| Library / Tipiṭaka / તિપિટક • Tipiṭaka / પઞ્ચપકરણ-અનુટીકા • Pañcapakaraṇa-anuṭīkā |
૫. વચીભેદકથાવણ્ણના
5. Vacībhedakathāvaṇṇanā
૩૨૬. સોતિ પઠમમગ્ગટ્ઠો. તસ્માતિ યસ્મા ‘‘વિરજં વીતમલં ધમ્મચક્ખું ઉદપાદિ ‘યં કિઞ્ચિ સમુદયધમ્મં, સબ્બં તં નિરોધધમ્મ’’’ન્તિ સુત્તસ્સ અત્થં અઞ્ઞથા ગહેત્વા ઉદયબ્બયાનુપસ્સનાનિસ્સન્દેન મગ્ગક્ખણેપિ દુક્ખન્તિ વિપસ્સના ઉપટ્ઠાતિ, તસ્મા ‘‘સો દુક્ખમિચ્ચેવ વાચં ભાસતી’’તિ વદન્તિ.
326. Soti paṭhamamaggaṭṭho. Tasmāti yasmā ‘‘virajaṃ vītamalaṃ dhammacakkhuṃ udapādi ‘yaṃ kiñci samudayadhammaṃ, sabbaṃ taṃ nirodhadhamma’’’nti suttassa atthaṃ aññathā gahetvā udayabbayānupassanānissandena maggakkhaṇepi dukkhanti vipassanā upaṭṭhāti, tasmā ‘‘so dukkhamicceva vācaṃ bhāsatī’’ti vadanti.
૩૨૮. ઇચ્છિતેતિ પરવાદિના સમ્પટિચ્છિતે. આરોપિતેતિ યુત્તિનિદ્ધારણેન તસ્મિં અત્થે પતિટ્ઠાપિતે યુજ્જતિ, વચીસમુટ્ઠાપનક્ખણતો પન પચ્છા તં સદ્દં સુણાતીતિ ઇચ્છિતે ન યુજ્જતિ સોતવિઞ્ઞાણસ્સ પચ્ચુપ્પન્નારમ્મણત્તાતિ અધિપ્પાયો. યસ્મા પન અત્તના નિચ્છારિતં સદ્દં અત્તનાપિ સુણાતિ, તસ્મા સોતવિઞ્ઞાણં ‘‘યેન તં સદ્દં સુણાતી’’તિ અટ્ઠકથાયં વુત્તન્તિ દટ્ઠબ્બં.
328. Icchiteti paravādinā sampaṭicchite. Āropiteti yuttiniddhāraṇena tasmiṃ atthe patiṭṭhāpite yujjati, vacīsamuṭṭhāpanakkhaṇato pana pacchā taṃ saddaṃ suṇātīti icchite na yujjati sotaviññāṇassa paccuppannārammaṇattāti adhippāyo. Yasmā pana attanā nicchāritaṃ saddaṃ attanāpi suṇāti, tasmā sotaviññāṇaṃ ‘‘yena taṃ saddaṃ suṇātī’’ti aṭṭhakathāyaṃ vuttanti daṭṭhabbaṃ.
૩૩૨. લોકુત્તરમગ્ગક્ખણેતિ પઠમજ્ઝાનિકસ્સ પઠમમગ્ગસ્સ ખણે. અભિભૂસુત્તાહરણે અધિપ્પાયો વત્તબ્બોતિ એતેન તદાહરણસ્સ અસમ્બન્ધતં દસ્સેતિ. તેનાહ ‘‘તસ્મા અસાધક’’ન્તિ.
332. Lokuttaramaggakkhaṇeti paṭhamajjhānikassa paṭhamamaggassa khaṇe. Abhibhūsuttāharaṇe adhippāyo vattabboti etena tadāharaṇassa asambandhataṃ dasseti. Tenāha ‘‘tasmā asādhaka’’nti.
વચીભેદકથાવણ્ણના નિટ્ઠિતા.
Vacībhedakathāvaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / કથાવત્થુપાળિ • Kathāvatthupāḷi / (૧૪) ૫. વચીભેદકથા • (14) 5. Vacībhedakathā
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૫. વચીભેદકથાવણ્ણના • 5. Vacībhedakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૫. વચીભેદકથાવણ્ણના • 5. Vacībhedakathāvaṇṇanā
