| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. உப்படிபாடிகஸுத்தவண்ணனா
10. Uppaṭipāṭikasuttavaṇṇanā
510. ரஸனங் ப⁴ஞ்ஜனங் நிருஜ்ஜ²னங் ரஸோ. யோ யோ த⁴ம்மானங் ரஸோ யதா²த⁴ம்மரஸோ, தேன யதா²த⁴ம்மரஸேன. படிபாடியாதி கமேன, உப⁴யேனபி த⁴ம்மானங் பஹானக்கமேனாதி வுத்தங் ஹோதி. இமஸ்மிங் இந்த்³ரியவிப⁴ங்கே³தி இமஸ்மிங் இந்த்³ரியஸங்யுத்தஸஞ்ஞிதே இந்த்³ரியவிப⁴ங்கே³. அதே³ஸிதத்தாதி ஸேஸஸுத்தானி விய ‘‘ஸுகி²ந்த்³ரிய’’ந்திஆதி³னா அதே³ஸிதத்தா இத³ங் உப்படிபாடிகஸுத்தங் நாம. வலியா க²ரஸம்ப²ஸ்ஸாய பு²ட்ட²ஸ்ஸ. தந்தி கண்டகவேத³னாதி³ங். ஏதஸ்ஸ து³க்கி²ந்த்³ரியஸ்ஸ.
510. Rasanaṃ bhañjanaṃ nirujjhanaṃ raso. Yo yo dhammānaṃ raso yathādhammaraso, tena yathādhammarasena. Paṭipāṭiyāti kamena, ubhayenapi dhammānaṃ pahānakkamenāti vuttaṃ hoti. Imasmiṃ indriyavibhaṅgeti imasmiṃ indriyasaṃyuttasaññite indriyavibhaṅge. Adesitattāti sesasuttāni viya ‘‘sukhindriya’’ntiādinā adesitattā idaṃ uppaṭipāṭikasuttaṃ nāma. Valiyā kharasamphassāya phuṭṭhassa. Tanti kaṇṭakavedanādiṃ. Etassa dukkhindriyassa.
தேஸங் தேஸந்தி தோ³மனஸ்ஸிந்த்³ரியாதீ³னங். காரணவஸேனேவாதி தங்தங்அஸாதா⁴ரணகாரணவஸேன. தேஸஞ்ஹி விஸேஸகாரணங் த³ஸ்ஸெந்தோ ‘‘பத்தசீவராதீ³னங் வா’’தி ஆஹ.
Tesaṃtesanti domanassindriyādīnaṃ. Kāraṇavasenevāti taṃtaṃasādhāraṇakāraṇavasena. Tesañhi visesakāraṇaṃ dassento ‘‘pattacīvarādīnaṃ vā’’ti āha.
ஏகதோவாதி புனப்புனங் பது³த்³தா⁴ரணங் அகத்வா ஏகஜ்ஜ²மேவ. து³தியஜ்ஜா²னாதீ³னங் உபசாரக்க²ணே ஏவ நிருஜ்ஜ²ந்தீதி ஆனெத்வா ஸம்ப³ந்தோ⁴. தேஸங் து³க்கி²ந்த்³ரியதோ³மனஸ்ஸாதீ³னங். அதிஸயனிரோதோ⁴தி ஸுட்டு² பஹானங் உஜுப்படிபக்கே²ன வூபஸமோ. நிரோதோ⁴யேவாதி நிரோத⁴மத்தமேவ. நானாவஜ்ஜனேதி யேன ஆவஜ்ஜனேன அப்பனாவீதி² ஹோதி, ததோ பி⁴ஜ்ஜாவஜ்ஜனே, அனேகாவஜ்ஜனே வா. அப்பனாவீதி²யஞ்ஹி உபசாரோ ஏகாவஜ்ஜனோ, இதரோ அனேகாவஜ்ஜனோ அனேகக்க²த்துங் பவத்தனதோ. விஸமனிஸஜ்ஜாய உப்பன்னகிலமதோ² விஸமாஸனுபதாபோ . பீதிப²ரணேனாதி பீதியா ப²ரணரஸத்தா. பீதிஸமுட்டா²னானங் வா பணீதரூபானங் காயஸ்ஸ ப்³யாபனதோ வுத்தங். தேனாஹ ‘‘ஸப்³போ³ காயோ ஸுகோ²க்கந்தோ ஹோதீ’’தி. விதக்கவிசாரபச்சயேபீதி பி-ஸத்³தோ³ அட்டா²னபயுத்தோ, ஸோ ‘‘பஹீனஸ்ஸா’’தி எத்த² ஆனெத்வா ஸம்ப³ந்தி⁴தப்³போ³ ‘‘பஹீனஸ்ஸபி தோ³மனஸ்ஸிந்த்³ரியஸ்ஸா’’தி. ஏதங் தோ³மனஸ்ஸிந்த்³ரியங் உப்பஜ்ஜதீதி ஸம்ப³ந்தோ⁴. ‘‘தஸ்ஸ மய்ஹங் அதிசிரங் விதக்கயதோ விசாரயதோ காயோபி கிலமி, சித்தம்பி விஹஞ்ஞீ’’தி ச வசனதோ காயசித்தகே²தா³னங் விதக்கவிசாரபச்சயதா வேதி³தப்³பா³. விதக்கவிசாரபா⁴வே உப்பஜ்ஜதி தோ³மனஸ்ஸிந்த்³ரியந்தி ஆனெத்வா ஸம்ப³ந்தி⁴தப்³ப³ங். தத்த²ஸ்ஸ ஸியா உப்பத்தீதி தத்த² து³தியஜ்ஜா²னுபசாரே அஸ்ஸ தோ³மனஸ்ஸஸ்ஸ உப்பத்தி ப⁴வெய்ய. ‘‘தத்த²ஸ்ஸ ஸியா உப்பத்தீ’’தி இத³ங் பரிகப்பவசனங் உபசாரக்க²ணே தோ³மனஸ்ஸஸ்ஸ ஸுப்பஹீனபா⁴வத³ஸ்ஸனத்த²ங். ததா² ஹி வுத்தங் ‘‘ந த்வேவ து³தியஜ்ஜா²னே பஹீனபச்சயத்தா’’தி. பஹீனம்பி ஸோமனஸ்ஸிந்த்³ரியங் பீதி விய ந தூ³ரேதி கத்வா ‘‘ஆஸன்னத்தா’’தி வுத்தங். நானாவஜ்ஜனுபசாரே பஹீனம்பி பஹானங்க³ங் படிபக்கே²ன அவிஹதத்தா அந்தரந்தரா உப்பஜ்ஜெய்யாதி இமமத்த²ங் த³ஸ்ஸெந்தோ ‘‘அப்பனாப்பத்தாயா’’திஆதி³மாஹ. ‘‘தாதி³ஸாய ஆஸேவனாய இச்சி²தப்³ப³த்தா யதா² மக்³க³வீதி²தோ புப்³பே³ த்³வே தயோ ஜவனவாரா ஸதி³ஸானுபஸ்ஸனாவ பவத்தந்தி, ஏவமிதா⁴பி அப்பனாவாரதோ புப்³பே³ த்³வே தயோ ஜவனவாரா உபெக்கா²ஸஹக³தாவ பவத்தந்தீ’’தி வத³ந்தி. அபரிஸேஸந்தி ஸுவிக்க²ம்பி⁴தந்தி கத்வா விக்க²ம்ப⁴னேன அனவஸேஸங்.
Ekatovāti punappunaṃ paduddhāraṇaṃ akatvā ekajjhameva. Dutiyajjhānādīnaṃ upacārakkhaṇe eva nirujjhantīti ānetvā sambandho. Tesaṃ dukkhindriyadomanassādīnaṃ. Atisayanirodhoti suṭṭhu pahānaṃ ujuppaṭipakkhena vūpasamo. Nirodhoyevāti nirodhamattameva. Nānāvajjaneti yena āvajjanena appanāvīthi hoti, tato bhijjāvajjane, anekāvajjane vā. Appanāvīthiyañhi upacāro ekāvajjano, itaro anekāvajjano anekakkhattuṃ pavattanato. Visamanisajjāya uppannakilamatho visamāsanupatāpo. Pītipharaṇenāti pītiyā pharaṇarasattā. Pītisamuṭṭhānānaṃ vā paṇītarūpānaṃ kāyassa byāpanato vuttaṃ. Tenāha ‘‘sabbo kāyo sukhokkanto hotī’’ti. Vitakkavicārapaccayepīti pi-saddo aṭṭhānapayutto, so ‘‘pahīnassā’’ti ettha ānetvā sambandhitabbo ‘‘pahīnassapi domanassindriyassā’’ti. Etaṃ domanassindriyaṃ uppajjatīti sambandho. ‘‘Tassa mayhaṃ aticiraṃ vitakkayato vicārayato kāyopi kilami, cittampi vihaññī’’ti ca vacanato kāyacittakhedānaṃ vitakkavicārapaccayatā veditabbā. Vitakkavicārabhāve uppajjati domanassindriyanti ānetvā sambandhitabbaṃ. Tatthassa siyā uppattīti tattha dutiyajjhānupacāre assa domanassassa uppatti bhaveyya. ‘‘Tatthassa siyā uppattī’’ti idaṃ parikappavacanaṃ upacārakkhaṇe domanassassa suppahīnabhāvadassanatthaṃ. Tathā hi vuttaṃ ‘‘na tveva dutiyajjhāne pahīnapaccayattā’’ti. Pahīnampi somanassindriyaṃ pīti viya na dūreti katvā ‘‘āsannattā’’ti vuttaṃ. Nānāvajjanupacāre pahīnampi pahānaṅgaṃ paṭipakkhena avihatattā antarantarā uppajjeyyāti imamatthaṃ dassento ‘‘appanāppattāyā’’tiādimāha. ‘‘Tādisāya āsevanāya icchitabbattā yathā maggavīthito pubbe dve tayo javanavārā sadisānupassanāva pavattanti, evamidhāpi appanāvārato pubbe dve tayo javanavārā upekkhāsahagatāva pavattantī’’ti vadanti. Aparisesanti suvikkhambhitanti katvā vikkhambhanena anavasesaṃ.
தத²த்தாயாதி தத²பா⁴வாய பட²மஜ்ஜா²னஸமங்கி³தாய. ஸா பனஸ்ஸ உப்பாத³னேன வா உப்பன்னஸ்ஸ ஸமாபஜ்ஜனேன வா ஹோதீதி வுத்தங் ‘‘உப்பாத³னத்தா²ய ஸமாபஜ்ஜனத்தா²யா’’தி. த்³வீஸூதி நவமத³ஸமேஸு ஸுத்தந்தேஸு.
Tathattāyāti tathabhāvāya paṭhamajjhānasamaṅgitāya. Sā panassa uppādanena vā uppannassa samāpajjanena vā hotīti vuttaṃ ‘‘uppādanatthāya samāpajjanatthāyā’’ti. Dvīsūti navamadasamesu suttantesu.
ஸுகி²ந்த்³ரியவக்³க³வண்ணனா நிட்டி²தா.
Sukhindriyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. உப்படிபாடிகஸுத்தங் • 10. Uppaṭipāṭikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. உப்படிபாடிகஸுத்தவண்ணனா • 10. Uppaṭipāṭikasuttavaṇṇanā
