| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
11. வலாஹகஸங்யுத்தவண்ணனா
11. Valāhakasaṃyuttavaṇṇanā
550-606. லோகங் வாலெந்தா ஸங்வரந்தா சா²தெ³ந்தா அஹந்தி பரியேஸந்தீதி வலாஹா, தே³வபுத்தா. தேஸங் ஸமூஹோ வலாஹகதே³வகாயோதி ஆஹ ‘‘வலாஹககாயிகா’’திஆதி³. ஸீதகரணவலாஹகாதி ஸீதஹரணவலாஹகா. ஸேஸபதே³ஸூதி உண்ஹவலாஹகாதி³பதே³ஸு. ஏஸேவ நயோதி ‘‘உண்ஹகரணவலாஹகா’’திஆதி³னா அத்தோ² வேதி³தப்³போ³. சித்தட்ட²பனந்தி ‘‘ஸீதங் ஹோதூ’’தி ஏவங் சித்தஸ்ஸ உப்பாத³னங். வஸ்ஸானேதி வஸ்ஸகாலே. உதுஸமுட்டா²னமேவாதி பாகதிகஸீதமேவாதி அத்தோ². உண்ஹேபீதி உண்ஹகாலே. அப்³ப⁴மண்ட³போதி மண்ட³பஸதி³ஸஅப்³ப⁴படலவிதானமாஹ. அப்³ப⁴ங் உப்பஜ்ஜதீதி தஹங் தஹங் படலங் உட்ட²ஹதி. அப்³பே⁴யேவாதி அப்³ப⁴காலே ஏவ, வஸ்ஸானேதி அத்தோ². அதிஅப்³ப⁴ந்தி ஸதபடலஸஹஸ்ஸபடலங் ஹுத்வா அப்³பு⁴ட்டா²னங். சித்தவேஸாக²மாஸேஸூதி வஸந்தகாலங் ஸந்தா⁴யாஹ. ததா³ ஹி வித்³தோ⁴ விக³தவலாஹகோ தே³வோ ப⁴விதுங் யுத்தோ. உத்தரத³க்கி²ணாதீ³தி ஆதி³-ஸத்³தே³ன பச்சி²மவாதாதி³ங் ஸங்க³ண்ஹாதி. பகதிவாதோதி பகதியா ஸபா⁴வேன வாயனகவாதோ. தங் உதுஸமுட்டா²னமேவாதி ஆஹாரூபஜீவீனங் ஸத்தானங் ஸாதா⁴ரணகம்மூபனிஸ்ஸயஉதுஸமுட்டா²னமேவ. ஏஸ நயோ உதுஸமுட்டா²னஸீதுண்ஹவாதேஸுபி. தம்பி ஹி ஆஹாரூபஜீவீனங் ஸத்தானங் ஸாதா⁴ரணகம்மூபனிஸ்ஸயமேவாதி.
550-606. Lokaṃ vālentā saṃvarantā chādentā ahanti pariyesantīti valāhā, devaputtā. Tesaṃ samūho valāhakadevakāyoti āha ‘‘valāhakakāyikā’’tiādi. Sītakaraṇavalāhakāti sītaharaṇavalāhakā. Sesapadesūti uṇhavalāhakādipadesu. Eseva nayoti ‘‘uṇhakaraṇavalāhakā’’tiādinā attho veditabbo. Cittaṭṭhapananti ‘‘sītaṃ hotū’’ti evaṃ cittassa uppādanaṃ. Vassāneti vassakāle. Utusamuṭṭhānamevāti pākatikasītamevāti attho. Uṇhepīti uṇhakāle. Abbhamaṇḍapoti maṇḍapasadisaabbhapaṭalavitānamāha. Abbhaṃ uppajjatīti tahaṃ tahaṃ paṭalaṃ uṭṭhahati. Abbheyevāti abbhakāle eva, vassāneti attho. Atiabbhanti satapaṭalasahassapaṭalaṃ hutvā abbhuṭṭhānaṃ. Cittavesākhamāsesūti vasantakālaṃ sandhāyāha. Tadā hi viddho vigatavalāhako devo bhavituṃ yutto. Uttaradakkhiṇādīti ādi-saddena pacchimavātādiṃ saṅgaṇhāti. Pakativātoti pakatiyā sabhāvena vāyanakavāto. Taṃ utusamuṭṭhānamevāti āhārūpajīvīnaṃ sattānaṃ sādhāraṇakammūpanissayautusamuṭṭhānameva. Esa nayo utusamuṭṭhānasītuṇhavātesupi. Tampi hi āhārūpajīvīnaṃ sattānaṃ sādhāraṇakammūpanissayamevāti.
கீ³தந்தி மேக⁴கீ³தங். ஸச்சகிரியாயாதி தாதி³ஸானங் புரிஸவிஸேஸானங் ஸச்சாதி⁴ட்டா²னேன. இத்³தி⁴ப³லேனாதி இத்³தி⁴மந்தானங் இத்³தி⁴ஆனுபா⁴வேன. வினாஸமேகே⁴னாதி கப்பவினாஸகமேகே⁴ன. அஞ்ஞேனபி கண்ஹபாபிகஸத்தானங் பாபகம்மபச்சயா உப்பன்னவினாஸமேகே⁴ன வுட்டே²ன ஸோ ஸோ தே³ஸோ வினஸ்ஸதேவ.
Gītanti meghagītaṃ. Saccakiriyāyāti tādisānaṃ purisavisesānaṃ saccādhiṭṭhānena. Iddhibalenāti iddhimantānaṃ iddhiānubhāvena. Vināsameghenāti kappavināsakameghena. Aññenapi kaṇhapāpikasattānaṃ pāpakammapaccayā uppannavināsameghena vuṭṭhena so so deso vinassateva.
வலாஹகஸங்யுத்தவண்ணனா நிட்டி²தா.
Valāhakasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. ஸுத்³தி⁴கஸுத்தங் • 1. Suddhikasuttaṃ
2. ஸுசரிதஸுத்தங் • 2. Sucaritasuttaṃ
3-12. ஸீதவலாஹகதா³னூபகாரஸுத்தத³ஸகங் • 3-12. Sītavalāhakadānūpakārasuttadasakaṃ
13-52. உண்ஹவலாஹகதா³னூபகாரஸுத்தசாலீஸகங் • 13-52. Uṇhavalāhakadānūpakārasuttacālīsakaṃ
53. ஸீதவலாஹகஸுத்தங் • 53. Sītavalāhakasuttaṃ
54. உண்ஹவலாஹகஸுத்தங் • 54. Uṇhavalāhakasuttaṃ
55. அப்³ப⁴வலாஹகஸுத்தங் • 55. Abbhavalāhakasuttaṃ
56. வாதவலாஹகஸுத்தங் • 56. Vātavalāhakasuttaṃ
57. வஸ்ஸவலாஹகஸுத்தங் • 57. Vassavalāhakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 11. வலாஹகஸங்யுத்தவண்ணனா • 11. Valāhakasaṃyuttavaṇṇanā
