| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. உபக்கிலேஸஸுத்தவண்ணனா
8. Upakkilesasuttavaṇṇanā
236. ஏவங் மே ஸுதந்தி உபக்கிலேஸஸுத்தங். தத்த² ஏதத³வோசாதி நேவ பே⁴தா³தி⁴ப்பாயேன ந பியகம்யதாய, அத² க்²வாஸ்ஸ ஏதத³ஹோஸி – ‘‘இமே பி⁴க்கூ² மம வசனங் க³ஹெத்வா ந ஓரமிஸ்ஸந்தி, பு³த்³தா⁴ ச நாம ஹிதானுகம்பகா, அத்³தா⁴ நேஸங் ப⁴க³வா ஏகங் காரணங் கதெ²ஸ்ஸதி, தங் ஸுத்வா ஏதே ஓரமிஸ்ஸந்தி, ததோ தேஸங் பா²ஸுவிஹாரோ ப⁴விஸ்ஸதீ’’தி. தஸ்மா ஏதங் ‘‘இத⁴, ப⁴ந்தே’’திஆதி³வசனமவோச. மா ப⁴ண்ட³னந்திஆதீ³ஸு ‘‘அகத்தா²’’தி பாட²ஸேஸங் க³ஹெத்வா ‘‘மா ப⁴ண்ட³னங் அகத்தா²’’தி ஏவங் அத்தோ² த³ட்ட²ப்³போ³. அஞ்ஞதரோதி ஸோ கிர பி⁴க்கு² ப⁴க³வதோ அத்த²காமோ, அயங் கிரஸ்ஸ அதி⁴ப்பாயோ – ‘‘இமே பி⁴க்கூ² கோதா⁴பி⁴பூ⁴தா ஸத்து² வசனங் ந க³ண்ஹந்தி, மா ப⁴க³வா ஏதே ஓவத³ந்தோ கிலமீ’’தி, தஸ்மா ஏவமாஹ.
236.Evaṃme sutanti upakkilesasuttaṃ. Tattha etadavocāti neva bhedādhippāyena na piyakamyatāya, atha khvāssa etadahosi – ‘‘ime bhikkhū mama vacanaṃ gahetvā na oramissanti, buddhā ca nāma hitānukampakā, addhā nesaṃ bhagavā ekaṃ kāraṇaṃ kathessati, taṃ sutvā ete oramissanti, tato tesaṃ phāsuvihāro bhavissatī’’ti. Tasmā etaṃ ‘‘idha, bhante’’tiādivacanamavoca. Mā bhaṇḍanantiādīsu ‘‘akatthā’’ti pāṭhasesaṃ gahetvā ‘‘mā bhaṇḍanaṃ akatthā’’ti evaṃ attho daṭṭhabbo. Aññataroti so kira bhikkhu bhagavato atthakāmo, ayaṃ kirassa adhippāyo – ‘‘ime bhikkhū kodhābhibhūtā satthu vacanaṃ na gaṇhanti, mā bhagavā ete ovadanto kilamī’’ti, tasmā evamāha.
பிண்டா³ய பாவிஸீதி ந கேவலங் பாவிஸி, யேனபி ஜனேன ந தி³ட்டோ², ஸோ மங் பஸ்ஸதூதிபி அதி⁴ட்டா²ஸி. கிமத்த²ங் அதி⁴ட்டா²ஸீதி? தேஸங் பி⁴க்கூ²னங் த³மனத்த²ங். ப⁴க³வா ஹி ததா³ பிண்ட³பாதப்படிக்கந்தோ ‘‘புது²ஸத்³தோ³ ஸமஜனோ’’திஆதி³கா³தா² பா⁴ஸித்வா கோஸம்பி³தோ பா³லகலோணகாரகா³மங் க³தோ. ததோ பாசீனவங்ஸதா³யங், ததோ பாலிலெய்யகவனஸண்ட³ங் க³ந்த்வா பாலிலெய்யஹத்தி²னாகே³ன உபட்ட²ஹியமானோ தேமாஸங் வஸி. நக³ரவாஸினோபி – ‘‘ஸத்தா² விஹாரங் க³தோ, க³ச்சா²ம த⁴ம்மஸ்ஸவனாயா’’தி க³ந்த⁴புப்ப²ஹத்தா² விஹாரங் க³ந்த்வா ‘‘கஹங், ப⁴ந்தே, ஸத்தா²’’தி புச்சி²ங்ஸு. ‘‘கஹங் தும்ஹே ஸத்தா²ரங் த³க்க²த², ஸத்தா² ‘இமே பி⁴க்கூ² ஸமக்³கே³ கரிஸ்ஸாமீ’தி ஆக³தோ, ஸமக்³கே³ காதுங் அஸக்கொந்தோ நிக்க²மித்வா க³தோ’’தி. ‘‘மயங் ஸதம்பி ஸஹஸ்ஸம்பி த³த்வா ஸத்தா²ரங் ஆனேதுங் ந ஸக்கோம, ஸோ நோ அயாசிதோ ஸயமேவ ஆக³தோ, மயங் இமே பி⁴க்கூ² நிஸ்ஸாய ஸத்து² ஸம்முகா² த⁴ம்மகத²ங் ஸோதுங் ந லபி⁴ம்ஹா. இமே ஸத்தா²ரங் உத்³தி³ஸ்ஸ பப்³ப³ஜிதா, தஸ்மிம்பி ஸாமக்³கி³ங் கரொந்தே ஸமக்³கா³ ந ஜாதா, கஸ்ஸாஞ்ஞஸ்ஸ வசனங் கரிஸ்ஸந்தி. அலங் ந இமேஸங் பி⁴க்கா² தா³தப்³பா³’’தி ஸகலனக³ரே த³ண்ட³ங் ட²பயிங்ஸு. தே புனதி³வஸே ஸகலனக³ரங் பிண்டா³ய சரித்வா கடச்சு²மத்தம்பி பி⁴க்க²ங் அலபி⁴த்வா விஹாரங் ஆக³மங்ஸு. உபாஸகாபி தே புன ஆஹங்ஸு – ‘‘யாவ ஸத்தா²ரங் ந க²மாபேத², தாவ வோ தமேவ த³ண்ட³கம்ம’’ந்தி. தே ‘‘ஸத்தா²ரங் க²மாபெஸ்ஸாமா’’தி ப⁴க³வதி ஸாவத்தி²யங் அனுப்பத்தே தத்த² அக³மங்ஸு. ஸத்தா² தேஸங் அட்டா²ரஸ பே⁴த³கரவத்தூ²னி தே³ஸேஸீதி அயமெத்த² பாளிமுத்தககதா².
Piṇḍāya pāvisīti na kevalaṃ pāvisi, yenapi janena na diṭṭho, so maṃ passatūtipi adhiṭṭhāsi. Kimatthaṃ adhiṭṭhāsīti? Tesaṃ bhikkhūnaṃ damanatthaṃ. Bhagavā hi tadā piṇḍapātappaṭikkanto ‘‘puthusaddo samajano’’tiādigāthā bhāsitvā kosambito bālakaloṇakāragāmaṃ gato. Tato pācīnavaṃsadāyaṃ, tato pālileyyakavanasaṇḍaṃ gantvā pālileyyahatthināgena upaṭṭhahiyamāno temāsaṃ vasi. Nagaravāsinopi – ‘‘satthā vihāraṃ gato, gacchāma dhammassavanāyā’’ti gandhapupphahatthā vihāraṃ gantvā ‘‘kahaṃ, bhante, satthā’’ti pucchiṃsu. ‘‘Kahaṃ tumhe satthāraṃ dakkhatha, satthā ‘ime bhikkhū samagge karissāmī’ti āgato, samagge kātuṃ asakkonto nikkhamitvā gato’’ti. ‘‘Mayaṃ satampi sahassampi datvā satthāraṃ ānetuṃ na sakkoma, so no ayācito sayameva āgato, mayaṃ ime bhikkhū nissāya satthu sammukhā dhammakathaṃ sotuṃ na labhimhā. Ime satthāraṃ uddissa pabbajitā, tasmimpi sāmaggiṃ karonte samaggā na jātā, kassāññassa vacanaṃ karissanti. Alaṃ na imesaṃ bhikkhā dātabbā’’ti sakalanagare daṇḍaṃ ṭhapayiṃsu. Te punadivase sakalanagaraṃ piṇḍāya caritvā kaṭacchumattampi bhikkhaṃ alabhitvā vihāraṃ āgamaṃsu. Upāsakāpi te puna āhaṃsu – ‘‘yāva satthāraṃ na khamāpetha, tāva vo tameva daṇḍakamma’’nti. Te ‘‘satthāraṃ khamāpessāmā’’ti bhagavati sāvatthiyaṃ anuppatte tattha agamaṃsu. Satthā tesaṃ aṭṭhārasa bhedakaravatthūni desesīti ayamettha pāḷimuttakakathā.
237. இதா³னி புது²ஸத்³தோ³திஆதி³கா³தா²ஸு புது² மஹாஸத்³தோ³ அஸ்ஸாதி புது²ஸத்³தோ³. ஸமஜனோதி ஸமானோ ஏகஸதி³ஸோ ஜனோ, ஸப்³போ³வாயங் ப⁴ண்ட³னகாரகஜனோ ஸமந்ததோ ஸத்³த³னிச்ச²ரணேன புது²ஸத்³தோ³ சேவ ஸதி³ஸோ சாதி வுத்தங் ஹோதி. ந பா³லோ கோசி மஞ்ஞதா²தி தத்ர கோசி ஏகோபி அஹங் பா³லோதி ந மஞ்ஞதி, ஸப்³பே³பி பண்டி³தமானினோயேவ. நாஞ்ஞங் பி⁴ய்யோ அமஞ்ஞருந்தி கோசி ஏகோபி அஹங் பா³லோதி ந ச மஞ்ஞி, பி⁴ய்யோ ச ஸங்க⁴ஸ்மிங் பி⁴ஜ்ஜமானே அஞ்ஞம்பி ஏகங் ‘‘மய்ஹங் காரணா ஸங்கோ⁴ பி⁴ஜ்ஜதீ’’தி இத³ங் காரணங் ந மஞ்ஞீதி அத்தோ².
237. Idāni puthusaddotiādigāthāsu puthu mahāsaddo assāti puthusaddo. Samajanoti samāno ekasadiso jano, sabbovāyaṃ bhaṇḍanakārakajano samantato saddaniccharaṇena puthusaddo ceva sadiso cāti vuttaṃ hoti. Na bālo koci maññathāti tatra koci ekopi ahaṃ bāloti na maññati, sabbepi paṇḍitamāninoyeva. Nāññaṃ bhiyyo amaññarunti koci ekopi ahaṃ bāloti na ca maññi, bhiyyo ca saṅghasmiṃ bhijjamāne aññampi ekaṃ ‘‘mayhaṃ kāraṇā saṅgho bhijjatī’’ti idaṃ kāraṇaṃ na maññīti attho.
பரிமுட்டா²தி முட்ட²ஸ்ஸதினோ. வாசாகோ³சரபா⁴ணினோதி ராகாரஸ்ஸ ரஸ்ஸாதே³ஸோ கதோ; வாசாகோ³சராவ , ந ஸதிபட்டா²னகோ³சரா, பா⁴ணினோ ச, கத²ங் பா⁴ணினோ? யாவிச்ச²ந்தி முகா²யாமங், யாவ முக²ங் பஸாரேதுங் இச்ச²ந்தி, தாவ பஸாரெத்வா பா⁴ணினோ, ஏகோபி ஸங்க⁴கா³ரவேன முக²ஸங்கோசனங் ந கரோதீதி அத்தோ². யேன நீதாதி யேன கலஹேன இமங் நில்லஜ்ஜபா⁴வங் நீதா. ந தங் விதூ³ ந தங் ஜானந்தி ‘‘ஏவங் ஸாதீ³னவோ அய’’ந்தி.
Parimuṭṭhāti muṭṭhassatino. Vācāgocarabhāṇinoti rākārassa rassādeso kato; vācāgocarāva , na satipaṭṭhānagocarā, bhāṇino ca, kathaṃ bhāṇino? Yāvicchanti mukhāyāmaṃ, yāva mukhaṃ pasāretuṃ icchanti, tāva pasāretvā bhāṇino, ekopi saṅghagāravena mukhasaṅkocanaṃ na karotīti attho. Yena nītāti yena kalahena imaṃ nillajjabhāvaṃ nītā. Na taṃ vidū na taṃ jānanti ‘‘evaṃ sādīnavo aya’’nti.
யே ச தங் உபனய்ஹந்தீதி தங் அக்கொச்சி² மந்திஆதி³கங் ஆகாரங் யே உபனய்ஹந்தி. ஸனந்தனோதி போராணோ.
Ye ca taṃ upanayhantīti taṃ akkocchi mantiādikaṃ ākāraṃ ye upanayhanti. Sanantanoti porāṇo.
பரேதி பண்டி³தே ட²பெத்வா ததோ அஞ்ஞே ப⁴ண்ட³னகாரகா பரே நாம. தே எத்த² ஸங்க⁴மஜ்ஜே² கலஹங் கரொந்தா ‘‘மயங் யமாமஸே உபயமாம நஸ்ஸாம ஸததங் ஸமிதங் மச்சுஸந்திகங் க³ச்சா²மா’’தி ந ஜானந்தி. யே ச தத்த² விஜானந்தீதி யே ச தத்த² பண்டி³தா ‘‘மயங் மச்சுனோ ஸமீபங் க³ச்சா²மா’’தி விஜானந்தி. ததோ ஸம்மந்தி மேத⁴கா³தி ஏவஞ்ஹி தே ஜானந்தா யோனிஸோமனஸிகாரங் உப்பாதெ³த்வா மேத⁴கா³னங் கலஹானங் வூபஸமாய படிபஜ்ஜந்தி.
Pareti paṇḍite ṭhapetvā tato aññe bhaṇḍanakārakā pare nāma. Te ettha saṅghamajjhe kalahaṃ karontā ‘‘mayaṃ yamāmase upayamāma nassāma satataṃ samitaṃ maccusantikaṃ gacchāmā’’ti na jānanti. Ye ca tattha vijānantīti ye ca tattha paṇḍitā ‘‘mayaṃ maccuno samīpaṃ gacchāmā’’ti vijānanti. Tato sammanti medhagāti evañhi te jānantā yonisomanasikāraṃ uppādetvā medhagānaṃ kalahānaṃ vūpasamāya paṭipajjanti.
அட்டி²ச்சி²ன்னாதி அயங் கா³தா² ஜாதகே (ஜா॰ 1.9.16) ஆக³தா, ப்³ரஹ்மத³த்தஞ்ச தீ³கா⁴வுகுமாரஞ்ச ஸந்தா⁴ய வுத்தா. அயஞ்ஹெத்த² அத்தோ² – தேஸம்பி ததா² பவத்தவேரானங் ஹோதி ஸங்க³தி, கஸ்மா தும்ஹாகங் ந ஹோதி, யேஸங் வோ நேவ மாதாபிதூனங் அட்டீ²னி சி²ன்னானி, ந பாணா ஹடா ந க³வாஸ்ஸத⁴னானி ஹடானீதி.
Aṭṭhicchinnāti ayaṃ gāthā jātake (jā. 1.9.16) āgatā, brahmadattañca dīghāvukumārañca sandhāya vuttā. Ayañhettha attho – tesampi tathā pavattaverānaṃ hoti saṅgati, kasmā tumhākaṃ na hoti, yesaṃ vo neva mātāpitūnaṃ aṭṭhīni chinnāni, na pāṇā haṭā na gavāssadhanāni haṭānīti.
ஸசே லபே⁴தா²திஆதி³கா³தா² பண்டி³தஸஹாயஸ்ஸ ச பா³லஸஹாயஸ்ஸ ச வண்ணாவண்ணதீ³பனத்த²ங் வுத்தா. அபி⁴பு⁴ய்ய ஸப்³பா³னி பரிஸ்ஸயானீதி பாகடபரிஸ்ஸயே ச படிச்ச²ன்னபரிஸ்ஸயே ச அபி⁴ப⁴வித்வா தேன ஸத்³தி⁴ங் அத்தமனோ ஸதிமா சரெய்யாதி.
Sacelabhethātiādigāthā paṇḍitasahāyassa ca bālasahāyassa ca vaṇṇāvaṇṇadīpanatthaṃ vuttā. Abhibhuyya sabbāni parissayānīti pākaṭaparissaye ca paṭicchannaparissaye ca abhibhavitvā tena saddhiṃ attamano satimā careyyāti.
ராஜாவ ரட்ட²ங் விஜிதந்தி யதா² அத்தனோ விஜிதரட்ட²ங் மஹாஜனகராஜா ச அரிந்த³மமஹாராஜா ச பஹாய ஏககா விசரிங்ஸு, ஏவங் விசரெய்யாதி அத்தோ². மாதங்க³ரஞ்ஞேவ நாகோ³தி மாதங்கோ³ அரஞ்ஞே நாகோ³வ. மாதங்கோ³தி ஹத்தி² வுச்சதி. நாகோ³தி மஹந்தாதி⁴வசனமேதங். யதா² ஹி மாதுபோஸகோ மாதங்க³னாகோ³ அரஞ்ஞே ஏகோ சரி, ந ச பாபானி அகாஸி, யதா² ச பாலிலெய்யகோ, ஏவங் ஏகோ சரே, ந ச பாபானி கயிராதி வுத்தங் ஹோதி.
Rājāva raṭṭhaṃ vijitanti yathā attano vijitaraṭṭhaṃ mahājanakarājā ca arindamamahārājā ca pahāya ekakā vicariṃsu, evaṃ vicareyyāti attho. Mātaṅgaraññeva nāgoti mātaṅgo araññe nāgova. Mātaṅgoti hatthi vuccati. Nāgoti mahantādhivacanametaṃ. Yathā hi mātuposako mātaṅganāgo araññe eko cari, na ca pāpāni akāsi, yathā ca pālileyyako, evaṃ eko care, na ca pāpāni kayirāti vuttaṃ hoti.
238. பா³லகலோணகாரகா³மோதி உபாலிக³ஹபதிஸ்ஸ போ⁴க³கா³மோ. தேனுபஸங்கமீதி கஸ்மா உபஸங்கமி? க³ணே கிரஸ்ஸ ஆதீ³னவங் தி³ஸ்வா ஏகவிஹாரிங் பி⁴க்கு²ங் பஸ்ஸிதுகாமதா உத³பாதி³, தஸ்மா ஸீதாதீ³ஹி பீளிதோ உண்ஹாதீ³னி பத்த²யமானோ விய உபஸங்கமி. த⁴ம்மியா கதா²யாதி ஏகீபா⁴வே ஆனிஸங்ஸப்படிஸங்யுத்தாய. யேன பாசீனவங்ஸதா³யோ, தத்த² கஸ்மா உபஸங்கமி? கலஹகாரகே கிரஸ்ஸ தி³ட்டா²தீ³னவத்தா ஸமக்³க³வாஸினோ பி⁴க்கூ² பஸ்ஸிதுகாமதா உத³பாதி³, தஸ்மா ஸீதாதீ³ஹி பீளிதோ உண்ஹாதீ³னி பத்த²யமானோ விய தத்த² உபஸங்கமி. ஆயஸ்மா ச அனுருத்³தோ⁴திஆதி³ வுத்தனயமேவ.
238.Bālakaloṇakāragāmoti upāligahapatissa bhogagāmo. Tenupasaṅkamīti kasmā upasaṅkami? Gaṇe kirassa ādīnavaṃ disvā ekavihāriṃ bhikkhuṃ passitukāmatā udapādi, tasmā sītādīhi pīḷito uṇhādīni patthayamāno viya upasaṅkami. Dhammiyā kathāyāti ekībhāve ānisaṃsappaṭisaṃyuttāya. Yena pācīnavaṃsadāyo, tattha kasmā upasaṅkami? Kalahakārake kirassa diṭṭhādīnavattā samaggavāsino bhikkhū passitukāmatā udapādi, tasmā sītādīhi pīḷito uṇhādīni patthayamāno viya tattha upasaṅkami. Āyasmā ca anuruddhotiādi vuttanayameva.
241. அத்தி² பன வோதி பச்சி²மபுச்சா²ய லோகுத்தரத⁴ம்மங் புச்செ²ய்ய. ஸோ பன தே²ரானங் நத்தி², தஸ்மா தங் புச்சி²துங் ந யுத்தந்தி பரிகம்மோபா⁴ஸங் புச்ச²தி. ஓபா⁴ஸஞ்சேவ ஸஞ்ஜானாமாதி பரிகம்மோபா⁴ஸங் ஸஞ்ஜானாம. த³ஸ்ஸனஞ்ச ரூபானந்தி தி³ப்³ப³சக்கு²னா ரூபத³ஸ்ஸனஞ்ச ஸஞ்ஜானாம. தஞ்ச நிமித்தங் நப்படிவிஜ்ஜா²மாதி தஞ்ச காரணங் ந ஜானாம, யேன நோ ஓபா⁴ஸோ ச ரூபத³ஸ்ஸனஞ்ச அந்தரதா⁴யதி.
241.Atthi pana voti pacchimapucchāya lokuttaradhammaṃ puccheyya. So pana therānaṃ natthi, tasmā taṃ pucchituṃ na yuttanti parikammobhāsaṃ pucchati. Obhāsañceva sañjānāmāti parikammobhāsaṃ sañjānāma. Dassanañca rūpānanti dibbacakkhunā rūpadassanañca sañjānāma. Tañca nimittaṃ nappaṭivijjhāmāti tañca kāraṇaṃ na jānāma, yena no obhāso ca rūpadassanañca antaradhāyati.
தங் கோ² பன வோ அனுருத்³தா⁴ நிமித்தங் படிவிஜ்ஜி²தப்³ப³ந்தி தங் வோ காரணங் ஜானிதப்³ப³ங். அஹம்பி ஸுத³ந்தி அனுருத்³தா⁴ தும்ஹே கிங் ந ஆளுலெஸ்ஸந்தி, அஹம்பி இமேஹி ஏகாத³ஸஹி உபக்கிலேஸேஹி ஆளுலிதபுப்³போ³தி த³ஸ்ஸேதுங் இமங் தே³ஸனங் ஆரபி⁴. விசிகிச்சா² கோ² மேதிஆதீ³ஸு மஹாஸத்தஸ்ஸ ஆலோகங் வட்³டெ⁴த்வா தி³ப்³ப³சக்கு²னா நானாவிதா⁴னி ரூபானி தி³ஸ்வா ‘‘இத³ங் கோ² கி’’ந்தி விசிகிச்சா² உத³பாதி³. ஸமாதி⁴ சவீதி பரிகம்மஸமாதி⁴ சவி. ஓபா⁴ஸோதி பரிகம்மோபா⁴ஸோபி அந்தரதா⁴யி, தி³ப்³ப³சக்கு²னாபி ரூபங் ந பஸ்ஸி. அமனஸிகாரோதி ரூபானி பஸ்ஸதோ விசிகிச்சா² உப்பஜ்ஜதி, இதா³னி கிஞ்சி ந மனஸிகரிஸ்ஸாமீதி அமனஸிகாரோ உத³பாதி³.
Taṃ kho pana vo anuruddhā nimittaṃ paṭivijjhitabbanti taṃ vo kāraṇaṃ jānitabbaṃ. Ahampi sudanti anuruddhā tumhe kiṃ na āḷulessanti, ahampi imehi ekādasahi upakkilesehi āḷulitapubboti dassetuṃ imaṃ desanaṃ ārabhi. Vicikicchā kho metiādīsu mahāsattassa ālokaṃ vaḍḍhetvā dibbacakkhunā nānāvidhāni rūpāni disvā ‘‘idaṃ kho ki’’nti vicikicchā udapādi. Samādhi cavīti parikammasamādhi cavi. Obhāsoti parikammobhāsopi antaradhāyi, dibbacakkhunāpi rūpaṃ na passi. Amanasikāroti rūpāni passato vicikicchā uppajjati, idāni kiñci na manasikarissāmīti amanasikāro udapādi.
தி²னமித்³த⁴ந்தி கிஞ்சி அமனஸிகரொந்தஸ்ஸ தி²னமித்³த⁴ங் உத³பாதி³.
Thinamiddhanti kiñci amanasikarontassa thinamiddhaṃ udapādi.
ச²ம்பி⁴தத்தந்தி ஹிமவந்தாபி⁴முக²ங் ஆலோகங் வட்³டெ⁴த்வா தா³னவரக்க²ஸஅஜக³ராத³யோ அத்³த³ஸ, அத²ஸ்ஸ ச²ம்பி⁴தத்தங் உத³பாதி³.
Chambhitattanti himavantābhimukhaṃ ālokaṃ vaḍḍhetvā dānavarakkhasaajagarādayo addasa, athassa chambhitattaṃ udapādi.
உப்பிலந்தி ‘‘மயா தி³ட்ட²ப⁴யங் பகதியா ஓலோகியமானங் நத்தி². அதி³ட்டே² கிங் நாம ப⁴ய’’ந்தி சிந்தயதோ உப்பிலாவிதத்தங் உத³பாதி³. ஸகிதே³வாதி ஏகபயோகே³னேவ பஞ்ச நிதி⁴கும்பி⁴யோபி பஸ்ஸெய்ய.
Uppilanti ‘‘mayā diṭṭhabhayaṃ pakatiyā olokiyamānaṃ natthi. Adiṭṭhe kiṃ nāma bhaya’’nti cintayato uppilāvitattaṃ udapādi. Sakidevāti ekapayogeneva pañca nidhikumbhiyopi passeyya.
து³ட்டு²ல்லந்தி மயா வீரியங் கா³ள்ஹங் பக்³க³ஹிதங், தேன மே உப்பிலங் உப்பன்னந்தி வீரியங் ஸிதி²லமகாஸி, ததோ காயத³ரதோ² காயது³ட்டு²ல்லங் காயாலஸியங் உத³பாதி³.
Duṭṭhullanti mayā vīriyaṃ gāḷhaṃ paggahitaṃ, tena me uppilaṃ uppannanti vīriyaṃ sithilamakāsi, tato kāyadaratho kāyaduṭṭhullaṃ kāyālasiyaṃ udapādi.
அச்சாரத்³த⁴வீரியந்தி மம வீரியங் ஸிதி²லங் கரோதோ து³ட்டு²ல்லங் உப்பன்னந்தி புன வீரியங் பக்³க³ண்ஹதோ அச்சாரத்³த⁴வீரியங் உத³பாதி³. பதமெய்யாதி மரெய்ய.
Accāraddhavīriyanti mama vīriyaṃ sithilaṃ karoto duṭṭhullaṃ uppannanti puna vīriyaṃ paggaṇhato accāraddhavīriyaṃ udapādi. Patameyyāti mareyya.
அதிலீனவீரியந்தி மம வீரியங் பக்³க³ண்ஹதோ ஏவங் ஜாதந்தி புன வீரியங் ஸிதி²லங் கரோதோ அதிலீனவீரியங் உத³பாதி³.
Atilīnavīriyanti mama vīriyaṃ paggaṇhato evaṃ jātanti puna vīriyaṃ sithilaṃ karoto atilīnavīriyaṃ udapādi.
அபி⁴ஜப்பாதி தே³வலோகாபி⁴முக²ங் ஆலோகங் வட்³டெ⁴த்வா தே³வஸங்க⁴ங் பஸ்ஸதோ தண்ஹா உத³பாதி³.
Abhijappāti devalokābhimukhaṃ ālokaṃ vaḍḍhetvā devasaṅghaṃ passato taṇhā udapādi.
நானத்தஸஞ்ஞாதி மய்ஹங் ஏகஜாதிகங் ரூபங் மனஸிகரொந்தஸ்ஸ அபி⁴ஜப்பா உப்பன்னா, நானாவித⁴ரூபங் மனஸி கரிஸ்ஸாமீதி காலேன தே³வலோகாபி⁴முக²ங் காலேன மனுஸ்ஸலோகாபி⁴முக²ங் வட்³டெ⁴த்வா நானாவிதா⁴னி ரூபானி மனஸிகரோதோ நானத்தஸஞ்ஞா உத³பாதி³.
Nānattasaññāti mayhaṃ ekajātikaṃ rūpaṃ manasikarontassa abhijappā uppannā, nānāvidharūpaṃ manasi karissāmīti kālena devalokābhimukhaṃ kālena manussalokābhimukhaṃ vaḍḍhetvā nānāvidhāni rūpāni manasikaroto nānattasaññā udapādi.
அதினிஜ்ஜா²யிதத்தந்தி மய்ஹங் நானாவிதா⁴னி ரூபானி மனஸிகரொந்தஸ்ஸ நானத்தஸஞ்ஞா உத³பாதி³, இட்ட²ங் வா அனிட்ட²ங் வா ஏகஜாதிகமேவ மனஸி கரிஸ்ஸாமீதி ததா² மனஸிகரோதோ அதினிஜ்ஜா²யிதத்தங் ரூபானங் உத³பாதி³.
Atinijjhāyitattanti mayhaṃ nānāvidhāni rūpāni manasikarontassa nānattasaññā udapādi, iṭṭhaṃ vā aniṭṭhaṃ vā ekajātikameva manasi karissāmīti tathā manasikaroto atinijjhāyitattaṃ rūpānaṃ udapādi.
243. ஓபா⁴ஸனிமித்தங் மனஸி கரோமீதி பரிகம்மோபா⁴ஸமேவ மனஸி கரோமி. ந ச ரூபானி பஸ்ஸாமீதி தி³ப்³ப³சக்கு²னா ரூபானி ந பஸ்ஸாமி. ரூபனிமித்தங் மனஸி கரோமீதி தி³ப்³ப³சக்கு²னா விஸயரூபமேவ மனஸி கரோமி.
243.Obhāsanimittaṃmanasi karomīti parikammobhāsameva manasi karomi. Na ca rūpāni passāmīti dibbacakkhunā rūpāni na passāmi. Rūpanimittaṃ manasi karomīti dibbacakkhunā visayarūpameva manasi karomi.
பரித்தஞ்சேவ ஓபா⁴ஸந்தி பரித்தகட்டா²னே ஓபா⁴ஸங். பரித்தானி ச ரூபானீதி பரித்தகட்டா²னே ரூபானி. விபரியாயேன து³தியவாரோ வேதி³தப்³போ³. பரித்தோ ஸமாதீ⁴தி பரித்தகோ பரிகம்மோபா⁴ஸோ, ஓபா⁴ஸபரித்ததஞ்ஹி ஸந்தா⁴ய இத⁴ பரிகம்மஸமாதி⁴ ‘‘பரித்தோ’’தி வுத்தோ. பரித்தங் மே தஸ்மிங் ஸமயேதி தஸ்மிங் ஸமயே தி³ப்³ப³சக்கு²பி பரித்தகங் ஹோதி. அப்பமாணவாரேபி ஏஸேவ நயோ.
Parittañceva obhāsanti parittakaṭṭhāne obhāsaṃ. Parittāni ca rūpānīti parittakaṭṭhāne rūpāni. Vipariyāyena dutiyavāro veditabbo. Paritto samādhīti parittako parikammobhāso, obhāsaparittatañhi sandhāya idha parikammasamādhi ‘‘paritto’’ti vutto. Parittaṃ me tasmiṃ samayeti tasmiṃ samaye dibbacakkhupi parittakaṃ hoti. Appamāṇavārepi eseva nayo.
245. அவிதக்கம்பி விசாரமத்தந்தி பஞ்சகனயே து³தியஜ்ஜா²னஸமாதி⁴ங். அவிதக்கம்பி அவிசாரந்தி சதுக்கனயேபி பஞ்சகனயேபி ஜா²னத்தயஸமாதி⁴ங். ஸப்பீதிகந்தி து³கதிகஜ்ஜா²னஸமாதி⁴ங். நிப்பீதிகந்தி து³கஜ்ஜா²னஸமாதி⁴ங். ஸாதஸஹக³தந்தி திகசதுக்கஜ்ஜா²னஸமாதி⁴ங். உபெக்கா²ஸஹக³தந்தி சதுக்கனயே சதுத்த²ஜ்ஜா²னஸமாதி⁴ங் பஞ்சகனயே பஞ்சமஜ்ஜா²னஸமாதி⁴ங்.
245.Avitakkampi vicāramattanti pañcakanaye dutiyajjhānasamādhiṃ. Avitakkampi avicāranti catukkanayepi pañcakanayepi jhānattayasamādhiṃ. Sappītikanti dukatikajjhānasamādhiṃ. Nippītikanti dukajjhānasamādhiṃ. Sātasahagatanti tikacatukkajjhānasamādhiṃ. Upekkhāsahagatanti catukkanaye catutthajjhānasamādhiṃ pañcakanaye pañcamajjhānasamādhiṃ.
கதா³ பன ப⁴க³வா இமங் திவித⁴ங் ஸமாதி⁴ங் பா⁴வேதி? மஹாபோ³தி⁴மூலே நிஸின்னோ பச்சி²மயாமே. ப⁴க³வதோ ஹி பட²மமக்³கோ³ பட²மஜ்ஜா²னிகோ அஹோஸி, து³தியாத³யோ து³தியததியசதுத்த²ஜ்ஜா²னிகா . பஞ்சகனயே பஞ்சமஜ்ஜா²னஸ்ஸ மக்³கோ³ நத்தீ²தி ஸோ லோகியோ அஹோஸீதி லோகியலோகுத்தரமிஸ்ஸகங் ஸந்தா⁴யேதங் வுத்தங். ஸேஸங் ஸப்³ப³த்த² உத்தானமேவாதி.
Kadā pana bhagavā imaṃ tividhaṃ samādhiṃ bhāveti? Mahābodhimūle nisinno pacchimayāme. Bhagavato hi paṭhamamaggo paṭhamajjhāniko ahosi, dutiyādayo dutiyatatiyacatutthajjhānikā . Pañcakanaye pañcamajjhānassa maggo natthīti so lokiyo ahosīti lokiyalokuttaramissakaṃ sandhāyetaṃ vuttaṃ. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
உபக்கிலேஸஸுத்தவண்ணனா நிட்டி²தா.
Upakkilesasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. உபக்கிலேஸஸுத்தங் • 8. Upakkilesasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. உபக்கிலேஸஸுத்தவண்ணனா • 8. Upakkilesasuttavaṇṇanā
