| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
5. உபபரிக்க²ஸுத்தவண்ணனா
5. Upaparikkhasuttavaṇṇanā
94. பஞ்சமே ததா² ததா²தி தேன தேன பகாரேன. உபபரிக்கெ²ய்யாதி வீமங்ஸெய்ய பரிதுலெய்ய ஸம்மஸெய்ய வா. யதா² யதா²ஸ்ஸ உபபரிக்க²தோதி யதா² யதா² அஸ்ஸ பி⁴க்கு²னோ உபபரிக்க²ந்தஸ்ஸ. ப³ஹித்³தா⁴ சஸ்ஸ விஞ்ஞாணங் அவிக்கி²த்தங் அவிஸடந்தி ப³ஹித்³தா⁴ ரூபாதி³ஆரம்மணே உப்பஜ்ஜனகவிக்கே²பாபா⁴வதோ அவிக்கி²த்தங் ஸமாஹிதங், ததோ ஏவ அவிஸடங் ஸியா . இத³ங் வுத்தங் ஹோதி – பி⁴க்க²வே, யேன யேன பகாரேன இமஸ்ஸ ஆரத்³த⁴விபஸ்ஸகஸ்ஸ பி⁴க்கு²னோ உபபரிக்க²தோ ஸங்கா²ரே ஸம்மஸந்தஸ்ஸ புப்³பே³ ஸமாஹிதாகாரஸல்லக்க²ணவஸேன ஸமத²னிமித்தங் க³ஹெத்வா ஸக்கச்சங் நிரந்தரங் ஸம்மஸனஞாணங் பவத்தெந்தஸ்ஸ அத்தனோ விபஸ்ஸனாசித்தங் கம்மட்டா²னதோ ப³ஹித்³தா⁴ ரூபாதி³ஆரம்மணே உப்பஜ்ஜனகங் ந ஸியா, அச்சாரத்³த⁴வீரியதாய உத்³த⁴ச்சபக்கி²யங் ந ஸியா, தேன தேன பகாரேன பி⁴க்கு² உபபரிக்கெ²ய்ய பரிதுலெய்யாதி. அஜ்ஜ²த்தங் அஸண்டி²தந்தி யஸ்மா வீரியே மந்த³ங் வஹந்தே ஸமாதி⁴ஸ்ஸ ப³லவபா⁴வதோ கோஸஜ்ஜாபி⁴ப⁴வேன அஜ்ஜ²த்தங் கோ³சரஜ்ஜ²த்தஸங்கா²தே கம்மட்டா²னாரம்மணே ஸங்கோசவஸேன டி²தத்தா ஸண்டி²தங் நாம ஹோதி, வீரியஸமதாய பன யோஜிதாய அஸண்டி²தங் ஹோதி வீதி²ங் படிபன்னங். தஸ்மா யதா² யதா²ஸ்ஸ உபபரிக்க²தோ விஞ்ஞாணங் அஜ்ஜ²த்தங் அஸண்டி²தங் அஸ்ஸ, வீதி²படிபன்னங் ஸியா, ததா² ததா² உபபரிக்கெ²ய்ய. அனுபாதா³ய ந பரிதஸ்ஸெய்யாதி யதா² யதா²ஸ்ஸ உபபரிக்க²தோ ‘‘ஏதங் மம, ஏஸோ மே அத்தா’’தி தண்ஹாதி³ட்டி²க்³கா³ஹவஸேன ரூபாதீ³ஸு கஞ்சி ஸங்கா²ரங் அக்³க³ஹெத்வா ததோ ஏவ தண்ஹாதி³ட்டி²க்³கா³ஹவஸேன ந பரிதஸ்ஸெய்ய, ததா² ததா² உபபரிக்கெ²ய்யாதி ஸம்ப³ந்தோ⁴. கத²ங் பன உபபரிக்க²தோ திவித⁴ம்பேதங் ஸியாதி? உத்³த⁴ச்சபக்கி²யே கோஸஜ்ஜபக்கி²யே ச த⁴ம்மே வஜ்ஜெந்தோ வீரியஸமதங் யோஜெத்வா புப்³பே³வ விபஸ்ஸனுபக்கிலேஸேஹி சித்தங் விஸோதெ⁴த்வா யதா² ஸம்மதே³வ விபஸ்ஸனாஞாணங் விபஸ்ஸனாவீதி²ங் படிபஜ்ஜதி, ததா² ஸம்மஸதோ.
94. Pañcame tathā tathāti tena tena pakārena. Upaparikkheyyāti vīmaṃseyya parituleyya sammaseyya vā. Yathā yathāssa upaparikkhatoti yathā yathā assa bhikkhuno upaparikkhantassa. Bahiddhācassa viññāṇaṃ avikkhittaṃ avisaṭanti bahiddhā rūpādiārammaṇe uppajjanakavikkhepābhāvato avikkhittaṃ samāhitaṃ, tato eva avisaṭaṃ siyā . Idaṃ vuttaṃ hoti – bhikkhave, yena yena pakārena imassa āraddhavipassakassa bhikkhuno upaparikkhato saṅkhāre sammasantassa pubbe samāhitākārasallakkhaṇavasena samathanimittaṃ gahetvā sakkaccaṃ nirantaraṃ sammasanañāṇaṃ pavattentassa attano vipassanācittaṃ kammaṭṭhānato bahiddhā rūpādiārammaṇe uppajjanakaṃ na siyā, accāraddhavīriyatāya uddhaccapakkhiyaṃ na siyā, tena tena pakārena bhikkhu upaparikkheyya parituleyyāti. Ajjhattaṃ asaṇṭhitanti yasmā vīriye mandaṃ vahante samādhissa balavabhāvato kosajjābhibhavena ajjhattaṃ gocarajjhattasaṅkhāte kammaṭṭhānārammaṇe saṅkocavasena ṭhitattā saṇṭhitaṃ nāma hoti, vīriyasamatāya pana yojitāya asaṇṭhitaṃ hoti vīthiṃ paṭipannaṃ. Tasmā yathā yathāssa upaparikkhato viññāṇaṃ ajjhattaṃ asaṇṭhitaṃ assa, vīthipaṭipannaṃ siyā, tathā tathā upaparikkheyya. Anupādāya na paritasseyyāti yathā yathāssa upaparikkhato ‘‘etaṃ mama, eso me attā’’ti taṇhādiṭṭhiggāhavasena rūpādīsu kañci saṅkhāraṃ aggahetvā tato eva taṇhādiṭṭhiggāhavasena na paritasseyya, tathā tathā upaparikkheyyāti sambandho. Kathaṃ pana upaparikkhato tividhampetaṃ siyāti? Uddhaccapakkhiye kosajjapakkhiye ca dhamme vajjento vīriyasamataṃ yojetvā pubbeva vipassanupakkilesehi cittaṃ visodhetvā yathā sammadeva vipassanāñāṇaṃ vipassanāvīthiṃ paṭipajjati, tathā sammasato.
இதி ப⁴க³வா சதுஸச்சகம்மட்டா²னிகஸ்ஸ பி⁴க்கு²னோ அனுக்கமேன படிபதா³ஞாணத³ஸ்ஸனவிஸுத்³தி⁴யா ஆரத்³தா⁴ய அச்சாரத்³த⁴வீரியஅதிஸிதி²லவீரியவிபஸ்ஸனுபக்கிலேஸேஹி சித்தஸ்ஸ விஸோத⁴னூபாயங் த³ஸ்ஸெத்வா இதா³னி ததா² விஸோதி⁴தே விபஸ்ஸனாஞாணே ந சிரஸ்ஸேவ விபஸ்ஸனங் மக்³கே³ன க⁴டெத்வா ஸகலவட்டது³க்க²ஸமதிக்கமாய ஸங்வத்தந்தீதி த³ஸ்ஸெந்தோ ‘‘ப³ஹித்³தா⁴, பி⁴க்க²வே , விஞ்ஞாணே’’திஆதி³மாஹ, தங் வுத்தனயமேவ. யங் பன வுத்தங் – ‘‘ஆயதிங் ஜாதிஜராமரணது³க்க²ஸமுத³யஸம்ப⁴வோ ந ஹோதீ’’தி, தஸ்ஸத்தோ² – ஏவங் விபஸ்ஸனங் மக்³கே³ன க⁴டெத்வா மக்³க³படிபாடியா அக்³க³மக்³கே³ன அனவஸேஸதோ கிலேஸேஸு கீ²ணேஸு ஆயதிங் அனாக³தே ஜாதிஜராமரணஸகலவட்டது³க்க²ஸமுத³யஸங்கா²தோ ஸம்ப⁴வோ உப்பாதோ³ ச ந ஹோதி, ஜாதிஸங்கா²தோ வா து³க்க²ஸமுத³யோ ஜராமரணஸங்கா²தோ து³க்க²ஸம்ப⁴வோ ச ந ஹோதி.
Iti bhagavā catusaccakammaṭṭhānikassa bhikkhuno anukkamena paṭipadāñāṇadassanavisuddhiyā āraddhāya accāraddhavīriyaatisithilavīriyavipassanupakkilesehi cittassa visodhanūpāyaṃ dassetvā idāni tathā visodhite vipassanāñāṇe na cirasseva vipassanaṃ maggena ghaṭetvā sakalavaṭṭadukkhasamatikkamāya saṃvattantīti dassento ‘‘bahiddhā, bhikkhave, viññāṇe’’tiādimāha, taṃ vuttanayameva. Yaṃ pana vuttaṃ – ‘‘āyatiṃ jātijarāmaraṇadukkhasamudayasambhavo na hotī’’ti, tassattho – evaṃ vipassanaṃ maggena ghaṭetvā maggapaṭipāṭiyā aggamaggena anavasesato kilesesu khīṇesu āyatiṃ anāgate jātijarāmaraṇasakalavaṭṭadukkhasamudayasaṅkhāto sambhavo uppādo ca na hoti, jātisaṅkhāto vā dukkhasamudayo jarāmaraṇasaṅkhāto dukkhasambhavo ca na hoti.
கா³தா²யங் ஸத்தஸங்க³ப்பஹீனஸ்ஸாதி தண்ஹாஸங்கோ³, தி³ட்டி²ஸங்கோ³, மானஸங்கோ³, கோத⁴ஸங்கோ³, அவிஜ்ஜாஸங்கோ³, கிலேஸஸங்கோ³, து³ச்சரிதஸங்கோ³தி இமேஸங் ஸத்தன்னங் ஸங்கா³னங் பஹீனத்தா ஸத்தஸங்க³ப்பஹீனஸ்ஸ. கேசி பன ‘‘ஸத்தானுஸயா ஏவ ஸத்த ஸங்கா³’’தி வத³ந்தி. நெத்திச்சி²ன்னஸ்ஸாதி சி²ன்னப⁴வனெத்திகஸ்ஸ . விக்கீ²ணோ ஜாதிஸங்ஸாரோதி புனப்புனங் ஜாயனவஸேன பவத்தியா ஜாதிஹேதுகத்தா ச ஜாதிபூ⁴தோ ஸங்ஸாரோதி ஜாதிஸங்ஸாரோ, ஸோ ப⁴வனெத்தியா சி²ன்னத்தா விக்கீ²ணோ பரிக்கீ²ணோ, ததோ ஏவ நத்தி² தஸ்ஸ புனப்³ப⁴வோதி.
Gāthāyaṃ sattasaṅgappahīnassāti taṇhāsaṅgo, diṭṭhisaṅgo, mānasaṅgo, kodhasaṅgo, avijjāsaṅgo, kilesasaṅgo, duccaritasaṅgoti imesaṃ sattannaṃ saṅgānaṃ pahīnattā sattasaṅgappahīnassa. Keci pana ‘‘sattānusayā eva satta saṅgā’’ti vadanti. Netticchinnassāti chinnabhavanettikassa . Vikkhīṇo jātisaṃsāroti punappunaṃ jāyanavasena pavattiyā jātihetukattā ca jātibhūto saṃsāroti jātisaṃsāro, so bhavanettiyā chinnattā vikkhīṇo parikkhīṇo, tato eva natthi tassa punabbhavoti.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 5. உபபரிக்க²ஸுத்தங் • 5. Upaparikkhasuttaṃ
