| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. வஜிரூபமஸுத்தங்
5. Vajirūpamasuttaṃ
25. ‘‘தயோமே , பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங் . கதமே தயோ? அருகூபமசித்தோ புக்³க³லோ, விஜ்ஜூபமசித்தோ புக்³க³லோ, வஜிரூபமசித்தோ புக்³க³லோ. கதமோ ச, பி⁴க்க²வே, அருகூபமசித்தோ புக்³க³லோ? இத⁴, பி⁴க்க²வே, ஏகச்சோ புக்³க³லோ கோத⁴னோ ஹோதி உபாயாஸப³ஹுலோ அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. ஸெய்யதா²பி, பி⁴க்க²வே, து³ட்டா²ருகோ 1 கட்டே²ன வா கட²லாய 2 வா க⁴ட்டிதோ 3 பி⁴ய்யோஸோமத்தாய ஆஸவங் தே³தி 4; ஏவமேவங் கோ², பி⁴க்க²வே, இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. அயங் வுச்சதி, பி⁴க்க²வே, அருகூபமசித்தோ புக்³க³லோ.
25. ‘‘Tayome , bhikkhave, puggalā santo saṃvijjamānā lokasmiṃ . Katame tayo? Arukūpamacitto puggalo, vijjūpamacitto puggalo, vajirūpamacitto puggalo. Katamo ca, bhikkhave, arukūpamacitto puggalo? Idha, bhikkhave, ekacco puggalo kodhano hoti upāyāsabahulo appampi vutto samāno abhisajjati kuppati byāpajjati patitthīyati kopañca dosañca appaccayañca pātukaroti. Seyyathāpi, bhikkhave, duṭṭhāruko 5 kaṭṭhena vā kaṭhalāya 6 vā ghaṭṭito 7 bhiyyosomattāya āsavaṃ deti 8; evamevaṃ kho, bhikkhave, idhekacco puggalo kodhano hoti upāyāsabahulo appampi vutto samāno abhisajjati kuppati byāpajjati patitthīyati kopañca dosañca appaccayañca pātukaroti. Ayaṃ vuccati, bhikkhave, arukūpamacitto puggalo.
‘‘கதமோ ச, பி⁴க்க²வே, விஜ்ஜூபமசித்தோ புக்³க³லோ? இத⁴, பி⁴க்க²வே, ஏகச்சோ புக்³க³லோ ‘இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ஸெய்யதா²பி பி⁴க்க²வே, சக்கு²மா புரிஸோ ரத்தந்த⁴காரதிமிஸாயங் விஜ்ஜந்தரிகாய ரூபானி பஸ்ஸெய்ய; ஏவமேவங் கோ², பி⁴க்க²வே, இதே⁴கச்சோ புக்³க³லோ ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. அயங் வுச்சதி, பி⁴க்க²வே, விஜ்ஜூபமசித்தோ புக்³க³லோ.
‘‘Katamo ca, bhikkhave, vijjūpamacitto puggalo? Idha, bhikkhave, ekacco puggalo ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Seyyathāpi bhikkhave, cakkhumā puriso rattandhakāratimisāyaṃ vijjantarikāya rūpāni passeyya; evamevaṃ kho, bhikkhave, idhekacco puggalo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Ayaṃ vuccati, bhikkhave, vijjūpamacitto puggalo.
‘‘கதமோ ச, பி⁴க்க²வே, வஜிரூபமசித்தோ புக்³க³லோ? இத⁴, பி⁴க்க²வே, ஏகச்சோ புக்³க³லோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஸெய்யதா²பி, பி⁴க்க²வே, வஜிரஸ்ஸ நத்தி² கிஞ்சி அபே⁴ஜ்ஜங் மணி வா பாஸாணோ வா; ஏவமேவங் கோ², பி⁴க்க²வே, இதே⁴கச்சோ புக்³க³லோ ஆஸவானங் க²யா…பே॰… உபஸம்பஜ்ஜ விஹரதி. அயங் வுச்சதி, பி⁴க்க²வே, வஜிரூபமசித்தோ புக்³க³லோ. ‘இமே கோ², பி⁴க்க²வே, தயோ புக்³க³லா ஸந்தோ ஸங்விஜ்ஜமானா லோகஸ்மி’’’ந்தி 9. பஞ்சமங்.
‘‘Katamo ca, bhikkhave, vajirūpamacitto puggalo? Idha, bhikkhave, ekacco puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Seyyathāpi, bhikkhave, vajirassa natthi kiñci abhejjaṃ maṇi vā pāsāṇo vā; evamevaṃ kho, bhikkhave, idhekacco puggalo āsavānaṃ khayā…pe… upasampajja viharati. Ayaṃ vuccati, bhikkhave, vajirūpamacitto puggalo. ‘Ime kho, bhikkhave, tayo puggalā santo saṃvijjamānā lokasmi’’’nti 10. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. வஜிரூபமஸுத்தவண்ணனா • 5. Vajirūpamasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. வஜிரூபமஸுத்தவண்ணனா • 5. Vajirūpamasuttavaṇṇanā
