| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(9) 4. தே²ரவக்³கோ³
(9) 4. Theravaggo
1. வாஹனஸுத்தங்
1. Vāhanasuttaṃ
81. ஏகங் ஸமயங் ப⁴க³வா சம்பாயங் விஹரதி க³க்³க³ராய பொக்க²ரணியா தீரே. அத² கோ² ஆயஸ்மா வாஹனோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா வாஹனோ ப⁴க³வந்தங் ஏதத³வோச – ‘‘கதிஹி நு கோ², ப⁴ந்தே, த⁴ம்மேஹி ததா²க³தோ நிஸ்ஸடோ விஸங்யுத்தோ விப்பமுத்தோ விமரியாதீ³கதேன சேதஸா விஹரதீ’’தி?
81. Ekaṃ samayaṃ bhagavā campāyaṃ viharati gaggarāya pokkharaṇiyā tīre. Atha kho āyasmā vāhano yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā vāhano bhagavantaṃ etadavoca – ‘‘katihi nu kho, bhante, dhammehi tathāgato nissaṭo visaṃyutto vippamutto vimariyādīkatena cetasā viharatī’’ti?
‘‘த³ஸஹி கோ², வாஹன, த⁴ம்மேஹி ததா²க³தோ நிஸ்ஸடோ விஸங்யுத்தோ விப்பமுத்தோ விமரியாதீ³கதேன சேதஸா விஹரதி. கதமேஹி த³ஸஹி? ரூபேன கோ², வாஹன, ததா²க³தோ நிஸ்ஸடோ விஸங்யுத்தோ விப்பமுத்தோ விமரியாதீ³கதேன சேதஸா விஹரதி, வேத³னாய கோ², வாஹன…பே॰… ஸஞ்ஞாய கோ², வாஹன… ஸங்கா²ரேஹி கோ², வாஹன… விஞ்ஞாணேன கோ², வாஹன… ஜாதியா கோ², வாஹன… ஜராய கோ², வாஹன… மரணேன கோ², வாஹன… து³க்கே²ஹி கோ², வாஹன… கிலேஸேஹி கோ², வாஹன, ததா²க³தோ நிஸ்ஸடோ விஸங்யுத்தோ விப்பமுத்தோ விமரியாதீ³கதேன சேதஸா விஹரதி. ஸெய்யதா²பி, வாஹன, உப்பலங் வா பது³மங் வா புண்ட³ரீகங் வா உத³கே ஜாதங் உத³கே ஸங்வட்³ட⁴ங் உத³கா பச்சுக்³க³ம்ம டி²தங் அனுபலித்தங் உத³கேன; ஏவமேவங் கோ², வாஹன, இமேஹி த³ஸஹி த⁴ம்மேஹி ததா²க³தோ நிஸ்ஸடோ விஸங்யுத்தோ விப்பமுத்தோ விமரியாதீ³கதேன சேதஸா விஹரதீ’’தி. பட²மங்.
‘‘Dasahi kho, vāhana, dhammehi tathāgato nissaṭo visaṃyutto vippamutto vimariyādīkatena cetasā viharati. Katamehi dasahi? Rūpena kho, vāhana, tathāgato nissaṭo visaṃyutto vippamutto vimariyādīkatena cetasā viharati, vedanāya kho, vāhana…pe… saññāya kho, vāhana… saṅkhārehi kho, vāhana… viññāṇena kho, vāhana… jātiyā kho, vāhana… jarāya kho, vāhana… maraṇena kho, vāhana… dukkhehi kho, vāhana… kilesehi kho, vāhana, tathāgato nissaṭo visaṃyutto vippamutto vimariyādīkatena cetasā viharati. Seyyathāpi, vāhana, uppalaṃ vā padumaṃ vā puṇḍarīkaṃ vā udake jātaṃ udake saṃvaḍḍhaṃ udakā paccuggamma ṭhitaṃ anupalittaṃ udakena; evamevaṃ kho, vāhana, imehi dasahi dhammehi tathāgato nissaṭo visaṃyutto vippamutto vimariyādīkatena cetasā viharatī’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-3. வாஹனஸுத்தாதி³வண்ணனா • 1-3. Vāhanasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. வாஹனஸுத்தாதி³வண்ணனா • 1-8. Vāhanasuttādivaṇṇanā
