| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. உபட்டா²னஸுத்தவண்ணனா
2. Upaṭṭhānasuttavaṇṇanā
222. காயத³ரதோ² ஹோதியேவ நியமேன, ந சித்தத³ரதோ² தஸ்ஸ மக்³கே³னேவ ஸமுக்³கா⁴டிதத்தா.
222.Kāyadaratho hotiyeva niyamena, na cittadaratho tassa maggeneva samugghāṭitattā.
ஜராதுரோதி ஜராபி⁴ப⁴வனேன ஆதுரோயேவ. பத³த்³வயேபி ஏஸேவ நயோ. உபரிட்ட²தாய பரிதோ தீ³க⁴புது²லதாய அதிவிய விஜ்ஜ²தீதி ஸத்திஸல்லக்³க³ஹணங். ஏவங் ஹிஸ்ஸ தண்ஹாஸல்லஸ்ஸ ஸதி³ஸதா. அவிஜ்ஜாய பன ஸம்மோஹாபாத³னேன து³க்கா²பாத³னேன ச விஸஸதி³ஸதா. ருப்பதோதி விகாரங் ஆபாதி³யமானஸ்ஸ பீளியமானஸ்ஸாதி அத்தோ²தி ஆஹ ‘‘க⁴ட்டியமானஸ்ஸா’’தி.
Jarāturoti jarābhibhavanena āturoyeva. Padadvayepi eseva nayo. Upariṭṭhatāya parito dīghaputhulatāya ativiya vijjhatīti sattisallaggahaṇaṃ. Evaṃ hissa taṇhāsallassa sadisatā. Avijjāya pana sammohāpādanena dukkhāpādanena ca visasadisatā. Ruppatoti vikāraṃ āpādiyamānassa pīḷiyamānassāti atthoti āha ‘‘ghaṭṭiyamānassā’’ti.
பப்³ப³ஜிதந்தி ஸஸந்தானதோ பப்³ப³ஜிதங் வா ராகா³தி³மலதோ பப்³ப³ஜிதங் வா. தஸ்மாதி யஸ்மா தே²ரஸ்ஸேவேதங் வசனங், தஸ்மா அயங் இதா³னி வுச்சமானோ எத்த² கா³தா²ய அத்தோ². தே³வதாய ஹீதிஆதி³ வுத்தஸ்ஸேவ அத்த²ஸ்ஸ பாகடகரணங். எத்தா²தி ஸேஸகா³தா²ஸு. அத்த²ஸ்ஸ வுத்தனயத்தா ‘‘அனுத்தானபத³வண்ணனா’’தி ஆஹ. வினயாதி ஹேதும்ஹி நிஸ்ஸக்கவசனந்தி தஸ்ஸ ஹேதும்ஹி கரணவசனேன அத்த²மாஹ ‘‘வினயேனா’’தி. ததா² ‘‘ஸமதிக்கமா’’தி எத்தா²பி. பரமபரிஸுத்³த⁴ங் ஸங்கிலேஸஸமுச்சி²ந்த³னதோ. ஆரத்³த⁴வீரியந்தி ஸம்பா⁴விதவீரியங். ஸம்பா⁴வனஞ்சஸ்ஸ பக்³க³ண்ஹனங் பரிபூரணஞ்சாதி ஆஹ ‘‘பக்³க³ஹிதவீரியங் பரிபுண்ணவீரிய’’ந்தி.
Pabbajitanti sasantānato pabbajitaṃ vā rāgādimalato pabbajitaṃ vā. Tasmāti yasmā therassevetaṃ vacanaṃ, tasmā ayaṃ idāni vuccamāno ettha gāthāya attho. Devatāya hītiādi vuttasseva atthassa pākaṭakaraṇaṃ. Etthāti sesagāthāsu. Atthassa vuttanayattā ‘‘anuttānapadavaṇṇanā’’ti āha. Vinayāti hetumhi nissakkavacananti tassa hetumhi karaṇavacanena atthamāha ‘‘vinayenā’’ti. Tathā ‘‘samatikkamā’’ti etthāpi. Paramaparisuddhaṃ saṃkilesasamucchindanato. Āraddhavīriyanti sambhāvitavīriyaṃ. Sambhāvanañcassa paggaṇhanaṃ paripūraṇañcāti āha ‘‘paggahitavīriyaṃ paripuṇṇavīriya’’nti.
உபட்டா²னஸுத்தவண்ணனா நிட்டி²தா.
Upaṭṭhānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. உபட்டா²னஸுத்தங் • 2. Upaṭṭhānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. உபட்டா²னஸுத்தவண்ணனா • 2. Upaṭṭhānasuttavaṇṇanā
