| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. உண்ணாப⁴ப்³ராஹ்மணஸுத்தவண்ணனா
2. Uṇṇābhabrāhmaṇasuttavaṇṇanā
512. அஞ்ஞமஞ்ஞஸ்ஸாதி அஞ்ஞோ அஞ்ஞஸ்ஸ. ந பச்சனுபோ⁴தி அத்தனோ அவிஸயபா⁴வதோ. இதா³னி தங் அஞ்ஞவிஸயதங் அன்வயதோ ப்³யதிரேகதோ விபா⁴வேதுங் ‘‘ஸசே ஹீ’’திஆதி³ வுத்தங்.
512.Aññamaññassāti añño aññassa. Na paccanubhoti attano avisayabhāvato. Idāni taṃ aññavisayataṃ anvayato byatirekato vibhāvetuṃ ‘‘sace hī’’tiādi vuttaṃ.
விஸயானி படிஸரந்தி எத்தா²தி படிஸரணங். இந்த்³ரியவிஞ்ஞாணானி ஹி அஸதிபி தாதி³ஸே அதி⁴ப்பாயே அத்தனோ ஆரம்மணஸ்ஸ யாதா²வதோ ஸம்பஜானநதோ பவேத³னவிஜானநானி கரொந்தானி விய பவத்தந்தி, ததா² லோகஸ்ஸ அஞ்ஞத்த² ஸித்³தி⁴தோ. தேனாஹ ப⁴க³வா – ‘‘மனோ படிஸரணங், மனோவ நேஸங் கோ³சரவிஸயங் பச்சனுபோ⁴தீ’’தி மனொத்³வாரிகஜவனமனோ ஹி ஸவிஸேஸங் மனோவிஸயங் பச்சனுபோ⁴தி, பஞ்சத்³வாரிகஜவனமனோ மனநமத்தமேவ பச்சனுப⁴வதி. ரஜ்ஜனாதி³க்³க³ஹணஞ்செத்த² நித³ஸ்ஸனமத்தங், தஸ்மா ஸத்³த³ஹனாதி³பி க³ஹிதமேவாதி த³ட்ட²ப்³ப³ங், பஞ்சத்³வாரப்பவத்திவஸேன ததா² வுத்தங். ஏகஸ்மிங் பன த்³வாரேதி சக்கு²த்³வாரே.
Visayāni paṭisaranti etthāti paṭisaraṇaṃ. Indriyaviññāṇāni hi asatipi tādise adhippāye attano ārammaṇassa yāthāvato sampajānanato pavedanavijānanāni karontāni viya pavattanti, tathā lokassa aññattha siddhito. Tenāha bhagavā – ‘‘mano paṭisaraṇaṃ, manova nesaṃ gocaravisayaṃ paccanubhotī’’ti manodvārikajavanamano hi savisesaṃ manovisayaṃ paccanubhoti, pañcadvārikajavanamano mananamattameva paccanubhavati. Rajjanādiggahaṇañcettha nidassanamattaṃ, tasmā saddahanādipi gahitamevāti daṭṭhabbaṃ, pañcadvārappavattivasena tathā vuttaṃ. Ekasmiṃ pana dvāreti cakkhudvāre.
து³ப்³ப³லபோ⁴ஜகாதி அப்பானுபா⁴வா ராஜபொ⁴க்³கா³. ஆயந்தி போ⁴கு³ப்பத்திட்டா²னங். யொத்தப³ந்தா⁴தி³னிமித்தங் லத்³த⁴ப்³ப³கஹாபணோ யொத்தகஹாபணோ. அத்³து³ப³ந்தா⁴தி³னிமித்தங் க³ஹேதப்³ப³கஹாபணோ அத்³து³கஹாபணோ. மாகா⁴தகோ⁴ஸனாய கதாய ஹிங்ஸானிமித்தங் க³ஹேதப்³ப³கஹாபணோ மாபஹாரகஹாபணோ. தஸ்ஸ பரிமாணங் த³ஸ்ஸேதுங் ‘‘அட்ட²கஹாபணோ’’திஆதி³ வுத்தங். ஸதவத்து²கந்தி ஸதகரீஸவத்து²கங்.
Dubbalabhojakāti appānubhāvā rājabhoggā. Āyanti bhoguppattiṭṭhānaṃ. Yottabandhādinimittaṃ laddhabbakahāpaṇo yottakahāpaṇo. Addubandhādinimittaṃ gahetabbakahāpaṇo addukahāpaṇo. Māghātaghosanāya katāya hiṃsānimittaṃ gahetabbakahāpaṇo māpahārakahāpaṇo. Tassa parimāṇaṃ dassetuṃ ‘‘aṭṭhakahāpaṇo’’tiādi vuttaṃ. Satavatthukanti satakarīsavatthukaṃ.
மக்³க³ஸதீதி அரியமக்³க³ஸதி. பா⁴வனமனுயுஞ்ஜந்தஸ்ஸ ஹி ஜவனமனோ உஸ்ஸக்கித்வாவ மக்³க³ஸதிங் படிஸரதி தப்பரியோஸானத்தா. தந்தி நிப்³பா³னங். ஸாதி ப²லவிமுத்தி. படிஸரதி அக்³க³மக்³க³ஸதியா. ப²லவிமுத்தி நிப்³பா³னந்தி உப⁴யங் மக்³க³ஸ்ஸ ஸித்³தா⁴யேவாதி. ஆரம்மணவஸேன நத்தி² ஏதஸ்ஸ படிஸரணந்தி அப்படிஸரணங் அஸங்க²தாமதஸ்ஸ ஸந்தினிச்சஸபா⁴வத்தா. ஸயங் பன ஸப்³பே³ஸங்யேவ அரியானங் படிஸரணங். தேனாஹ ‘‘நிப்³பா³னங் அரஹதோ க³தீ’’தி (பரி॰ 339). நிப்³பா³னங் அனுபவிட்ட²ங் நிப்³பா³னநிஸ்ஸயத்தா. ந ததோ பரங் க³ச்ச²தி க³தஸ்ஸ அஞ்ஞஸ்ஸ தாதி³ஸஸ்ஸ அபா⁴வா. நிப்³பா³னங் பரி ஸப்³ப³ஸோ ஓஸானந்தி நிப்³பா³னபரியோஸானங்.
Maggasatīti ariyamaggasati. Bhāvanamanuyuñjantassa hi javanamano ussakkitvāva maggasatiṃ paṭisarati tappariyosānattā. Tanti nibbānaṃ. Sāti phalavimutti. Paṭisarati aggamaggasatiyā. Phalavimutti nibbānanti ubhayaṃ maggassa siddhāyevāti. Ārammaṇavasena natthi etassa paṭisaraṇanti appaṭisaraṇaṃ asaṅkhatāmatassa santiniccasabhāvattā. Sayaṃ pana sabbesaṃyeva ariyānaṃ paṭisaraṇaṃ. Tenāha ‘‘nibbānaṃ arahato gatī’’ti (pari. 339). Nibbānaṃ anupaviṭṭhaṃ nibbānanissayattā. Na tato paraṃ gacchati gatassa aññassa tādisassa abhāvā. Nibbānaṃ pari sabbaso osānanti nibbānapariyosānaṃ.
மூலஜாதா ஜாதமூலா. ததோ ஏவ பதிட்டி²தா. கா பனஸ்ஸாதி ஆஹ ‘‘மக்³கே³ன ஆக³தஸத்³தா⁴’’தி. மக்³கோ³ த³ள்ஹாய அஸங்ஹாரியஸத்³தா⁴ய மூலங் தி³ட்டி²ஸம்பயுத்தானி சேவ விசிகிச்சா²சித்தஞ்சாதி பஞ்ச அகுஸலசித்தானி ஸமுச்சே²த³வஸேன பஹீனானி. பஞ்ச நீவரணானீதி எத்த² அபாயக³மனீயானி பட²மமக்³கே³னேவ பஹீனானி, இதரானி விக்க²ம்ப⁴னவஸேன ஜா²னேன பஹீனானீதி பஞ்சஸு ஓரம்பா⁴கி³யகிலேஸஸங்யோஜனேஸு ஏகதே³ஸவிக³மேனேவ ப³ஹித்³தா⁴ஸங்யோஜனோ விய ஜாதோதி வுத்தங் ‘‘ஜா²னஅனாகா³மிட்டா²னே டி²தோ’’தி. தேனாஹ ‘‘ஸோ அபரிஹீன…பே॰… நிப்³பா³யெய்யா’’தி.
Mūlajātā jātamūlā. Tato eva patiṭṭhitā. Kā panassāti āha ‘‘maggena āgatasaddhā’’ti. Maggo daḷhāya asaṃhāriyasaddhāya mūlaṃ diṭṭhisampayuttāni ceva vicikicchācittañcāti pañca akusalacittāni samucchedavasena pahīnāni. Pañca nīvaraṇānīti ettha apāyagamanīyāni paṭhamamaggeneva pahīnāni, itarāni vikkhambhanavasena jhānena pahīnānīti pañcasu orambhāgiyakilesasaṃyojanesu ekadesavigameneva bahiddhāsaṃyojano viya jātoti vuttaṃ ‘‘jhānaanāgāmiṭṭhāne ṭhito’’ti. Tenāha ‘‘so aparihīna…pe… nibbāyeyyā’’ti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. உண்ணாப⁴ப்³ராஹ்மணஸுத்தங் • 2. Uṇṇābhabrāhmaṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. உண்ணாப⁴ப்³ராஹ்மணஸுத்தவண்ணனா • 2. Uṇṇābhabrāhmaṇasuttavaṇṇanā
