| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
10. உப்பஜ்ஜந்திஸுத்தவண்ணனா
10. Uppajjantisuttavaṇṇanā
60. த³ஸமே யாவகீவந்தி யத்தகங் காலங். யதோதி யதா³, யதோ பட்டா²ய, யஸ்மிங் காலேதி வா அத்தோ². ஏவமேதங், ஆனந்தா³தி, ஆனந்த³, ததா²க³தே உப்பன்னே ததா²க³தஸ்ஸ ததா²க³தஸாவகானங்யேவ ச லாப⁴ஸக்காரோ அபி⁴வட்³ட⁴தி, தித்தி²யா பன நித்தேஜா விஹதப்பபா⁴ பஹீனலாப⁴ஸக்காரா ஹொந்தீதி யங் தயா வுத்தங், ஏதங் ஏவங், ந ஏதஸ்ஸ அஞ்ஞதா²பா⁴வோ. சக்கவத்தினோ ஹி சக்கரதனஸ்ஸ பாதுபா⁴வேன லோகோ சக்கரதனங் முஞ்சித்வா அஞ்ஞத்த² பூஜாஸக்காரஸம்மானங் ந பவத்தேதி, சக்கரதனமேவ பன ஸப்³போ³ லோகோ ஸப்³ப³பா⁴வேஹி ஸக்கரோதி க³ருங் கரோதி மானேதி பூஜேதி. இதி வட்டானுஸாரிபுஞ்ஞமத்தனிஸ்ஸந்த³ஸ்ஸபி தாவ மஹந்தோ ஆனுபா⁴வோ, கிமங்க³ங் பன விவட்டானுஸாரிபுஞ்ஞப²லூபத்த²ம்ப⁴ஸ்ஸ அனந்தாபரிமெய்யகு³ணக³ணாதா⁴ரஸ்ஸ பு³த்³த⁴ரதனஸ்ஸ த⁴ம்மரதனஸ்ஸ ஸங்க⁴ரதனஸ்ஸ சாதி த³ஸ்ஸேதி.
60. Dasame yāvakīvanti yattakaṃ kālaṃ. Yatoti yadā, yato paṭṭhāya, yasmiṃ kāleti vā attho. Evametaṃ, ānandāti, ānanda, tathāgate uppanne tathāgatassa tathāgatasāvakānaṃyeva ca lābhasakkāro abhivaḍḍhati, titthiyā pana nittejā vihatappabhā pahīnalābhasakkārā hontīti yaṃ tayā vuttaṃ, etaṃ evaṃ, na etassa aññathābhāvo. Cakkavattino hi cakkaratanassa pātubhāvena loko cakkaratanaṃ muñcitvā aññattha pūjāsakkārasammānaṃ na pavatteti, cakkaratanameva pana sabbo loko sabbabhāvehi sakkaroti garuṃ karoti māneti pūjeti. Iti vaṭṭānusāripuññamattanissandassapi tāva mahanto ānubhāvo, kimaṅgaṃ pana vivaṭṭānusāripuññaphalūpatthambhassa anantāparimeyyaguṇagaṇādhārassa buddharatanassa dhammaratanassa saṅgharatanassa cāti dasseti.
ப⁴க³வா ஹி ஸம்மாஸம்போ³தி⁴ங் பத்வா பவத்தவரத⁴ம்மசக்கோ அனுக்கமேன லோகே ஏகஸட்டி²யா அரஹந்தேஸு ஜாதேஸு ஸட்டி² அரஹந்தே ஜனபத³சாரிகாய விஸ்ஸஜ்ஜெத்வா உருவேலங் பத்வா உருவேலகஸ்ஸபப்பமுகே² ஸஹஸ்ஸஜடிலே அரஹத்தே பதிட்டா²பெத்வா தேஹி பரிவுதோ லட்டி²வனுய்யானே நிஸீதி³த்வா பி³ம்பி³ஸாரப்பமுகா²னங் அங்க³மக³த⁴வாஸீனங் த்³வாத³ஸ நஹுதானி ஸாஸனே ஓதாரெத்வா யதா³ ராஜக³ஹே விஹாஸி, ததோ பட்டா²ய ப⁴க³வதோ பி⁴க்கு²ஸங்க⁴ஸ்ஸ ச யதா² யதா² உபரூபரி உளாரலாப⁴ஸக்காரோ அபி⁴வட்³ட⁴தி, ததா² ததா² ஸப்³ப³தித்தி²யானங் லாப⁴ஸக்காரோ பரிஹாயி ஏவ.
Bhagavā hi sammāsambodhiṃ patvā pavattavaradhammacakko anukkamena loke ekasaṭṭhiyā arahantesu jātesu saṭṭhi arahante janapadacārikāya vissajjetvā uruvelaṃ patvā uruvelakassapappamukhe sahassajaṭile arahatte patiṭṭhāpetvā tehi parivuto laṭṭhivanuyyāne nisīditvā bimbisārappamukhānaṃ aṅgamagadhavāsīnaṃ dvādasa nahutāni sāsane otāretvā yadā rājagahe vihāsi, tato paṭṭhāya bhagavato bhikkhusaṅghassa ca yathā yathā uparūpari uḷāralābhasakkāro abhivaḍḍhati, tathā tathā sabbatitthiyānaṃ lābhasakkāro parihāyi eva.
அதே²கதி³வஸங் ஆயஸ்மா ஆனந்தோ³ தி³வாட்டா²னே நிஸின்னோ ப⁴க³வதோ ச அரியஸங்க⁴ஸ்ஸ ச ஸம்மாபடிபத்திங் பச்சவெக்கி²த்வா பீதிஸோமனஸ்ஸஜாதோ ‘‘கத²ங் நு கோ² தித்தி²யான’’ந்தி தேஸங் படிபத்திங் ஆவஜ்ஜேஸி. அத²ஸ்ஸ நேஸங் ஸப்³ப³தா²பி து³ப்படிபத்தியேவ உபட்டா²ஸி. ஸோ ‘‘ஏவங்மஹானுபா⁴வே நாம புஞ்ஞூபனிஸ்ஸயஸ்ஸ த⁴ம்மானுத⁴ம்மப்படிபத்தியா ச உக்கங்ஸபாரமிப்பத்தே ப⁴க³வதி, அரியஸங்கே⁴ ச த⁴ரந்தே கத²ங் இமே அஞ்ஞதித்தி²யா ஏவங் து³ப்படிபன்னா அகதபுஞ்ஞா வராகா லாபி⁴னோ ஸக்கதா ப⁴விஸ்ஸந்தீ’’தி தித்தி²யானங் லாப⁴ஸக்காரஹானிங் நிஸ்ஸாய காருஞ்ஞங் உப்பாதெ³த்வா அத² அத்தனோ பரிவிதக்கங் ‘‘யாவகீவஞ்ச, ப⁴ந்தே’’திஆதி³னா ப⁴க³வதோ ஆரோசேஸி. ப⁴க³வா ச தங், ‘‘ஆனந்த³, தயா மிச்சா² பரிவிதக்கித’’ந்தி அவத்வா ஸுவண்ணாலிங்க³ஸதி³ஸங் கீ³வங் உன்னாமெத்வா ஸுபுப்பி²தஸதபத்தஸஸ்ஸிரிகங் மஹாமுக²ங் அபி⁴ப்பஸன்னதரங் கத்வா ‘‘ஏவமேதங், ஆனந்தா³’’தி ஸம்பஹங்ஸித்வா ‘‘யாவகீவஞ்சா’’திஆதி³னா தஸ்ஸ வசனங் பச்சனுமோதி³. தேன வுத்தங் – ‘‘அத² கோ² ஆயஸ்மா ஆனந்தோ³…பே॰… பி⁴க்கு²ஸங்கோ⁴ சா’’தி. அத² ப⁴க³வா தஸ்ஸங் அட்டு²ப்பத்தியங் அதீதேபி மயி அனுப்பன்னே ஏகச்சே நீசஜனா ஸம்மானங் லபி⁴த்வா மம உப்பாத³தோ பட்டா²ய ஹதலாப⁴ஸக்காரா அஹேஸுந்தி பா³வேருஜாதகங் (ஜா॰ 1.4.153 ஆத³யோ) கதே²ஸி.
Athekadivasaṃ āyasmā ānando divāṭṭhāne nisinno bhagavato ca ariyasaṅghassa ca sammāpaṭipattiṃ paccavekkhitvā pītisomanassajāto ‘‘kathaṃ nu kho titthiyāna’’nti tesaṃ paṭipattiṃ āvajjesi. Athassa nesaṃ sabbathāpi duppaṭipattiyeva upaṭṭhāsi. So ‘‘evaṃmahānubhāve nāma puññūpanissayassa dhammānudhammappaṭipattiyā ca ukkaṃsapāramippatte bhagavati, ariyasaṅghe ca dharante kathaṃ ime aññatitthiyā evaṃ duppaṭipannā akatapuññā varākā lābhino sakkatā bhavissantī’’ti titthiyānaṃ lābhasakkārahāniṃ nissāya kāruññaṃ uppādetvā atha attano parivitakkaṃ ‘‘yāvakīvañca, bhante’’tiādinā bhagavato ārocesi. Bhagavā ca taṃ, ‘‘ānanda, tayā micchā parivitakkita’’nti avatvā suvaṇṇāliṅgasadisaṃ gīvaṃ unnāmetvā supupphitasatapattasassirikaṃ mahāmukhaṃ abhippasannataraṃ katvā ‘‘evametaṃ, ānandā’’ti sampahaṃsitvā ‘‘yāvakīvañcā’’tiādinā tassa vacanaṃ paccanumodi. Tena vuttaṃ – ‘‘atha kho āyasmā ānando…pe… bhikkhusaṅgho cā’’ti. Atha bhagavā tassaṃ aṭṭhuppattiyaṃ atītepi mayi anuppanne ekacce nīcajanā sammānaṃ labhitvā mama uppādato paṭṭhāya hatalābhasakkārā ahesunti bāverujātakaṃ (jā. 1.4.153 ādayo) kathesi.
ஏதமத்த²ங் விதி³த்வாதி தி³ட்டி²க³திகானங் தாவ ஸக்காரஸம்மானோ யாவ ந ஸம்மாஸம்பு³த்³தா⁴ லோகே உப்பஜ்ஜந்தி, தேஸங் பன உப்பாத³தோ பட்டா²ய தே ஹதலாப⁴ஸக்காரா நிப்பபா⁴ நித்தேஜாவ ஹொந்தி, து³ப்படிபத்தியா து³க்க²தோ ச ந முச்சந்தீதி ஏதமத்த²ங் ஸப்³பா³காரதோ விதி³த்வா தத³த்த²தீ³பனங் இமங் உதா³னங் உதா³னேஸி.
Etamatthaṃviditvāti diṭṭhigatikānaṃ tāva sakkārasammāno yāva na sammāsambuddhā loke uppajjanti, tesaṃ pana uppādato paṭṭhāya te hatalābhasakkārā nippabhā nittejāva honti, duppaṭipattiyā dukkhato ca na muccantīti etamatthaṃ sabbākārato viditvā tadatthadīpanaṃ imaṃ udānaṃ udānesi.
தத்த² ஓபா⁴ஸதி தாவ ஸோ கிமீதி ஸோ க²ஜ்ஜூபனககிமி தாவதே³வ ஓபா⁴ஸதி ஜோததி தி³ப்³ப³தி. யாவ ந உன்னமதே பப⁴ங்கரோதி தீஸுபி மஹாதீ³பேஸு ஏகக்க²ணே ஆலோககரணேன ‘‘பப⁴ங்கரோ’’தி லத்³த⁴னாமோ ஸூரியோ யாவ ந உக்³க³மதி ந உதே³தி. அனுக்³க³தே ஹி ஸூரியே லத்³தோ⁴காஸா க²ஜ்ஜூபனகா விபரிவத்தமானாபி கண்டகப²லஸதி³ஸா தமஸி விஜ்ஜோதந்தி. ஸ வேரோசனம்ஹி உக்³க³தே, ஹதப்பபோ⁴ ஹோதி ந சாபி பா⁴ஸதீதி ஸமந்ததோ அந்த⁴காரங் வித⁴மித்வா கிரணஸஹஸ்ஸேன விரோசனஸபா⁴வதாய வேரோசனநாமகே ஆதி³ச்சே உட்டி²தே ஸோ க²ஜ்ஜூபனகோ ஹதப்பபோ⁴ நித்தேஜோ காளகோ ஹோதி, ரத்தந்த⁴காரே விய ந பா⁴ஸதி ந தி³ப்³ப³தி.
Tattha obhāsati tāva so kimīti so khajjūpanakakimi tāvadeva obhāsati jotati dibbati. Yāva na unnamate pabhaṅkaroti tīsupi mahādīpesu ekakkhaṇe ālokakaraṇena ‘‘pabhaṅkaro’’ti laddhanāmo sūriyo yāva na uggamati na udeti. Anuggate hi sūriye laddhokāsā khajjūpanakā viparivattamānāpi kaṇṭakaphalasadisā tamasi vijjotanti. Sa verocanamhi uggate, hatappabho hoti na cāpi bhāsatīti samantato andhakāraṃ vidhamitvā kiraṇasahassena virocanasabhāvatāya verocananāmake ādicce uṭṭhite so khajjūpanako hatappabho nittejo kāḷako hoti, rattandhakāre viya na bhāsati na dibbati.
ஏவங் ஓபா⁴ஸிதமேவ தக்கிகானந்தி யதா² தேன க²ஜ்ஜூபனகேன ஸூரியுக்³க³மனதோ புரேயேவ ஓபா⁴ஸிதங் ஹோதி, ஏவங் தக்கெத்வா விதக்கெத்வா பரிகப்பனமத்தேன தி³ட்டீ²னங் க³ஹணதோ ‘‘தக்கிகா’’தி லத்³த⁴னாமேஹி தித்தி²யேஹி ஓபா⁴ஸிதங் அத்தனோ ஸமயதேஜேன தீ³பெத்வா அதி⁴ட்டி²தங் தாவ, யாவ ஸம்மாஸம்பு³த்³தா⁴ லோகே நுப்பஜ்ஜந்தி. ந தக்கிகா ஸுஜ்ஜ²ந்தி ந சாபி ஸாவகாதி யதா³ பன ஸம்மாஸம்பு³த்³தா⁴ லோகே உப்பஜ்ஜந்தி, ததா³ தி³ட்டி²க³திகா ந ஸுஜ்ஜ²ந்தி ந ஸோப⁴ந்தி, ந சாபி தேஸங் ஸாவகா ஸோப⁴ந்தி, அஞ்ஞத³த்து² விஹதஸோபா⁴ ரத்திகி²த்தா விய ஸரா ந பஞ்ஞாயந்தேவ. அத² வா யாவ ஸம்மாஸம்பு³த்³தா⁴ லோகே நுப்பஜ்ஜந்தி, தாவதே³வ தக்கிகானங் ஓபா⁴ஸிதங் அத்தனோ ஸமயேன ஜோதனங் பா³லலாபனங், ந ததோ பரங். கஸ்மா? யஸ்மா ந தக்கிகா ஸுஜ்ஜ²ந்தி, ந சாபி ஸாவகா. தே ஹி து³ரக்கா²தத⁴ம்மவினயா ஸம்மாபடிபத்திரஹிதா ந ஸங்ஸாரதோ ஸுஜ்ஜ²ந்தி அனிய்யானிகஸாஸனத்தா. தேனாஹ ‘‘து³த்³தி³ட்டீ² ந து³க்கா² பமுச்சரே’’தி. தக்கிகா ஹி அயாதா²வலத்³தி⁴கதாய து³த்³தி³ட்டி²னோ மிச்சா²பி⁴னிவிட்ட²தி³ட்டி²கா விபரீதத³ஸ்ஸனா தங் தி³ட்டி²ங் அனிஸ்ஸஜ்ஜித்வா ஸங்ஸாரது³க்க²தோ ந கதா³சிபி முச்சந்தீதி.
Evaṃ obhāsitameva takkikānanti yathā tena khajjūpanakena sūriyuggamanato pureyeva obhāsitaṃ hoti, evaṃ takketvā vitakketvā parikappanamattena diṭṭhīnaṃ gahaṇato ‘‘takkikā’’ti laddhanāmehi titthiyehi obhāsitaṃ attano samayatejena dīpetvā adhiṭṭhitaṃ tāva, yāva sammāsambuddhā loke nuppajjanti. Na takkikā sujjhanti na cāpi sāvakāti yadā pana sammāsambuddhā loke uppajjanti, tadā diṭṭhigatikā na sujjhanti na sobhanti, na cāpi tesaṃ sāvakā sobhanti, aññadatthu vihatasobhā rattikhittā viya sarā na paññāyanteva. Atha vā yāva sammāsambuddhā loke nuppajjanti, tāvadeva takkikānaṃ obhāsitaṃ attano samayena jotanaṃ bālalāpanaṃ, na tato paraṃ. Kasmā? Yasmā na takkikā sujjhanti, na cāpi sāvakā. Te hi durakkhātadhammavinayā sammāpaṭipattirahitā na saṃsārato sujjhanti aniyyānikasāsanattā. Tenāha ‘‘duddiṭṭhī na dukkhā pamuccare’’ti. Takkikā hi ayāthāvaladdhikatāya duddiṭṭhino micchābhiniviṭṭhadiṭṭhikā viparītadassanā taṃ diṭṭhiṃ anissajjitvā saṃsāradukkhato na kadācipi muccantīti.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
நிட்டி²தா ச ஜச்சந்த⁴வக்³க³வண்ணனா.
Niṭṭhitā ca jaccandhavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 10. உப்பஜ்ஜந்திஸுத்தங் • 10. Uppajjantisuttaṃ
