| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. உபஸம்பதா³ஸுத்தங்
4. Upasampadāsuttaṃ
34. ‘‘கதிஹி நு கோ², ப⁴ந்தே, த⁴ம்மேஹி ஸமன்னாக³தேன பி⁴க்கு²னா உபஸம்பாதே³தப்³ப³’’ந்தி? ‘‘த³ஸஹி கோ², உபாலி, த⁴ம்மேஹி ஸமன்னாக³தேன பி⁴க்கு²னா உபஸம்பாதே³தப்³ப³ங். கதமேஹி த³ஸஹி? இது⁴பாலி, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴; பாதிமொக்க²ங் கோ² பனஸ்ஸ வித்தா²ரேன ஸ்வாக³தங் ஹோதி ஸுவிப⁴த்தங் ஸுப்பவத்தங் ஸுவினிச்சி²தங் ஸுத்தஸோ அனுப்³யஞ்ஜனஸோ; படிப³லோ ஹோதி கி³லானங் உபட்டா²துங் வா உபட்டா²பேதுங் வா; படிப³லோ ஹோதி அனபி⁴ரதிங் வூபகாஸேதுங் வா வூபகாஸாபேதுங் வா; படிப³லோ ஹோதி உப்பன்னங் குக்குச்சங் த⁴ம்மதோ வினோதே³துங்; படிப³லோ ஹோதி உப்பன்னங் தி³ட்டி²க³தங் த⁴ம்மதோ விவேசேதுங்; படிப³லோ ஹோதி அதி⁴ஸீலே ஸமாத³பேதுங்; படிப³லோ ஹோதி அதி⁴சித்தே ஸமாத³பேதுங்; படிப³லோ ஹோதி அதி⁴பஞ்ஞாய ஸமாத³பேதுங். இமேஹி கோ², உபாலி, த³ஸஹி த⁴ம்மேஹி ஸமன்னாக³தேன பி⁴க்கு²னா உபஸம்பாதே³தப்³ப³’’ந்தி. சதுத்த²ங்.
34. ‘‘Katihi nu kho, bhante, dhammehi samannāgatena bhikkhunā upasampādetabba’’nti? ‘‘Dasahi kho, upāli, dhammehi samannāgatena bhikkhunā upasampādetabbaṃ. Katamehi dasahi? Idhupāli, bhikkhu sīlavā hoti, pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu; bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā; pātimokkhaṃ kho panassa vitthārena svāgataṃ hoti suvibhattaṃ suppavattaṃ suvinicchitaṃ suttaso anubyañjanaso; paṭibalo hoti gilānaṃ upaṭṭhātuṃ vā upaṭṭhāpetuṃ vā; paṭibalo hoti anabhiratiṃ vūpakāsetuṃ vā vūpakāsāpetuṃ vā; paṭibalo hoti uppannaṃ kukkuccaṃ dhammato vinodetuṃ; paṭibalo hoti uppannaṃ diṭṭhigataṃ dhammato vivecetuṃ; paṭibalo hoti adhisīle samādapetuṃ; paṭibalo hoti adhicitte samādapetuṃ; paṭibalo hoti adhipaññāya samādapetuṃ. Imehi kho, upāli, dasahi dhammehi samannāgatena bhikkhunā upasampādetabba’’nti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. உபஸம்பதா³ஸுத்தவண்ணனா • 4. Upasampadāsuttavaṇṇanā
