipurekkhāroti sammāsaṅkappagocaratāya vidhūtamicchādassano puretaraṃyeva kammassakatālakkhaṇaṃ, tato yathābhūtañāṇalakkhaṇañca sammādiṭṭhiṃ purato katvā pubbe vuttanayeneva sīlasamādhīsu yutto payutto vipassanaṃ ārabhitvā saṅkhāre sammasanto ñatvāna udayabbayaṃ pañcasu upādānakkhandhesu samapaññāsāya ākārehi uppādanirodhaṃ vavatthapetvā udayabbayañāṇamadhigantvā tato paraṃ bhaṅgānupassanādivasena vipassanaṃ ussukkāpetvā anukkamena ariyamaggaṃ gaṇhanto aggamaggena, thinamiddhābhibhū bhikkhu sabbā duggatiyo jaheti, evaṃ so heṭṭhimamaggavajjhānaṃ kilesānaṃ paṭhamameva pahīnattā diṭṭhivippayuttalobhasahagatacittuppādesu uppajjanakathinamiddhānaṃ adhigatena arahattamaggena samucchindanato tadekaṭṭhānaṃ mānādīnampi pahīnattā sabbaso bhinnakileso khīṇāsavo bhikkhu tividhadukkhatāyogena duggatisaṅkhātā sabbāpi gatiyo ucchinnabhavamūlattā jahe, pajaheyya. Tāsaṃ parabhāge nibbāne patiṭṭheyyāti attho.
து³தியஸுத்தவண்ணனா நிட்டி²தா.
Dutiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 2. உத்³த⁴தஸுத்தங் • 2. Uddhatasuttaṃ
