| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. உபஞ்ஞாதஸுத்தங்
5. Upaññātasuttaṃ
5. ‘‘த்³வின்னாஹங் , பி⁴க்க²வே, த⁴ம்மானங் உபஞ்ஞாஸிங் – யா ச அஸந்துட்டி²தா குஸலேஸு த⁴ம்மேஸு, யா ச அப்படிவானிதா பதா⁴னஸ்மிங். அப்படிவானீ ஸுதா³ஹங், பி⁴க்க²வே, பத³ஹாமி – ‘காமங் தசோ ச ந்ஹாரு 1 ச அட்டி² ச அவஸிஸ்ஸது, ஸரீரே உபஸுஸ்ஸது மங்ஸலோஹிதங், யங் தங் புரிஸதா²மேன புரிஸவீரியேன புரிஸபரக்கமேன பத்தப்³ப³ங் ந தங் அபாபுணித்வா வீரியஸ்ஸ ஸண்டா²னங் ப⁴விஸ்ஸதீ’தி. தஸ்ஸ மய்ஹங், பி⁴க்க²வே, அப்பமாதா³தி⁴க³தா ஸம்போ³தி⁴, அப்பமாதா³தி⁴க³தோ அனுத்தரோ யோக³க்கே²மோ. தும்ஹே சேபி, பி⁴க்க²வே, அப்படிவானங் பத³ஹெய்யாத² – ‘காமங் தசோ ச ந்ஹாரு ச அட்டி² ச அவஸிஸ்ஸது, ஸரீரே உபஸுஸ்ஸது மங்ஸலோஹிதங், யங் தங் புரிஸதா²மேன புரிஸவீரியேன புரிஸபரக்கமேன பத்தப்³ப³ங் ந தங் அபாபுணித்வா வீரியஸ்ஸ ஸண்டா²னங் ப⁴விஸ்ஸதீ’தி, தும்ஹேபி, பி⁴க்க²வே, நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி தத³னுத்தரங் – ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸத². தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘அப்படிவானங் பத³ஹிஸ்ஸாம. காமங் தசோ ச ந்ஹாரு ச அட்டி² ச அவஸிஸ்ஸது, ஸரீரே உபஸுஸ்ஸது மங்ஸலோஹிதங், யங் தங் புரிஸதா²மேன புரிஸவீரியேன புரிஸபரக்கமேன பத்தப்³ப³ங் ந தங் அபாபுணித்வா வீரியஸ்ஸ ஸண்டா²னங் ப⁴விஸ்ஸதீ’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பஞ்சமங்.
5. ‘‘Dvinnāhaṃ , bhikkhave, dhammānaṃ upaññāsiṃ – yā ca asantuṭṭhitā kusalesu dhammesu, yā ca appaṭivānitā padhānasmiṃ. Appaṭivānī sudāhaṃ, bhikkhave, padahāmi – ‘kāmaṃ taco ca nhāru 2 ca aṭṭhi ca avasissatu, sarīre upasussatu maṃsalohitaṃ, yaṃ taṃ purisathāmena purisavīriyena purisaparakkamena pattabbaṃ na taṃ apāpuṇitvā vīriyassa saṇṭhānaṃ bhavissatī’ti. Tassa mayhaṃ, bhikkhave, appamādādhigatā sambodhi, appamādādhigato anuttaro yogakkhemo. Tumhe cepi, bhikkhave, appaṭivānaṃ padaheyyātha – ‘kāmaṃ taco ca nhāru ca aṭṭhi ca avasissatu, sarīre upasussatu maṃsalohitaṃ, yaṃ taṃ purisathāmena purisavīriyena purisaparakkamena pattabbaṃ na taṃ apāpuṇitvā vīriyassa saṇṭhānaṃ bhavissatī’ti, tumhepi, bhikkhave, nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharissatha. Tasmātiha, bhikkhave, evaṃ sikkhitabbaṃ – ‘appaṭivānaṃ padahissāma. Kāmaṃ taco ca nhāru ca aṭṭhi ca avasissatu, sarīre upasussatu maṃsalohitaṃ, yaṃ taṃ purisathāmena purisavīriyena purisaparakkamena pattabbaṃ na taṃ apāpuṇitvā vīriyassa saṇṭhānaṃ bhavissatī’ti. Evañhi vo, bhikkhave, sikkhitabba’’nti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. உபஞ்ஞாதஸுத்தவண்ணனா • 5. Upaññātasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. உபஞ்ஞாதஸுத்தவண்ணனா • 5. Upaññātasuttavaṇṇanā
