| Library / Tipiṭaka / તિપિટક • Tipiṭaka / મહાવિભઙ્ગ • Mahāvibhaṅga |
૨. ઊનપઞ્ચબન્ધનસિક્ખાપદં
2. Ūnapañcabandhanasikkhāpadaṃ
૬૦૯. તેન સમયેન બુદ્ધો ભગવા સક્કેસુ વિહરતિ કપિલવત્થુસ્મિં નિગ્રોધારામે. તેન ખો પન સમયેન અઞ્ઞતરેન કુમ્ભકારેન ભિક્ખૂ પવારિતા હોન્તિ – ‘‘યેસં અય્યાનં પત્તેન અત્થો અહં પત્તેના’’તિ. તેન ખો પન સમયેન ભિક્ખૂ ન મત્તં જાનિત્વા બહૂ પત્તે વિઞ્ઞાપેન્તિ. યેસં ખુદ્દકા પત્તા તે મહન્તે પત્તે વિઞ્ઞાપેન્તિ. યેસં મહન્તા પત્તા તે ખુદ્દકે પત્તે વિઞ્ઞાપેન્તિ. અથ ખો સો કુમ્ભકારો ભિક્ખૂનં બહૂ પત્તે કરોન્તો ન સક્કોતિ અઞ્ઞં વિક્કાયિકં ભણ્ડં કાતું, અત્તનાપિ ન યાપેતિ, પુત્તદારાપિસ્સ કિલમન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ સમણા સક્યપુત્તિયા ન મત્તં જાનિત્વા બહૂ પત્તે વિઞ્ઞાપેસ્સન્તિ! અયં ઇમેસં બહૂ પત્તે કરોન્તો ન સક્કોતિ અઞ્ઞં વિક્કાયિકં ભણ્ડં કાતું, અત્તનાપિ ન યાપેતિ, પુત્તદારાપિસ્સ કિલમન્તી’’તિ.
609. Tena samayena buddho bhagavā sakkesu viharati kapilavatthusmiṃ nigrodhārāme. Tena kho pana samayena aññatarena kumbhakārena bhikkhū pavāritā honti – ‘‘yesaṃ ayyānaṃ pattena attho ahaṃ pattenā’’ti. Tena kho pana samayena bhikkhū na mattaṃ jānitvā bahū patte viññāpenti. Yesaṃ khuddakā pattā te mahante patte viññāpenti. Yesaṃ mahantā pattā te khuddake patte viññāpenti. Atha kho so kumbhakāro bhikkhūnaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
અસ્સોસું ખો ભિક્ખૂ તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યે તે ભિક્ખૂ અપ્પિચ્છા…પે॰… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખૂ ન મત્તં જાનિત્વા બહૂ પત્તે વિઞ્ઞાપેસ્સન્તી’’તિ! અથ ખો તે ભિક્ખૂ તે અનેકપરિયાયેન વિગરહિત્વા ભગવતો એતમત્થં આરોચેસું…પે॰… સચ્ચં કિર, ભિક્ખવે, ભિક્ખૂ ન મત્તં જાનિત્વા બહૂ પત્તે વિઞ્ઞાપેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે॰… કથઞ્હિ નામ તે, ભિક્ખવે, મોઘપુરિસા ન મત્તં જાનિત્વા બહૂ પત્તે વિઞ્ઞાપેસ્સન્તિ! નેતં, ભિક્ખવે, અપ્પસન્નાનં વા પસાદાય…પે॰… વિગરહિત્વા ધમ્મિં કથં કત્વા ભિક્ખૂ આમન્તેસિ – ‘‘ન, ભિક્ખવે, પત્તો વિઞ્ઞાપેતબ્બો. યો વિઞ્ઞાપેય્ય, આપત્તિ દુક્કટસ્સા’’તિ.
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū na mattaṃ jānitvā bahū patte viññāpessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū na mattaṃ jānitvā bahū patte viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā na mattaṃ jānitvā bahū patte viññāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, patto viññāpetabbo. Yo viññāpeyya, āpatti dukkaṭassā’’ti.
૬૧૦. તેન ખો પન સમયેન અઞ્ઞતરસ્સ ભિક્ખુનો પત્તો ભિન્નો હોતિ. અથ ખો સો ભિક્ખુ – ‘‘ભગવતા પટિક્ખિત્તં પત્તં વિઞ્ઞાપેતુ’’ન્તિ કુક્કુચ્ચાયન્તો ન વિઞ્ઞાપેતિ. હત્થેસુ પિણ્ડાય ચરતિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ સમણા સક્યપુત્તિયા હત્થેસુ પિણ્ડાય ચરિસ્સન્તિ, સેય્યથાપિ તિત્થિયા’’તિ! અસ્સોસું ખો ભિક્ખૂ તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. અથ ખો તે ભિક્ખૂ ભગવતો એતમત્થં આરોચેસું. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘અનુજાનામિ, ભિક્ખવે, નટ્ઠપત્તસ્સ વા ભિન્નપત્તસ્સ વા પત્તં વિઞ્ઞાપેતુ’’ન્તિ.
610. Tena kho pana samayena aññatarassa bhikkhuno patto bhinno hoti. Atha kho so bhikkhu – ‘‘bhagavatā paṭikkhittaṃ pattaṃ viññāpetu’’nti kukkuccāyanto na viññāpeti. Hatthesu piṇḍāya carati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hatthesu piṇḍāya carissanti, seyyathāpi titthiyā’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, naṭṭhapattassa vā bhinnapattassa vā pattaṃ viññāpetu’’nti.
૬૧૧. તેન ખો પન સમયેન છબ્બગ્ગિયા ભિક્ખૂ – ‘‘ભગવતા અનુઞ્ઞાતં નટ્ઠપત્તસ્સ વા ભિન્નપત્તસ્સ વા પત્તં વિઞ્ઞાપેતુ’’ન્તિ અપ્પમત્તકેનપિ ભિન્નેન અપ્પમત્તકેનપિ ખણ્ડેન વિલિખિતમત્તેનપિ બહૂ પત્તે વિઞ્ઞાપેન્તિ . અથ ખો સો કુમ્ભકારો ભિક્ખૂનં તથેવ બહૂ પત્તે કરોન્તો ન સક્કોતિ અઞ્ઞં વિક્કાયિકં ભણ્ડં કાતું, અત્તનાપિ ન યાપેતિ, પુત્તદારાપિસ્સ કિલમન્તિ. મનુસ્સા તથેવ ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ સમણા સક્યપુત્તિયા ન મત્તં જાનિત્વા બહૂ પત્તે વિઞ્ઞાપેસ્સન્તિ! અયં ઇમેસં બહૂ પત્તે કરોન્તો ન સક્કોતિ અઞ્ઞં વિક્કાયિકં ભણ્ડં કાતું, અત્તનાપિ ન યાપેતિ, પુત્તદારાપિસ્સ કિલમન્તી’’તિ.
611. Tena kho pana samayena chabbaggiyā bhikkhū – ‘‘bhagavatā anuññātaṃ naṭṭhapattassa vā bhinnapattassa vā pattaṃ viññāpetu’’nti appamattakenapi bhinnena appamattakenapi khaṇḍena vilikhitamattenapi bahū patte viññāpenti . Atha kho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamanti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā bahū patte viññāpessanti! Ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ, attanāpi na yāpeti, puttadārāpissa kilamantī’’ti.
અસ્સોસું ખો ભિક્ખૂ તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યે તે ભિક્ખૂ અપ્પિચ્છા…પે॰… તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખૂ અપ્પમત્તકેનપિ ભિન્નેન અપ્પમત્તકેનપિ ખણ્ડેન વિલિખિતમત્તેનપિ બહૂ પત્તે વિઞ્ઞાપેસ્સન્તી’’તિ! અથ ખો તે ભિક્ખૂ છબ્બગ્ગિયે ભિક્ખૂ અનેકપરિયાયેન વિગરહિત્વા ભગવતો એતમત્થં આરોચેસું…પે॰… ‘‘સચ્ચં કિર તુમ્હે, ભિક્ખવે, અપ્પમત્તકેનપિ ભિન્નેન અપ્પમત્તકેનપિ ખણ્ડેન વિલિખિતમત્તેનપિ બહૂ પત્તે વિઞ્ઞાપેથા’’તિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે॰… કથઞ્હિ નામ તુમ્હે, મોઘપુરિસા, અપ્પમત્તકેનપિ ભિન્નેન અપ્પમત્તકેનપિ ખણ્ડેન વિલિખિતમત્તેનપિ બહૂ પત્તે વિઞ્ઞાપેસ્સથ! નેતં, મોઘપુરિસા, અપ્પસન્નાનં વા પસાદાય…પે॰… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appamattakenapi bhinnena appamattakenapi khaṇḍena vilikhitamattenapi bahū patte viññāpessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, appamattakenapi bhinnena appamattakenapi khaṇḍena vilikhitamattenapi bahū patte viññāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, appamattakenapi bhinnena appamattakenapi khaṇḍena vilikhitamattenapi bahū patte viññāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
૬૧૨. ‘‘યો પન ભિક્ખુ ઊનપઞ્ચબન્ધનેન પત્તેન અઞ્ઞં નવં પત્તં ચેતાપેય્ય, નિસ્સગ્ગિયં પાચિત્તિયં. તેન ભિક્ખુના સો પત્તો ભિક્ખુપરિસાય નિસ્સજ્જિતબ્બો. યો ચ તસ્સા ભિક્ખુપરિસાય પત્તપરિયન્તો સો તસ્સ ભિક્ખુનો પદાતબ્બો – ‘અયં તે, ભિક્ખુ, પત્તો યાવ ભેદનાય ધારેતબ્બો’તિ. અયં તત્થ સામીચી’’તિ.
612.‘‘Yo pana bhikkhu ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tena bhikkhunā so patto bhikkhuparisāya nissajjitabbo. Yo ca tassā bhikkhuparisāya pattapariyanto so tassa bhikkhuno padātabbo – ‘ayaṃ te, bhikkhu, patto yāva bhedanāya dhāretabbo’ti. Ayaṃ tattha sāmīcī’’ti.
૬૧૩. યો પનાતિ યો યાદિસો…પે॰… ભિક્ખૂતિ…પે॰… અયં ઇમસ્મિં અત્થે અધિપ્પેતો ભિક્ખૂતિ.
613.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ઊનપઞ્ચબન્ધનો નામ પત્તો અબન્ધનો વા એકબન્ધનો વા દ્વિબન્ધનો વા તિબન્ધનો વા ચતુબન્ધનો વા. અબન્ધનોકાસો નામ પત્તો યસ્સ દ્વઙ્ગુલા રાજિ ન હોતિ. બન્ધનોકાસો નામ પત્તો યસ્સ દ્વઙ્ગુલા રાજિ હોતિ. નવો નામ પત્તો વિઞ્ઞત્તિં ઉપાદાય વુચ્ચતિ.
Ūnapañcabandhano nāma patto abandhano vā ekabandhano vā dvibandhano vā tibandhano vā catubandhano vā. Abandhanokāso nāma patto yassa dvaṅgulā rāji na hoti. Bandhanokāso nāma patto yassa dvaṅgulā rāji hoti. Navo nāma patto viññattiṃ upādāya vuccati.
ચેતાપેય્યાતિ વિઞ્ઞાપેતિ, પયોગે દુક્કટં. પટિલાભેન નિસ્સગ્ગિયો હોતિ. સઙ્ઘમજ્ઝે નિસ્સજ્જિતબ્બો. સબ્બેહેવ અધિટ્ઠિતપત્તં ગહેત્વા સન્નિપતિતબ્બં. ન લામકો પત્તો અધિટ્ઠાતબ્બો – ‘‘મહગ્ઘં પત્તં ગહેસ્સામી’’તિ. સચે લામકં પત્તં અધિટ્ઠેતિ – ‘‘મહગ્ઘં પત્તં ગહેસ્સામી’’તિ, આપત્તિ દુક્કટસ્સ. એવઞ્ચ પન, ભિક્ખવે, નિસ્સજ્જિતબ્બો. તેન ભિક્ખુના સઙ્ઘં ઉપસઙ્કમિત્વા એકંસં ઉત્તરાસઙ્ગં કરિત્વા વુડ્ઢાનં ભિક્ખૂનં પાદે વન્દિત્વા ઉક્કુટિકં નિસીદિત્વા અઞ્જલિં પગ્ગહેત્વા એવમસ્સ વચનીયો – ‘‘અયં મે, ભન્તે, પત્તો ઊનપઞ્ચબન્ધનેન પત્તેન ચેતાપિતો નિસ્સગ્ગિયો. ઇમાહં સઙ્ઘસ્સ નિસ્સજ્જામી’’તિ. નિસ્સજ્જિત્વા આપત્તિ દેસેતબ્બા. બ્યત્તેન ભિક્ખુના પટિબલેન આપત્તિ પટિગ્ગહેતબ્બા. પઞ્ચહઙ્ગેહિ સમન્નાગતો ભિક્ખુ પત્તગ્ગાહાપકો સમ્મન્નિતબ્બો – યો ન છન્દાગતિં ગચ્છેય્ય, ન દોસાગતિં ગચ્છેય્ય, ન મોહાગતિં ગચ્છેય્ય, ન ભયાગતિં ગચ્છેય્ય, ગાહિતાગાહિતઞ્ચ જાનેય્ય . એવઞ્ચ પન, ભિક્ખવે, સમ્મન્નિતબ્બો. પઠમં ભિક્ખુ યાચિતબ્બો. યાચિત્વા બ્યત્તેન ભિક્ખુના પટિબલેન સઙ્ઘો ઞાપેતબ્બો –
Cetāpeyyāti viññāpeti, payoge dukkaṭaṃ. Paṭilābhena nissaggiyo hoti. Saṅghamajjhe nissajjitabbo. Sabbeheva adhiṭṭhitapattaṃ gahetvā sannipatitabbaṃ. Na lāmako patto adhiṭṭhātabbo – ‘‘mahagghaṃ pattaṃ gahessāmī’’ti. Sace lāmakaṃ pattaṃ adhiṭṭheti – ‘‘mahagghaṃ pattaṃ gahessāmī’’ti, āpatti dukkaṭassa. Evañca pana, bhikkhave, nissajjitabbo. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ayaṃ me, bhante, patto ūnapañcabandhanena pattena cetāpito nissaggiyo. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Pañcahaṅgehi samannāgato bhikkhu pattaggāhāpako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gāhitāgāhitañca jāneyya . Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
૬૧૪. ‘‘સુણાતુ મે, ભન્તે, સઙ્ઘો. યદિ સઙ્ઘસ્સ પત્તકલ્લં, સઙ્ઘો ઇત્થન્નામં ભિક્ખું પત્તગ્ગાહાપકં સમ્મન્નેય્ય. એસા ઞત્તિ.
614. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ pattaggāhāpakaṃ sammanneyya. Esā ñatti.
‘‘સુણાતુ મે, ભન્તે, સઙ્ઘો. સઙ્ઘો ઇત્થન્નામં ભિક્ખું પત્તગ્ગાહાપકં સમ્મન્નતિ. યસ્સાયસ્મતો ખમતિ ઇત્થન્નામસ્સ ભિક્ખુનો પત્તગ્ગાહાપકસ્સ સમ્મુતિ, સો તુણ્હસ્સ; યસ્સ નક્ખમતિ, સો ભાસેય્ય.
‘‘Suṇātu me, bhante, saṅgho. Saṅgho itthannāmaṃ bhikkhuṃ pattaggāhāpakaṃ sammannati. Yassāyasmato khamati itthannāmassa bhikkhuno pattaggāhāpakassa sammuti, so tuṇhassa; yassa nakkhamati, so bhāseyya.
‘‘સમ્મતો સઙ્ઘેન ઇત્થન્નામો ભિક્ખુ પત્તગ્ગાહાપકો. ખમતિ સઙ્ઘસ્સ, તસ્મા તુણ્હી, એવમેતં ધારયામી’’તિ.
‘‘Sammato saṅghena itthannāmo bhikkhu pattaggāhāpako. Khamati saṅghassa, tasmā tuṇhī, evametaṃ dhārayāmī’’ti.
૬૧૫. તેન સમ્મતેન ભિક્ખુના પત્તો ગાહેતબ્બો. થેરો વત્તબ્બો – ‘‘ગણ્હાતુ, ભન્તે, થેરો પત્ત’’ન્તિ. સચે થેરો ગણ્હાતિ, થેરસ્સ પત્તો દુતિયસ્સ ગાહેતબ્બો. ન ચ તસ્સ અનુદ્દયતાય ન ગહેતબ્બો. યો ન ગણ્હેય્ય, આપત્તિ દુક્કટસ્સ. અપત્તકસ્સ ન ગાહેતબ્બો. એતેનેવ ઉપાયેન યાવ સઙ્ઘનવકા ગાહેતબ્બા. યો ચ તસ્સા ભિક્ખુપરિસાય પત્તપરિયન્તો, સો તસ્સ ભિક્ખુનો પદાતબ્બો – ‘‘અયં તે, ભિક્ખુ, પત્તો યાવ ભેદનાય ધારેતબ્બો’’તિ.
615. Tena sammatena bhikkhunā patto gāhetabbo. Thero vattabbo – ‘‘gaṇhātu, bhante, thero patta’’nti. Sace thero gaṇhāti, therassa patto dutiyassa gāhetabbo. Na ca tassa anuddayatāya na gahetabbo. Yo na gaṇheyya, āpatti dukkaṭassa. Apattakassa na gāhetabbo. Eteneva upāyena yāva saṅghanavakā gāhetabbā. Yo ca tassā bhikkhuparisāya pattapariyanto, so tassa bhikkhuno padātabbo – ‘‘ayaṃ te, bhikkhu, patto yāva bhedanāya dhāretabbo’’ti.
તેન ભિક્ખુના સો પત્તો ન અદેસે નિક્ખિપિતબ્બો, ન અભોગેન ભુઞ્જિતબ્બો, ન વિસ્સજ્જેતબ્બો – ‘‘કથાયં પત્તો નસ્સેય્ય વા વિનસ્સેય્ય વા ભિજ્જેય્ય વા’’તિ? સચે અદેસે વા નિક્ખિપતિ અભોગેન વા ભુઞ્જતિ વિસ્સજ્જેતિ વા, આપત્તિ દુક્કટસ્સ.
Tena bhikkhunā so patto na adese nikkhipitabbo, na abhogena bhuñjitabbo, na vissajjetabbo – ‘‘kathāyaṃ patto nasseyya vā vinasseyya vā bhijjeyya vā’’ti? Sace adese vā nikkhipati abhogena vā bhuñjati vissajjeti vā, āpatti dukkaṭassa.
અયં તત્થ સામીચીતિ અયં તત્થ અનુધમ્મતા.
Ayaṃ tattha sāmīcīti ayaṃ tattha anudhammatā.
૬૧૬. અબન્ધનેન પત્તેન અબન્ધનં પત્તં ચેતાપેતિ, નિસ્સગ્ગિયં પાચિત્તિયં. અબન્ધનેન પત્તેન એકબન્ધનં પત્તં ચેતાપેતિ, નિસ્સગ્ગિયં પાચિત્તિયં. અબન્ધનેન પત્તેન દ્વિબન્ધનં પત્તં ચેતાપેતિ, નિસ્સગ્ગિયં પાચિત્તિયં. અબન્ધનેન પત્તેન તિબન્ધનં પત્તં ચેતાપેતિ, નિસ્સગ્ગિયં પાચિત્તિયં. અબન્ધનેન પત્તેન ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
616. Abandhanena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Abandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Abandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
એકબન્ધનેન પત્તેન અબન્ધનં પત્તં ચેતાપેતિ, નિસ્સગ્ગિયં પાચિત્તિયં. એકબન્ધનેન પત્તેન એકબન્ધનં પત્તં ચેતાપેતિ, નિસ્સગ્ગિયં પાચિત્તિયં. એકબન્ધનેન પત્તેન દ્વિબન્ધનં પત્તં ચેતાપેતિ, નિસ્સગ્ગિયં પાચિત્તિયં. એકબન્ધનેન પત્તેન તિબન્ધનં પત્તં ચેતાપેતિ, નિસ્સગ્ગિયં પાચિત્તિયં. એકબન્ધનેન પત્તેન ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
Ekabandhanena pattena abandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena ekabandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena dvibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena tibandhanaṃ pattaṃ cetāpeti, nissaggiyaṃ pācittiyaṃ. Ekabandhanena pattena catubandhanaṃ pattaṃ cetāpeti, nissaggiyaṃ pācittiyaṃ.
દ્વિબન્ધનેન પત્તેન અબન્ધનં પત્તં ચેતાપેતિ, નિસ્સગ્ગિયં પાચિત્તિયં. દ્વિબન્ધનેન પત્તેન એકબન્ધનં પત્તં…પે॰… દ્વિબન્ધનં પત્તં… તિબન્ધનં પત્તં… ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
Dvibandhanena pattena abandhanaṃ pattaṃ cetāpeti, nissaggiyaṃ pācittiyaṃ. Dvibandhanena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
તિબન્ધનેન પત્તેન અબન્ધનં પત્તં…પે॰… એકબન્ધનં પત્તં…પે॰… દ્વિબન્ધનં પત્તં… તિબન્ધનં પત્તં… ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
Tibandhanena pattena abandhanaṃ pattaṃ…pe… ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ચતુબન્ધનેન પત્તેન અબન્ધનં પત્તં…પે॰… એકબન્ધનં પત્તં… દ્વિબન્ધનં પત્તં… તિબન્ધનં પત્તં… ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
Catubandhanena pattena abandhanaṃ pattaṃ…pe… ekabandhanaṃ pattaṃ… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
અબન્ધનેન પત્તેન અબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં. અબન્ધનેન પત્તેન એકબન્ધનોકાસં પત્તં…પે॰… દ્વિબન્ધનોકાસં પત્તં … તિબન્ધનોકાસં પત્તં… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Abandhanena pattena abandhanokāsaṃ pattaṃ cetāpeti, nissaggiyaṃ pācittiyaṃ. Abandhanena pattena ekabandhanokāsaṃ pattaṃ…pe… dvibandhanokāsaṃ pattaṃ … tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
એકબન્ધનેન પત્તેન અબન્ધનોકાસં પત્તં…પે॰… એકબન્ધનોકાસં પત્તં… દ્વિબન્ધનોકાસં પત્તં… તિબન્ધનોકાસં પત્તં… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Ekabandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
દ્વિબન્ધનેન પત્તેન અબન્ધનોકાસં પત્તં…પે॰… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Dvibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
તિબન્ધનેન પત્તેન અબન્ધનોકાસં પત્તં…પે॰… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Tibandhanena pattena abandhanokāsaṃ pattaṃ…pe… catubandhanokāsaṃ pattaṃ cetāpeti, nissaggiyaṃ pācittiyaṃ.
ચતુબન્ધનેન પત્તેન અબન્ધનોકાસં પત્તં…પે॰… એકબન્ધનોકાસં પત્તં… દ્વિબન્ધનોકાસં પત્તં… તિબન્ધનોકાસં પત્તં… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Catubandhanena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
અબન્ધનોકાસેન પત્તેન અબન્ધનં પત્તં ચેતાપેતિ, નિસ્સગ્ગિયં પાચિત્તિયં. અબન્ધનોકાસેન પત્તેન એકબન્ધનં પત્તં…પે॰… દ્વિબન્ધનં પત્તં… તિબન્ધનં પત્તં… ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
Abandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Abandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
ચતુબન્ધનોકાસેન પત્તેન અબન્ધનં પત્તં ચેતાપેતિ, નિસ્સગ્ગિયં પાચિત્તિયં. ચતુબન્ધનોકાસેન પત્તેન એકબન્ધનં પત્તં…પે॰… દ્વિબન્ધનં પત્તં… તિબન્ધનં પત્તં… ચતુબન્ધનં પત્તં ચેતાપેતિ, નિસ્સગ્ગિયં પાચિત્તિયં.
Catubandhanokāsena pattena abandhanaṃ pattaṃ cetāpeti, nissaggiyaṃ pācittiyaṃ. Catubandhanokāsena pattena ekabandhanaṃ pattaṃ…pe… dvibandhanaṃ pattaṃ… tibandhanaṃ pattaṃ… catubandhanaṃ pattaṃ cetāpeti, nissaggiyaṃ pācittiyaṃ.
અબન્ધનોકાસેન પત્તેન અબન્ધનોકાસં પત્તં…પે॰… એકબન્ધનોકાસં પત્તં… દ્વિબન્ધનોકાસં પત્તં… તિબન્ધનોકાસં પત્તં… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Abandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
ચતુબન્ધનોકાસેન પત્તેન અબન્ધનોકાસં પત્તં…પે॰… એકબન્ધનોકાસં પત્તં… દ્વિબન્ધનોકાસં પત્તં… તિબન્ધનોકાસં પત્તં… ચતુબન્ધનોકાસં પત્તં ચેતાપેતિ, નિસ્સગ્ગિયં પાચિત્તિયં.
Catubandhanokāsena pattena abandhanokāsaṃ pattaṃ…pe… ekabandhanokāsaṃ pattaṃ… dvibandhanokāsaṃ pattaṃ… tibandhanokāsaṃ pattaṃ… catubandhanokāsaṃ pattaṃ cetāpeti, nissaggiyaṃ pācittiyaṃ.
૬૧૭. અનાપત્તિ નટ્ઠપત્તસ્સ, ભિન્નપત્તસ્સ, ઞાતકાનં પવારિતાનં, અઞ્ઞસ્સત્થાય, અત્તનો ધનેન, ઉમ્મત્તકસ્સ, આદિકમ્મિકસ્સાતિ.
617. Anāpatti naṭṭhapattassa, bhinnapattassa, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
ઊનપઞ્ચબન્ધનસિક્ખાપદં નિટ્ઠિતં દુતિયં.
Ūnapañcabandhanasikkhāpadaṃ niṭṭhitaṃ dutiyaṃ.
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૨. ઊનપઞ્ચબન્ધનસિક્ખાપદવણ્ણના • 2. Ūnapañcabandhanasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૨. ઊનપઞ્ચબન્ધનસિક્ખાપદવણ્ણના • 2. Ūnapañcabandhanasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૨. ઊનપઞ્ચબન્ધનસિક્ખાપદવણ્ણના • 2. Ūnapañcabandhanasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૨. ઊનપઞ્ચબન્ધનસિક્ખાપદવણ્ણના • 2. Ūnapañcabandhanasikkhāpadavaṇṇanā
