| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. உத்தரவிபத்திஸுத்தங்
8. Uttaravipattisuttaṃ
8. ஏகங் ஸமயங் ஆயஸ்மா உத்தரோ மஹிஸவத்து²ஸ்மிங் விஹரதி ஸங்கெ²ய்யகே பப்³ப³தே வடஜாலிகாயங் 1. தத்ர கோ² ஆயஸ்மா உத்தரோ பி⁴க்கூ² ஆமந்தேஸி – ‘‘ஸாதா⁴வுஸோ, பி⁴க்கு² காலேன காலங் அத்தவிபத்திங் பச்சவெக்கி²தா ஹோதி. ஸாதா⁴வுஸோ, பி⁴க்கு² காலேன காலங் பரவிபத்திங் பச்சவெக்கி²தா ஹோதி. ஸாதா⁴வுஸோ, பி⁴க்கு² காலேன காலங் அத்தஸம்பத்திங் பச்சவெக்கி²தா ஹோதி. ஸாதா⁴வுஸோ, பி⁴க்கு² காலேன காலங் பரஸம்பத்திங் பச்சவெக்கி²தா ஹோதீ’’தி.
8. Ekaṃ samayaṃ āyasmā uttaro mahisavatthusmiṃ viharati saṅkheyyake pabbate vaṭajālikāyaṃ 2. Tatra kho āyasmā uttaro bhikkhū āmantesi – ‘‘sādhāvuso, bhikkhu kālena kālaṃ attavipattiṃ paccavekkhitā hoti. Sādhāvuso, bhikkhu kālena kālaṃ paravipattiṃ paccavekkhitā hoti. Sādhāvuso, bhikkhu kālena kālaṃ attasampattiṃ paccavekkhitā hoti. Sādhāvuso, bhikkhu kālena kālaṃ parasampattiṃ paccavekkhitā hotī’’ti.
தேன கோ² பன ஸமயேன வெஸ்ஸவணோ மஹாராஜா உத்தராய தி³ஸாய த³க்கி²ணங் தி³ஸங் க³ச்ச²தி கேனசிதே³வ கரணீயேன. அஸ்ஸோஸி கோ² வெஸ்ஸவணோ மஹாராஜா ஆயஸ்மதோ உத்தரஸ்ஸ மஹிஸவத்து²ஸ்மிங் ஸங்கெ²ய்யகே பப்³ப³தே வடஜாலிகாயங் பி⁴க்கூ²னங் ஏவங் த⁴ம்மங் தே³ஸெந்தஸ்ஸ – ‘‘ஸாதா⁴வுஸோ, பி⁴க்கு² காலேன காலங் அத்தவிபத்திங் பச்சவெக்கி²தா ஹோதி. ஸாதா⁴வுஸோ, பி⁴க்கு² காலேன காலங் பரவிபத்திங் பச்சவெக்கி²தா ஹோதி. ஸாதா⁴வுஸோ, பி⁴க்கு² காலேன காலங் அத்தஸம்பத்திங் பச்சவெக்கி²தா ஹோதி. ஸாதா⁴வுஸோ, பி⁴க்கு² காலேன காலங் பரஸம்பத்திங் பச்சவெக்கி²தா ஹோதீ’’தி.
Tena kho pana samayena vessavaṇo mahārājā uttarāya disāya dakkhiṇaṃ disaṃ gacchati kenacideva karaṇīyena. Assosi kho vessavaṇo mahārājā āyasmato uttarassa mahisavatthusmiṃ saṅkheyyake pabbate vaṭajālikāyaṃ bhikkhūnaṃ evaṃ dhammaṃ desentassa – ‘‘sādhāvuso, bhikkhu kālena kālaṃ attavipattiṃ paccavekkhitā hoti. Sādhāvuso, bhikkhu kālena kālaṃ paravipattiṃ paccavekkhitā hoti. Sādhāvuso, bhikkhu kālena kālaṃ attasampattiṃ paccavekkhitā hoti. Sādhāvuso, bhikkhu kālena kālaṃ parasampattiṃ paccavekkhitā hotī’’ti.
அத² கோ² வெஸ்ஸவண்ணோ மஹாராஜா – ஸெய்யதா²பி நாம ப³லவா புரிஸோ ஸமிஞ்ஜிதங் 3 வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய 4, ஏவமேவங் மஹிஸவத்து²ஸ்மிங் ஸங்கெ²ய்யகே பப்³ப³தே வடஜாலிகாயங் அந்தரஹிதோ தே³வேஸு தாவதிங்ஸேஸு பாதுரஹோஸி. அத² கோ² வெஸ்ஸவண்ணோ மஹாராஜா யேன ஸக்கோ தே³வானமிந்தோ³ தேனுபஸங்கமி; உபஸங்கமித்வா ஸக்கங் தே³வானமிந்த³ங் ஏதத³வோச – ‘‘யக்³கே⁴ மாரிஸ, ஜானெய்யாஸி! ஏஸோ ஆயஸ்மா உத்தரோ மஹிஸவத்து²ஸ்மிங் ஸங்கெ²ய்யகே பப்³ப³தே வடஜாலிகாயங் பி⁴க்கூ²னங் ஏவங் த⁴ம்மங் தே³ஸேதி – ‘ஸாதா⁴வுஸோ, பி⁴க்கு² காலேன காலங் அத்தவிபத்திங் பச்சவெக்கி²தா ஹோதி . ஸாதா⁴வுஸோ, பி⁴க்கு² காலேன காலங் பரவிபத்திங்…பே॰… அத்தஸம்பத்திங்… பரஸம்பத்திங் பச்சவெக்கி²தா ஹோதீ’’’தி.
Atha kho vessavaṇṇo mahārājā – seyyathāpi nāma balavā puriso samiñjitaṃ 5 vā bāhaṃ pasāreyya, pasāritaṃ vā bāhaṃ samiñjeyya 6, evamevaṃ mahisavatthusmiṃ saṅkheyyake pabbate vaṭajālikāyaṃ antarahito devesu tāvatiṃsesu pāturahosi. Atha kho vessavaṇṇo mahārājā yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘‘yagghe mārisa, jāneyyāsi! Eso āyasmā uttaro mahisavatthusmiṃ saṅkheyyake pabbate vaṭajālikāyaṃ bhikkhūnaṃ evaṃ dhammaṃ deseti – ‘sādhāvuso, bhikkhu kālena kālaṃ attavipattiṃ paccavekkhitā hoti . Sādhāvuso, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hotī’’’ti.
அத² கோ² ஸக்கோ தே³வானமிந்தோ³ ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவங் தே³வேஸு தாவதிங்ஸேஸு அந்தரஹிதோ மஹிஸவத்து²ஸ்மிங் ஸங்கெ²ய்யகே பப்³ப³தே வடஜாலிகாயங் ஆயஸ்மதோ உத்தரஸ்ஸ ஸம்முகே² பாதுரஹோஸி. அத² கோ² ஸக்கோ தே³வானமிந்தோ³ யேனாயஸ்மா உத்தரோ தேனுபஸங்கமி; உபஸங்கமித்வா ஆயஸ்மந்தங் உத்தரங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² ஸக்கோ தே³வானமிந்தோ³ ஆயஸ்மந்தங் உத்தரங் ஏதத³வோச –
Atha kho sakko devānamindo seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ devesu tāvatiṃsesu antarahito mahisavatthusmiṃ saṅkheyyake pabbate vaṭajālikāyaṃ āyasmato uttarassa sammukhe pāturahosi. Atha kho sakko devānamindo yenāyasmā uttaro tenupasaṅkami; upasaṅkamitvā āyasmantaṃ uttaraṃ abhivādetvā ekamantaṃ aṭṭhāsi. Ekamantaṃ ṭhito kho sakko devānamindo āyasmantaṃ uttaraṃ etadavoca –
‘‘ஸச்சங் கிர, ப⁴ந்தே, ஆயஸ்மா உத்தரோ பி⁴க்கூ²னங் ஏவங் த⁴ம்மங் தே³ஸேஸி – ‘ஸாதா⁴வுஸோ, பி⁴க்கு² காலேன காலங் அத்தவிபத்திங் பச்சவெக்கி²தா ஹோதி, ஸாதா⁴வுஸோ, பி⁴க்கு² காலேன காலங் பரவிபத்திங்…பே॰… அத்தஸம்பத்திங்… பரஸம்பத்திங் பச்சவெக்கி²தா ஹோதீ’’’ தி? ‘‘ஏவங், தே³வானமிந்தா³’’தி. ‘‘கிங் பனித³ங் 7, ப⁴ந்தே, ஆயஸ்மதோ உத்தரஸ்ஸ ஸகங் படிபா⁴னங் 8, உதா³ஹு தஸ்ஸ ப⁴க³வதோ வசனங் அரஹதோ ஸம்மாஸம்பு³த்³த⁴ஸ்ஸா’’தி? ‘‘தேன ஹி, தே³வானமிந்த³, உபமங் தே கரிஸ்ஸாமி. உபமாய மிதே⁴கச்சே விஞ்ஞூ புரிஸா பா⁴ஸிதஸ்ஸ அத்த²ங் ஆஜான’’ந்தி.
‘‘Saccaṃ kira, bhante, āyasmā uttaro bhikkhūnaṃ evaṃ dhammaṃ desesi – ‘sādhāvuso, bhikkhu kālena kālaṃ attavipattiṃ paccavekkhitā hoti, sādhāvuso, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hotī’’’ ti? ‘‘Evaṃ, devānamindā’’ti. ‘‘Kiṃ panidaṃ 9, bhante, āyasmato uttarassa sakaṃ paṭibhānaṃ 10, udāhu tassa bhagavato vacanaṃ arahato sammāsambuddhassā’’ti? ‘‘Tena hi, devānaminda, upamaṃ te karissāmi. Upamāya midhekacce viññū purisā bhāsitassa atthaṃ ājāna’’nti.
‘‘ஸெய்யதா²பி, தே³வானமிந்த³, கா³மஸ்ஸ வா நிக³மஸ்ஸ வா அவிதூ³ரே மஹாத⁴ஞ்ஞராஸி. ததோ மஹாஜனகாயோ த⁴ஞ்ஞங் ஆஹரெய்ய – காஜேஹிபி பிடகேஹிபி உச்ச²ங்கே³ஹிபி அஞ்ஜலீஹிபி . யோ நு கோ², தே³வானமிந்த³, தங் மஹாஜனகாயங் உபஸங்கமித்வா ஏவங் புச்செ²ய்ய – ‘குதோ இமங் த⁴ஞ்ஞங் ஆஹரதா²’தி, கத²ங் ப்³யாகரமானோ நு கோ², தே³வானமிந்த³, ஸோ மஹாஜனகாயோ ஸம்மா ப்³யாகரமானோ ப்³யாகரெய்யா’’தி? ‘‘‘அமும்ஹா மஹாத⁴ஞ்ஞராஸிம்ஹா ஆஹராமா’தி கோ², ப⁴ந்தே, ஸோ மஹாஜனகாயோ ஸம்மா ப்³யாகரமானோ ப்³யாகரெய்யா’’தி. ‘‘ஏவமேவங் கோ², தே³வானமிந்த³, யங் கிஞ்சி ஸுபா⁴ஸிதங் ஸப்³ப³ங் தங் தஸ்ஸ ப⁴க³வதோ வசனங் அரஹதோ ஸம்மாஸம்பு³த்³த⁴ஸ்ஸ. ததோ உபாதா³யுபாதா³ய மயங் சஞ்ஞே ச ப⁴ணாமா’’தி.
‘‘Seyyathāpi, devānaminda, gāmassa vā nigamassa vā avidūre mahādhaññarāsi. Tato mahājanakāyo dhaññaṃ āhareyya – kājehipi piṭakehipi ucchaṅgehipi añjalīhipi . Yo nu kho, devānaminda, taṃ mahājanakāyaṃ upasaṅkamitvā evaṃ puccheyya – ‘kuto imaṃ dhaññaṃ āharathā’ti, kathaṃ byākaramāno nu kho, devānaminda, so mahājanakāyo sammā byākaramāno byākareyyā’’ti? ‘‘‘Amumhā mahādhaññarāsimhā āharāmā’ti kho, bhante, so mahājanakāyo sammā byākaramāno byākareyyā’’ti. ‘‘Evamevaṃ kho, devānaminda, yaṃ kiñci subhāsitaṃ sabbaṃ taṃ tassa bhagavato vacanaṃ arahato sammāsambuddhassa. Tato upādāyupādāya mayaṃ caññe ca bhaṇāmā’’ti.
‘‘அச்ச²ரியங், ப⁴ந்தே, அப்³பு⁴தங் ப⁴ந்தே! யாவ ஸுபா⁴ஸிதங் சித³ங் ஆயஸ்மதா உத்தரேன – ‘யங் கிஞ்சி ஸுபா⁴ஸிதங் ஸப்³ப³ங் தங் தஸ்ஸ ப⁴க³வதோ வசனங் அரஹதோ ஸம்மாஸம்பு³த்³த⁴ஸ்ஸ . ததோ உபாதா³யுபாதா³ய மயங் சஞ்ஞே ச ப⁴ணாமா’தி. ஏகமித³ங், ப⁴ந்தே உத்தர, ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே அசிரபக்கந்தே தே³வத³த்தே. தத்ர கோ² ப⁴க³வா தே³வத³த்தங் ஆரப்³ப⁴ பி⁴க்கூ² ஆமந்தேஸி –
‘‘Acchariyaṃ, bhante, abbhutaṃ bhante! Yāva subhāsitaṃ cidaṃ āyasmatā uttarena – ‘yaṃ kiñci subhāsitaṃ sabbaṃ taṃ tassa bhagavato vacanaṃ arahato sammāsambuddhassa . Tato upādāyupādāya mayaṃ caññe ca bhaṇāmā’ti. Ekamidaṃ, bhante uttara, samayaṃ bhagavā rājagahe viharati gijjhakūṭe pabbate acirapakkante devadatte. Tatra kho bhagavā devadattaṃ ārabbha bhikkhū āmantesi –
‘‘ஸாது⁴, பி⁴க்க²வே, பி⁴க்கு² காலேன காலங் அத்தவிபத்திங் பச்சவெக்கி²தா ஹோதி. ஸாது⁴, பி⁴க்க²வே, பி⁴க்கு² காலேன காலங் பரவிபத்திங்…பே॰… அத்தஸம்பத்திங்… பரஸம்பத்திங் பச்சவெக்கி²தா ஹோதி. அட்ட²ஹி, பி⁴க்க²வே, அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². கதமேஹி அட்ட²ஹி? லாபே⁴ன ஹி, பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ²; அலாபே⁴ன, பி⁴க்க²வே…பே॰… யஸேன, பி⁴க்க²வே … அயஸேன, பி⁴க்க²வே… ஸக்காரேன, பி⁴க்க²வே… அஸக்காரேன, பி⁴க்க²வே… பாபிச்ச²தாய, பி⁴க்க²வே… பாபமித்ததாய , பி⁴க்க²வே, அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ². இமேஹி கோ², பி⁴க்க²வே, அட்ட²ஹி அஸத்³த⁴ம்மேஹி அபி⁴பூ⁴தோ பரியாதி³ன்னசித்தோ தே³வத³த்தோ ஆபாயிகோ நேரயிகோ கப்பட்டோ² அதேகிச்சோ².
‘‘Sādhu, bhikkhave, bhikkhu kālena kālaṃ attavipattiṃ paccavekkhitā hoti. Sādhu, bhikkhave, bhikkhu kālena kālaṃ paravipattiṃ…pe… attasampattiṃ… parasampattiṃ paccavekkhitā hoti. Aṭṭhahi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi aṭṭhahi? Lābhena hi, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho; alābhena, bhikkhave…pe… yasena, bhikkhave … ayasena, bhikkhave… sakkārena, bhikkhave… asakkārena, bhikkhave… pāpicchatāya, bhikkhave… pāpamittatāya , bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Imehi kho, bhikkhave, aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho.
‘‘ஸாது⁴, பி⁴க்க²வே, பி⁴க்கு² உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய விஹரெய்ய; உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்… உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்… உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரெய்ய.
‘‘Sādhu, bhikkhave, bhikkhu uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya.
‘‘கிஞ்ச, பி⁴க்க²வே, பி⁴க்கு² அத்த²வஸங் படிச்ச உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய விஹரெய்ய; உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்… உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்… உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரெய்ய?
‘‘Kiñca, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya vihareyya?
‘‘யங் ஹிஸ்ஸ, பி⁴க்க²வே, உப்பன்னங் லாப⁴ங் அனபி⁴பு⁴ய்ய விஹரதோ உப்பஜ்ஜெய்யுங் ஆஸவா விகா⁴தபரிளாஹா, உப்பன்னங் லாப⁴ங் அபி⁴பு⁴ய்ய விஹரதோ ஏவங்ஸ தே ஆஸவா விகா⁴தபரிளாஹா ந ஹொந்தி. யங் ஹிஸ்ஸ, பி⁴க்க²வே, உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்… உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்… உப்பன்னங் பாபமித்ததங் அனபி⁴பு⁴ய்ய விஹரதோ உப்பஜ்ஜெய்யுங் ஆஸவா விகா⁴தபரிளாஹா, உப்பன்னங் பாபமித்ததங் அபி⁴பு⁴ய்ய விஹரதோ ஏவங்ஸ தே ஆஸவா விகா⁴தபரிளாஹா ந ஹொந்தி. இத³ங் கோ², பி⁴க்க²வே, பி⁴க்கு² அத்த²வஸங் படிச்ச உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய விஹரெய்ய; உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்… உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங் … உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரெய்ய.
‘‘Yaṃ hissa, bhikkhave, uppannaṃ lābhaṃ anabhibhuyya viharato uppajjeyyuṃ āsavā vighātapariḷāhā, uppannaṃ lābhaṃ abhibhuyya viharato evaṃsa te āsavā vighātapariḷāhā na honti. Yaṃ hissa, bhikkhave, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ anabhibhuyya viharato uppajjeyyuṃ āsavā vighātapariḷāhā, uppannaṃ pāpamittataṃ abhibhuyya viharato evaṃsa te āsavā vighātapariḷāhā na honti. Idaṃ kho, bhikkhave, bhikkhu atthavasaṃ paṭicca uppannaṃ lābhaṃ abhibhuyya abhibhuyya vihareyya; uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ … uppannaṃ pāpamittataṃ abhibhuyya abhibhuyya vihareyya.
‘‘தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – உப்பன்னங் லாப⁴ங் அபி⁴பு⁴ய்ய அபி⁴பு⁴ய்ய விஹரிஸ்ஸாம, உப்பன்னங் அலாப⁴ங்…பே॰… உப்பன்னங் யஸங்… உப்பன்னங் அயஸங்… உப்பன்னங் ஸக்காரங்… உப்பன்னங் அஸக்காரங்… உப்பன்னங் பாபிச்ச²தங்… உப்பன்னங் பாபமித்ததங் அபி⁴பு⁴ய்ய அபி⁴பு⁴ய்ய விஹரிஸ்ஸாமாதி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி.
‘‘Tasmātiha, bhikkhave, evaṃ sikkhitabbaṃ – uppannaṃ lābhaṃ abhibhuyya abhibhuyya viharissāma, uppannaṃ alābhaṃ…pe… uppannaṃ yasaṃ… uppannaṃ ayasaṃ… uppannaṃ sakkāraṃ… uppannaṃ asakkāraṃ… uppannaṃ pāpicchataṃ… uppannaṃ pāpamittataṃ abhibhuyya abhibhuyya viharissāmāti. Evañhi vo, bhikkhave, sikkhitabba’’nti.
‘‘எத்தாவதா, ப⁴ந்தே உத்தர, மனுஸ்ஸேஸு சதஸ்ஸோ பரிஸா – பி⁴க்கூ², பி⁴க்கு²னியோ, உபாஸகா, உபாஸிகாயோ. நாயங் த⁴ம்மபரியாயோ கிஸ்மிஞ்சி உபட்டி²தோ 11. உக்³க³ண்ஹது, ப⁴ந்தே, ஆயஸ்மா உத்தரோ இமங் த⁴ம்மபரியாயங். பரியாபுணாது, ப⁴ந்தே, ஆயஸ்மா உத்தரோ இமங் த⁴ம்மபரியாயங். தா⁴ரேது, ப⁴ந்தே, ஆயஸ்மா உத்தரோ இமங் த⁴ம்மபரியாயங். அத்த²ஸங்ஹிதோ அயங், ப⁴ந்தே, த⁴ம்மபரியாயோ ஆதி³ப்³ரஹ்மசரியகோ’’தி 12. அட்ட²மங்.
‘‘Ettāvatā, bhante uttara, manussesu catasso parisā – bhikkhū, bhikkhuniyo, upāsakā, upāsikāyo. Nāyaṃ dhammapariyāyo kismiñci upaṭṭhito 13. Uggaṇhatu, bhante, āyasmā uttaro imaṃ dhammapariyāyaṃ. Pariyāpuṇātu, bhante, āyasmā uttaro imaṃ dhammapariyāyaṃ. Dhāretu, bhante, āyasmā uttaro imaṃ dhammapariyāyaṃ. Atthasaṃhito ayaṃ, bhante, dhammapariyāyo ādibrahmacariyako’’ti 14. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. உத்தரவிபத்திஸுத்தவண்ணனா • 8. Uttaravipattisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6-8. து³தியலோகத⁴ம்மஸுத்தாதி³வண்ணனா • 6-8. Dutiyalokadhammasuttādivaṇṇanā
