| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. உபஜ்ஜா²யஸுத்தங்
6. Upajjhāyasuttaṃ
56. அத² கோ² அஞ்ஞதரோ பி⁴க்கு² யேன ஸகோ உபஜ்ஜா²யோ தேனுபஸங்கமி; உபஸங்கமித்வா ஸகங் உபஜ்ஜா²யங் ஏதத³வோச – ‘‘ஏதரஹி மே, ப⁴ந்தே, மது⁴ரகஜாதோ சேவ காயோ, தி³ஸா ச மே ந பக்கா²யந்தி, த⁴ம்மா ச மங் நப்படிப⁴ந்தி, தி²னமித்³த⁴ஞ்ச மே சித்தங் பரியாதா³ய திட்ட²தி, அனபி⁴ரதோ ச ப்³ரஹ்மசரியங் சராமி, அத்தி² ச மே த⁴ம்மேஸு விசிகிச்சா²’’தி.
56. Atha kho aññataro bhikkhu yena sako upajjhāyo tenupasaṅkami; upasaṅkamitvā sakaṃ upajjhāyaṃ etadavoca – ‘‘etarahi me, bhante, madhurakajāto ceva kāyo, disā ca me na pakkhāyanti, dhammā ca maṃ nappaṭibhanti, thinamiddhañca me cittaṃ pariyādāya tiṭṭhati, anabhirato ca brahmacariyaṃ carāmi, atthi ca me dhammesu vicikicchā’’ti.
அத² கோ² ஸோ பி⁴க்கு² தங் ஸத்³தி⁴விஹாரிகங் பி⁴க்கு²ங் ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘அயங், ப⁴ந்தே, பி⁴க்கு² ஏவமாஹ – ‘ஏதரஹி மே, ப⁴ந்தே, மது⁴ரகஜாதோ சேவ காயோ, தி³ஸா ச மங் ந பக்கா²யந்தி, த⁴ம்மா ச மே நப்படிப⁴ந்தி, தி²னமித்³த⁴ஞ்ச மே சித்தங் பரியாதா³ய திட்ட²தி, அனபி⁴ரதோ ச ப்³ரஹ்மசரியங் சராமி, அத்தி² ச மே த⁴ம்மேஸு விசிகிச்சா²’’’தி.
Atha kho so bhikkhu taṃ saddhivihārikaṃ bhikkhuṃ ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ayaṃ, bhante, bhikkhu evamāha – ‘etarahi me, bhante, madhurakajāto ceva kāyo, disā ca maṃ na pakkhāyanti, dhammā ca me nappaṭibhanti, thinamiddhañca me cittaṃ pariyādāya tiṭṭhati, anabhirato ca brahmacariyaṃ carāmi, atthi ca me dhammesu vicikicchā’’’ti.
‘‘ஏவஞ்ஹேதங் , பி⁴க்கு², ஹோதி இந்த்³ரியேஸு அகு³த்தத்³வாரஸ்ஸ, போ⁴ஜனே அமத்தஞ்ஞுனோ, ஜாக³ரியங் அனநுயுத்தஸ்ஸ, அவிபஸ்ஸகஸ்ஸ குஸலானங் த⁴ம்மானங், புப்³ப³ரத்தாபரரத்தங் போ³தி⁴பக்கி²யானங் த⁴ம்மானங் பா⁴வனானுயோக³ங் அனநுயுத்தஸ்ஸ விஹரதோ, யங் மது⁴ரகஜாதோ சேவ காயோ ஹோதி, தி³ஸா சஸ்ஸ ந பக்கா²யந்தி, த⁴ம்மா ச தங் நப்படிப⁴ந்தி, தி²னமித்³த⁴ஞ்சஸ்ஸ சித்தங் பரியாதா³ய திட்ட²தி, அனபி⁴ரதோ ச ப்³ரஹ்மசரியங் சரதி, ஹோதி சஸ்ஸ த⁴ம்மேஸு விசிகிச்சா². தஸ்மாதிஹ தே, பி⁴க்கு², ஏவங் ஸிக்கி²தப்³ப³ங் – ‘இந்த்³ரியேஸு கு³த்தத்³வாரோ ப⁴விஸ்ஸாமி, போ⁴ஜனே மத்தஞ்ஞூ, ஜாக³ரியங் அனுயுத்தோ, விபஸ்ஸகோ குஸலானங் த⁴ம்மானங், புப்³ப³ரத்தாபரரத்தங் போ³தி⁴பக்கி²யானங் த⁴ம்மானங் பா⁴வனானுயோக³ங் அனுயுத்தோ விஹரிஸ்ஸாமீ’தி. ஏவஞ்ஹி தே, பி⁴க்கு², ஸிக்கி²தப்³ப³’’ந்தி.
‘‘Evañhetaṃ , bhikkhu, hoti indriyesu aguttadvārassa, bhojane amattaññuno, jāgariyaṃ ananuyuttassa, avipassakassa kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ ananuyuttassa viharato, yaṃ madhurakajāto ceva kāyo hoti, disā cassa na pakkhāyanti, dhammā ca taṃ nappaṭibhanti, thinamiddhañcassa cittaṃ pariyādāya tiṭṭhati, anabhirato ca brahmacariyaṃ carati, hoti cassa dhammesu vicikicchā. Tasmātiha te, bhikkhu, evaṃ sikkhitabbaṃ – ‘indriyesu guttadvāro bhavissāmi, bhojane mattaññū, jāgariyaṃ anuyutto, vipassako kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyutto viharissāmī’ti. Evañhi te, bhikkhu, sikkhitabba’’nti.
அத² கோ² ஸோ பி⁴க்கு² ப⁴க³வதா இமினா ஓவாதே³ன ஓவதி³தோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² ஸோ பி⁴க்கு² ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி, தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ பன ஸோ பி⁴க்கு² அரஹதங் அஹோஸி.
Atha kho so bhikkhu bhagavatā iminā ovādena ovadito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho so bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro pana so bhikkhu arahataṃ ahosi.
அத² கோ² ஸோ பி⁴க்கு² அரஹத்தங் பத்தோ யேன ஸகோ உபஜ்ஜா²யோ தேனுபஸங்கமி; உபஸங்கமித்வா ஸகங் உபஜ்ஜா²யங் ஏதத³வோச – ‘‘ஏதரஹி மே, ப⁴ந்தே, ந சேவ 1 மது⁴ரகஜாதோ காயோ, தி³ஸா ச மே பக்கா²யந்தி, த⁴ம்மா ச மங் படிப⁴ந்தி, தி²னமித்³த⁴ஞ்ச மே சித்தங் ந பரியாதா³ய திட்ட²தி, அபி⁴ரதோ ச ப்³ரஹ்மசரியங் சராமி, நத்தி² ச மே த⁴ம்மேஸு விசிகிச்சா²’’தி. அத² கோ² ஸோ பி⁴க்கு² தங் ஸத்³தி⁴விஹாரிகங் பி⁴க்கு²ங் ஆதா³ய யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘அயங், ப⁴ந்தே, பி⁴க்கு² ஏவமாஹ – ‘ஏதரஹி மே, ப⁴ந்தே, ந சேவ மது⁴ரகஜாதோ காயோ, தி³ஸா ச மே பக்கா²யந்தி, த⁴ம்மா ச மங் படிப⁴ந்தி, தி²னமித்³த⁴ஞ்ச மே சித்தங் ந பரியாதா³ய திட்ட²தி, அபி⁴ரதோ ச ப்³ரஹ்மசரியங் சராமி, நத்தி² ச மே த⁴ம்மேஸு விசிகிச்சா²’’’தி.
Atha kho so bhikkhu arahattaṃ patto yena sako upajjhāyo tenupasaṅkami; upasaṅkamitvā sakaṃ upajjhāyaṃ etadavoca – ‘‘etarahi me, bhante, na ceva 2 madhurakajāto kāyo, disā ca me pakkhāyanti, dhammā ca maṃ paṭibhanti, thinamiddhañca me cittaṃ na pariyādāya tiṭṭhati, abhirato ca brahmacariyaṃ carāmi, natthi ca me dhammesu vicikicchā’’ti. Atha kho so bhikkhu taṃ saddhivihārikaṃ bhikkhuṃ ādāya yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘ayaṃ, bhante, bhikkhu evamāha – ‘etarahi me, bhante, na ceva madhurakajāto kāyo, disā ca me pakkhāyanti, dhammā ca maṃ paṭibhanti, thinamiddhañca me cittaṃ na pariyādāya tiṭṭhati, abhirato ca brahmacariyaṃ carāmi, natthi ca me dhammesu vicikicchā’’’ti.
‘‘ஏவஞ்ஹேதங், பி⁴க்கு², ஹோதி இந்த்³ரியேஸு கு³த்தத்³வாரஸ்ஸ, போ⁴ஜனே மத்தஞ்ஞுனோ, ஜாக³ரியங் அனுயுத்தஸ்ஸ, விபஸ்ஸகஸ்ஸ குஸலானங் த⁴ம்மானங், புப்³ப³ரத்தாபரரத்தங் போ³தி⁴பக்கி²யானங் த⁴ம்மானங் பா⁴வனானுயோக³ங் அனுயுத்தஸ்ஸ விஹரதோ, யங் ந சேவ மது⁴ரகஜாதோ காயோ ஹோதி, தி³ஸா சஸ்ஸ பக்கா²யந்தி, த⁴ம்மா ச தங் படிப⁴ந்தி, தி²னமித்³த⁴ஞ்சஸ்ஸ சித்தங் ந பரியாதா³ய திட்ட²தி, அபி⁴ரதோ ச ப்³ரஹ்மசரியங் சரதி, ந சஸ்ஸ ஹோதி த⁴ம்மேஸு விசிகிச்சா². தஸ்மாதிஹ வோ, பி⁴க்க²வே, ஏவங் ஸிக்கி²தப்³ப³ங் – ‘இந்த்³ரியேஸு கு³த்தத்³வாரா ப⁴விஸ்ஸாம, போ⁴ஜனே மத்தஞ்ஞுனோ, ஜாக³ரியங் அனுயுத்தா, விபஸ்ஸகா குஸலானங் த⁴ம்மானங், புப்³ப³ரத்தாபரரத்தங் போ³தி⁴பக்கி²யானங் த⁴ம்மானங் பா⁴வனானுயோக³ங் அனுயுத்தா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ச²ட்ட²ங்.
‘‘Evañhetaṃ, bhikkhu, hoti indriyesu guttadvārassa, bhojane mattaññuno, jāgariyaṃ anuyuttassa, vipassakassa kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyuttassa viharato, yaṃ na ceva madhurakajāto kāyo hoti, disā cassa pakkhāyanti, dhammā ca taṃ paṭibhanti, thinamiddhañcassa cittaṃ na pariyādāya tiṭṭhati, abhirato ca brahmacariyaṃ carati, na cassa hoti dhammesu vicikicchā. Tasmātiha vo, bhikkhave, evaṃ sikkhitabbaṃ – ‘indriyesu guttadvārā bhavissāma, bhojane mattaññuno, jāgariyaṃ anuyuttā, vipassakā kusalānaṃ dhammānaṃ, pubbarattāpararattaṃ bodhipakkhiyānaṃ dhammānaṃ bhāvanānuyogaṃ anuyuttā viharissāmā’ti. Evañhi vo, bhikkhave, sikkhitabba’’nti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. உபஜ்ஜா²யஸுத்தவண்ணனா • 6. Upajjhāyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. உபஜ்ஜா²யஸுத்தவண்ணனா • 6. Upajjhāyasuttavaṇṇanā
