| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. உம்மக்³க³ஸுத்தங்
6. Ummaggasuttaṃ
186. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘கேன நு கோ², ப⁴ந்தே, லோகோ நீயதி, கேன லோகோ பரிகஸ்ஸதி, கஸ்ஸ ச உப்பன்னஸ்ஸ வஸங் க³ச்ச²தீ’’தி?
186. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘kena nu kho, bhante, loko nīyati, kena loko parikassati, kassa ca uppannassa vasaṃ gacchatī’’ti?
‘‘ஸாது⁴ ஸாது⁴, பி⁴க்கு²! ப⁴த்³த³கோ கோ² தே, பி⁴க்கு², உம்மக்³கோ³ 1, ப⁴த்³த³கங் படிபா⁴னங், கல்யாணீ 2 பரிபுச்சா². ஏவஞ்ஹி த்வங், பி⁴க்கு², புச்ச²ஸி – ‘கேன நு கோ², ப⁴ந்தே, லோகோ நீயதி, கேன லோகோ பரிகஸ்ஸதி, கஸ்ஸ ச உப்பன்னஸ்ஸ வஸங் க³ச்ச²தீ’’’தி? ‘‘ஏவங், ப⁴ந்தே’’. ‘‘சித்தேன கோ², பி⁴க்கு², லோகோ நீயதி, சித்தேன பரிகஸ்ஸதி, சித்தஸ்ஸ உப்பன்னஸ்ஸ வஸங் க³ச்ச²தீ’’தி.
‘‘Sādhu sādhu, bhikkhu! Bhaddako kho te, bhikkhu, ummaggo 3, bhaddakaṃ paṭibhānaṃ, kalyāṇī 4 paripucchā. Evañhi tvaṃ, bhikkhu, pucchasi – ‘kena nu kho, bhante, loko nīyati, kena loko parikassati, kassa ca uppannassa vasaṃ gacchatī’’’ti? ‘‘Evaṃ, bhante’’. ‘‘Cittena kho, bhikkhu, loko nīyati, cittena parikassati, cittassa uppannassa vasaṃ gacchatī’’ti.
‘‘ஸாது⁴ , ப⁴ந்தே’’தி கோ² ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா ப⁴க³வந்தங் உத்தரி பஞ்ஹங் அபுச்சி² – ‘‘‘ப³ஹுஸ்ஸுதோ த⁴ம்மத⁴ரோ, ப³ஹுஸ்ஸுதோ த⁴ம்மத⁴ரோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, ப³ஹுஸ்ஸுதோ த⁴ம்மத⁴ரோ ஹோதீ’’தி?
‘‘Sādhu , bhante’’ti kho so bhikkhu bhagavato bhāsitaṃ abhinanditvā anumoditvā bhagavantaṃ uttari pañhaṃ apucchi – ‘‘‘bahussuto dhammadharo, bahussuto dhammadharo’ti, bhante, vuccati. Kittāvatā nu kho, bhante, bahussuto dhammadharo hotī’’ti?
‘‘ஸாது⁴ ஸாது⁴, பி⁴க்கு²! ப⁴த்³த³கோ கோ² தே, பி⁴க்கு² உம்மக்³கோ³, ப⁴த்³த³கங் படிபா⁴னங், கல்யாணீ பரிபுச்சா². ஏவஞ்ஹி த்வங், பி⁴க்கு², புச்ச²ஸி – ‘ப³ஹுஸ்ஸுதோ த⁴ம்மத⁴ரோ, ப³ஹுஸ்ஸுதோ த⁴ம்மத⁴ரோதி, ப⁴ந்தே, வுச்சதி. கித்தாவதா நு கோ², ப⁴ந்தே, ப³ஹுஸ்ஸுதோ த⁴ம்மத⁴ரோ ஹோதீ’’’தி? ‘‘ஏவங், ப⁴ந்தே’’. ‘‘ப³ஹூ கோ², பி⁴க்கு², மயா த⁴ம்மா தே³ஸிதா 5 – ஸுத்தங், கெ³ய்யங், வெய்யாகரணங், கா³தா², உதா³னங், இதிவுத்தகங், ஜாதகங், அப்³பு⁴தத⁴ம்மங், வேத³ல்லங். சதுப்பதா³ய சேபி, பி⁴க்கு², கா³தா²ய அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி ப³ஹுஸ்ஸுதோ த⁴ம்மத⁴ரோதி அலங் வசனாயா’’தி.
‘‘Sādhu sādhu, bhikkhu! Bhaddako kho te, bhikkhu ummaggo, bhaddakaṃ paṭibhānaṃ, kalyāṇī paripucchā. Evañhi tvaṃ, bhikkhu, pucchasi – ‘bahussuto dhammadharo, bahussuto dhammadharoti, bhante, vuccati. Kittāvatā nu kho, bhante, bahussuto dhammadharo hotī’’’ti? ‘‘Evaṃ, bhante’’. ‘‘Bahū kho, bhikkhu, mayā dhammā desitā 6 – suttaṃ, geyyaṃ, veyyākaraṇaṃ, gāthā, udānaṃ, itivuttakaṃ, jātakaṃ, abbhutadhammaṃ, vedallaṃ. Catuppadāya cepi, bhikkhu, gāthāya atthamaññāya dhammamaññāya dhammānudhammappaṭipanno hoti bahussuto dhammadharoti alaṃ vacanāyā’’ti.
‘‘ஸாது⁴, ப⁴ந்தே’’தி கோ² ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா ப⁴க³வந்தங் உத்தரி பஞ்ஹங் அபுச்சி² – ‘‘‘ஸுதவா நிப்³பே³தி⁴கபஞ்ஞோ, ஸுதவா நிப்³பே³தி⁴கபஞ்ஞோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸுதவா நிப்³பே³தி⁴கபஞ்ஞோ ஹோதீ’’தி?
‘‘Sādhu, bhante’’ti kho so bhikkhu bhagavato bhāsitaṃ abhinanditvā anumoditvā bhagavantaṃ uttari pañhaṃ apucchi – ‘‘‘sutavā nibbedhikapañño, sutavā nibbedhikapañño’ti, bhante, vuccati. Kittāvatā nu kho, bhante, sutavā nibbedhikapañño hotī’’ti?
‘‘ஸாது⁴ ஸாது⁴, பி⁴க்கு²! ப⁴த்³த³கோ கோ² தே, பி⁴க்கு², உம்மக்³கோ³, ப⁴த்³த³கங் படிபா⁴னங், கல்யாணீ பரிபுச்சா². ஏவஞ்ஹி த்வங், பி⁴க்கு², புச்ச²ஸி – ‘ஸுதவா நிப்³பே³தி⁴கபஞ்ஞோ, ஸுதவா நிப்³பே³தி⁴கபஞ்ஞோதி, ப⁴ந்தே, வுச்சதி. கித்தாவதா நு கோ², ப⁴ந்தே, ஸுதவா நிப்³பே³தி⁴கபஞ்ஞோ ஹோதீ’’’தி? ‘‘ஏவங், ப⁴ந்தே’’. ‘‘இத⁴, பி⁴க்கு², பி⁴க்கு²னோ ‘இத³ங் து³க்க²’ந்தி ஸுதங் ஹோதி, பஞ்ஞாய சஸ்ஸ அத்த²ங் அதிவிஜ்ஜ² பஸ்ஸதி; ‘அயங் து³க்க²ஸமுத³யோ’தி ஸுதங் ஹோதி, பஞ்ஞாய சஸ்ஸ அத்த²ங் அதிவிஜ்ஜ² பஸ்ஸதி; ‘அயங் து³க்க²னிரோதோ⁴’தி ஸுதங் ஹோதி, பஞ்ஞாய சஸ்ஸ அத்த²ங் அதிவிஜ்ஜ² பஸ்ஸதி; ‘அயங் து³க்க²னிரோத⁴கா³மினீ படிபதா³’தி ஸுதங் ஹோதி, பஞ்ஞாய சஸ்ஸ அத்த²ங் அதிவிஜ்ஜ² பஸ்ஸதி. ஏவங் கோ², பி⁴க்கு², ஸுதவா நிப்³பே³தி⁴கபஞ்ஞோ ஹோதீ’’தி.
‘‘Sādhu sādhu, bhikkhu! Bhaddako kho te, bhikkhu, ummaggo, bhaddakaṃ paṭibhānaṃ, kalyāṇī paripucchā. Evañhi tvaṃ, bhikkhu, pucchasi – ‘sutavā nibbedhikapañño, sutavā nibbedhikapaññoti, bhante, vuccati. Kittāvatā nu kho, bhante, sutavā nibbedhikapañño hotī’’’ti? ‘‘Evaṃ, bhante’’. ‘‘Idha, bhikkhu, bhikkhuno ‘idaṃ dukkha’nti sutaṃ hoti, paññāya cassa atthaṃ ativijjha passati; ‘ayaṃ dukkhasamudayo’ti sutaṃ hoti, paññāya cassa atthaṃ ativijjha passati; ‘ayaṃ dukkhanirodho’ti sutaṃ hoti, paññāya cassa atthaṃ ativijjha passati; ‘ayaṃ dukkhanirodhagāminī paṭipadā’ti sutaṃ hoti, paññāya cassa atthaṃ ativijjha passati. Evaṃ kho, bhikkhu, sutavā nibbedhikapañño hotī’’ti.
‘‘ஸாது⁴, ப⁴ந்தே’’தி கோ² ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா ப⁴க³வந்தங் உத்தரி பஞ்ஹங் அபுச்சி² – ‘‘‘பண்டி³தோ மஹாபஞ்ஞோ, பண்டி³தோ மஹாபஞ்ஞோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, பண்டி³தோ மஹாபஞ்ஞோ ஹோதீ’’தி?
‘‘Sādhu, bhante’’ti kho so bhikkhu bhagavato bhāsitaṃ abhinanditvā anumoditvā bhagavantaṃ uttari pañhaṃ apucchi – ‘‘‘paṇḍito mahāpañño, paṇḍito mahāpañño’ti, bhante, vuccati. Kittāvatā nu kho, bhante, paṇḍito mahāpañño hotī’’ti?
‘‘ஸாது⁴ ஸாது⁴ பி⁴க்கு²! ப⁴த்³த³கோ கோ² தே, பி⁴க்கு², உம்மக்³கோ³, ப⁴த்³த³கங் படிபா⁴னங், கல்யாணீ பரிபுச்சா². ஏவஞ்ஹி த்வங் பி⁴க்கு² புச்ச²ஸி – ‘பண்டி³தோ மஹாபஞ்ஞோ, பண்டி³தோ மஹாபஞ்ஞோதி , ப⁴ந்தே, வுச்சதி. கித்தாவதா நு கோ², ப⁴ந்தே, பண்டி³தோ மஹாபஞ்ஞோ ஹோதீ’’’தி? ‘‘ஏவங், ப⁴ந்தே’’. ‘‘இத⁴, பி⁴க்கு², பண்டி³தோ மஹாபஞ்ஞோ நேவத்தப்³யாபா³தா⁴ய சேதேதி ந பரப்³யாபா³தா⁴ய சேதேதி ந உப⁴யப்³யாபா³தா⁴ய சேதேதி அத்தஹிதபரஹிதஉப⁴யஹிதஸப்³ப³லோகஹிதமேவ சிந்தயமானோ சிந்தேதி. ஏவங் கோ², பி⁴க்கு², பண்டி³தோ மஹாபஞ்ஞோ ஹோதீ’’தி. ச²ட்ட²ங்.
‘‘Sādhu sādhu bhikkhu! Bhaddako kho te, bhikkhu, ummaggo, bhaddakaṃ paṭibhānaṃ, kalyāṇī paripucchā. Evañhi tvaṃ bhikkhu pucchasi – ‘paṇḍito mahāpañño, paṇḍito mahāpaññoti , bhante, vuccati. Kittāvatā nu kho, bhante, paṇḍito mahāpañño hotī’’’ti? ‘‘Evaṃ, bhante’’. ‘‘Idha, bhikkhu, paṇḍito mahāpañño nevattabyābādhāya ceteti na parabyābādhāya ceteti na ubhayabyābādhāya ceteti attahitaparahitaubhayahitasabbalokahitameva cintayamāno cinteti. Evaṃ kho, bhikkhu, paṇḍito mahāpañño hotī’’ti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. உம்மக்³க³ஸுத்தவண்ணனா • 6. Ummaggasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. உம்மக்³க³ஸுத்தவண்ணனா • 6. Ummaggasuttavaṇṇanā
