| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. உபாதா³னபரிபவத்தஸுத்தவண்ணனா
4. Upādānaparipavattasuttavaṇṇanā
56. சதுன்னங் பரிவட்டனவஸேனாதி பச்சேகக்க²ந்தே⁴ஸு சதுன்னங் அரியஸச்சானங் பரிவட்டனவஸேன. ரூபங் அப்³ப⁴ஞ்ஞாஸிந்தி ஸகலபூ⁴துபாதா³ரூபங் குச்சி²தபா⁴வதோ தத்த² ச துச்ச²விபல்லாஸதாய ‘‘து³க்க²ஸச்ச’’ந்தி அபி⁴விஸிட்டே²ன ஞாணேன அஞ்ஞாஸிங் படிவிஜ்ஜி²ங். ஆஹாரவஸேன ரூபகாயஸ்ஸ ஹானிவுத்³தா⁴தீ³னங் பாகடபா⁴வதோ விஸேஸபச்சயதோ ச தஸ்ஸ ‘‘ஆஹாரஸமுத³யா’’தி வுத்தங். து³க்க²ஸமுத³யகதா² நாம வட்டகதா²தி ‘‘ஸச்ச²ந்த³ராகோ³’’தி விஸேஸெத்வா வுத்தங். ச²ந்த³ராக³க்³க³ஹணேன ச உபாதா³னகம்மாவிஜ்ஜாபி க³ஹிதா ஏவ. படிபன்னா ஹொந்தீதி அத்தோ². வத்தமானகாலப்பயோகோ³ ஹேஸ யதா² ‘‘குஸலங் சித்தங் உப்பன்னங் ஹோதீ’’தி. பதிட்ட²ஹந்தீதி பதிட்ட²ங் லப⁴ந்தி. கேவலினோதி இத⁴ விமுத்திகு³ணேன பாரிபூரீதி ஆஹ ‘‘ஸகலினோ கதஸப்³ப³கிச்சா’’தி. யேன தேதி யேன அவஸிட்டே²ன தே அஸெக்கே² பஞ்ஞாபெந்தா பஞ்ஞாபெய்யுங், தங் நேஸங் வட்டங் ஸெக்கா²னங் விய நத்தி² பஞ்ஞாபனாய. வட்டந்தி காரணங் வட்டனட்டே²ன ப²லஸ்ஸ பவத்தனட்டே²ன. அஸெக்க²பூ⁴மிவாரோதி அஸெக்க²பூ⁴மிப்பவத்தி.
56.Catunnaṃparivaṭṭanavasenāti paccekakkhandhesu catunnaṃ ariyasaccānaṃ parivaṭṭanavasena. Rūpaṃ abbhaññāsinti sakalabhūtupādārūpaṃ kucchitabhāvato tattha ca tucchavipallāsatāya ‘‘dukkhasacca’’nti abhivisiṭṭhena ñāṇena aññāsiṃ paṭivijjhiṃ. Āhāravasena rūpakāyassa hānivuddhādīnaṃ pākaṭabhāvato visesapaccayato ca tassa ‘‘āhārasamudayā’’ti vuttaṃ. Dukkhasamudayakathā nāma vaṭṭakathāti ‘‘sacchandarāgo’’ti visesetvā vuttaṃ. Chandarāgaggahaṇena ca upādānakammāvijjāpi gahitā eva. Paṭipannā hontīti attho. Vattamānakālappayogo hesa yathā ‘‘kusalaṃ cittaṃ uppannaṃ hotī’’ti. Patiṭṭhahantīti patiṭṭhaṃ labhanti. Kevalinoti idha vimuttiguṇena pāripūrīti āha ‘‘sakalino katasabbakiccā’’ti. Yena teti yena avasiṭṭhena te asekkhe paññāpentā paññāpeyyuṃ, taṃ nesaṃ vaṭṭaṃ sekkhānaṃ viya natthi paññāpanāya. Vaṭṭanti kāraṇaṃ vaṭṭanaṭṭhena phalassa pavattanaṭṭhena. Asekkhabhūmivāroti asekkhabhūmippavatti.
உபாதா³னபரிபவத்தஸுத்தவண்ணனா நிட்டி²தா.
Upādānaparipavattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. உபாதா³னபரிபவத்தஸுத்தங் • 4. Upādānaparipavattasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. உபாதா³னபரிபவத்தஸுத்தவண்ணனா • 4. Upādānaparipavattasuttavaṇṇanā
