| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. உபனீயஸுத்தவண்ணனா
3. Upanīyasuttavaṇṇanā
3. அனேகத்த²த்தா தா⁴துஸத்³தா³னங் உபஸக்³க³வஸேன அத்த²விஸேஸவாசகோ ஹோதீதி ஆஹ ‘‘உபனீயதீதி பரிக்கீ²யதி நிருஜ்ஜ²தீ’’தி. வினஸ்ஸதீதி அத்தோ². உபனீயதீதி வா ஸரஸேனேவ ஜீவிதஸ்ஸ மரணூபக³மனங் வுத்தந்தி ஆஹ – ‘‘உபக³ச்ச²தி வா, அனுபுப்³பே³ன மரணங் உபேதீதி அத்தோ²’’தி. காமஞ்செத்த² ‘‘உபனீயதீ’’தி பத³ங் அபாகடகம்மவிஸேஸங் வுத்தங். யதா² பன ‘‘ஸப்³ப³ங் ஆரொக்³யங் ப்³யாதி⁴பரியோஸானங், ஸப்³ப³ங் யொப்³ப³னங் ஜராபரியோஸானங், ஸப்³ப³ங் ஜீவிதங் மரணபரியோஸான’’ந்தி, ‘‘உபனீயதி ஜீவித’’ந்தி வுத்தத்தா ‘‘மரணங் உபேதீ’’தி வுத்தங். கம்மகத்துவஸேன ஹேதங் வுத்தங்.
3. Anekatthattā dhātusaddānaṃ upasaggavasena atthavisesavācako hotīti āha ‘‘upanīyatīti parikkhīyati nirujjhatī’’ti. Vinassatīti attho. Upanīyatīti vā saraseneva jīvitassa maraṇūpagamanaṃ vuttanti āha – ‘‘upagacchati vā, anupubbena maraṇaṃ upetīti attho’’ti. Kāmañcettha ‘‘upanīyatī’’ti padaṃ apākaṭakammavisesaṃ vuttaṃ. Yathā pana ‘‘sabbaṃ ārogyaṃ byādhipariyosānaṃ, sabbaṃ yobbanaṃ jarāpariyosānaṃ, sabbaṃ jīvitaṃ maraṇapariyosāna’’nti, ‘‘upanīyati jīvita’’nti vuttattā ‘‘maraṇaṃ upetī’’ti vuttaṃ. Kammakattuvasena hetaṃ vuttaṃ.
இதா³னி கம்மஸாத⁴னவஸேன அத்த²ங் த³ஸ்ஸேதுங் ‘‘யதா² வா’’திஆதி³ வுத்தங். கோ³பாலேன கோ³க³ணோ நீயதி யதி²ச்சி²தங் டா²னங். ஜீவந்தி தேன ஸத்தா, ஸஹஜாதத⁴ம்மா வாதி ஜீவிதங், ததே³வ தேஸங் அனுபாலனே ஆதி⁴பச்சஸப்³பா⁴வதோ இந்த்³ரியந்தி ஆஹ ‘‘ஜீவிதந்தி ஜீவிதிந்த்³ரிய’’ந்தி பரித்தந்தி இத்தரங். தேனாஹ ‘‘தோ²க’’ந்தி. பப³ந்தா⁴னுபச்சே²த³ஸ்ஸ பச்சயபா⁴வோ இத⁴ ஜீவிதஸ்ஸ மரணகிச்சந்தி அதி⁴ப்பேதந்தி ஆஹ ‘‘ஸரஸபரித்ததாய சா’’திஆதி³. ஆயூதி ச பரமாயு இதா⁴தி⁴ப்பேதங், தஞ்ச அஜ்ஜகாலவஸேன வேதி³தப்³ப³ங்.
Idāni kammasādhanavasena atthaṃ dassetuṃ ‘‘yathā vā’’tiādi vuttaṃ. Gopālena gogaṇo nīyati yathicchitaṃ ṭhānaṃ. Jīvanti tena sattā, sahajātadhammā vāti jīvitaṃ, tadeva tesaṃ anupālane ādhipaccasabbhāvato indriyanti āha ‘‘jīvitanti jīvitindriya’’nti parittanti ittaraṃ. Tenāha ‘‘thoka’’nti. Pabandhānupacchedassa paccayabhāvo idha jīvitassa maraṇakiccanti adhippetanti āha ‘‘sarasaparittatāya cā’’tiādi. Āyūti ca paramāyu idhādhippetaṃ, tañca ajjakālavasena veditabbaṃ.
இமஸ்மிஞ்ஹி பு³த்³து⁴ப்பாதே³ அயங் கதா²தி ஜீவிதஸ்ஸ அதிஇத்தரபா⁴வதீ³பனபரா அயங் தே³ஸனா. ஜீவிதிந்த்³ரியவஸேன ஜீவிதக்க²யங் நியமெந்தோ ‘‘ஏகசித்தப்பவத்திமத்தோயேவா’’தி ஆஹ, ஏகஸ்ஸ சித்துப்பாத³ஸ்ஸ பவத்திக்க²ணமத்தோ ஏவாதி அத்தோ². இதா³னி தமத்த²ங் உபமாய விபா⁴வேதுங் ‘‘யதா² நாமா’’திஆதி³ வுத்தங். தத்த² பவத்தமானந்தி நேமிரதீ²ஸா வத்தந்தீ ஏகேனேவ நேமிப்பதே³ஸேன பவத்ததி ஏகஸ்மிங் க²ணேதி அதி⁴ப்பாயோ. ‘‘ஏகேனேவ திட்ட²தீ’’தி எத்தா²பி ஏஸேவ நயோ. ஏகசித்தக்க²ணிகந்தி ஏகசித்தக்க²ணமத்தவந்தங். தஸ்மிங் சித்தேதி தஸ்மிங் யஸ்மிங் கிஸ்மிஞ்சி ஏகஸ்மிங் சித்தே. நிருத்³த⁴மத்தேதி நிருத்³த⁴பா⁴வப்பத்தமத்தே. நிருத்³தோ⁴தி வுச்சதீதி மதோதி வுச்சதி தங்ஸமங்கீ³ ஸத்தோ பரமத்த²தோ. அவிஸேஸவிது³னோ பன அவிஞ்ஞாயமானந்தரேன அனுஸந்தா⁴னஸ்ஸ நிருத்³த⁴னங் நிரோத⁴ங் ஸல்லக்கெ²ந்தி. யதா²வுத்தமத்த²ங் ஸுத்தேன விபா⁴வேதுங் ‘‘யதா²ஹா’’திஆதி³ வுத்தங். தேன தீஸுபி காலேஸு ஸத்தானங் பரமத்த²தோ ஜீவனங் மரணங் சித்தக்க²ணவஸேனேவாதி த³ஸ்ஸேதி.
Imasmiñhi buddhuppāde ayaṃ kathāti jīvitassa atiittarabhāvadīpanaparā ayaṃ desanā. Jīvitindriyavasena jīvitakkhayaṃ niyamento ‘‘ekacittappavattimattoyevā’’ti āha, ekassa cittuppādassa pavattikkhaṇamatto evāti attho. Idāni tamatthaṃ upamāya vibhāvetuṃ ‘‘yathā nāmā’’tiādi vuttaṃ. Tattha pavattamānanti nemirathīsā vattantī ekeneva nemippadesena pavattati ekasmiṃ khaṇeti adhippāyo. ‘‘Ekeneva tiṭṭhatī’’ti etthāpi eseva nayo. Ekacittakkhaṇikanti ekacittakkhaṇamattavantaṃ. Tasmiṃ citteti tasmiṃ yasmiṃ kismiñci ekasmiṃ citte. Niruddhamatteti niruddhabhāvappattamatte. Niruddhoti vuccatīti matoti vuccati taṃsamaṅgī satto paramatthato. Avisesaviduno pana aviññāyamānantarena anusandhānassa niruddhanaṃ nirodhaṃ sallakkhenti. Yathāvuttamatthaṃ suttena vibhāvetuṃ ‘‘yathāhā’’tiādi vuttaṃ. Tena tīsupi kālesu sattānaṃ paramatthato jīvanaṃ maraṇaṃ cittakkhaṇavasenevāti dasseti.
ஜீவிதந்தி ஜீவிதிந்த்³ரியங். அத்தபா⁴வோதி ஜீவிதவேத³னாவிஞ்ஞாணானி ட²பெத்வா அவஸிட்ட²த⁴ம்மா அதி⁴ப்பேதா. ஸுக²து³க்கா²தி ஸுக²து³க்கா² வேத³னா, உபெக்கா²பி இத⁴ ஸுக²து³க்கா²ஸ்வேவ அந்தோக³தா⁴ இட்டா²னிட்ட²பா⁴வதோ. கேவலாதி அத்தனா, நிச்சபா⁴வேன வா அவோமிஸ்ஸா. ஏகசித்தஸமாயுத்தாதி ஏககேன சித்தேன ஸஹிதா. லஹுஸோ வத்ததே க²ணோதி வுத்தனயேன ஏகசித்தக்க²ணிகதாய லஹுகோ அதிஇத்தரோ ஜீவிதாதீ³னங் க²ணோ வத்ததி.
Jīvitanti jīvitindriyaṃ. Attabhāvoti jīvitavedanāviññāṇāni ṭhapetvā avasiṭṭhadhammā adhippetā. Sukhadukkhāti sukhadukkhā vedanā, upekkhāpi idha sukhadukkhāsveva antogadhā iṭṭhāniṭṭhabhāvato. Kevalāti attanā, niccabhāvena vā avomissā. Ekacittasamāyuttāti ekakena cittena sahitā. Lahuso vattate khaṇoti vuttanayena ekacittakkhaṇikatāya lahuko atiittaro jīvitādīnaṃ khaṇo vattati.
யே நிருத்³தா⁴ மரந்தஸ்ஸாதி சவந்தஸ்ஸ ஸத்தஸ்ஸ சுதிதோ உத்³த⁴ங் நிருத்³தா⁴தி வத்தப்³பா³ யே க²ந்தா⁴. திட்ட²மானஸ்ஸ வா இதா⁴தி யே வா இத⁴ பவத்தியங் திட்ட²மானஸ்ஸ த⁴ரந்தஸ்ஸ ப⁴ங்க³ப்பத்தியா நிருத்³தா⁴ க²ந்தா⁴, ஸப்³பே³பி ஸதி³ஸா தே ஸப்³பே³பி ஏகஸதி³ஸா க³தா அத்த²ங்க³தா அப்படிஸந்தி⁴யா புன ஆக³ந்த்வா படிஸந்தா⁴னாபா⁴வேன விக³தா. யதா² ஹி சுதிக²ந்தா⁴ ந நிப்³ப³த்தந்தி, ஏவங் ததோ புப்³பே³பி க²ந்தா⁴. தஸ்மா ஏகசித்தக்க²ணிகங் ஸத்தானங் ஜீவிதந்தி அதி⁴ப்பாயோ.
Ye niruddhā marantassāti cavantassa sattassa cutito uddhaṃ niruddhāti vattabbā ye khandhā. Tiṭṭhamānassa vā idhāti ye vā idha pavattiyaṃ tiṭṭhamānassa dharantassa bhaṅgappattiyā niruddhā khandhā, sabbepi sadisā te sabbepi ekasadisā gatā atthaṅgatā appaṭisandhiyā puna āgantvā paṭisandhānābhāvena vigatā. Yathā hi cutikhandhā na nibbattanti, evaṃ tato pubbepi khandhā. Tasmā ekacittakkhaṇikaṃ sattānaṃ jīvitanti adhippāyo.
அனிப்³ப³த்தேன ந ஜாதோதி அனுப்பன்னேன சித்தேன ஜாதோ ந ஹோதி ‘‘அனாக³தே சித்தக்க²ணே ந ஜீவித்த² ந ஜீவதி ஜீவிஸ்ஸதீ’’தி வத்தப்³ப³தோ. பச்சுப்பன்னேன வத்தமானேன சித்தேன ஜீவதி ஜீவமானோ நாம ஹோதி, ந ஜீவித்த² ந ஜீவிஸ்ஸதி. சித்தப⁴ங்கா³ மதோ லோகோதி சுதிசித்தஸ்ஸ விய ஸப்³ப³ஸ்ஸபி தஸ்ஸ தஸ்ஸ சித்தஸ்ஸ ப⁴ங்க³ப்பத்தியா அயங் லோகோ பரமத்த²தோ மதோ நாம ஹோதி ‘‘அதீதே சித்தக்க²ணே ஜீவித்த² ந ஜீவதி ந ஜீவிஸ்ஸதீ’’தி வத்தப்³ப³தோ, நிருத்³த⁴ஸ்ஸ அப்படிஸந்தி⁴கத்தா. ஏவங் ஸந்தேபி பஞ்ஞத்தி பரமத்தி²யா, யாயங் தங் தங் பவத்தங் சித்தங் உபாதா³ய ‘‘திஸ்ஸோ ஜீவதி, பு²ஸ்ஸோ ஜீவதீ’’தி வசனப்பவத்தியா விஸயபூ⁴தா ஸந்தானபஞ்ஞத்தி, ஸா எத்த² பரமத்தி²யா பரமத்த²பூ⁴தா. ததா² ஹி வுத்தங் ‘‘நாமகொ³த்தங் ந ஜீரதீ’’தி (ஸங்॰ நி॰ 1.76).
Anibbattena na jātoti anuppannena cittena jāto na hoti ‘‘anāgate cittakkhaṇe na jīvittha na jīvati jīvissatī’’ti vattabbato. Paccuppannena vattamānena cittena jīvati jīvamāno nāma hoti, na jīvittha na jīvissati. Cittabhaṅgā mato lokoti cuticittassa viya sabbassapi tassa tassa cittassa bhaṅgappattiyā ayaṃ loko paramatthato mato nāma hoti ‘‘atīte cittakkhaṇe jīvittha na jīvati na jīvissatī’’ti vattabbato, niruddhassa appaṭisandhikattā. Evaṃ santepi paññatti paramatthiyā, yāyaṃ taṃ taṃ pavattaṃ cittaṃ upādāya ‘‘tisso jīvati, phusso jīvatī’’ti vacanappavattiyā visayabhūtā santānapaññatti, sā ettha paramatthiyā paramatthabhūtā. Tathā hi vuttaṃ ‘‘nāmagottaṃ na jīratī’’ti (saṃ. ni. 1.76).
ந ஸந்தி தாணாதி ஜரங் உபக³தஸ்ஸ ததோ தங்னிமித்தங் யங் வா பாபகாரினோ பாபகம்மானங் உபட்டா²னவஸேன புஞ்ஞகாரினோ பியவிப்பயோக³வஸேன சித்தது³க்க²ங் உப⁴யேஸம்பி ப³ந்த⁴னச்சே²த³னாதி³வஸேன விதுஜ்ஜமானங் அனப்பகங் ஸரீரது³க்க²ங் ஸம்மோஹப்பத்தி ச ஹோதி, ததோ தாயந்தா ந ஸந்தி. தேனாஹ – ‘‘தாணங் லேணங் ஸரணங் ப⁴விதுங் ஸமத்தா² நாம கேசி நத்தீ²’’தி. பா⁴யதி ஏதஸ்மாதி ப⁴யங், ப⁴யனிமித்தந்தி ஆஹ ‘‘ப⁴யவத்தூ²’’தி. தக்³க³ஹணேன ச சித்துத்ராஸலக்க²ணங் ப⁴யங் க³ஹிதமேவ, ஸதி நிமித்தே நேமித்தங் ஸந்தமேவாதி. புப்³ப³சேதனந்தி ஏகாவஜ்ஜனவீதி²யங் நானாவஜ்ஜனவீதி²யங் ஸம்பவத்தங் உபசாரஜ்ஜா²னசேதனங். அபரசேதனந்தி வஸீபா⁴வாபாத³னவஸேன பரதோ ஸமாபஜ்ஜனவஸேன ச பவத்தங் ஸமாபத்திசேதனங். முஞ்சசேதனந்தி விக்க²ம்ப⁴னவஸேன பவத்தங் பட²மப்பனாசேதனங். குஸலஜ்ஜா²னஸ்ஸ விபாகஜ்ஜா²னேவ லப்³ப⁴மானங் ஸுக²ங் ஜா²னஸுக²ங். இட்ட²பரியாயோ செத்த² ஸுக²-ஸத்³தோ³. ஜா²னே அபெக்கா² ஜா²னநிகந்தி. ஜா²னஸ்ஸ அஸ்ஸாத³வஸேன பவத்தோ லோபோ⁴ ஜா²னஸ்ஸாதோ³. யேன தே தே ப்³ரஹ்மானோ ஜா²னதோ வுட்டா²ய ‘‘அஹோ ஸுக²ங் அஹோ ஸுக²’’ந்தி வாசங் நிச்சா²ரேஸுந்தி. யதா² தே³வா ஸுக²ப³ஹுலா திஹேதுபடிஸந்தி⁴காவாதி படிபஜ்ஜந்தா ஜா²னங் அதி⁴க³ந்துங் ப⁴ப்³பா³, ந இதரேதி ‘‘காமாவசரதே³வேஸூ’’தி வுத்தங். காமாவசரா ச உபரிதே³வா ச காமாவசரதே³வாதி ஏகதே³ஸஸரூபேகஸேஸோ த³ட்ட²ப்³போ³. தேன மனுஸ்ஸானம்பி ஏகச்சானங் ஸப்³பே³ஸம்பி வா ஸங்க³ஹோ ஸித்³தோ⁴ ஹோதி பத்த²னாபரிகப்பனாய விஸயபா⁴வதோ. தேனாஹ ‘‘அஹோ வதிமே ச…பே॰… திட்டெ²ய்யு’’ந்தி. து²ல்லானி பு²ஸிதானி விப்பு²ரானி எத்தா²தி து²ல்லபு²ஸிதகோ, காலோ, தே³ஸோ வா. தஸ்மிங் து²ல்லபு²ஸிதகே.
Nasanti tāṇāti jaraṃ upagatassa tato taṃnimittaṃ yaṃ vā pāpakārino pāpakammānaṃ upaṭṭhānavasena puññakārino piyavippayogavasena cittadukkhaṃ ubhayesampi bandhanacchedanādivasena vitujjamānaṃ anappakaṃ sarīradukkhaṃ sammohappatti ca hoti, tato tāyantā na santi. Tenāha – ‘‘tāṇaṃ leṇaṃ saraṇaṃ bhavituṃ samatthā nāma keci natthī’’ti. Bhāyati etasmāti bhayaṃ, bhayanimittanti āha ‘‘bhayavatthū’’ti. Taggahaṇena ca cittutrāsalakkhaṇaṃ bhayaṃ gahitameva, sati nimitte nemittaṃ santamevāti. Pubbacetananti ekāvajjanavīthiyaṃ nānāvajjanavīthiyaṃ sampavattaṃ upacārajjhānacetanaṃ. Aparacetananti vasībhāvāpādanavasena parato samāpajjanavasena ca pavattaṃ samāpatticetanaṃ. Muñcacetananti vikkhambhanavasena pavattaṃ paṭhamappanācetanaṃ. Kusalajjhānassa vipākajjhāneva labbhamānaṃ sukhaṃ jhānasukhaṃ. Iṭṭhapariyāyo cettha sukha-saddo. Jhāne apekkhā jhānanikanti. Jhānassa assādavasena pavatto lobho jhānassādo. Yena te te brahmāno jhānato vuṭṭhāya ‘‘aho sukhaṃ aho sukha’’nti vācaṃ nicchāresunti. Yathā devā sukhabahulā tihetupaṭisandhikāvāti paṭipajjantā jhānaṃ adhigantuṃ bhabbā, na itareti ‘‘kāmāvacaradevesū’’ti vuttaṃ. Kāmāvacarā ca uparidevā ca kāmāvacaradevāti ekadesasarūpekaseso daṭṭhabbo. Tena manussānampi ekaccānaṃ sabbesampi vā saṅgaho siddho hoti patthanāparikappanāya visayabhāvato. Tenāha ‘‘aho vatime ca…pe… tiṭṭheyyu’’nti. Thullāni phusitāni vipphurāni etthāti thullaphusitako, kālo, deso vā. Tasmiṃ thullaphusitake.
‘‘புஞ்ஞானி கயிராத² ஸுகா²வஹானீ’’தி வுத்தத்தா ‘‘அனிய்யானிகங் வட்டகத²ங் கதே²தீ’’தி வுத்தங். லுஜ்ஜனபலுஜ்ஜனட்டே²ன லோகோ, கிலேஸேஹி ஆமஸிதப்³ப³தோ ஆமிஸஞ்சாதி லோகாமிஸங். நிப்பரியாயாமிஸங் பன லோகே ஆமிஸந்திபி லோகாமிஸங். பரியாயேதி ஸபா⁴வதோ பரிவத்தெத்வா ஞாபேதி ஏதேனாதி பரியாயோ, லேஸோ, காரணங் வாதி ஆஹ ‘‘நிப்பரியாயேன சத்தாரோ பச்சயா’’தி, வட்டஸ்ஸ ஏகந்ததோ பா³லலோகேஹேவ ஆமஸிதப்³ப³பா⁴வதோ பரியாயாமிஸதா வுத்தா. இத⁴ பரி..பே॰… அதி⁴ப்பேதங் விவட்டபடியோகி³னோ இச்சி²தத்தா. சதுபச்சயாபெக்க²ஞ்ஹி பஹானங். ஏகச்சஸ்ஸ ஸகலவட்டாபெக்க²ப்பஹானஸ்ஸபி பச்சயோ ஹோதீதி ‘‘வட்டதியேவா’’தி ஸாஸங்கங் வத³தி. வூபஸமதி எத்த² ஸகலவட்டது³க்க²ந்தி ஸந்தி, அஸங்க²ததா⁴தூதி ஆஹ ‘‘நிப்³பா³னஸங்கா²த’’ந்தி.
‘‘Puññāni kayirātha sukhāvahānī’’ti vuttattā ‘‘aniyyānikaṃ vaṭṭakathaṃ kathetī’’ti vuttaṃ. Lujjanapalujjanaṭṭhena loko, kilesehi āmasitabbato āmisañcāti lokāmisaṃ. Nippariyāyāmisaṃ pana loke āmisantipi lokāmisaṃ. Pariyāyeti sabhāvato parivattetvā ñāpeti etenāti pariyāyo, leso, kāraṇaṃ vāti āha ‘‘nippariyāyena cattāro paccayā’’ti, vaṭṭassa ekantato bālalokeheva āmasitabbabhāvato pariyāyāmisatā vuttā. Idha pari..pe… adhippetaṃ vivaṭṭapaṭiyogino icchitattā. Catupaccayāpekkhañhi pahānaṃ. Ekaccassa sakalavaṭṭāpekkhappahānassapi paccayo hotīti ‘‘vaṭṭatiyevā’’ti sāsaṅkaṃ vadati. Vūpasamati ettha sakalavaṭṭadukkhanti santi, asaṅkhatadhātūti āha ‘‘nibbānasaṅkhāta’’nti.
உபனீயஸுத்தவண்ணனா நிட்டி²தா.
Upanīyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. உபனீயஸுத்தங் • 3. Upanīyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. உபனீயஸுத்தவண்ணனா • 3. Upanīyasuttavaṇṇanā
