| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૫. વાલસુત્તવણ્ણના
5. Vālasuttavaṇṇanā
૧૧૧૫. ઉપાસનન્તિ આચરિયઉપાસનં, આચરિયં અન્તેવાસિના વા દિવસે દિવસે સિક્ખનવસેન ઉપાસિતબ્બતો ઉપાસનન્તિ લદ્ધનામં કણ્ડખિપનસિપ્પં. કણ્ડં અતિક્કમન્તેતિ સરં ખિપન્તે. પોઙ્ખાનુપોઙ્ખન્તિ પોઙ્ખસદ્દત્થં પાકટં કત્વા દસ્સેતું ‘‘એકં કણ્ડં ખિપિત્વા’’તિઆદિ વુત્તં. અપરં અનુપોઙ્ખન્તિ એત્થ અપરન્તિ તતિયકણ્ડં. અનુપોઙ્ખં નામ ઇદન્તિ દસ્સેતું ‘‘અનુપોઙ્ખં નામ દુતિયસ્સ પોઙ્ખ’’ન્તિ વુત્તં. તઞ્હિ તતિયેન સરેન વિજ્ઝીયતિ. પુન અપરં તસ્સ પોઙ્ખન્તિ ઇદં પન અપરાપરં અવિરજ્ઝનં દસ્સેતું વુત્તં. દુરભિસમ્ભવતરન્તિ અભિભવિતું અસક્કુણેય્યતરં. વાલન્તિ કેસં. સત્તધા ભિન્દિત્વાતિ સત્તક્ખત્તું વિફાલેત્વા. તસ્સ એકં ભેદન્તિ તસ્સ કેસસ્સ એકં અંસુસઙ્ખાતં ભેદં ગહેત્વા. વાતિઙ્ગણમજ્ઝે બન્ધિત્વાતિ વાતિઙ્ગણફલસ્સ મજ્ઝટ્ઠાને બન્ધિત્વા. અપરં ભેદન્તિ અપરં કેસસ્સ અંસુસઙ્ખાતં ભેદં. અગ્ગકોટિયં બન્ધિત્વાતિ યથા તસ્સ વાલભેદસ્સ ઊકામત્તં લિખામત્તં વા કણ્ડસ્સ અગ્ગકોટિં અધિકં હુત્વા તિટ્ઠતિ, એવં બન્ધિત્વા. ઉસભમત્તેતિ વીસતિયટ્ઠિમત્તે ઠાને ઠિતો. કણ્ડબદ્ધાય કોટિયાતિ કણ્ડબદ્ધાય વાલસ્સ કોટિયા વાતિઙ્ગણબન્ધનવાલસ્સ કોટિં પટિવિજ્ઝેય્ય.
1115.Upāsananti ācariyaupāsanaṃ, ācariyaṃ antevāsinā vā divase divase sikkhanavasena upāsitabbato upāsananti laddhanāmaṃ kaṇḍakhipanasippaṃ. Kaṇḍaṃ atikkamanteti saraṃ khipante. Poṅkhānupoṅkhanti poṅkhasaddatthaṃ pākaṭaṃ katvā dassetuṃ ‘‘ekaṃ kaṇḍaṃ khipitvā’’tiādi vuttaṃ. Aparaṃ anupoṅkhanti ettha aparanti tatiyakaṇḍaṃ. Anupoṅkhaṃ nāma idanti dassetuṃ ‘‘anupoṅkhaṃ nāma dutiyassa poṅkha’’nti vuttaṃ. Tañhi tatiyena sarena vijjhīyati. Puna aparaṃ tassa poṅkhanti idaṃ pana aparāparaṃ avirajjhanaṃ dassetuṃ vuttaṃ. Durabhisambhavataranti abhibhavituṃ asakkuṇeyyataraṃ. Vālanti kesaṃ. Sattadhā bhinditvāti sattakkhattuṃ viphāletvā. Tassa ekaṃ bhedanti tassa kesassa ekaṃ aṃsusaṅkhātaṃ bhedaṃ gahetvā. Vātiṅgaṇamajjhe bandhitvāti vātiṅgaṇaphalassa majjhaṭṭhāne bandhitvā. Aparaṃ bhedanti aparaṃ kesassa aṃsusaṅkhātaṃ bhedaṃ. Aggakoṭiyaṃ bandhitvāti yathā tassa vālabhedassa ūkāmattaṃ likhāmattaṃ vā kaṇḍassa aggakoṭiṃ adhikaṃ hutvā tiṭṭhati, evaṃ bandhitvā. Usabhamatteti vīsatiyaṭṭhimatte ṭhāne ṭhito. Kaṇḍabaddhāya koṭiyāti kaṇḍabaddhāya vālassa koṭiyā vātiṅgaṇabandhanavālassa koṭiṃ paṭivijjheyya.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૫. વાલસુત્તં • 5. Vālasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૫. વાલસુત્તવણ્ણના • 5. Vālasuttavaṇṇanā
