| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
10. உபோஸத²ஸுத்தங்
10. Uposathasuttaṃ
20. 1 ஏகங் ஸமயங் ப⁴க³வா ஸாவத்தி²யங் விஹரதி புப்³பா³ராமே மிகா³ரமாதுபாஸாதே³. தேன கோ² பன ஸமயேன ப⁴க³வா தத³ஹுபோஸதே² பி⁴க்கு²ஸங்க⁴பரிவுதோ நிஸின்னோ ஹோதி. அத² கோ² ஆயஸ்மா ஆனந்தோ³ அபி⁴க்கந்தாய ரத்தியா, நிக்க²ந்தே பட²மே யாமே, உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – ‘‘அபி⁴க்கந்தா, ப⁴ந்தே, ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴. உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²’’ந்தி.
20.2 Ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena bhagavā tadahuposathe bhikkhusaṅghaparivuto nisinno hoti. Atha kho āyasmā ānando abhikkantāya rattiyā, nikkhante paṭhame yāme, uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘abhikkantā, bhante, ratti, nikkhanto paṭhamo yāmo, ciranisinno bhikkhusaṅgho. Uddisatu, bhante, bhagavā bhikkhūnaṃ pātimokkha’’nti.
ஏவங் வுத்தே ப⁴க³வா துண்ஹீ அஹோஸி. து³தியம்பி கோ² ஆயஸ்மா ஆனந்தோ³ அபி⁴க்கந்தாய ரத்தியா, நிக்க²ந்தே மஜ்ஜி²மே யாமே, உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – ‘‘அபி⁴க்கந்தா, ப⁴ந்தே , ரத்தி, நிக்க²ந்தோ மஜ்ஜி²மோ யாமோ, சிரனிஸின்னோ பி⁴க்கு²ஸங்கோ⁴. உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²’’ந்தி. து³தியம்பி கோ² ப⁴க³வா துண்ஹீ அஹோஸி. ததியம்பி கோ² ஆயஸ்மா ஆனந்தோ³ அபி⁴க்கந்தாய ரத்தியா, நிக்க²ந்தே பச்சி²மே யாமே, உத்³த⁴ஸ்தே அருணே, நந்தி³முகி²யா ரத்தியா உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – ‘‘அபி⁴க்கந்தா, ப⁴ந்தே, ரத்தி, நிக்க²ந்தோ பச்சி²மோ யாமோ, உத்³த⁴ஸ்தங் அருணங், நந்தி³முகீ² ரத்தி; சிரனிஸின்னோ பி⁴க்கு²ஸங்கோ⁴. உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²’’ந்தி. ‘‘அபரிஸுத்³தா⁴, ஆனந்த³, பரிஸா’’தி.
Evaṃ vutte bhagavā tuṇhī ahosi. Dutiyampi kho āyasmā ānando abhikkantāya rattiyā, nikkhante majjhime yāme, uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘abhikkantā, bhante , ratti, nikkhanto majjhimo yāmo, ciranisinno bhikkhusaṅgho. Uddisatu, bhante, bhagavā bhikkhūnaṃ pātimokkha’’nti. Dutiyampi kho bhagavā tuṇhī ahosi. Tatiyampi kho āyasmā ānando abhikkantāya rattiyā, nikkhante pacchime yāme, uddhaste aruṇe, nandimukhiyā rattiyā uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘abhikkantā, bhante, ratti, nikkhanto pacchimo yāmo, uddhastaṃ aruṇaṃ, nandimukhī ratti; ciranisinno bhikkhusaṅgho. Uddisatu, bhante, bhagavā bhikkhūnaṃ pātimokkha’’nti. ‘‘Aparisuddhā, ānanda, parisā’’ti.
அத² கோ² ஆயஸ்மதோ மஹாமொக்³க³ல்லானஸ்ஸ ஏதத³ஹோஸி – ‘‘கங் நு கோ² ப⁴க³வா புக்³க³லங் ஸந்தா⁴ய ஏவமாஹ – ‘அபரிஸுத்³தா⁴, ஆனந்த³, பரிஸா’’’தி? அத² கோ² ஆயஸ்மா மஹாமொக்³க³ல்லானோ ஸப்³பா³வந்தங் பி⁴க்கு²ஸங்க⁴ங் சேதஸா சேதோ பரிச்ச மனஸாகாஸி. அத்³த³ஸா கோ² ஆயஸ்மா மஹாமொக்³க³ல்லானோ தங் புக்³க³லங் து³ஸ்ஸீலங் பாபத⁴ம்மங் அஸுசிங் ஸங்கஸ்ஸரஸமாசாரங் படிச்ச²ன்னகம்மந்தங் அஸ்ஸமணங் ஸமணபடிஞ்ஞங் அப்³ரஹ்மசாரிங் ப்³ரஹ்மசாரிபடிஞ்ஞங் அந்தோபூதிங் அவஸ்ஸுதங் கஸம்பு³ஜாதங் மஜ்ஜே² பி⁴க்கு²ஸங்க⁴ஸ்ஸ நிஸின்னங்; தி³ஸ்வான உட்டா²யாஸனா யேன ஸோ புக்³க³லோ தேனுபஸங்கமி; உபஸங்கமித்வா தங் புக்³க³லங் ஏதத³வோச – ‘‘உட்டே²ஹாவுஸோ, தி³ட்டோ²ஸி ப⁴க³வதா. நத்தி² தே பி⁴க்கூ²ஹி ஸத்³தி⁴ங் ஸங்வாஸோ’’தி.
Atha kho āyasmato mahāmoggallānassa etadahosi – ‘‘kaṃ nu kho bhagavā puggalaṃ sandhāya evamāha – ‘aparisuddhā, ānanda, parisā’’’ti? Atha kho āyasmā mahāmoggallāno sabbāvantaṃ bhikkhusaṅghaṃ cetasā ceto paricca manasākāsi. Addasā kho āyasmā mahāmoggallāno taṃ puggalaṃ dussīlaṃ pāpadhammaṃ asuciṃ saṅkassarasamācāraṃ paṭicchannakammantaṃ assamaṇaṃ samaṇapaṭiññaṃ abrahmacāriṃ brahmacāripaṭiññaṃ antopūtiṃ avassutaṃ kasambujātaṃ majjhe bhikkhusaṅghassa nisinnaṃ; disvāna uṭṭhāyāsanā yena so puggalo tenupasaṅkami; upasaṅkamitvā taṃ puggalaṃ etadavoca – ‘‘uṭṭhehāvuso, diṭṭhosi bhagavatā. Natthi te bhikkhūhi saddhiṃ saṃvāso’’ti.
ஏவங் வுத்தே ஸோ புக்³க³லோ துண்ஹீ அஹோஸி. து³தியம்பி கோ² ஆயஸ்மா மஹாமொக்³க³ல்லானோ தங் புக்³க³லங் ஏதத³வோச – ‘‘உட்டே²ஹாவுஸோ, தி³ட்டோ²ஸி ப⁴க³வதா. நத்தி² தே பி⁴க்கூ²ஹி ஸத்³தி⁴ங் ஸங்வாஸோ’’தி. து³தியம்பி கோ² ஸோ புக்³க³லோ துண்ஹீ அஹோஸி. ததியம்பி கோ² ஆயஸ்மா மஹாமொக்³க³ல்லானோ தங் புக்³க³லங் ஏதத³வோச – ‘‘உட்டே²ஹாவுஸோ, தி³ட்டோ²ஸி ப⁴க³வதா. நத்தி² தே பி⁴க்கூ²ஹி ஸத்³தி⁴ங் ஸங்வாஸோ’’தி. ததியம்பி கோ² ஸோ புக்³க³லோ துண்ஹீ அஹோஸி.
Evaṃ vutte so puggalo tuṇhī ahosi. Dutiyampi kho āyasmā mahāmoggallāno taṃ puggalaṃ etadavoca – ‘‘uṭṭhehāvuso, diṭṭhosi bhagavatā. Natthi te bhikkhūhi saddhiṃ saṃvāso’’ti. Dutiyampi kho so puggalo tuṇhī ahosi. Tatiyampi kho āyasmā mahāmoggallāno taṃ puggalaṃ etadavoca – ‘‘uṭṭhehāvuso, diṭṭhosi bhagavatā. Natthi te bhikkhūhi saddhiṃ saṃvāso’’ti. Tatiyampi kho so puggalo tuṇhī ahosi.
அத² கோ² ஆயஸ்மா மஹாமொக்³க³ல்லானோ தங் புக்³க³லங் பா³ஹாயங் க³ஹெத்வா ப³ஹித்³வாரகொட்ட²கா நிக்கா²மெத்வா ஸூசிக⁴டிகங் த³த்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் ஏதத³வோச – ‘‘நிக்கா²மிதோ ஸோ, ப⁴ந்தே, புக்³க³லோ மயா. பரிஸுத்³தா⁴ பரிஸா. உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²’’ந்தி. ‘‘அச்ச²ரியங், மொக்³க³ல்லான, அப்³பு⁴தங், மொக்³க³ல்லான! யாவ பா³ஹா க³ஹணாபி நாம ஸோ மோக⁴புரிஸோ ஆக³மிஸ்ஸதீ’’தி!
Atha kho āyasmā mahāmoggallāno taṃ puggalaṃ bāhāyaṃ gahetvā bahidvārakoṭṭhakā nikkhāmetvā sūcighaṭikaṃ datvā yena bhagavā tenupasaṅkami; upasaṅkamitvā bhagavantaṃ etadavoca – ‘‘nikkhāmito so, bhante, puggalo mayā. Parisuddhā parisā. Uddisatu, bhante, bhagavā bhikkhūnaṃ pātimokkha’’nti. ‘‘Acchariyaṃ, moggallāna, abbhutaṃ, moggallāna! Yāva bāhā gahaṇāpi nāma so moghapuriso āgamissatī’’ti!
அத² கோ² ப⁴க³வா பி⁴க்கூ² ஆமந்தேஸி – ‘‘தும்ஹேவ தா³னி, பி⁴க்க²வே, உபோஸத²ங் கரெய்யாத², பாதிமொக்க²ங் உத்³தி³ஸெய்யாத². ந தா³னாஹங், பி⁴க்க²வே, அஜ்ஜதக்³கே³ உபோஸத²ங் கரிஸ்ஸாமி, பாதிமொக்க²ங் உத்³தி³ஸிஸ்ஸாமி. அட்டா²னமேதங், பி⁴க்க²வே, அனவகாஸோ யங் ததா²க³தோ அபரிஸுத்³தா⁴ய பரிஸாய பாதிமொக்க²ங் உத்³தி³ஸெய்ய’’.
Atha kho bhagavā bhikkhū āmantesi – ‘‘tumheva dāni, bhikkhave, uposathaṃ kareyyātha, pātimokkhaṃ uddiseyyātha. Na dānāhaṃ, bhikkhave, ajjatagge uposathaṃ karissāmi, pātimokkhaṃ uddisissāmi. Aṭṭhānametaṃ, bhikkhave, anavakāso yaṃ tathāgato aparisuddhāya parisāya pātimokkhaṃ uddiseyya’’.
‘‘அட்டி²மே, பி⁴க்க²வே, மஹாஸமுத்³தே³ அச்ச²ரியா அப்³பு⁴தா த⁴ம்மா, யே தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தி. கதமே அட்ட²? மஹாஸமுத்³தோ³, பி⁴க்க²வே, அனுபுப்³ப³னின்னோ அனுபுப்³ப³போணோ அனுபுப்³ப³பப்³பா⁴ரோ, ந ஆயதகேனேவ பபாதோ. யம்பி, பி⁴க்க²வே, மஹாஸமுத்³தோ³ அனுபுப்³ப³னின்னோ அனுபுப்³ப³போணோ அனுபுப்³ப³பப்³பா⁴ரோ, ந ஆயதகேனேவ பபாதோ; அயங், பி⁴க்க²வே, மஹாஸமுத்³தே³ பட²மோ அச்ச²ரியோ அப்³பு⁴தோ த⁴ம்மோ, யங் தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தி…பே॰… (யதா² புரிமே ததா² வித்தா²ரேதப்³போ³).
‘‘Aṭṭhime, bhikkhave, mahāsamudde acchariyā abbhutā dhammā, ye disvā disvā asurā mahāsamudde abhiramanti. Katame aṭṭha? Mahāsamuddo, bhikkhave, anupubbaninno anupubbapoṇo anupubbapabbhāro, na āyatakeneva papāto. Yampi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto; ayaṃ, bhikkhave, mahāsamudde paṭhamo acchariyo abbhuto dhammo, yaṃ disvā disvā asurā mahāsamudde abhiramanti…pe… (yathā purime tathā vitthāretabbo).
‘‘புன சபரங், பி⁴க்க²வே, மஹாஸமுத்³தோ³ மஹதங் பூ⁴தானங் ஆவாஸோ. தத்ரிமே பூ⁴தா – திமி திமிங்க³லோ திமிரபிங்க³லோ அஸுரா நாகா³ க³ந்த⁴ப்³பா³. வஸந்தி மஹாஸமுத்³தே³ யோஜனஸதிகாபி அத்தபா⁴வா…பே॰… பஞ்சயோஜனஸதிகாபி அத்தபா⁴வா . யம்பி, பி⁴க்க²வே, மஹாஸமுத்³தோ³ மஹதங் பூ⁴தானங் ஆவாஸோ; தத்ரிமே பூ⁴தா – திமி திமிங்க³லோ திமிரபிங்க³லோ அஸுரா நாகா³ க³ந்த⁴ப்³பா³; வஸந்தி மஹாஸமுத்³தே³ யோஜனஸதிகாபி அத்தபா⁴வா…பே॰… பஞ்சயோஜனஸதிகாபி அத்தபா⁴வா; அயங், பி⁴க்க²வே, மஹாஸமுத்³தே³ அட்ட²மோ அச்ச²ரியோ அப்³பு⁴தோ த⁴ம்மோ, யங் தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தி. இமே கோ², பி⁴க்க²வே, மஹாஸமுத்³தே³ அட்ட² அச்ச²ரியா அப்³பு⁴தா த⁴ம்மா, யங் தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தி.
‘‘Puna caparaṃ, bhikkhave, mahāsamuddo mahataṃ bhūtānaṃ āvāso. Tatrime bhūtā – timi timiṅgalo timirapiṅgalo asurā nāgā gandhabbā. Vasanti mahāsamudde yojanasatikāpi attabhāvā…pe… pañcayojanasatikāpi attabhāvā . Yampi, bhikkhave, mahāsamuddo mahataṃ bhūtānaṃ āvāso; tatrime bhūtā – timi timiṅgalo timirapiṅgalo asurā nāgā gandhabbā; vasanti mahāsamudde yojanasatikāpi attabhāvā…pe… pañcayojanasatikāpi attabhāvā; ayaṃ, bhikkhave, mahāsamudde aṭṭhamo acchariyo abbhuto dhammo, yaṃ disvā disvā asurā mahāsamudde abhiramanti. Ime kho, bhikkhave, mahāsamudde aṭṭha acchariyā abbhutā dhammā, yaṃ disvā disvā asurā mahāsamudde abhiramanti.
‘‘ஏவமேவங் கோ², பி⁴க்க²வே, அட்ட² இமஸ்மிங் த⁴ம்மவினயே அச்ச²ரியா அப்³பு⁴தா த⁴ம்மா, யே தி³ஸ்வா தி³ஸ்வா பி⁴க்கூ² இமஸ்மிங் த⁴ம்மவினயே அபி⁴ரமந்தி. கதமே அட்ட²? ஸெய்யதா²பி, பி⁴க்க²வே, மஹாஸமுத்³தோ³ அனுபுப்³ப³னின்னோ அனுபுப்³ப³போணோ அனுபுப்³ப³பப்³பா⁴ரோ, ந ஆயதகேனேவ பபாதோ; ஏவமேவங் கோ², பி⁴க்க²வே, இமஸ்மிங் த⁴ம்மவினயே அனுபுப்³ப³ஸிக்கா² அனுபுப்³ப³கிரியா அனுபுப்³ப³படிபதா³, ந ஆயதகேனேவ அஞ்ஞாபடிவேதோ⁴. யம்பி, பி⁴க்க²வே, இமஸ்மிங் த⁴ம்மவினயே அனுபுப்³ப³ஸிக்கா² அனுபுப்³ப³கிரியா அனுபுப்³ப³படிபதா³, ந ஆயதகேனேவ அஞ்ஞாபடிவேதோ⁴; அயங், பி⁴க்க²வே, இமஸ்மிங் த⁴ம்மவினயே பட²மோ அச்ச²ரியோ அப்³பு⁴தோ த⁴ம்மோ, யங் தி³ஸ்வா தி³ஸ்வா பி⁴க்கூ² இமஸ்மிங் த⁴ம்மவினயே அபி⁴ரமந்தி…பே॰… ஸெய்யதா²பி, பி⁴க்க²வே, மஹாஸமுத்³தோ³ மஹதங் பூ⁴தானங் ஆவாஸோ; தத்ரிமே பூ⁴தா – திமி திமிங்க³லோ திமிரபிங்க³லோ அஸுரா நாகா³ க³ந்த⁴ப்³பா³, வஸந்தி மஹாஸமுத்³தே³ யோஜனஸதிகாபி அத்தபா⁴வா…பே॰… பஞ்சயோஜனஸதிகாபி அத்தபா⁴வா; ஏவமேவங் கோ², பி⁴க்க²வே, அயங் த⁴ம்மவினயோ மஹதங் பூ⁴தானங் ஆவாஸோ. தத்ரிமே பூ⁴தா – ஸோதாபன்னோ ஸோதாபத்திப²லஸச்சி²கிரியாய படிபன்னோ…பே॰… அரஹா அரஹத்தாய படிபன்னோ. யம்பி, பி⁴க்க²வே, அயங் த⁴ம்மவினயோ மஹதங் பூ⁴தானங் ஆவாஸோ; தத்ரிமே பூ⁴தா – ஸோதாபன்னோ ஸோதாபத்திப²லஸச்சி²கிரியாய படிபன்னோ…பே॰… அரஹா அரஹத்தாய படிபன்னோ; அயங், பி⁴க்க²வே, இமஸ்மிங் த⁴ம்மவினயே அட்ட²மோ அச்ச²ரியோ அப்³பு⁴தோ த⁴ம்மோ, யங் தி³ஸ்வா தி³ஸ்வா பி⁴க்கூ² இமஸ்மிங் த⁴ம்மவினயே அபி⁴ரமந்தி. இமே கோ², பி⁴க்க²வே, இமஸ்மிங் த⁴ம்மவினயே அட்ட² அச்ச²ரியா அப்³பு⁴தா த⁴ம்மா, யே தி³ஸ்வா தி³ஸ்வா பி⁴க்கூ² இமஸ்மிங் த⁴ம்மவினயே அபி⁴ரமந்தீ’’தி. த³ஸமங்.
‘‘Evamevaṃ kho, bhikkhave, aṭṭha imasmiṃ dhammavinaye acchariyā abbhutā dhammā, ye disvā disvā bhikkhū imasmiṃ dhammavinaye abhiramanti. Katame aṭṭha? Seyyathāpi, bhikkhave, mahāsamuddo anupubbaninno anupubbapoṇo anupubbapabbhāro, na āyatakeneva papāto; evamevaṃ kho, bhikkhave, imasmiṃ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho. Yampi, bhikkhave, imasmiṃ dhammavinaye anupubbasikkhā anupubbakiriyā anupubbapaṭipadā, na āyatakeneva aññāpaṭivedho; ayaṃ, bhikkhave, imasmiṃ dhammavinaye paṭhamo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti…pe… seyyathāpi, bhikkhave, mahāsamuddo mahataṃ bhūtānaṃ āvāso; tatrime bhūtā – timi timiṅgalo timirapiṅgalo asurā nāgā gandhabbā, vasanti mahāsamudde yojanasatikāpi attabhāvā…pe… pañcayojanasatikāpi attabhāvā; evamevaṃ kho, bhikkhave, ayaṃ dhammavinayo mahataṃ bhūtānaṃ āvāso. Tatrime bhūtā – sotāpanno sotāpattiphalasacchikiriyāya paṭipanno…pe… arahā arahattāya paṭipanno. Yampi, bhikkhave, ayaṃ dhammavinayo mahataṃ bhūtānaṃ āvāso; tatrime bhūtā – sotāpanno sotāpattiphalasacchikiriyāya paṭipanno…pe… arahā arahattāya paṭipanno; ayaṃ, bhikkhave, imasmiṃ dhammavinaye aṭṭhamo acchariyo abbhuto dhammo, yaṃ disvā disvā bhikkhū imasmiṃ dhammavinaye abhiramanti. Ime kho, bhikkhave, imasmiṃ dhammavinaye aṭṭha acchariyā abbhutā dhammā, ye disvā disvā bhikkhū imasmiṃ dhammavinaye abhiramantī’’ti. Dasamaṃ.
மஹாவக்³கோ³ து³தியோ.
Mahāvaggo dutiyo.
தஸ்ஸுத்³தா³னங் –
Tassuddānaṃ –
வேரஞ்ஜோ ஸீஹோ ஆஜஞ்ஞங், க²ளுங்கேன மலானி ச;
Verañjo sīho ājaññaṃ, khaḷuṅkena malāni ca;
தூ³தெய்யங் த்³வே ச ப³ந்த⁴னா, பஹாராதோ³ உபோஸதோ²தி.
Dūteyyaṃ dve ca bandhanā, pahārādo uposathoti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. உபோஸத²ஸுத்தவண்ணனா • 10. Uposathasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. உபோஸத²ஸுத்தவண்ணனா • 10. Uposathasuttavaṇṇanā
