| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. உஜ்ஜா²னஸஞ்ஞிஸுத்தவண்ணனா
5. Ujjhānasaññisuttavaṇṇanā
35. உஜ்ஜா²னவஸேன பவத்தா ஸஞ்ஞா ஏதேஸங் அத்தி², உஜ்ஜா²னவஸேன வா ஸஞ்ஜானந்தீதி உஜ்ஜா²னஸஞ்ஞீ. காரயேதி கதானங் பரியந்தங் காரயேதி அத்தோ². பரியந்தகாரிதந்தி பரிச்சி²ன்னகாரிதங் பரிமிதவசனந்தி அத்தோ². பங்ஸுகூலாதி³படிபக்க²னயேன பத்துண்ணது³குலாதி³ வுத்தங். நாமங் க³ஹிதந்தி ஏதேன ‘‘உஜ்ஜா²னஸஞ்ஞிகா’’தி எத்த² க-ஸத்³தோ³ ஸஞ்ஞாயந்தி த³ஸ்ஸேதி.
35. Ujjhānavasena pavattā saññā etesaṃ atthi, ujjhānavasena vā sañjānantīti ujjhānasaññī. Kārayeti katānaṃ pariyantaṃ kārayeti attho. Pariyantakāritanti paricchinnakāritaṃ parimitavacananti attho. Paṃsukūlādipaṭipakkhanayena pattuṇṇadukulādi vuttaṃ. Nāmaṃ gahitanti etena ‘‘ujjhānasaññikā’’ti ettha ka-saddo saññāyanti dasseti.
அஞ்ஞேனாகாரேன பூ⁴தந்தி அத்தனா பவேதி³யமானாகாரதோ அஞ்ஞேன அஸுத்³தே⁴ன ஆகாரேன விஜ்ஜமானங் உபலப்³ப⁴மானங் அத்தானங். வஞ்செத்வாதி பலம்பெ⁴த்வா. தஸ்ஸ குஹகஸ்ஸ. தங் சதுன்னங் பச்சயானங் பரிபு⁴ஞ்ஜனங். பரிஜானந்தீதி தஸ்ஸ படிபத்திங் பரிச்சி²ஜ்ஜ ஜானந்தி. காரகோதி ஸம்மாபடிபத்தியா கத்தா, ஸம்மாபடிபஜ்ஜிதாதி அத்தோ².
Aññenākārena bhūtanti attanā pavediyamānākārato aññena asuddhena ākārena vijjamānaṃ upalabbhamānaṃ attānaṃ. Vañcetvāti palambhetvā. Tassa kuhakassa. Taṃ catunnaṃ paccayānaṃ paribhuñjanaṃ. Parijānantīti tassa paṭipattiṃ paricchijja jānanti. Kārakoti sammāpaṭipattiyā kattā, sammāpaṭipajjitāti attho.
இத³ந்தி லிங்க³விபல்லாஸேன வுத்தங், அயந்தி அத்தோ². த⁴ம்மானுத⁴ம்மபடிபதா³தி நிப்³பா³னத⁴ம்மஸ்ஸ அனுச்ச²விகதாய அனுத⁴ம்மபூ⁴தா படிபதா³. படிபக்க²வித⁴மனே அஸிதி²லதாய த³ள்ஹா. பா⁴ஸிதமத்தேன ச ஸவனமத்தேன சாதி எத்த² ச-ஸத்³தோ³ விஸேஸனிவத்திஅத்தோ². தேன பா⁴ஸிதஸ்ஸ ஸுதஸ்ஸ ச ஸம்மாபடிபத்திவிஸேஸங் நிவத்தேதி. லோகபரியாயந்தி லோகஸ்ஸ பரிவித⁴மனங் உப்பாத³னிரோத⁴வஸேன ஸங்கா²ரானங் பராவுத்திங். தேனாஹ ‘‘ஸங்கா²ரலோகஸ்ஸ உத³யப்³ப³ய’’ந்தி. ஸ்வாயமத்தோ² ஸச்சபடிவேதே⁴னேவ ஹோதீதி ஆஹ ‘‘சதுஸச்சத⁴ம்மஞ்ச அஞ்ஞாயா’’தி . ஏவங் ந குப்³ப³ந்தீதி அத்தனி விஜ்ஜமானம்பி கு³ணங் அனாவீகரொந்தோ ‘‘யதா² தும்ஹே வத³த², ஏவங் ந குப்³ப³ந்தீ’’தி அவிஜ்ஜமானதங் ப்³யாகரோதீதி அத்தோ².
Idanti liṅgavipallāsena vuttaṃ, ayanti attho. Dhammānudhammapaṭipadāti nibbānadhammassa anucchavikatāya anudhammabhūtā paṭipadā. Paṭipakkhavidhamane asithilatāya daḷhā. Bhāsitamattena ca savanamattena cāti ettha ca-saddo visesanivattiattho. Tena bhāsitassa sutassa ca sammāpaṭipattivisesaṃ nivatteti. Lokapariyāyanti lokassa parividhamanaṃ uppādanirodhavasena saṅkhārānaṃ parāvuttiṃ. Tenāha ‘‘saṅkhāralokassa udayabbaya’’nti. Svāyamattho saccapaṭivedheneva hotīti āha ‘‘catusaccadhammañca aññāyā’’ti . Evaṃ na kubbantīti attani vijjamānampi guṇaṃ anāvīkaronto ‘‘yathā tumhe vadatha, evaṃ na kubbantī’’ti avijjamānataṃ byākarotīti attho.
அகாரகமேவாதி தோ³ஸங் அகாரகமேவ. அச்சயஸ்ஸ படிக்³க³ண்ஹனங் நாம அதி⁴வாஸனங், ஏவங் ஸோ தே³ஸகேன தே³ஸியமானோ ததோ விக³தோ நாம ஹோதி. தேனாஹ ‘‘படிக்³க³ண்ஹாதூதி க²மதூ’’தி.
Akārakamevāti dosaṃ akārakameva. Accayassa paṭiggaṇhanaṃ nāma adhivāsanaṃ, evaṃ so desakena desiyamāno tato vigato nāma hoti. Tenāha ‘‘paṭiggaṇhātūti khamatū’’ti.
ஸபா⁴வேனாதி ஸபா⁴வதோ. ஏகஸதி³ஸந்தி பரேஸங் சித்தாசாரங் ஜானந்தம்பி அஜானந்தேஹி ஸஹ ஏகஸதி³ஸங் கரொந்தா. பரதோதி பச்சா². கதா²ய உப்பன்னாயாதி ‘‘கஸ்ஸச்சயா ந விஜ்ஜந்தீ’’திஆதி³கதா²ய பவத்தமானாய ‘‘ததா²க³தஸ்ஸ பு³த்³த⁴ஸ்ஸா’’திஆதி³னா பு³த்³த⁴ப³லங் பு³த்³தா⁴னுபா⁴வங் தீ³பெத்வா. க²மிஸ்ஸாமீதி அச்சயதே³ஸனங் படிக்³க³ண்ஹிஸ்ஸாமி. தப்படிக்³க³ஹோ ஹி இத⁴ க²மனந்தி அதி⁴ப்பேதங், ஸத்தா² பன ஸப்³ப³காலங் க²மோ ஏவ.
Sabhāvenāti sabhāvato. Ekasadisanti paresaṃ cittācāraṃ jānantampi ajānantehi saha ekasadisaṃ karontā. Paratoti pacchā. Kathāya uppannāyāti ‘‘kassaccayā na vijjantī’’tiādikathāya pavattamānāya ‘‘tathāgatassa buddhassā’’tiādinā buddhabalaṃ buddhānubhāvaṃ dīpetvā. Khamissāmīti accayadesanaṃ paṭiggaṇhissāmi. Tappaṭiggaho hi idha khamananti adhippetaṃ, satthā pana sabbakālaṃ khamo eva.
கோபோ அந்தரே சித்தே ஏதஸ்ஸாதி கோபந்தரோ. தோ³ஸோ க³ரு க³ருகாதப்³போ³ அஸ்ஸாதி தோ³ஸக³ரு. ‘‘படிமுச்சதீ’’தி வா பாடோ², அயமேவ அத்தோ². அச்சாயிககம்மந்தி ஸஹஸா அனுபதா⁴ரெத்வா கிரியா. நோ சிதா⁴தி நோ சே இத⁴. இதா⁴தி நிபாதமத்தங். அபக³தங் அபனீதங். தோ³ஸோ நோ சே ஸியா, தேன பரியாயேன யதி³ அபராதோ⁴ நாம ந ப⁴வெய்யாதி. ந ஸம்மெய்யுங் ந வூபஸமெய்யுங். குஸலோதி அனவஜ்ஜோ.
Kopo antare citte etassāti kopantaro. Doso garu garukātabbo assāti dosagaru. ‘‘Paṭimuccatī’’ti vā pāṭho, ayameva attho. Accāyikakammanti sahasā anupadhāretvā kiriyā. No cidhāti no ce idha. Idhāti nipātamattaṃ. Apagataṃ apanītaṃ. Doso no ce siyā, tena pariyāyena yadi aparādho nāma na bhaveyyāti. Na sammeyyuṃ na vūpasameyyuṃ. Kusaloti anavajjo.
தீ⁴ரோ ஸதோதி பத³த்³வயேன வட்டசி²ந்த³ங் ஆஹ. கோ நிச்சமேவ பண்டி³தோ நாமாதி அத்தோ²தி ‘‘கஸ்ஸச்சயா’’திஆதி³காய புச்சா²கா³தா²ய அத்தோ². தீ³க⁴மஜ்ஜி²மஸங்வண்ணனாஸு ததா²க³த-ஸத்³தோ³ வித்தா²ரதோ ஸங்வண்ணிதோதி ஆஹ ‘‘ஏவமாதீ³ஹி காரணேஹி ததா²க³தஸ்ஸா’’தி. பு³த்³த⁴த்தாதீ³ஹீதி ஆதி³-ஸத்³தே³ன ‘‘போ³தே⁴தா பஜாயா’’திஆதி³னா (மஹானி॰ 192; சூளனி॰ பாராயனத்து²திகா³தா²னித்³தே³ஸ 97) நித்³தே³ஸே ஆக³தகாரணானி ஸங்க³ய்ஹந்தி. விமொக்க²ங் வுச்சதி அரியமக்³கோ³, தஸ்ஸ அந்தோ அக்³க³ப²லங், தத்த² ப⁴வா பண்ணத்தி, தஸ்ஸா வஸேன. ஏவங் பு³த்³த⁴ப³லங் தீ³பேதி. இதா³னி கி²த்தங் ஸங்கே²பேன ஸங்ஹராபிதங் ஹோதீதி த³ஸ்ஸேதி.
Dhīro satoti padadvayena vaṭṭachindaṃ āha. Ko niccameva paṇḍito nāmāti atthoti ‘‘kassaccayā’’tiādikāya pucchāgāthāya attho. Dīghamajjhimasaṃvaṇṇanāsu tathāgata-saddo vitthārato saṃvaṇṇitoti āha ‘‘evamādīhi kāraṇehi tathāgatassā’’ti. Buddhattādīhīti ādi-saddena ‘‘bodhetā pajāyā’’tiādinā (mahāni. 192; cūḷani. pārāyanatthutigāthāniddesa 97) niddese āgatakāraṇāni saṅgayhanti. Vimokkhaṃ vuccati ariyamaggo, tassa anto aggaphalaṃ, tattha bhavā paṇṇatti, tassā vasena. Evaṃ buddhabalaṃ dīpeti. Idāni khittaṃ saṅkhepena saṃharāpitaṃ hotīti dasseti.
உஜ்ஜா²னஸஞ்ஞிஸுத்தவண்ணனா நிட்டி²தா.
Ujjhānasaññisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. உஜ்ஜா²னஸஞ்ஞிஸுத்தங் • 5. Ujjhānasaññisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. உஜ்ஜா²னஸஞ்ஞிஸுத்தவண்ணனா • 5. Ujjhānasaññisuttavaṇṇanā
