| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. உப்பாதா³ஸுத்தங்
4. Uppādāsuttaṃ
137. ‘‘உப்பாதா³ வா, பி⁴க்க²வே, ததா²க³தானங் அனுப்பாதா³ வா ததா²க³தானங், டி²தாவ ஸா தா⁴து த⁴ம்மட்டி²ததா த⁴ம்மனியாமதா. ஸப்³பே³ ஸங்கா²ரா அனிச்சா. தங் ததா²க³தோ அபி⁴ஸம்பு³ஜ்ஜ²தி அபி⁴ஸமேதி. அபி⁴ஸம்பு³ஜ்ஜி²த்வா அபி⁴ஸமெத்வா ஆசிக்க²தி தே³ஸேதி பஞ்ஞாபேதி பட்ட²பேதி விவரதி விப⁴ஜதி உத்தானீகரோதி – ‘ஸப்³பே³ ஸங்கா²ரா அனிச்சா’தி. உப்பாதா³ வா, பி⁴க்க²வே, ததா²க³தானங் அனுப்பாதா³ வா ததா²க³தானங் டி²தாவ ஸா தா⁴து த⁴ம்மட்டி²ததா த⁴ம்மனியாமதா. ஸப்³பே³ ஸங்கா²ரா து³க்கா². தங் ததா²க³தோ அபி⁴ஸம்பு³ஜ்ஜ²தி அபி⁴ஸமேதி. அபி⁴ஸம்பு³ஜ்ஜி²த்வா அபி⁴ஸமெத்வா ஆசிக்க²தி தே³ஸேதி பஞ்ஞாபேதி பட்ட²பேதி விவரதி விப⁴ஜதி உத்தானீகரோதி – ‘ஸப்³பே³ ஸங்கா²ரா து³க்கா²’தி. உப்பாதா³ வா, பி⁴க்க²வே, ததா²க³தானங் அனுப்பாதா³ வா ததா²க³தானங் டி²தாவ ஸா தா⁴து த⁴ம்மட்டி²ததா த⁴ம்மனியாமதா. ஸப்³பே³ த⁴ம்மா அனத்தா. தங் ததா²க³தோ அபி⁴ஸம்பு³ஜ்ஜ²தி அபி⁴ஸமேதி. அபி⁴ஸம்பு³ஜ்ஜி²த்வா அபி⁴ஸமெத்வா ஆசிக்க²தி தே³ஸேதி பஞ்ஞாபேதி பட்ட²பேதி விவரதி விப⁴ஜதி உத்தானீகரோதி – ‘ஸப்³பே³ த⁴ம்மா அனத்தா’’’தி. சதுத்த²ங்.
137. ‘‘Uppādā vā, bhikkhave, tathāgatānaṃ anuppādā vā tathāgatānaṃ, ṭhitāva sā dhātu dhammaṭṭhitatā dhammaniyāmatā. Sabbe saṅkhārā aniccā. Taṃ tathāgato abhisambujjhati abhisameti. Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttānīkaroti – ‘sabbe saṅkhārā aniccā’ti. Uppādā vā, bhikkhave, tathāgatānaṃ anuppādā vā tathāgatānaṃ ṭhitāva sā dhātu dhammaṭṭhitatā dhammaniyāmatā. Sabbe saṅkhārā dukkhā. Taṃ tathāgato abhisambujjhati abhisameti. Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttānīkaroti – ‘sabbe saṅkhārā dukkhā’ti. Uppādā vā, bhikkhave, tathāgatānaṃ anuppādā vā tathāgatānaṃ ṭhitāva sā dhātu dhammaṭṭhitatā dhammaniyāmatā. Sabbe dhammā anattā. Taṃ tathāgato abhisambujjhati abhisameti. Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttānīkaroti – ‘sabbe dhammā anattā’’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. உப்பாதா³ஸுத்தவண்ணனா • 4. Uppādāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. உப்பாதா³ஸுத்தவண்ணனா • 4. Uppādāsuttavaṇṇanā
