| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. உபஸ்ஸயஸுத்தவண்ணனா
10. Upassayasuttavaṇṇanā
153. லாப⁴ஸக்காரஹேதுபி ஏகச்சே பி⁴க்கூ² பி⁴க்கு²னுபஸ்ஸயங் க³ந்த்வா பி⁴க்கு²னியோ ஓவத³ந்தி, ஏவமேவங் அயங் பன தே²ரோ ந லாப⁴ஸக்காரஹேது பி⁴க்கு²னுபஸ்ஸயக³மனங் யாசதி, அத² கஸ்மாதி ஆஹ ‘‘கம்மட்டா²னத்தி²கா’’திஆதி³. ஏஸோ ஹி ஆனந்த³த்தே²ரோ உஸ்ஸுக்காபெத்வா படிபத்திகு³ணங் த³ஸ்ஸெந்தோ யஸ்மா தா பி⁴க்கு²னியோ சதுஸச்சகம்மட்டா²னிகா, தஸ்மா பஞ்சன்னங் உபாதா³னக்க²ந்தா⁴னங் உத³யப்³ப³யாதி³பகாஸனியா த⁴ம்மகதா²ய விபஸ்ஸனாபடிபத்திஸம்பத³ங் த³ஸ்ஸேஸி. அனிச்சாதி³லக்க²ணானி சேவ உத³யப்³ப³யாதி³கே ச ஸம்மா த³ஸ்ஸேஸி. ஹத்தே²ன க³ஹெத்வா விய பச்சக்க²தோ த³ஸ்ஸேஸி. ஸமாத³பேஸீதி தத்த² லக்க²ணாரம்மணிகவிபஸ்ஸனங் ஸமாத³பேஸி. யதா² வீதி²படிபன்னோ ஹுத்வா பவத்ததி, ஏவங் க³ண்ஹாபேஸி. ஸமுத்தேஜேஸீதி விபஸ்ஸனாய ஆரத்³தா⁴ய ஸங்கா²ரானங் உத³யப்³ப³யாதீ³ஸு உபட்ட²ஹந்தேஸு யதா²காலங் பக்³க³ஹஸமுபெக்க²ணேஹி பொ³ஜ்ஜ²ங்கா³னங் அனுபவத்தனேன பா⁴வனாமஜ்ஜி²மவீதி²ங் பாபெத்வா யதா² விபஸ்ஸனாஞாணங் ஸுப்பஸன்னங் ஹுத்வா வஹதி, ஏவங் இந்த்³ரியானங் விஸத³பா⁴வகரணேன விபஸ்ஸனாசித்தங் ஸம்மா உத்தேஜேஸி, நிப்³பா³னவஸேன வா ஸமாத³பேஸி. ஸம்பஹங்ஸேஸீதி ததா² பவத்தியமானாய விபஸ்ஸனாய ஸமப்பவத்தபா⁴வனாவஸேன உபரி லத்³த⁴ப்³ப³பா⁴வனாவஸேன சித்தங் ஸம்பஹங்ஸேஸி, லத்³த⁴ஸ்ஸாத³வஸேன ஸுட்டு² தோஸேஸி. ஏவமெத்த² அத்தோ² வேதி³தப்³போ³.
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
மனுதே பரிஞ்ஞாதி³வஸேன ஸச்சானி பு³ஜ்ஜ²தீதி முனி. தேதி தங். உபயோக³த்தே² ஹி இத³ங் ஸாமிவசனங். உத்தரீதி உபரி, தவ யதா²பூ⁴தஸபா⁴வதோ பரதோதி அத்தோ². பக்க²பதிதோ அக³திக³மனங் அதிரேகஓகாஸோ. உபபரிக்கீ²தி அனுவிச்ச நிவாரகோ ந ப³ஹுமதோ. பு³த்³த⁴படிபா⁴கோ³ தே²ரோ. ‘‘பா³லா பி⁴க்கு²னீ து³ப்³பா⁴ஸிதங் ஆஹா’’தி அவத்வா ‘‘க²மத², ப⁴ந்தே’’தி வத³ந்தேன பக்க²பாதேன விய வுத்தங் ஹோதீதி ஆஹ ‘‘ஏகா பி⁴க்கு²னீ ந வாரிதா’’திஆதி³.
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
சுதா ஸலிங்க³தோ நட்டா², தே³ஸந்தரபக்கமேன அத³ஸ்ஸனங் ந க³தா. கண்டகஸாகா² வியாதி குரண்டகஅபாமக்³க³கண்டகலஸிகாஹி ஸாகா² விய.
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
உபஸ்ஸயஸுத்தவண்ணனா நிட்டி²தா.
Upassayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. உபஸ்ஸயஸுத்தங் • 10. Upassayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. உபஸ்ஸயஸுத்தவண்ணனா • 10. Upassayasuttavaṇṇanā
